Mattayo 25 - Bibliyeeda Ghaydit

Gida sigala haweega atamanamughuush

¹ “Abeeda sugoocheanduumeeda humng'eeda gaygawuurji sea haw damanamughuush geanu gheaboonyanga nyaawa ak gaweay ghwadeapta siida geeshi.

² Aba jeenyaawa ea dasheahi haw muut nea suurja gea amuut ea weaghoodi.

³ Haweegiga amuut dasheahiin ghwaat gheaboonyanga nyaawa nea mwayiina jeesinga nagheeda;

⁴ duuku haweegiga mideawa weaghuumeedean gageanu nagheeda ak ghwayiin jeeda haleanjeeda sea gheaboonyanga nyaawa.

⁵ Iidu nea ghwashing'da siida geeshi geeyi bwak ea ghang'uta ghaat ak gwalil.

⁶ Bugusta eaweeda agweena ghwanya sideecheeka nea gwayi, ‘Asaghayneawa, nihidu siida geeshi! Aweayeena deepteayda.’

⁷ Ghang'eat ng'eat haweegiga seaniin aba geeshangiga ak gwasisin gheaboonyanga nyaawa.

⁸ Gwayeesha haweegiga dasheahiin gea weaghoodi; ‘Agoaneasa nagheedeang'wa suung'ay aba gideaba gheaboonyangaasa iissa gamis.’

⁹ Gwayeesha giika mideawa weaghuumeedean, ‘Manda mayghoahiideasa aseasa ea agooga! Ghang'wana ghoang'waanyi naweeda ak gooweesi fuga sheahiida nagheeda ak ghoashaayi.’

¹⁰ Ng'eatng'eat haweegiga dasheahiin gaweay ghwasha nagheeda, goobeeru siida geeshi ak goodeayi jeeda gheeda haweegiga hidaat bay ea niidiing'diing'dean ak gaweay jeeda gheeda nyeangiida amang'ata gearat gidaghuuta.

¹¹ Iidu ghwahidu eara haweega suurja ak gaguuriida aba gidaghuuta nea gwayeeniissa, ‘Ea Ng'utamiida, ea Ng'utamiida, eaniyean jaaseasa.’

¹² Ghwasha nea gwayeesha; ‘Aba huumwa, geayeeshiineegwa, agooga mwanaleagwa.’

¹³ Hean gwayeesha, asi oang'wearni, aba gideaba moanali eaweeda jea gawaseewa ghana damanda.

Gida sigala soomju samwagu

¹⁴ “Damandida gaygawuurji sea siida gasa gawa bareanyeeka, gaguursa soomjoagaaschi ak goodeaga haleanjeadaanyi;

¹⁵ gageanu ak gaba siisi adaw haleanjeeda heeda ammu ghoadaw siyagi lapiyeeda siguura dalaanta muut, ak ghoadaw niirja iyeenya, ak ghoadaw niirja agi, amahit ghang'eat gawa bareanyeeka.

¹⁶ Gageanu siidida heeta siitaw dalaantaji muudiin amang'ata googeakshi ak gabiikta gwayi dalaantaji muut gicha.

¹⁷ Eara siida heeta siitaw dalaantaji iyeenya googeaksheata ak gabiikta ghwanyas dalaantaji iyeenya suuk.

¹⁸ Duuku siidida siitaw agiin gawa amahita ghaghurghur shoomanda ak ghafuy lapiyeeda siida bea gadiyeeda.

¹⁹ Muchu nea nigeawiit ruudeaydaanyi gabiigu siidida haw bea soomjoogigeani amahidu gwayiida haleanjeadaanyi.

²⁰ Ghwaan siidida ghayi siitaw dalaantaji muudiin nea gweadu dalaantaji muut suuk amahidu gwayeesha, ‘Siida haw, ang'wearda ghayi gigoonyean dalaantaji muut ak ghamneawa ea naahaachi suuk dalaantaji muut.’

²¹ Gwayeesha siidida hawiin, ‘Ghwadoabiiw soomjeanda miy doabiiwaat; niwoosi doabiwaat aba haleanjeeda ng'ay, gajambala gea saang'a, beeni apteada nea gihoosani sea siida haw.’

²² Ghwahidu eara siidida ghayi siitaw dalaantaji iyeenyean nea gweadu dalaantaji iyeenya ahaada ak gwayeesha, ‘Siida haw, ghayi gigoonyean dalaantaji iyeenya; sukwa naanyaschi suuk iyeenya gea niihaada.’

²³ Gwayeesha siidaanyi haw; ‘Ghwahit soomjeandeanyu miy doabiwaat; niwoosi doabiwaat aba haleanjeeda ng'ay, gajambala gaasaang'a beeni apteada nea gihoosani sea siidaang'u haw.’

²⁴ Ghwahidu siidida ghayi siitaw dalaanteenagiin ak gwayeesha, ‘Siida haw, aniini ghaanali gideaba guwoosi siida hang'waay, iissa gilaji heeda mihisani, ak giimughuushi aba heeda miileeysiini;

²⁵ ghaabeali ak geawi dafuy dalaanteadaang'u aba jeesigeeda. Asi ang'waanya gea was gaagu.’

