Mattayo 2 - Bibliyeeda Ghaydit

Bareanoodiga leabu heeda ghayeawa

¹ Damanda sijiila Yesu aba Betlehemeeda Yudeya, damanda waseewa Herode sugoocheanda. Ng'ula, ghwahidu Yerusalemu weaghoodiga leabu heeda ghayeawa nea gwayi,

² “Gwanda yeenu baleanda siji was sugoocheanda Yahudi? Aba gideaba geadeaksi miing'weandaanyi heeda ghayeawa, ak geapkaanyi eaghadoawana.”

³ Iiy sugoocheanda siyi Herode ng'asheesu, gwahirbaban sea Yerusalemooda sean.

⁴ Gaguursa ashoohoodiga hees sean ea ng'oorshoodiga buuneeda ak ghoanyaash heeda jea eejiilsa Gristo.

⁵ Geeyeesha, “Jeeda Betlehemeeda Yudeya aba gideaba gidaghayi ng'oarda sibaneeda,

⁶ ‘Nea ang'iing'i, Ea Betlehemeeda ng'eanyiida Yuda, ang'iing'i muwoosi mwanang'eawa earahay sugoodiga ng'eanyiida Yuda; aba gideaba headaang'u gaygwarina sugoocheanda, jea ghoahaaghwa buuneedeanyu was Israeli.’”

⁷ Gaguursa Herode aba makcheameeda weaghoodigiga ak ghoanyaash damanda daaha miing'weandideani;

⁸ ak goojeakta Betlehemu nea gwayeesha, “Aweayeena ak ghoanyaashti muuchi iita baleanda, ama oanyaschi gooyeanean iita, abeeda gaydawa eara aniini daghadoawan.”

⁹ Hean iiy ng'asheega sugoocheanda ghoang'waay naweeda; asi ng'ula, miing'weandida sideaksa heeda ghayeawaan, goosheedeawa ea gawa ghamiinaadawa deascheeda mida baleanda.

¹⁰ Iidaah fugiga miing'weandida gang'weela ng'weelooda haw muuchi;

¹¹ weay gah ghwadaah baleanda ea Mariyayda was ghaamwat ak goobeedeayi ak ghaghadoawan. Ng'ata, gootin shageeniga nyaawa ak ghoadaw haleanjeeda miyas, was dahaabu ea hideeni ng'andit ea buureata.

¹² Iidu nea sireekusa aba jeeda giirgweatka ea mabiiksiina Herode, ghwala nawa nuut ak gaweay ng'eang'da nyaawa.

Mang'awsiinda Misri

¹³ Iing'ata nea niweay fugiga, ng'ula ghwahidu heeda Yosefu Malaykajeanda Ng'utamiida aba jeeda giirgweatka ak gwayeesha, “Ng'eada ak giyaadi baleanda ea ghaamwat, amng'awsiina Misri, ak goopiidi hoowa ea darukuneey, aba gideaba gagasa Herode gwanuus baleanda.”

¹⁴ Ghang'eat ak ghwaat baleanda sea ghaamwat eawa, ak gawa Misri,

¹⁵ goobiida hoowa ea ghami Herode. Nih gajeenung' gwasa ng'asheandida ghayi rugu Ng'utamiida aba ghuuta sibaneeda, “Geaguursi orjeedaanyi gwarina Misri.”

Geenuuseada diibiga

¹⁶ Hean jeeng'u Herode gideaba nimulsa fugiga was weaghoodigean, ghwanyareas muuchi, hean goojeakta buuneeda gwanuuseada diibiga sean was orjooga aba Betlehemu ea gea mida jeedeaba ng'eanyiita bea gweanyeew iyeenya, ea gea hiing'aadawa, nea abeeda ea nisikteawa damanda rukusa weaghoodiga.

¹⁷ Ak gwasa ng'asheanda ghayi rugu sibaneeda siguura Yeremiya nea gwayi:

¹⁸ “Siyiiy ghuuta siida aba Rama, shooka ea heareega raanya, Raheli gooyeawda diibigaaschi; Nea mamwasa eara hawdeayda, aba gideaba mudugwanda.”

Sibiikna Misri

¹⁹ Iing'ata miyeeda Herode, hean gabussa Yosefu Malaykajeanda Ng'utamiida aba jeeda giirgweatka aba Misri,

²⁰ Ak gwayeesha, “Ng'eada, aada baleanda ea ghaamwat, ak gibiikti ng'eanyiida Israeli, aba gideaba fuga ghayi gaseadayi laknooda eaweega baleanda nimeewa.”

²¹ Ghang'eat ak ghwaat baleanda ea ghaamwat ak gabiikta ng'eanyiida Israeli.

²² Iimuchu nea ghwayiiy gideaba Arkelao niimbal ng'eanyiida Yudeya ghoang'waay hoorgeeda ghwaan was Herode, hean ghoawal gawa hoowa, amadu nea sireekusa aba jeeda giirgweatka hean ghwayam geaw ak gawa ng'eanyiida Galilaya.

²³ Gawa ak goobiida mujiineeda siguura Nasareti, ak abeeda gwasa ng'asheanda ghayi rukuta sibanga, “Gajeeguura Nasarayajeanda.”