Mattayo 23 - Bibliyeeda Ghaydit

Yesu gwayeesha buuneeda ashageada ng'oorshoodiga deaweeda ea Farisaayajeega

¹ Ng'ata gwayeesha Yesu eemeetuw ea giinealangaaschi,

² “Ng'oorshoodiga ea Farisaayajeega goobiitpiida hoorgeeda Musa;

³ asi ng'asheega jea gwarukuneegwa sean oang'waanya nea goosinyi ak ea adoogali sinaweega nyaawa ea adoosinyi aba gideaba saawa gwarukwiida nea masina.

⁴ Saawa iissa ghwarat sareenyeeka durumani ak ghoasari buuneeda ghwaada hamarjoojiga, nea magassa eara gideaba gayghwasat eara aba mooneeda.

⁵ Gicha sinaweega nyaawa sean inyeesa gwasin ghwadaah buuneeda aba gideaba iissa gooheetu barawajeegeagwa bea mooshta ghawooda, nea googeawiidi seapseapta nyaawa.

⁶ Fuga bwariiy goobiitpiida hoorgajeegeaba mwadi eaweeda ghweelmeeda, nea ghabwariiy goobiida mwadi aba jeesinga ghoorajeega siinealshacheewa.

⁷ Iissa ghabwariiy gideaba gajeeyeeniisa seayu aba naadajeega nea gaguura buuneeda Rabi.

⁸ Ak agooga ea adagaguureeweegwa sih Rabi, aba gideaba Giinealshoocheandeang'wa ea akaleala amadu agooga goobeayi ghaamwadagi.

⁹ Nea adooguuri siida, Bwaabwa aba ng'eanyiida aba gideaba, Ghweandeang'wa ea akaleala nea gwanda humng'eeda.

¹⁰ Biisa gicha ea adeeguureeweegwa fuga hees, aba gideaba, siida haw akaleala, nea Gristo gil.

¹¹ Siida haw aba jeedeang'wa gayghoah soomjeandeang'wa.

¹² Siida adiing'u geaw gajeahiing'u, nea dea hiing'u geaw gajeetiing'u.

Yesu gwanyareeksa giimiituunoodeaba geat

¹³ “Ashageada geat ng'oorshoodiga ea Farisaayajeega, amiitu geat! Aba gideaba ghoakghuumi buuneeda gidaghuuta sugoocheanduumeeda humng'eeda, nea mooweayeeni jeeda, nea fuga jea gaweay ea moosiksiini gaweay jeeda. [

¹⁴ Ashageada agoogeeda was ng'oorshoodiga ea Farisaayajeega amiitu geat! Aba gideaba gooyeagiisacheewi gealga masinung'weega, amadu aba giimiinoadeaba geat iissa ghoamwaashchi ghawooda nea gookeawiichi; asi gajanyasa ghoorjooda haw muuchi.]

¹⁵ Ashageada geat ng'oorshoodiga ea Farisaayajeega amiitu geat! Aba gideaba gooneayeewi jeesinga baskweega ea ng'eanyiida bwadaw nea googasayi siyagi jea ghwalaalaan, amadu nea niiw, ghoanung' ghoah baleanda maloonghajeega niba iyeenya ea ghwanaawaneegwa agooga.

¹⁶ “Ashageada geat ashoohoodiga ng'oowi! ‘Agooga iissa gooyeenyi siida iiyaksa habeawooda gheeda sibata ASEETA ea miigili; ama aksa habeawooda dahaabu mida jeeda gheeda sibata ASEETA abeeda ea nirat geaw aba habeawooni.’

¹⁷ Ea fuga ng'oowi biissa ea leekghteega! Ea ghaloamwaat aneeda, dahaabu ghana gheedida sibata ASEETEAN nung' ghoah dahaabu haleanjeeda ghaydidiin?

¹⁸ Nea gooyeenyi, ‘Siida jea gweaksa habeawooda heeda wagiida ea miigili; ama aksa habeawooda haleanjeeda sisapa geadi bea ghadooweeda mida badayda heeda wagiida, ea nirat geaw aba habeawooni.’

¹⁹ Ea fuga ng'oowi! Ea ghaloamwaat muuchi aneeda, haleanjeedida sisabwa geadi bea ghadooweedean ghana heeda wagiida, nung' ghoah haleanjeeda sisabwa geadi bea ghadooweeda haleanjeeda ghaydit?

