Mattayo 18 - Bibliyeeda Ghaydit

Siida haweewa sean ng'eaha?

¹ Damandida gaweay giinealanga heeda Yesu ak ghoanyaash gideaba “Siida haweewa sean ng'eaha aba jeeda sugoocheanduumeeda humng'eeda?”

² Gaguursa niny baleanda ak ghwanung' ghamiinaada aba dageascheeda nyaawa,

³ ak gwayi, “Aba huumwa geayeeshiineegwa, Iimoayami geat ea awuurjeewana diibiga, ea majaghanyi aweayeena jeeda sugoocheanduumeeda humng'eeda.

⁴ Siida wassean aat geaw ng'eanyi ea gawuurji jeebi, siisi siida haw gil aba jeeda sugoocheanduumeeda humng'eeda.

⁵ “Nea siida wassean jea ghamwas jeabwagi uurji nih aba gheawungeasu, abeeda ghamwasan aniini.

Simsimda eadu riing'eeda

⁶ Siida wassean jea ghwanung' gwasin riing'eeda jeabwagi aba jeedeaba diibisu manang'i mwasaniin, ghang'wana gwachi geerasa gheata lagheaneeda haw bea ng'ealdeayda ak geejaksa bugusta basooda.

⁷ “Eamuy daang'u ng'eanyiida aba simsimda eatu riing'eeda! Aba gideaba simsimda gammiisa hinnooda, abeeda eamuy dea siida jea ghwanung' ghwahidu simsimda!

⁸ Iinung' geatindaang'u adiinya ghanea geashtaang'u, laja ak gijakti asheagiidana geaw; ghang'wana ginyasi eaweega nea gibea badeeda, mwasamwa gideaba gindeawi geatin iyeenya ea geeshan iyeenya ak geejakseey jeeda beasta manda muudeanooda.

⁹ Ama nung' gheang'daang'u sina riing'eeda giloati, ak gijakti asheagiidana geaw; ghang'wana gideaba ginyasi eaweega nea gibea ghaang'agi, mwasamwa gideaba gindeawi gheanyan iyeenya, ak geejakseey jeeda beasta maloonghajeega.

Gissigala gisilleanda roat

¹⁰ “Ang'ula! Adiidu goofooli earagi aba jeedeaba suh manang'iin, asi geayeeshiineegwa aba humng'eeda malaykajeega nyaawa iissa gang'ula galeagasean gheamamda Bwaabeeda mida humng'eeda. [

¹¹ Aba gideaba Orjeeda Siida ghoan gwalealu gidaghayi roat.]

¹² Heapi gawuurjiin? Siida iimideawa gisil bughala, ak ghwaroat agi, maygwanung'usa heeda giika aseedam ea damashageashiin uhuuda giijeeda ak gawa gagasa diita gwachi roadiin?

¹³ Amadu nea ghwanyas, aba huumwa geayeeshiineegwa, gaygang'weeliisa nih muuchi ea ghwalaabwa hoowa giika aseedam ea damashageash marootean.

¹⁴ Asi nih mii gidagasiida Ghweandeang'wa mida humng'eeda gideaba gayghwaroat jeabwagi aba jeedeaba suh manang'iin.

Iyadiiyseey orjeeda giyeang'wa

¹⁵ “Iyadiiyseey orjeeda giyeang'wa, guweesi ak gireekusi nea goobeayi geat. Iimwas gooleeyseey iita abeeda ea ninyasi orjeeda giyeang'wa.

¹⁶ Ama heawa gooleeyseey iit giideayeewi siyagi ghanea fih iyeenya sea ang'iing'i, aba gideaba ng'asheanda wassean iirugu aba madeeda muushoodi asiyeenya ghanea samwagu abeeda ng'asheega gaygamajeekcheewiidi.

¹⁷ Ama mealeeysiiniit saawa, abeeda girukusi ganiisa; ama mealeeysiiniit ganiisa, abeeda ginung' ghoah aba headaang'u siida Eemoojiga ea dea ang'waanyi gwaadi.

