Mattayo 22 - Bibliyeeda Ghaydit

Gida sigala ghweelmeeda nyeangiida

¹ Gabiikta Yesu gicha goobalool buuneeda aba galeega nea gwayeesha,

² “Sugoocheanduumeeda humng'eeda gawuurji sea sugoocheanda gasa gageesheesa orjeedaanyi,

³ hean goojeakta soomjoagaaschi gaguursa fugiga sirariin ghapka nyeangiida, amadu fugiga sirariin ghaheawa ghapka.

⁴ Gabiikta gicha goojeakta soomjoagaaschi suuk ak gwayeesha, ‘Ayeeshiina fuga heeta sirar apkaani aba gideaba, Ang'ula neanuuschi heewgeasu ea muhooga riisheadi nigeawiit ghwahit sean, apkaani nyeangiida.’

⁵ Ghanyea maduupa, ghang'eatng'eat gaweay, gawa akaleala madamnyeandaanyi niirja gawa giigeakshoadaanyi,

⁶ nea gea abit ghoang'waay soomjoogiga ak geesissa ghwarjeeda, ama ng'ata geabwar gameewa.

⁷ Hean ghwanyareas sugoocheanda ak goojeakta shirikareadaanyi ghwalas uhuudeaba fugiga bara buuneedean nea geang'uda mujiineeda nyaawa beasta.

⁸ Ng'ata gwayeesha soomjoagaaschi, ‘Nyeangiida nigeawiit ghwahit ama duw fuga heeta sirar ea mudu gwadeaschi.’

⁹ Asi ang'eatng'eada aweayeena guuyeeda naweadinga ak googuursi fuga oadaayi sean aguursiina ghapka nyeangiida.

¹⁰ Gwarita soomjoogiga ak gaweay bearsheeda naweadinga ak gooweamu gilinyoo ghwadaah gea, munyas ea gea miyaas, ea ghwanyiit gheeda rabasta.

¹¹ “Iidu gawa sugoocheanda gah ghwadaah rabastaanyi, ghwadaah siyagi miigookwa hang'weaka nyeangiida;

¹² ghoanyaash sugoocheanda nea gwayeesha, ‘Siida eaduupcheewi, giwundiin jeedeaba gheawi nea mindeawani hang'weaka nyeangiida?’ Geerukusa ak ghwaroat ghuuta.

¹³ Gwayeesha Sugoocheanda fuga gadiyeeda, ‘Arada geatinga ea geeshanga, ak ghoayaachi ak goojaksi jeeda misaneeda jarooda, aba hoowa gaygooyeawda nea goowiiri geeshatka aba sawanadeeda.’

¹⁴ Aba gideaba gea siguursa aasaang'a, nea gea siloat ea ng'ay.”

Giinyeashteayda giruteayda gwaadi

¹⁵ Ng'ata gaweay Farisaayajeega ak gabaloola gichea ghaghasta Yesu aba ng'asheagaaschi.

¹⁶ Iidu goojeakta giinealanga nyaawa headaanyi ea gea Herode geanyaash nea geeyeesha, “Giinealshoocheanda, Aseasa geanali gideaba ang'iing'i guwoosi siida huumwa, ak gibwadi nih giinaali buuneeda naweeda ASEETA aba huumeanda, nea ghanyea miduupi hawunda siida aba gideaba ming'uli ratooda buuneeda.

¹⁷ Heapi, rukuneasa aba ang'iing'i gidaaktiini. Ghwadoabiiwi gideaba geatawji Gaysari gwaadi ghana mwadoabiiwa?”

¹⁸ Gwajeeng'u Yesu munyasnacheeka nyaawa ak gwayeesha, “Anda googasayi asimsimean ea fuga amitu geat?

¹⁹ Oahiimni heapi lapiyeeda ootayiideawi gwaadi.” Gageanu buuneeda ak geataw shiliingajeanda.

²⁰ Ng'ata ghoanyaash Yesu nea gwayeesha, “Gili gawuurji ng'eaha, ak gheawung'su gabeang'a?”

²¹ Geeyeesha, “Gaba Gaysari.” Gwayeesha saawa, “Haleanjeeda Gaysari oatawa Gaysari, ak gea ASEETA ghoatawji ASEETA.”

