Mattayo 27 - Bibliyeeda Ghaydit

Yesu geayaat madeeda Bilato

¹ Iimuchu nea ghaghar gayeew gagasa Ashoohoodiga hees ea gweargwa gichea gwanuusta Yesu.

² Geerada aba biingu ak geayaat heeda Bilato nea siida ambal ng'eanyiita gil.

Miyeeda Yuda

³ Iidu nea ghwadaah Yudayda heeta lah bwadaw Yesu gideaba sirgweaksa, ghang'ut giiseaneega ak googuumsa ashoohoodiga hees ea gweargwa shiliingajeegiga atiktam ea damanamughuushiin.

⁴ Gwayeesha, “Neadiinyi aba gideaba ghaadaydi siida manda giidiinyeanda eenuus.” Gwayeesha Saawa, “Neada ghwadaseasaani aseasa? Ng'asheanji gabeacheeweey ang'iing'i.”

⁵ Hean gwahisa niny shiliingajeegiga jeeda gheeda sibata ASEETA, ak ghang'eat gawa ea mwahita ghwarata geaw.

⁶ Gageanda ashoohoodiga hees shiliingajeegiga nea gwayi, “Mamiisiina gideaba gajeayiina jeeda gheaseeda aba gideaba suh lapiyeeda foojeanda gil.”

⁷ Gwaneaji ak ghwashaaha lapiyeedida madamnyeamba siisi sineadayi dahuundiga ak ghoah heeda jea eebunyiisa rabasta.

⁸ Ghoaw gida duu eeguureewa madamnyeandida madamnyeanda foojeanda ea ghoah ghamneawa.

⁹ Ak gwasa ng'asheega ghayi rukuta sibaneeda siguura Yeremiya gideaba, “Gageanda lapiyaji diktam ea damanamughuush mooneeda ghayi bea siida mwas fuga Israeli gideaba gayghoadayda,

¹⁰ ak ghwashaaha madamnyeanda siida sina dahuundiga gawuurji gidaghayi eeshiindanean Ng'utamiida sinda.”

Bilato goonyeari Yesu ng'asheega

¹¹ Geanung' ghamiinaada Yesu aba madeeda siida haw bea ng'eanyiita. Hean ghoanyaash Siidida haw bea ng'eanyiidean nea gwayeesha, “Ang'iing'i guwoosi sugoocheanda fuga Yahudi?” Gwayeesha Yesu, “Girgu ang'iing'i.”

¹² Nea aba damandida argweaksiina ashoohoodiga hees ea gweargweeni ghanyea mwasha eara ng'ashaan.

¹³ Hean gwayeesha Bilato, “Miyiinyi ng'asheesu sean simuuwunaneeyiini?”

¹⁴ Ghanyea mwasha Yesu eara ng'asheanjagi ea ghahamng'eanyi siidida haw bea ng'eanyiita muuchi.

Yesu geergweaksiina miyeeda

¹⁵ Iissa eaweeda ghweelmeeda gageanu siida haw bea ng'eanyiida ak gootin siyagi wassean mida ghealooniga gasa eemeeda.

¹⁶ Aba damandida gwanda siisi nalaat muuchi was siida ghealooniga siguura gheawungaaschi Baraba.

¹⁷ Hean iidu nea ghabwat geat buuneeda ghoanyaash Bilato gideaba, “Googasayi deatin ng'eaha, Barabahi ghana Yesuheeda siguura Gristo?”

¹⁸ Ghoanyaashtaaydunu nea ghwanal gideaba geayaat headaanyi aba lachng'eanyiida.

¹⁹ Damanda mideawa Bilato uhuuda hoorgeeda argweacha goojeakta gatmoadaanyi siida weah gwayeesha, “Adiidu gighasi geaw siisi doabiiwaadiin, aba gideaba geesawanan muuchi aba jeeda giirgweatka aba badaydaanyi.”

²⁰ Gageanu ashoohoodiga hees ea gweargwa ak ghaghoash buuneeda nea gwayeesha, amusa eetineegwa Baraba ak geenuus Yesu.

²¹ Ghoanyaash siida haw bea ng'eanyiita nea gwayeesha, “Googasayi deatin ng'eaha aba jeedeaba fiisu asiyeenyean?” Gwayeesha saawa, “Baraba.”

