Mattayo 24 - Bibliyeeda Ghaydit

Yesu gabaloola nyarjeawda gheeda sibata ASEETA

¹ Gwariteawa Yesu jeeda gheeda sibata ASEETA ak ghang'eat gawa, ak gaweay heeda giinealangaaschi ak geehiimsa gissideasta gheedida sibata ASEETEAN.

² Ghwasha niny ak gwayeesha, “Moong'uli haleanjeeni seaniin? Aba huumwa geayeeshiineegwa, manda eara lagheaneanagi jea ghoabit aba uhuudeaba niirja jea ea majeeng'adeadu.”

Sawanadeeda ea ghabasta

³ Iidu nea goopteada Yesu aba uhuuda Giijeeda Saytuunajeega, gaweesa giinealangaaschi aba heeda funyaat ak geanyasa hichpa geaw ak geanyaash gideaba, “Rukuni ng'asheesu gayghoah eeju? Amadu hinoadaang'u gwanda gwadeagooda jea eadaaha ghana dea muudeanooda damanda?”

⁴ Ghwasha Yesu nea gwayeesha, “Ang'ula adiidu gwareenganeegwa sih.

⁵ Aba gideaba gayghwahidu fuga saang'a nea gaygaba nih ayi, ‘Aniini geewooschi Gristo,’ ak gaygwareengani fuga saang'a.

⁶ Gajayiinya iita ng'ucheeda ea dea ng'ucheadinga, ang'ula adaghoabealeagwa, aba gideaba ng'asheesu mayghwashiy hinnooda, amaduuku muudeanooda ea miighoaw.

⁷ Aba gideaba gaygang'uchi daroar ea daroar nuut, ak gang'uchi sugoocheanduumeeda ea sugoocheanduumeeda nuut, ak gaygwanda geejeeda ea sawooda ng'eanyiida aba hiji ea hiji:

⁸ suh seaniin ghang'eat ghuuta lajooda.

⁹ “Iimuchu gheeda gajealaabeagwa bwadaw eesawaneegwa amadu geenuuseegwa; gayghwasteagwa Eemoojiga sean aba badaydeanyu aba gheawungeasu.

¹⁰ Ak abeeda fuga saang'a gajeeruusa nea gooheakiida geat nea gwasta geat.

¹¹ Amadu gayghwahidu sibanga saang'a bea ng'uyyeega ak gaygwareengani fuga saang'a.

¹² Iidu nea ghoahaada deambiilaneanduumeeda buuneeda, hean gaygabiisa ghamwanang'iidaada bariinyeega aba jeesinga nyaawa.

¹³ Abeeda siida jea ghamilikghta ea gamuudean ada ea siida jea ghwalaalaani.

¹⁴ Gicha gajeerukwiida Giijasta Miy bea sugoocheanduumeeda aba ng'eanyiisean ghoah muuwuunooda aba eemoojiga sean, ama ng'ata abeeda ghwahidu muudeanooda ng'eanyiida.

Sawanadeeda haw

¹⁵ “Asi iyoadaayi gidamuy jea gweadu nyariida, ghayi rugu sibaneeda siguura Danieli nea nimiinaada aba heeda ghaydit (dea asoamwa ea danala),

¹⁶ abeeda fuga mida ng'eanyiida Yudeya dasalsiina giijeega;

¹⁷ nea siida mida badayda bulaliida ea adaghwararang'aan gageanu haleanjeeda mida jeedeaba gheanyi;

¹⁸ nea dea mida madamnyeanda ea adagabiigu bwadaw ghamwagha hang'daanyi.

¹⁹ Eamuy dea gheamadiga mideawa diibiga ea gea areeri diibiga aba damani!

²⁰ Amwaasha ASEETA ea moosaldani eaweeda gooroogeeda ghanea eaweeda Sabaatohi

²¹ Aba gideaba damani gaygwanda sawanadeeda haw manda dea deena aba deaghayi sisna ng'eanyiida ea ghoah ghamneawa, ak ea maygudu abiikta adaaha sawanadeeda uurji nih earahay.

²² Nea ghwanyawa askwearjoojisu dagheeda ea meanuwaasa ghwanyawa ea maygwanda siichea ghwalaalaan; iidu geelagu askwearjoojisu aba badahuuka fuga ghayi sibay ealoat.

²³ Asi eaweecheanji iiyeeshineegwa sih ‘Gristo gwanda hiji!’ ghana ‘Gwanda hoowa!’ Adoamwaschi.

²⁴ Aba gideaba gayghwahidu Gristohajeega ng'uyyeega ea sibanga ng'uyyeega. Ak gayghoahiimu gwadeagwajeega hees deamdeameadi jea ghoamu gahuteawi fuga ghayi bay ealoat.

²⁵ Ang'ula nigeawiit dareekuseegwa aba mwadi.

²⁶ Asi iiyeeshineegwa, ‘Adaaha diida gwanda dareapcheeda,’ ea adiidu gooriti; ghana iisiyi, ‘Gwanda jeeda gheeda,’ ea adoamwaschi.

