Mattayo 21 - Bibliyeeda Ghaydit

Hooseaneega aba hiteayda Yerusalemu

¹ Iidu nea gwaneekiisa Yerusalemu ghwahita Betfage, mida giijeeda saytuunajeega, hean goojeakta Yesu giinealan iyeenya,

² nea gwayeesha, “Aweayeena ea ahita gharang'da mida madeadeang'wa, deagheata gajadaaha digeeda sirat ea gureandaanyi; gootinyi ak gooyeanean.

³ Ama rukuneegwa siida ng'asheanda, gooyeeshi, ‘Gagasa Ng'utamiida,’ ak gaygwasikseegwa.”

⁴ Suh seaniin geesindunu gwadeaschi sea ng'asheanda ghayi rugu sibaneeda nea gwayi,

⁵ “Ayeeshiina hudeaba Sayuni, Ang'wearda, sugoocheandaang'u ghwaan headaang'u, ea ng'eeni nea gwading'da digeeda, gureenda digeeda, dayeenda digeeda.”

⁶ Gaweay giinealanga ak gwasinda ng'asheega gida rukusiinda Yesu;

⁷ goorjeanu digeeda ea gureandaanyi ak gookwealsa hang'weaka nyaawa badahuuka ak goopteada aba badayda.

⁸ Ghoabwarghaan eemeeda hang'weaka nyaawa aba jeeda naweeda, nea buuneeda suurja gaptu seenga geediga ak ghoabwarghaan aba jeeda naweeda.

⁹ Goojuur eemeetuw asheeda ea gea huuydean nea gwayi, “Hosana Orjeeda Dawdi! Sing'usha dea jea ghoana gheawunga Ng'utamiida! Hosana aba humng'eeda.”

¹⁰ Damanda hitaawa Yerusalemu, ghwadakghuyan mujiineesean. Hean gwayi buuneeda, “Siisi ng'eaha?”

¹¹ Gwayi eemeetuw, “Nih sibaneeda was Yesuheeda leabu Nasareteeda Galilaya gil.”

Yesu gawa jeeda gheeda sibata ASEETA

¹² Gawa Yesu jeeda gheeda sibata ASEETA, hita ghahoan fuga shaayda haleanjeeda ea gea shaah aba jeeda gheeda sibata ASEETA, ak goobimbiineada measajeega fuga nyarja lapiya, ea hoorgajeega fuga shaayda ghariibajeega.

¹³ Gwayeesha saawa, “Geang'waar gideaba, ‘Gheenyu gajeeguura gheeda simoora ghawooda’; amadu ghoanung' agooga ghoah gwaleeda funya geat mareanghooga.”

¹⁴ Gaweay headaanyi fuga badoojiga ea gea ng'oowi ak ghwanyasa jeeda gheeda sibata ASEETA, ak ghoahaap.

¹⁵ Iidu nea ghwadaah ashoohoodiga hees ea ng'oorshoodiga ng'asheega deamdeameadi sin, ea ghuusiga diibiga ajuur aba jeeda gheeda sibata ASEETA nea gwayi, “Hoosaana Orjeeda Dawdi!” Gwanyareesi;

¹⁶ geeyeesha niny, “Heapi niyiinyi gida nyaah fiisu?” Gwayeesha Yesu saawa, “Ea huumwa ghayi, miyoasoamwana gideaba, ‘Aba ghuusiga diibiga ea gea ghameeka manang'i gaygwaduumshooweey muuchi’?”

¹⁷ Hit ghang'eat ghwanung'wa heeda, ak gwariteawa mujiini ak gawa Betaniya ak gwalla hoowa.

Yesu ghamwaashta shaboogheecheanda

¹⁸ Sakteayda nea gagal mujiini, ghwayeat jih.

¹⁹ Ghwadaa shaboogheecheanda mida ghuuta naweeda, ak gaweesa, ama hita heeda ghwadaah mandeawana haghweega geaghus seenga ak ghwahit. Ng'ata gwayeesha geeta, “Adagudijiili haghweega ea ghoah gweanyeeka manda muudeanooda!” Ghaghajaamiit geetida aba geeshangiga.

²⁰ Daah giinealanga, ghahamng'eanyi nea gwayi, “Ghwasaan anda geedi gabay ghaghajaamiit?”

²¹ Ghwasha Yesu nea gwayeesha saawa, “Aba huumwa geayeeshiineegwa, iyoondeawi masaweega nea manda jeesingeagwa machmajeega, ghoamuuschi nea majeaghus nih bea shaboogheecheandean ak ghwahit, gajoamuusa eara gideaba gajayeeshiina giijeeni, ‘Loadaada ak geejakseey jeeda basooda,’ ak gaygwasa.

²² Amadu iyoondeawi masaweega, ak goomuschi nea ghoamwaashchi ghawooda gajanyasa haleanjeeda sean oogasayi.”

Geannyaash Yesu heeda nyasa gheambalmeadaanyi

²³ Iidu nea gawa Yesu jeeda gheeda sibata ASEETA goonealshi, damani anealsheewean gaweay heeda ashoohoodiga hees ea gweargwa ak geannyaash, “Ng'asheesu deenuun gisini aba gheambalmeedeabeang'a, gagoonyi ng'eaha gheambalmeani?”

²⁴ Ghwasha Yesu nea gwayeesha, “Eara aniini gaydaanyaasheagwa ng'asheanjagi; ama oashaayi abeeda eara aniini gaydarukuneegwa gheambalmeani easini ng'asheesuun headaanyasi.