²² Gabiikta Bilato ghoanyaash nea gwayeesha, “Ghamneawa googasayi dahindaan Yesuheeda siguura Gristo?” Gwayeesha sean, “Angoora.”

²³ Ghoanyaashta Bilato nea gwayeesha, “Aba naaha? Neada ea niidiinya naaha?” Gabiikta saawa ghoaraanya giijuureanda nea gwayeesha, “Angoora.”

²⁴ Daah Bilato gideaba mwanyasa gil ghoahaada nyarasta, gageanu beega ak goohuun geatingaaschi aba madeeda eemeeda ak gwayeesha, “Aniini manda gichea ghwaagan aba foojeandeaba siisi asawsiina agooga nea goobea geat.”

²⁵ Ghwasha buuneesean nea gwayeesha, “Nung'waada foojeandeaba siisi ghapka badahuukaasa ea gea diibigaasa!”

²⁶ Hean gageanu ak gootissa Baraba, hit bayiiga Yesu aba mughoowooda ghoadayda Yesu eengoorsa uhuuda beehiida.

Shirikara gwajuuga Yesu

²⁷ Gageanu shirikarajeanda siida haw bea ng'eanyiita ak ghwaat Yesu jeeda gheeda sugoocheanda, ak gabassa geat shirikareeda sean.

²⁸ Geafwakta hang'weakaaschi ak geekwealsa hang'da oomu.

²⁹ Geanap shiipka halaghweenga, ak geayiin uhuuda Yesu, nea geegeanu muudeanda ak geayiin geatindaanyi bea dugwa. Iissa geetkuy aba madeadaanyi nea geejuuga nea geeyeesha, “Seayu, Sugoocheanda Yahudi!”

³⁰ Geeng'uriisa ng'usheega nea geegeanu muudeanda ak geabwara uhuuda.

³¹ Iing'ata juukooda geegeanda hang'dida ak geeshuup hang'weakaaschi hean geayaat eengoor.

Yesu geengoor

³² Iidu nea gaweay geadaah siyagi siguura Simoneeda ng'eanyiida Girene, ak geediing'sa ghwasar beehiidaanyi.

³³ Sihita hiji siguura Golgota (nea gideaba dea Geapkeeda Uhuuda gil,)

³⁴ geataw difaayeeda siikuuyi sea gidang'weanda, hean samu niny ghaheawa ghwali.

³⁵ Iidu nea ning'ata giingoorda geelaja hang'weakaaschi nea geeng'alealeesa;

³⁶ goobiitpiit nea gafur.

³⁷ Geayiin deascheeda uhuudaanyi ng'asheega siihaaktaawa sing'waardunu, “Nih Yesu gil sugoocheanda Yahudi.”

³⁸ Abeeda gwanda fih iyeenya was mareanghooga siingooruudayi sea niny, dea manda meatkweadaanyi bea geatinda dugwa, niirja gwanda meatkweeda geatinda ghaadaam.

³⁹ Iissa fuga ng'ata aba naweeda goong'eawi nea goodiindiil iheenga nyaawa nea gwayeesha,

⁴⁰ “Ang'iing'eeda jea gwanyarja gheeda sibata ASEETA ak ghwadeas aba eawooji samwagu, asi lealni geaw! Iiwoosi Orjeeda ASEETA, girarang'aanani uhuuda beehiida.”

⁴¹ Gwasunu eara ashoohoodiga hees ea ng'oorshoodiga ea gweargwa, gabara budeay nea gwayeesha,

⁴² “Gwalealu suurja ak ea moamu gwalealu geaw. Niny sugoocheanda Israeli gil; asi dararang'aanana uhuuda beehiida ghamneawa ak abeeda eara aseasa gajeamwasa.

⁴³ Niny ghaghus ASEETA ea dalealna ghamneawa iigasa, aba gideaba gwayi, ‘Aniini Orjeeda ASEETA.’”

⁴⁴ Eara fugiga was mareanghooga siingooruudayi sea ninyiin goong'eawi.

Miyeeda Yesu

⁴⁵ Ghang'eada aseeteaba lah ea ghwahita aseeteaba shageash gwadukuta ng'eanyiisean misaneeda.