²⁶ Ghwasha siidaanyi haw nea gwayeesha, ‘Ang'iing'i guwoosi soomjeanda muy bea ghaleehooda! Ginali gideaba iissa ghaalaji heeda ghayi meahisani ak ghaamughuushchi aba heeda ghayi mealeelsiini?

²⁷ Abeeda mamiiseey eadita lapiyeedeanyu heeda fuga jea goodiing'u nea abeeda ghwanyawa gaydanyas lapiyeedeanyu ea gea jea ghoahaada.

²⁸ Asi oareada siisi dalaanteeni ak ghoatawji siidida mideawa dalaantaji damanamughuushiin.

²⁹ Aba gideaba siida nyooh googar gil gajeeheasa ea ghwanaawda; amaduuku siidida meagara giliin, eara gidida mwanang' mideawean gajeareat.

³⁰ Duuku soomjeanji marachi giliin, ajaksiina jarooda jeeda misaneeda; hoowa gaygwanda shooka ea giiwiirooda geeshatka.’

Girgweageeda huuydean

³¹ “Damanda jea ghwahina Orjeeda Siida aba jeeda giigheambiitaanyi, nea goodeana malaykajeega, hean gaygoopteada aba uhuuda hoorgeeda giigheambiitaanyi.

³² Gaygabassa geat Eemoojiga sean madeadaanyi ak gaygooheeldooscheata gideajusu aheeldooscheata jeagiischoocheanda gisilga ea nooga,

³³ ak gayghwayiin gisilga meatkweadaanyi bea geatinda dugwa ak ghwayiin nooga meatkweadaanyi bea geatinda ghaadaam.

³⁴ Ng'ata gaygwayeesha sugoocheanda fugiga mida meatkweadaanyi bea geatinda dugwean, ‘Abeeni agoogeeda ghayi nigooneegwa Bwaabwa ghawooda ahearana sugoocheanduumeeda ghayi sibay eerarseegwa ghang'eada dea ghayi sibwada ng'eanyiida;

³⁵ aba gideaba geabearjeewi jalooda ak googoonyean gichea daak, geabearjeewi muwooshta ak googoonyean beega jea dali, geabiisi dawoos rabascheanda ak gooluulean,

³⁶ geabiisi dawoos dawiish ak gookwealean, ghaamnyaanyi ak ghoapkaanyi ooloong'sean, geandi ghealooniga ak ghoapkaanyi aloong'sean.’

³⁷ Aba damani gaygwayeesha fugiga doobiiweadiin, ‘Ng'utamiida, nih gajea andamwani sidaayeay nea gibearjeewi jalooda ak geegoonyeey gichea aga, ghana bearjeewana muwooshta ak geegoonyeey beega jea leaha?

³⁸ Ak nih gajea ana eaweecha gil jea ea sidaayeay nea guwoosi rabascheanda ak geadeaptaaneey, ghana woosa dawiish ak geakwealeey?

³⁹ Nih gajea andamwani gil jea ea sidaahaneey nea gimnyaani, ghana midana ghealooniga ak geapkaanyi eeloong'seey?’

⁴⁰ Ghwasha Sugoocheanda nea gwayeesha, ‘Aba huumwa gaydayeeshiineegwa, gili wassean noosisi siyagi aba jeedeaba orjusu bea giyeanya manang'iin goosinnean aniini.’

⁴¹ Iidu gaygwayeesha fugiga mida meatkweadaanyi bea geatinda ghaadaamiin, ‘Oang'amwana madeedeanyu, fuga ghayi simwaashta, aweayeena jeeda beasta manda muudeanooda ghayi sibay eerarsa meang'nyeandeenda ea malaykajeagaaschi;

⁴² aba gideaba geabearjeewi jalooda ak ea moogoonean gichea daak, geabearjeewi muwooshta ak ea moogoonean beega jea dali,

⁴³ geewooschi rabascheanda ak ea mooluulean, geewooschi dawiish ak ea mookwealean, ghaamnyaanyi nea geandi ghealooniga ak ea moapkaani ooloong'sean.’

⁴⁴ Abeeda gayghwasha saawa nea gwayeesha, ‘Ng'utamiida, nih gajea ana eaweecha gil sidaahaneey nea gibearjeewi jalooda, ghana muwooshta ghana woosa rabascheanda ghana woosa dawiish, ghana miyaana ghana midana ghealooniga, ak ea meaweadeay?’

⁴⁵ Ak gaygwayeesha niny, gaydayeeshiineegwa, ‘Aba huumwa, ghayi iissa iyoaheawi asisiina ng'asheesu siyagi aba jeedeaba orjusu manang'iin, abeeda ghoaheawi asinnean aniini.’

⁴⁶ Abeeda fiisu gaygaweay jeeda ghoorjooda manda muudeanooda, nea fugiga doobiiweadiin gaygaweay jeeda eaweega manda muudeanooda.”