²⁵ Giibaatiisanda Yohana gwaleabu yeenu? Gwaleabu humng'eeda ghana leabu heeda buuneeda?” Hean goonyeari geat saawa gideaba, “Iisiyeeshi, ‘Gwaleabu humng'eeda,’ abeeda gaygwayeeshiineasa, ‘Abeeda ghwasaan anda moamwasi?’

²⁶ Ama siyeeshi, ‘Gwaleabu heeda buuneeda,’ earada geawali eemeeda; aba gideaba ghwanal buuneassean gideaba Yohana sibaneeda.”

²⁷ Hean ghwasha ghuuta Yesu nea gwayeesha, “Meanali.” Gwayeesha niny saawa, “Eara aniini abeeda ea maydarukuneegwa heeda aanyasi gheambalmeani easini ng'asheesu seaniin.

Gida sigala orju iyeenya

²⁸ “Heapi ghoadaaktiin? Gwandeawa siyagi orju iyeenya; gaweesa dea madeeda ak gwayeesha, ‘Orjeeda, askweareani una ak gisini gadiyeeda aba jeeda madamnyeanda sabiibu.’

²⁹ Ghwasha nea gwayeesha, ‘Maydawa.’ Iidu gwaduukuuna ak gawa.

³⁰ Gaweesa siidida bea iyeenyean ak gwarukuteayda gidagwachi; ghwasha nea gwayeesha, ‘Gaydawa, Siida mureeda,’ ak ea mawa.

³¹ Heapi! Aba jeedeaba fiisu asiyeenyean gwasin aneeda gidagasa ghwaan?” Gwayeesha saawa, “Diita bea madeedean.” Ng'ata gwayeesha Yesu saawa, “Aba huumwa, geayeeshiineegwa, fuga ang'oonyi gwaadi ea fuga hiseada gaygoosheedeaweegwa beata jeeda sugoocheanduumeeda ASEETA.

³² Aba gideaba Yohana ghayi ghwaan heedeang'wa aba naweeda doabiiwaat ak ea moamwasi agooga, amadu ghamwas fuga ang'oonyi gwaadi ea fuga hiseada. Earapeadi noadaayi haleanjeeni seaniin ghanyea mii aduukuunana ghana amwasa niny.

Gida sigala fuga aragaan madamnyeanda sabiibu

³³ “Ooleeysiiniit gideagali nuut. Ghayi gwanda siisi bea gheeda ak gwandeawa madamnyeanda sabiibu ak gooneaweesa hilgweanda ak gwasin heeda jea eesisa difaayi aba jeeda ak ghwadeas eara madalooda, ak ghoadaw fuga jea gooragan, ak ghang'eat gawa bareanyeeka aba ng'eanyi nuut.

³⁴ Neekiit damanda haghweega goojeakta soomjoagaaschi heedeaba fugiga aragan madamnyeandean gaweay gweadu haghweagaaschi.

³⁵ Gageanu fuga ghayi ragan madamnyeandean ak ghoang'waay soomjoogiga siicheaktean ak geabwar akaleala, nea niirja geenuus, nea niirja geefuta lagheanga.

³⁶ Gabiikta goojeakta soomjooga suuk saang'a naawa gea madeeda; gabiikta gicha gwasima fiisu gidida.

³⁷ Aba huuydeanda goojeakta orjeedaanyi nea gwayi, ‘Gayghoawal gheang'da orjeedeanyu.’

³⁸ Iidu nea ghwadaah fugiga ghayi aragan madamnyeandean orjeedida gabaloola saawa nea gaba geat gideaba, ‘Nih siichea gwahearaniischi gil, eabwara ghami ak geegeandi hearaniischoadaanyi.’

³⁹ Hean geang'waay ak geeruuteawa madamnyeandida bea misabiibuun ak geenuus.

⁴⁰ Abeeda iihidu siidida bea madamnyeanda misabiibuun gaygwahindaan fugiga ghayi aragan madamnyeandean?”

⁴¹ Geeyeesha niny, “Gayghwalas uhuudeaba fugiga munyasiin, ak ghoadaw madamnyeandida fih suuk jea gooragan ak geataw haghweega aba damandaanyi.”

⁴² Gwayeesha Yesu, “Heapi miyoasoamwana iiteaba ng'asheanji aba jeeda Ng'ooruutka? ‘Lagheaneeda ghayi anaawa ghaang' deekshoodiga niiw lagheaneeda haw bea sindeeta; ng'asheanji gwaleabu heeda Ng'utamiida, ak ea daamdaamwaat aba gheanyangaasa’?

⁴³ Aba nih geayeeshiineegwa, sugoocheanduumeeda ASEETA gajeareadeagwa ak geataw eamwa nuut ammu gagu haghweagaaschi.”

⁴⁴ “Nea siida jea ghoabeada aba uhuudeaba lagheaneeni gaygagiishachi; nea siida wassean jea goobeedeaysa, gayghang'aal ea goosha.

⁴⁵ Hean iiy Ashoohoodiga hees ea Farisaayajeega ng'asheagaaschi galageadiini, gwajeeng'u gideaba gabaloola saawa.

⁴⁶ Hean geebiisa eegasa gichea eang'waayda, amadu geawal buuneeda aba gideaba ghwadaah gideaba sibaneeda gil.