⁴⁶ Iidu nea nihita aseeteaba shageash gooyeawuda Yesu nea gooheedu daghata nea gwayi, “Eloi, Eloi lama sabaktaani?” Nea gideaba, “ASEETEANYU, ASEETEANYU, anda ninung'usean heeda?”

⁴⁷ Iing'shi fugiga gwachi miinaada aba hooweani ng'asheesu gwayeena, “Gaguursa Eliya.”

⁴⁸ Ghafwach Siyagi ak gageanu gheabuuscheanda ak ghoanyiit beega ng'weani ak ghwayiin uhuuda muudeanda ak ghoadaw ghwali.

⁴⁹ Gwayeesha buuneeda mwaatkwa, “Oomeasa eadaaha ea jea ghwaan gwalealu.”

⁵⁰ Gabiikta Yesu gooyeawda nea gooheedu daghata amang'ata ghoabita guroorooda.

⁵¹ Ghabwaasha, hang'da sibwaasha gheeda sibata ASEETA nibiyeenya, ghang'eada humng'eeda ea gagul ng'eanyi, gwasim geaw ng'eanyiida ak gabearshachi lagheanga hees;

⁵² ghwajaada ghuusiga bung'eadinga ak ghang'eatng'eat sasanuuka saang'a bea fuga ghayi lil.

⁵³ Rinna jeesinga bung'eadinga nyaawa iing'ata duunoadaanyi, gaweay jeeda mujiineeda ghaydit ak goohiimsa geat fuga saang'a.

⁵⁴ Hean dea shirikarajeanda haw ea fuga gwachi fur Yesu gidasimda geaw ng'eanyiida ea ng'asheegiga ghwanyawa bunuun, ghabeal muuchi nea gwayi, “Aba huumwa siisi Orjeeda ASEETA gil!”

⁵⁵ Abeeda aba hoowa gwanda gadeemga saang'a ng'ula nea sheagi. Suh gadeemga ghayi eadu geeshta Yesu nea gwaleabu Galilaya nea gagadiiyeesa.

⁵⁶ Aba jeenyaawa gwanda Mariyayda siguura Magdalena ea Mariya gheamata Yakobo ea Yosefu, ea gheamata orjooga Sebedayo.

Bunyita Yesu

⁵⁷ Iidu nea ghoah shing'ada ghwahidu siyagi was meanang'oocheanda bea ng'eanyiida Arimataya siguura Yosefu. Nea abeeda eara niny ea giinealaneeda Yesu gil.

⁵⁸ Gawa heeda Bilato ak gamus saseeda Yesu, hean ghwanung' Bilato eatawa.

⁵⁹ Gageanda Yosefu saseeda Yesu ak gookwealsa hang'deesh miy.

⁶⁰ Ak ghwayiin jeeda bung'eadaanyi eesh ghayi gurgursa jeeda harearacheanda amwahit gooreakreaksa lagheaneeda haw ghuuta bung'eeda ak gawa.

⁶¹ Damandida goobiitpiit Mariyayda Magdalena ea Mariya niirja nea goofuursa jeesinga nyaawa bung'eeda.

Furita bung'eeda

⁶² Hita eaweeteaba iyeenya was eaweeda giidiing'diing'deayda, gabassa geat ashoohoodiga hees sea Farisaayajeega heeda Bilato,

⁶³ gwayeesha, “Ea Siida mureeda, siipkaachi gidaghayi rugu siidida milmiliin damanda mii ghameawa gideaba, ‘Iing'ata eawooji samwagu gaydaduudu.’

⁶⁴ Asi nung' eefur bung'eeda muuchi ea ghang'ata eawooji samwagu, aba gideaba gajiidu ghapka giinealangaaschi ak gwajagwat amadu gwayeeniisa buuneeda, ‘Niduuna miyeeda,’ reengaweega huuydean gayghwalaabwa hoowa dea madeeda.”

⁶⁵ Gwayeesha Bilato saawa, “Goondeawi furiischoodiga aweayeena afura muuchi aba gidoamuusti.”

⁶⁶ Hean gaweay ak gafur muuchi heeda sibunyiisa buuneeda nea geeroor lagheaneedida ak geayiin furiischoocheanda.