Mattayo 15 - Bibliyeeda Ghaydit

Ng'asheega siing'wanyaana fugeaba garayi

¹ Hean gaweesa Farisaayajeega ea ng'oorshoodiga nea gwaleabu Yerusalemu ak ghapka heeda Yesu ak ghoanyaash,

² “Ghwasaan anda giinealangaagu maduupa ng'asheega siing'wanyaana fugeaba garayi bea ghaheanya? Iissa gweagiischi nea meahuuna geatinga.”

³ Ghwasha nea gwayeesha, “Anda eara agooga iissa goofooli diigheanda ASEETA aba ng'asheegeagwa oang'waanyi?

⁴ Gwayi ASEETA; ‘Sissiina mureeda gweanu ea geamadu,’ nea ‘Siida ang'eawi ghwaan ghana ghaamwat ea deenuusa.’

⁵ Ak gooyeenyi agooga, ‘Siida iiyeesha ghwaan ghana ghaamwat, gidida gwachi jea dagoonyi, naadawji ASEETA.’

⁶ Asi aba seareeda ghaheang'wa, noanung' ghoah ng'asheanda ASEETA gidamwadaagha.

⁷ Ea fuga amitu geat! Nidoabiiw ng'asheanda ghayi ramoaran sibaneeda siguura Isaya aba badahuukeagwa nea gwayi,

⁸ ‘Fiisu iissa gwasinnean mureeda aba ghuusiga, nea gurooruunatka nyaawa ea sheageeweani;

⁹ saawa gagadoowanean mwadaagha, nea ghoanaal giinealshooda was ng'asheega buuneeda.’”

Haleanjeeda ng'uta fih ririnnyeanda

¹⁰ Gaguursa eemeeda bwat geat ak gwayeesha, “Oaleaydiit ak ghoanali:

¹¹ manda gichea gwasik ghuut ak ghang'uda siida ririnnyeanda, geaghus gidarina ghuuta, nih dea jea ghang'uda siida ririnnyeanda.”

¹² Ng'ata gaweay heeda giinealangaaschi ak gwayeesha, “Heapi ginali gideaba gwachi Farisaayajeega iiyiiy ng'asheandida gwanyareesi?”

¹³ Ghwasha nea gwayeesha, “Gilinyoo ea histeanyeanda gil iimahista Bwaabeeda bea humng'eeda gajealoata.

¹⁴ Anung'waada saawa, suh fuga adoobiiwshi ng'oowi. Nea siida ng'oaw iyadoabiiw siida ng'oaw, gayghoabita duwaawi jeeda shoomanda.”

¹⁵ Ng'ata gwayeesha Betaro niny, “Ng'acha iidigaasa aba galeesu.”

¹⁶ Gwayeesha, “Eara agooga mandaneegwa fughareenga?

¹⁷ Mii anala eara ghamneawa gideaba gidanyooh gwasik ghuuta siida iissa ghang'ata gawa jeeda, amadu gwarita jarooda?

¹⁸ Amaduuku ng'asheega rituuna ghuuta gwaleapu guroorooda, amadu ghang'uda siida ririnnyeanda.

¹⁹ Aba gideaba jeeda guroorooda gwarituuna giiteemshajeega munyas, nuusta siida, mealuuleega, hiseadayeanduumeeda, mareanghuumeeda, muuwuunooda ng'uyyeega, ea beeshta siida.

²⁰ Ng'asheesu seaniin geang'uta siida ririnnyeanda; duuku gideaba geeyeagiischi nea meehuuna geatinga moamu ghang'uda siida ririnnyeanda.”

Gatmooda mideawa masaweega

²¹ Ghabeawa Yesu hoowa ak gawa meatkwajeega Diro ea Sidoni.

²² Hean ghwahidu headaanyi gatmoomba fuga Gananayo bea ng'eanyiita goojuur muuchi, nea gwayeesha, “Bwaydanaan, Ng'utamiida, Orjeeda Dawdi, gabearji hudeanyu meangeenda.”

²³ Ea marukusiina eara ng'ashaan. Ng'ata ghwahidu heeda giinealangaaschi ak gamus niny nea gwayeesha, “Nung'waada gawa, aba gideaba goojuura geeshteanya.”

²⁴ Ghwasha nea gwayeesha, “Meecheaksean buuneesean geecheaksean gisilga roodeadi bea gheeh Israeli.”

²⁵ Ghwahidu gatmoodida ak gwatkuy aba madeadaanyi ak gwayeesha, “Ea Ng'utamiida weadaan.”

²⁶ Ghwasha nea gwayeesha, “Miimiy gideaba geegeanu hamita diibiga ak geejaksa gudajeega.”

²⁷ Gwayeesha, “Huumwa gil, Ng'utamiida, eara gudajeega iissa ghwaak lajanga abitpina heeda agiischeewa ghweanda nyaawa.”

²⁸ Hean gwayeesha Yesu, “Ea Gatmooda, ang'iing'i masaweagaagu aahaw! Gagasa nyasa gidida igasayiin.” Ghahaap hudaanyi aba geeshangiga.

Yesu ghoahaap fuga saang'a

²⁹ Ghabeawa Yesu hoowa ak gawa ghuuta basooda Galilaya, ak gwading'da giijeeda ak goopteada.

³⁰ Gaweay heeda eemeetuw nea geeyeassa fuga badoojiga, ea fuga manda geeshanga, ea fuga ng'oowi, ea fuga manda ghuusiga, ea suuk gea saang'a ak geayiin madeadaanyi ak ghoahaap.

³¹ Ghaham ng'eanyi eemeeda iidaah nea gabalool fuga manda ghuusiga nea gamajeegiidi fuga badoojiga, nea gaweelweel fuga manda geeshanga, nea ghoang'wearda fuga ng'oowi, ak ghoaghaambiit ASEETA Israeli.

Yesu ghoang'aata fih sagalamnyooji ang'wan

³² Gaguursa Yesu giinealangaaschi ak gwayeesha, “Geasamsi eemeeni aba gideaba neandeawi eawooji samwagu nea mandeawana gilak; mabwariinya gideaba gaydasiksa gaweay nea mwaaga gil, gajiidu goohiili aba naweeda.”

³³ Gwayeesha giinealangaaschi, “Aba hiji geendi dareapcheeda gajeanyasana yeenu hamita jea goolang'u eemeeda saang'a deenu?”

³⁴ Ghoanyaash Yesu gideaba, “Goondeawi mukaataji hada?” Gwayeesha, “Ispwa ea ghweayeesu ng'ay manang'i.”

³⁵ Ng'ata ghwanung' goobiitpiit eemeeda aba ng'eanyi,

³⁶ gageanu mukaatajeegiga as ispwaan ea ghweayeegiga, ak ghamwaash ghawooda ak ghabwanajaada ak ghoadaw giinealanga, ak ghoadaw giinealanga eemeeda.

³⁷ Gweagiischi sean ea gwalang'u, ng'ata ghoawaam gheaptanga ak ghwanyiit sooscheew ispwa.

³⁸ Nea fuga gwachi agiischi ea sagalamnyooji ang'wan headiga ak ghwahit nea meeyiita gadeemga ea diibiga.

³⁹ Iidu gwaheeli eemeeda ak gwading'da maleambooda ak gawa meatkweeda Magadani.