Heeheeweega ea giidaydeayda gheata

¹⁸ Aba huumwa, geayeeshiineegwa, gida wassean oarachi aba hiji bea ng'eanyiidean abeeda gajea sirat aba hoowa bea humng'eedean, nea gidootiinyi aba hiji bea ng'eanyiidean gajea siitin aba hoowa bea humng'eedean.

¹⁹ Geayeeshiineegwa gicha, aba jeedeang'wa iineajeesa fih iyeenya ng'ashaan aba hiji bea badayda ng'eanyiidean ak ghamwaash ASEETA, gayghoadaw Bwaabeeda mida humng'eeda.

²⁰ Aba gideaba heeda wassean roonyeesa fih iyeenya ghana samwagu aba gheawungeasu, abeeda eara aniini gaydanda jeenyaawa.”

Gissigala soomjeanda mandeawana samsiinda

²¹ Iidu gawa Betaro heeda ak ghoanyaash nea gwayeesha, “Ng'utamiida, heapi orjeeda giyeanya iyadiiysean gaydasamsa niba hada? Niba ispwa?”

²² Gwayeesha Yesu niny, “Meayeeshiineey niba ispwa, eara laadam ea damanamughuush niba ispwa.

²³ “Aba deascheani sugoocheanduumeeda humng'eeda gawuurji sea sugoocheanjagi gasa gwayiida haleanjeeda sea soomjoagaaschi.

²⁴ Hean ang'eat iitooda haleanjeeda, deagheata geeyeadu headaanyi siisi mideewa siileemba lapiyeeda siguura dalaantaji sagalamnyooji damanamughuush;

²⁵ siisi abeeda mandeawana eara gichea ghoadaydaawa siileedida; iidu gwayeesha siidida haw was sugoocheandean, ashaayda niny ea gatmoadaanyi ea diibigaaschi ea haleanjeadaanyi sean mideawa, ak geataydaawa siileedida.

²⁶ Ghwalamda Soomjeandida ak gwatkuy aba madeadaanyi ak gwayeesha, ‘Ng'utamiida, eaniyean nyooh ghanyi riyeang'da ak gaydawalu siileadaang'u sean.’

²⁷ Iidu ghabwayda sugoocheanda soomjeandida ak gwasamsa siileedida.

²⁸ Gawa soomjeandida ak gwaroonyi sea siyagi was soomjeanda eawoojisu mideaydooscheesa gadiyeeda biissa gwandeawa siileadaanyi lapiyaji bughala siguura dinaari. Gang'eesa ak ghoang'waay ak ghoagheat nea gwayeesha, ‘Goona siileedeanyu.’

²⁹ Gwatkuy aba madeadaanyi siidida eawoojisu mideaydooschi aba gadiyeedean ak gamus nea gwayeesha, ‘Eaniyean nyooh ghanyi riyeang'da ak gaydawalu siileadaang'u.

³⁰ Ghaheawa ak gwajaksa ghealooniga ea eaghus ea niwalu siileedida.’

³¹ Iidu nea ghwadaah soomjooga mideaydooschi ng'asheanji gwanyareesi muuchi, ak gaweay gwarukusa siida bea gadiyeeda iiteaba ng'asheesu sean Sini siidideani.

³² Ng'ata gaguursa siidida bea gadiyeedean ak gwayeesha, ‘Ea soomjeanda muy! Gwachi ang'iing'i gimuschean gideaba eaniyean nyooh ghanyi bassean ak geasamseey siileedida sean itaang'uun;

³³ ama ang'iing'i mamiiseey gideaba gaybwayda soomjeanda indeaydooscheesi gadiyeeda gawuurji gidagwachi easamsiindaneeyi?’

³⁴ Ghwanyareas Siidida haw bea gadiyeedean muuchi ak ghwanung' eayaat eesawan ea eaghus ea niwalu siileedida seaniin.

³⁵ Asi gwasunu eara Bwaabeeda mida humng'eeda gaygwahinduneegwa eara agooga iimaba siisi samsa orjeeda geanyaawa aba jeadaanyi sean.”