²⁰ Siida aksa habeawooda heeda wagiida, gweaksa habeawooda eara haleanjeedida sean mida uhuudean;

²¹ nea siida aksa habeawooda gheeda sibata ASEETA, gweaksa habeawooda nih ea siida abiita jeeda;

²² nea siida aksa humng'eeda habeawooda, gweaksa hoorgeeda sugoocheanduumeeda ASEETA habeawooda, ak ghabwada eara siida apteadayeewa uhuudaanyi.

²³ “Ashageada geat ng'oorshoodiga ea Farisaayajeega, amiitu geat! Iissa ghoanung' ghoadayda buuneeda gilagi aba jeeda damanamughuush aba mwayoah ea ruuruukta ea hamuumayga ea seenga ng'andit, nea ghoapuuchi ng'asheega durumani bea deaweeda was huumeanda ea inyeanda jeeda ea baydeayda ea masaweega. Suh ng'asheega ghwanyawa haguuw gideaba gajasina gil, nea moanung'waadani ng'asheega suurja.

²⁴ Ea ashoohoodiga ng'oowi, ammu ghamuush doonyooda ak ghwanukghuta ngamiya!

²⁵ “Ashageada geat ng'oorshoodiga, ea Farisaayajeega amiitu geat! Aba gideaba iissa goohuunyi badayda gikoombe ea dea gweeriida, nea jeeda ghwanyiit haleanjeeda ooreedayi buuneeda ea shidoodeaba ghaang'.

²⁶ Ea Farisaayajeanda ng'oaw! Nyooh ghanyi asheeda ahuuna jeeda gikoombe ak abeeda gayghamiidu eara badayda.

²⁷ “Ashageada geat ng'oorshoodiga, ea Farisaayajeega amiitu geat! Goowuurjeewi bung'eadinga siyeasha badahuuka roonghooda, amadu nea geeng'uluuna bwadaw ea miyaas, nea aba jih ghwanyiit geaka fuga nimeewa ea ririnnyeanda sean.

²⁸ Gwasunu eara agooga ing'uluunaneegwa buuneeda bwadaw goowooschi fuga doobiiweadi, nea aba jih ghwanyiit munyinda ea giing'uucheeda.

Yesu gwarugu ghoorjooda jea ghwahidu

²⁹ “Ashageada geat ng'oorshoodiga, ea Farisaayajeega amiitu geat! Aba gideaba iissa ghoadeaschi bung'eadinga sibanga, ak iissa ghoataamdaamnyi bung'eadinga fuga miyaas,

³⁰ nea gooyeenyi, ‘Inyeeda ghwanyawa geendi damandida bea gheamba ghweanigaasa bea garayiin, gwachi ea majeahiida foojeanda sibaneeda.’

³¹ Aba sareani goomuuwu gideaba goowooschi orjooga fuga ghayi nuus sibanga.

³² Asi oanyiida gidida ghayi adeeniida ghweanigeagwean.

³³ Ea ichipkeega ea dayeega udang'usheega, gajoamuustaan amulsiina girgweageeda jea ghwaadeagwa heeda maloonghajeega?

³⁴ Ak gaydeajeagu sibanga ea weaghoodiga ea ng'oorshoodiga, mwaatkwa gajanuuseada nea goongoorsi iheenga beehajeega, nea suurja gajabwara aba jeesinga ghoorajeegeagwa siinealshacheewa nea ghoahoanyi aba gilinyoo ea mujiini,

³⁵ ak abeeda gayghwahidu badahuukeagwa foojeanda sean bea fuga doobiiweadi weayeesa badayda ng'eanyiida, ghang'eada foojeanda ghayi siihiida bea Habeli ghayi doabiiwaat, ea gagul foojeanda Sakariya was orjeeda Barakiya ghayi oonuukusi jeeda gheeda sibatiisa ASEETA dageascheeda heeda Ghaydit ea dea heeda wagiida.

³⁶ Aba huumwa geayeeshiineegwa ng'asheesu seaniin gayghwahidu badaydeaba seaygeani.

Bariinyeega Yesu bea Yerusalemu

³⁷ “Ea Yerusalemu, Yerusalemooda, inuusay sibanga nea gifuti lagheanga fuga siicheakseey! Neagasayi dabwada geat diibigaagu niba hada, gawuurji gidahiniida nghaghooda dayeagaaschi aba jeeda meang'eagaaschi ak ghoaheawi!

³⁸ Asi ang'ula ghaheang'wa sinung'usa heeda ghoah eemeeda.

³⁹ Asi geayeeshiineegwa, majagudoobiikta adaahaan gicha ea eaghus eeyi bwak ea ayeena, ‘Siitaw ghawooda siida wuna gheawunga Ng'utamiida.’”