²⁷ Aba gideaba gawuurji dadamandeedida abwaay heeda ghayeawa ea gagul heeda biyearean nih abeeda gichea gawuurji hinnooda Orjeeda Siida.

²⁸ Heeda wassean mida guumeeda heeda jea gabatiisa geat madoonyaka.

Hinooda Orjeeda Siida

²⁹ “Iimuchu nea ning'ata sawanadeedida bea askwearjoojigigeaniin, gajeenung' gamisaniit gheang'da aseeta, nea sheeda ea maygooboong'u, nea miinga mida humng'eeda gaygoobitu, nea uurda humng'eeda gajeetuumduum;

³⁰ ng'ata gajeadaah gwadeagooda Orjeeda Siida aba humng'eeda, abeeda eemoojiga sean bea muunda ng'eanyiida gaygagutu heareega iidaah Orjeeda Siida nea ghwaan aba badayda shamooghuutka humng'eeda nea gwandeawa uurda ea giigheambiita haw;

³¹ ak gaygoojeakta malaykajeagaaschi ghaghuut muuchi durumbeati ak gaygaweay gooweamu fugaaschi loat aba murdajeega asang'wan bea ng'eanyiida, ghang'eada murdeeda humng'eeda meatkweeni ea gagul meatkweedida.

Gida anaal fih shaboogheecheanda

³² “Ajeeng'ni ng'asheesu eagali shaboogheecheandean: iifiirfiir damealgaaschi ak gwardu seenga, goojeeng'u gideaba damanda doomeelda nineekiit.

³³ Gwasunu eara agooga iyoadaayi ng'asheesu seaniin nea ghwahidu ghoanali gideaba nineekiisa gidaghuuta.

³⁴ Aba huumwa gaydarukuneegwa gideaba mayghwanaawda seaygeani nea miighwahidu suh seaniin.

³⁵ Humng'eeda ea ng'eanyiida gayghang'ata, amaduuku ng'asheegeasu ea mayghang'ata earahay.

Manda siida nal askwearjeanda ghana damanda

³⁶ “Duuku iita askwearjeandida ghana damandida manda siida nal eaweeda jea gawaseewa eara malaykajeega humng'eeda ghana Orjeeda geaghus Bwaabwa nea gaba geaw.

³⁷ Aba gideaba gaygawuurji gidaghayi bea damanda Nuhu, nih gichea gawuurji hinnooda Orjeeda Siida gil.

³⁸ Aba gideaba damandida ghayi miighwahina roopta hawiin abeeda buuneeda iissa gweagiischi nea gwaleeshi, gageeshi nea geaghi, ea eeyi bwak ea gawa Nuhu jeeda maleambooda,

³⁹ nea majeeng'na ea ghwahidu roopta duw ak gwaduulu buuneesean, nih abeeda gichea gawuurji hinnooda Orjeeda Siida gil.

⁴⁰ Damandida gaygwanda fih iyeenya madamnyeanda gajeegeanda agi ak geenung'usa heeda niirja.

⁴¹ Gadeem iyeenya gajeahita nea gang'ealshi, ak gajeegeanda agi ak geenung'usa heeda niirja.

⁴² Asi oang'wearni aba gideaba moanali eaweeda jea ghwahina Ng'utamiideang'wa.

⁴³ Asi anala ng'asheanji gideaba inyeeda ghwanyawa ghwanal siida bea gheeda damanda eaweeda jea ghwahina mareanghweanda, gayghoang'wearu nea ghanyea mayghwanung'waada eenyarja gheanyi.

⁴⁴ Gwasunu eara agooga asisina geat, aba gideaba Orjeeda Siida gayghwahidu damanda moorarsiini.

Soomjeanda doabiiwaat ea dea mii doabiiwaat

⁴⁵ “Nih gajea anasihi was soomjeanda doabiiwaat mideawa weaghuumeeda, iin siidaanyi haw uhuudeaba gheanyi ak ghoadaw buuneeda daghwarda aba damandaanyi?

⁴⁶ Ghang'wana soomjeandida ama hidu Siidaanyi hawiin ghwahita nea gwasinda ng'asheega gidaghayi sirukusiindean.

⁴⁷ Aba huumwa, gaydayeeshiineegwa, gaygageanu ak ghwayiin haghweeda haleanjeadaanyi sean.

⁴⁸ Amaduuku soomjeandida muyiin iiyeesha geaw aba jeadaanyi ‘Nishing'da siideanyu hawiin,’

⁴⁹ amahit gabiissa ghabwar soomjooga ama ng'ata gweagiischi nea gwaleeshi sea leeydean,

⁵⁰ gayghwahidu Siidaanyi haw bea soomjeandideani eaweeda mararsiina ea damanda mwanala.

⁵¹ Ak gayghwaaga ghoorjooda, ak ghwanung' gwandeayi sea fuga amitu geat; abeeda gaygwanda shooka ea giiwiirooda geeshatka.