²² Geeyi bwak ama iiy ng'asheesu ghahamng'eanyi ak gaweay.

Giinyeashteayda duunooda miyeeda

²³ Eaweedida gaweay heeda Yesu Fiisu siguura Sadukayajeega eena manda duunooda ak ghoanyaash,

²⁴ nea gwayeesha, “Giinealshoocheanda, ghayi gwayi Musa, ‘Siida iimea, nea moabuuda diibiga, gayghaghi masinung'weandida itaanyiin orjeeda ghaamwat, ak gwanyaksa orjeeda ghaamwat diibiga.’

²⁵ Asi aba hiji bea ghaheanyean gwanda orju ispwa bea ghaamwadagi; gageeshi dea madeeda ak ghami nea miighwanyas diibiga ak gwanung'usa gatmoadaanyi orjeeda ghaamwat.

²⁶ Gwasunu eara aba baleandeaba iyeenya, ea baleandeaba samwagu, ea ghwahita ispeeda nyaawa.

²⁷ Aba huuydeandeaba sea eara gatmoodida ghami.

²⁸ Aba jeeda duunooda gay ghoah gatmoodeabeang'a aba fiisu as ispwaan? Aba gideaba nindeayi sean.”

²⁹ Ghwasha Yesu nea gwayeesha saawa, “Agooga ghoaramwaschi aba gideaba moanali Ng'ooruutka ghana uurda ASEETA.

³⁰ Aba gideaba eaweeda sidutuuna majeegeeshi nea mwajeaghi aba gideaba gaygawuurji malaykajeega humng'eeda.

³¹ Ama duuku iita duunooda miyeeda, ea miyoasoamwana gidaghayi rukuneegwa ASEETA, ghayi gwayeeshiineegwa,

³² ‘Aniini geewooschi ASEETA Abrahamu, ea ASEETA Isaka, ea ASEETA Yakobo’? Asi niny mii ASEETA fuga nimeewa gil, niny ASEETA fuga majeekcheewi.”

³³ Iidu nea gwayiing'shi eemeeda ghahamng'eanyi aba giinealshoadaanyi.

Diigheanda haw

³⁴ Iimuchu gheeda nea ghwayiiy Farisaayajeega gideaba nirat ghuusiga Sadukayajeega, ghabwat geat ak gabalool.

³⁵ Ghoanyaash diinagiida nea gwasim.

³⁶ “Giinealshoocheanda, diigheanda haw aba jeeda deaweeda aneeda?”

³⁷ Gwayeesha niny, “Bwariinya Ng'utamiida was ASEATAANG'U aba gurooroadaang'u sean, ea aba jeadaang'u sean, ea aba fughareadaang'u sean.

³⁸ Nih diigheanda hawi ak gabiissa ea dea madeeda gil.

³⁹ Deaba iyeenya gawuurji sea nih, bwariiyda siida iischeayeewi gidubwariiydi geaw.

⁴⁰ Aba diigheanyeeksu asiyeenyean gwadiyeewa deaweedajeega sean ea sibanga.”

Giinyeashteayda iita Gristo

⁴¹ Iidu nea ghabwatgeat Farisaayajeega ghoanyaash Yesu nea gwayeesha,

⁴² “Iing'ulayi Gristo ea ng'eaha? Heapi ghoanung' ghoah baleandeabeang'a?” Ak gwayeesha saawa, “Orjeeda Dawdihi.”

⁴³ Ak gwayeesha saawa, “Abeeda ghwasaan iidu inyas gwayeesha Dawdi aba Guroorooda, Ng'utamiida, nea gwayi,

⁴⁴ ‘Ng'utamiida gwayeesha Ng'utamiideanyu, apteada aba meatkweedeanyu bea geatinda dugwa, bwak ea dayiin weajoodigaagu jeeda baneaguuka geeshangaagu’?

⁴⁵ Abeeda Dawdi iiguura Ng'utamiida, abeeda ghoamu ghoawdaan orjeedaanyi?”

⁴⁶ Aba hiji ghwaroat siida jea gwarukusa ng'asheanda. Ghang'eada eaweedida ghwaroat siichea ghoanyaash gicha ng'asheanda.