Mattayo 19 - Bibliyeeda Ghaydit

Yesu gwarugu iita nung'wiischooda

¹ Iidu nea ghoahiit Yesu ng'asheesu ghabeawa ng'eanyiida Galilaya ak gawa ng'eanyiida Yahudi, giigheawda eenda Yordani;

² ghwaat geeshta eemeeda saang'a ak ghoahaap aba hoowa.

³ Ghapka headaanyi Farisaayajeega ak gwasimsim nea gwayeesha, “Heapi ghwadoabiiwi gideaba siida gayghwanung' gatmoadaanyi aba gilinyoo ea ramwasaani?”

⁴ Ghwasha nea gwayeesha, “Miyoasoamwana gideaba siida ghayi sineegwa aba mwadi gwasin siida was ng'eedeeda ea siida was gatmooda,

⁵ ak gwayi, ‘Aba sareani gayghwanung'wa ng'eedeeda heeda ghwaan ea ghaamwat, ak gaygwaroochi sea gatmoadaanyi, ama ng'ata ghoah fiisu asiyeenyean saseanagi’?

⁶ Fiisu abeeda ea mudea iyeenya, niiw saseanagi. Asi fugiga aguuyi ASEETEAN, adiidu gooheeli siida.”

⁷ Gwayeesha Saawa, “Abeeda iidu goodaydeaysa naaha Musa gheata barawajeanda nung'ooda?”

⁸ Gwayeesha, “Musa ghayi ghoadayda gheata jea eanung'wa gatmooda aba hang'ooynacheeka gurooruunatkeagwa, nea abeeda ghayi mwadi ea masunu.

⁹ Asi geayeeshiineegwa: siida wassean jea ghwanung' gatmoadaanyi iimwanung'wa aba ng'asheega hiseadayeanduumeeda, ak ghaghi nuut, gamealuuli.”

¹⁰ Gwayeesha giinealangaaschi, “Ng'asheega siida ea gatmoadaanyi iisunu, ghang'wana ea meegeeshi.”

¹¹ Hean gwayeesha saawa, “Moamu buuneesean ghoang'waay ng'asheanji, geaghus fugiga adaw ASEETEAN.

¹² Aba gideaba gwanda gulanga siji nea gwasunu ghang'eada jeesinga gheamadiga nyaawa, ak gwanda gulanga nung' buuneeda ghoah gulanga, ak gwanda gulanga sin geat gulanga aba sugoocheanduumeeda humng'eeda. Dea ammu ghoang'waay ng'asheanji, ea daang'waanya.”

Yesu gang'usha diibiga manang'i

¹³ Muchu geeyeassa diibiga manang'i ghwayiin geatingaaschi iheenga diibiga ak ghamwaash ghawooda aba badahuuka nyaawa. Iidu goojuursa giinealanga;

¹⁴ gwayeesha Yesu, “Anung'waada diibiga manang'i ghapka heedeanyu, adoakghuumnyi; aba gideaba fuga uurji suh sugoocheanduumeeda humng'eeda daanyaawa.”

¹⁵ Ghwayiin geatingaaschi iheenga nyaawa, ak ghabeawa ng'eanyiita.

Gheareemaneeda was meanang'oocheanda

¹⁶ Hean gabeesa Siyagi ak gwayeesha, “Giinealshoocheanda, gaydasin ana ng'ashaan miy iijeadanyas eaweega manda muudeanooda?”

¹⁷ Ak gwayeesha niny, “Ghwasaan anda giinyaashchaan iita miyinda? Siida miy ea agi, ama iigasayi una jeeda eaweega, giing'waanyi digheanyeeka.”

¹⁸ Gwayeesha niny, “Akeega?” Gwayeesha Yesu, “Adinuusi siida, adimealuuli, adijagwadiischi, adinapiisi siida ng'uyyeega.

¹⁹ Sissiina mureeda gweanu ea geamadu, ak gibwariiydi giischeewoocheandaang'u gidubwariiydi geaw.”

²⁰ Gwayeesha gheareemaneedida, “Ng'asheesu seaniin nigeawiit daang'waay; abeeda gudu ghwashoadeawaan naaha gicha?”

²¹ Gwayeesha Yesu niny, “Iigasayi huwa siida hidaat, guwi ak gishaaydi haleanjeadaang'u indeawi, ak giidawi fuga barbari, ak abeeda gaymideawana gheaseeda aba humng'eeda, ama ng'ata guwuni eani geeshteanyu.”

²² Iiy Gheareemaneedida ng'asheanji ghang'eat gawa nea gagiisan, aba gideaba gwandeawa haleanjeeda saang'a.

²³ Gwayeesha Yesu giinealangaaschi, “Aba huumwa geayeeshiineegwa gajeahang'waay beata jea gawa meanang'oocheanda jeeda sugoocheanduumeeda humng'eeda.

²⁴ Nuut gicha geayeeshiineegwa, gajea wusis muuchi gideaba gaygwasik diyeayda siguura ngamiya seawadeeda sidageeda ea ea mawuurji gideaba gaygawa meanang'oocheanda jeeda sugoocheanduumeeda ASEETA.”

²⁵ Iiy giinealanga ghahamng'eanyi muuchi nea gwayi, “Abeeda iisunu gayghoamu ghwalaalaan ng'eaha?”

²⁶ Goong'weersa Yesu ak gwayeesha, “Ng'asheanji aba buuneeda ahang'waay, ak aba heeda ASEETA ea wusis.”

²⁷ Deagheata ghwasha Betaro nea gwayeesha, “Ang'wearda, aseasa sinung'wi heeda haleanjeeda sean ak geeyeadu geashtaang'u. Abeeda gajeanyasa naaha?”

²⁸ Gwayeesha Yesu saawa, “Aba huumwa, geayeeshiineegwa, agoogeeda ooyeadu geeshteanyu aba ng'eanyiideesh, jea ghwahidu eaweeda jea goopteadawa Orjeeda Siida hoorgeadaanyi ghaambiidaat, abeeda eara agooga gajoopiidana hoorgajeegiga atamaniyeenyean ak goorgweaksi eemoojigiga atamaniyeenya bea Israeliin.

²⁹ Nea giliwas sih nung'usa heeda gheeda ghana orjeeda ghaamwat ghana haweega ghaamwat ghana ghwaan ghana ghaamwat ghana diibiga ghana madameega, aba badayda gheawungeasu, gayghwanyas niba bughala ak gwahearan eaweega manda muudeanooda.

³⁰ Ak gea saang'a mida mwadi gayghoah gea huuydean, nea gea huuydean gayghoah gea madeeda.