Mattayo 20 - Bibliyeeda Ghaydit

Fuga bwarng'eanyi aba jeeda madamnyeanda sabiibu

¹ “Aba gideaba sugoocheanduumeeda humng'eeda gawuurji siida bea gheeda riteawa sakteayda duw ak gagasa fuga jea ghabwar ng'eanyi aba jeeda madamnyeandaanyi bea sabiibu.

² Iing'ata nea nineajeesa buuneeda gideaba gayghoadaw lapiyeeda siguura dinaari aba gadiyeeda jeeda askwearda, ghwaat jeeda madamnyeandaanyi bea sabiibu.

³ Gwarita sakteayda nea gaba aseeta samwagu ak ghwadaah buuneeda suuk nea ghamiinaada aba jeeda naada nea mandeawana gadiyeeda;

⁴ gwayeesha fugiga, ‘Aweayeena eara agooga ak goosinyi gadiyeeda aba jeeda madamnyeanda sabiibu, ak abeeda gaydagooneegwa gitoobiiwseegwa.’ Ak gaweay.

⁵ Gabiikta gwarita gicha siidida bea madamnyeandean nea gaba aseeta lah ea aseeteaba shageash, ak gwasinda gidida.

⁶ Hita aseeteaba damwanagi gabiikta gwarita gicha ak gabiikta ghwanyas fih suuk nea ghamiinaada; hean ghoanyaash nea gwayeesha, ‘Ghwasaan anda agooga goomiineadaysi aba hiji askwearda sean nea moosini gil?’

⁷ Geeyeesha saawa, ‘Gweagu gideaba manda siida gooneasa gadiyeeda.’ Gwayeesha Siidida saawa, ‘Aweayeena eara agooga ak goosinyi gadiyeeda aba jeeda madamnyeanda sabiibu.’

⁸ Iidu nea gamikta aseeta, gaguursa siida bea madamnyeanda siidaanyi ahaaghwa fuga gadiyeeda ak gwayeesha, ‘Guursiina fuga gadiyeeda ak giidawi gidageatinda nyaawa, nea ging'eadi siida huuydean, ea gagul siida madeeda.’

⁹ Ghwahidu fuga gwachi siitaw gadiyeeda nea gaba aseeta damwanagi, ak gaba siisi siitaw dinaarajeanjagi.

¹⁰ Hidu fuga gwachi bea madeeda ghaghay gili jea eataw lapiyeeda meaji ghwanaawda, amadu eara saawa gaba siisi siitaw dinaarajeanjagi.

¹¹ Ng'ata ging'ooyda, gooniiksa siidida bea gheedean,

¹² nea gwayi, ‘Fiisu huuydeaniin gagadiiy aba jeemba aseadeanagi ak ghwahit, ak ginung' gwadeenyi lapiyeedeanya sea gea nyaawa nea gwachi aseasa geamilikghti gadiyeeda hang'waay sibwadi beasta askwearda sean.’

¹³ Ng'ata gwayeesha siyagi aba jeenyaawa, ‘Siida eaduupcheewi, aniini mwaayaagi gheanyangaagu; gwachi meeheeleesiini gideaba gaydagoonyi dinaari?

¹⁴ Geanda gea was gaagu ak guwi; ghaabwariinyi gideaba gaydaadaw siisi huuydeaniin ooyang'deayeena.

¹⁵ Neada ea mwadoabiiwa haleanjeedeanyu iyeagasayi dahinda gidaabwariiydi? Ghana gishti ghaang' aba gideaba geewooschi inya jihi?’

¹⁶ Asi, gwasunu eara fuga huuydean gayghoah fugeaba mwadi, nea fugeaba mwadi gayghoah fuga huuydean.”

Yesu gabaloola deaba samwagu iita miyeadaanyi

¹⁷ Muchu gheeda nea ghwascheang'da Yesu gawa Yerusalemu, ghwaat giinealangiga atamaniyeenyean heeda funyaat ak gwayeesha aba naweeda,

¹⁸ “Ang'ula, ghamneawa geescheang'di geeweayi Yerusalemu; ak Orjeeda Siida gajeang'waay ak geayiin geatinga ashoohoodiga hees ea gea ng'oorshoodiga ak gajeergweaksiina miyeeda,

¹⁹ ng'ata gajeayaat ak geayiin geatinga Eemoojiga eeshka, nea geabwar aba mughoowooda, ak geengoor, ama eaweeteaba samwagu gaygwaduudu.”

Gidaghayi mus gheamata

²⁰ Ng'ata gawa Gheamata jiilu orjooga Sebedayo ak gawa heeda nea goodeayi orjoagaaschi ama hita gwatkuy ak gamus ng'ashaan.

²¹ Gwayeesha niny, “Gigasayi naaha?” Ak gwayeesha, “Rukuta gideaba orjusu ikeasu asiyeenyean nung' goopteada akaleala aba geatindaang'u bea dugwa ak ginung' goopteada niirja aba geatindaang'u ghaadaam aba jeeda sugoocheanduumeadaang'u.”

²² Ghwasha Yesu nea gwayeesha, “Moanali eara gidoomuschi. Heapi! Ghoamuuschi aleayda gikoombeeyda jea daleayda aniini?” Gwayeesha, “Geamuuschi.”

²³ Gwayeesha Yesu, “Sawanadeedeanyu gajoomilikghteaysiina, ama duuku giipteadayda geatindeanyu bea dugwa ea geatindeanyu ghaadaam, meandeawani uurda jea dagoona, geaghus eataw fuga ghayi nibay gwararsa Bwaabwa.”

²⁴ Iiy Giinealangiga atamanamughuushiin ng'asheesu, gwanyareeksa orjoogiga asiyeenyean.

²⁵ Ng'ata gaguursa Yesu saawa ak gwayeesha, “Moanali gideaba fuga hees bea Eemoojiga goombaleegwa aba uurda nea fuga hees ikaanyaawa iissa ghaminighiseegwa.

²⁶ Ea maygwasunu aba heedeang'wa nea siida gasa gwaheedu aba jeedeang'wa, ea doawa soomjeandeang'wa,

²⁷ nea siida wassean aba jeedeang'wa iigasa ghoah siida madeeda ea doawa giing'oonyaneedeang'wa;

²⁸ aba sareani eara Orjeeda Siida moani eegadiyeesa niny ghoan gagadiiy, ak ghoadayda eaweagaaschi ghoah leadeeda fuga saang'a.”

Yesu ghoahaap fih iyeenya ng'oowi

²⁹ Muchu nea ghabeawa mujiineeda Yeriko ghwaat geeshta eemeetuw.

³⁰ Hean, gwanda ghuuta naweeda fih iyeenya ng'oowi nea goobiitpiit, hean iidu nea ghwayiiy gideaba ghang'ata Yesu ghwaat naweedida, goojuur nea gwayi, “Bwaydaneasa, Orjeeda Dawdi!”

³¹ Goowoowsa eemeeda nea geeyeesha asiinda; saawa gabiikta goojuur muuchi nea gwayi, “Bwaydaneasa, Ng'utamiida Orjeeda Dawdi!”

³² Ghamiinaada Yesu ak gaguursa ak gwayeesha, “Googasayi dasinneegwa naaha?”

³³ Geeyeesha niny, “Ng'utamiida, geegasayi ghwajaada gheanyangaasa.”

³⁴ Ghabwayda Yesu ak ghoang'waay gheanyanga nyaawa ama deagheata ghwajaada, ak ghwaat geeshta.