Mattayo 14 - Bibliyeeda Ghaydit

Miyeeda Yohaneeda Abaatiisachi

¹ Aba damandida ghwayiiy sugoocheanda siguura Herode geawunda iita Yesu;

² Hean gwayeesha soomjoagaaschi, “Siisi gajea Yohaneeda Abaatiisachi gil, niduuna miyeeda; ak ghoah ghamneawa uuri sina ng'asheesuun.”

³ Aba gideaba Herode ghayi ghoang'waay Yohana ak gwajaksa ghealooniga, aba badayda Herodiyayda ghayi was gatmooda orjeeda ghaamwat siguura Filipo;

⁴ nea gweagu ng'asheanda ghayi rukusa Yohana nea gwayeesha, “Mwadoabiiwa gideaba gaymideawana gatmooda orjeeda giyeang'wa.”

⁵ Gagasa gwanuus Yohana amadu ghoawal buuneeda aba gideaba ghwanal buuneesean gideaba Yohana sibaneeda.

⁶ Muchu gagul damanda ghweelmeeda eaweeda ghayi sijiila Herode, ghang'was hudeaba Herodiya aba madeeda rabasta, ak geeyi bwak ea gahoosan Herode,

⁷ ak gwaheeleesa nea gweaksa habeawooda nea gwayeesha gaydagoonyi gida wassean ing'alaan.

⁸ Aba damandida gagwarsa ghaamwat ak gwayeesha, “Goonean uhuuda Yohaneeda Abaatiisachi iina jeeda harakta.”

⁹ Gagiisan Sugoocheanda; amadu nea ghoapkaat habeawooda ghwanyawa ak ea gheanyanga rabasta ghwanung' eataw;

¹⁰ goojeakta siida gawa ghealooni ak ghwalach gheata Yohana.

¹¹ Geeyeana uhuudaanyi jeeda harakta ak geataw hudida, ak ghwaat niny heeda ghaamwat.

¹² Ghwahidu giinealangaaschi ak gageanda musta ak gabuy; ama ng'ata gaweay ghoadaw Yesu iita.

Yesu ghoang'aata fih sagalamnyooji muut

¹³ Ng'ata iing'da iiy Yesu ng'asheesu, ghabeawa hoowa nea ghwaat maleambooda ak gawa heeda manda sih. Nyas iita eemeetuw ghabeawa geeshanga gamaseaw niny nea ghabeawa mujiinajeega nyaawa.

¹⁴ Hita Yesu ghuuta basooda ghwadaah eemeetuw ak gwasamsa amadu ghoahaap geeyoonung'weaka nyaawa.

¹⁵ Iidu nea niiw shing'ada, gaweay heeda giinealangaaschi ak gwayeesha, “Hiji sindiin heeda manda sih, adawa eemeeda beata gaweay gharang'weaka gwasheaysa geat gichea ghwaak.”

¹⁶ Gwayeesha Yesu, “Manda gichea ghwaat, oatawa agooga gichea ghwaak.”

¹⁷ Geeyeesha niny, “Geendeawi aba hiji mukaataji muut ea ghweayi iyeenya.”

¹⁸ Gwayeesha, “Ayeani heedeanyu.”

¹⁹ Gwayeesha anung' goobiitpiit eemeeda aba heeda mida nyeega; ng'ata gageanu mukaatajeegiga amuudiin ea ghweayeegiga asiyeenyean ak gang'ula humng'eeda, ak gang'usha, ng'ata ghabwanajaada mukaatajeegiga ak ghoadaw giinealangaaschi, amahit ghoadaw giinealanga eemeeda.

²⁰ Gweagiischi sean ea gwalang'u. Ghoawaam gheaptanga ak ghwanyiit sooscheew damaniyeenya.

²¹ Mooneeda fuga siing'aata ea sagalamnyooji muut headiga, nea meeyiita gadeemga ea diibiga.

Yesu ghabeawa badayda beega

²² Iidu ghwanung' goosheeda giinealangaaschi gaweay giigheawda basooda nea ghoaghaawa maleambooda, nea gahuuydean niny aba gideaba miigwaheeli sea eemeeda.

²³ Hean heeli eemeeda gwading'da giijeeda heeda funyaat ghamwaash ASEETA. Iidu ghoah shing'ada nea gaba geaw aba hoowa,

²⁴ nea aba damani maleambooda gwachi ea nihita bugusta basooda, nea goodeawiit laweajajeega aba gideaba gwaroonyi jeameeda.

²⁵ Was gheata beashata gawa nea ghabeawa badayda beega nea gaweesa.

²⁶ Daah giinealanga nea ghabeawa badayda beega, ghabeal nea gwayi, “Nih maloonghajeanda!” Googuul aba muuwda.

²⁷ Deagheata gwayeesha saawa, “Oapida ng'eanyi adoabeali siida aniini.”

²⁸ Ghwasha Betaro nea gwayeesha, “Ng'utamiida ii ang'iing'i gil ginung' doan headaang'u nea ghaabeawi badayda beega.”

²⁹ Gwayeesha, “Beeni.” Ng'ata ghwararang'aada Betaro aba jeeda maleambooda ak gawa aba badayda beega nea gagal heeda Yesu;

³⁰ hean dea jeameeda, ghabeal ak gwalik beega, ak googuul nea gwayeesha, “Ng'utamiida lealnean.”

³¹ Deagheata ghoahaakta Yesu geatindaanyi ak ghoang'waay nea gwayeesha, “Ea orjeeda siida mwanang' masawi, ghwasaan anda gibeali?”

³² Ding'da duwaawi maleambooda ghahawda jeameeda.

³³ Hean ghaghadoawan fugiga sean mida jeeda maleamboodean nea gwayeesha, “Aba huumwa ang'iing'i guwoosi Orjeeda ASEETA.”

Yesu ghoahaap fuga miyeani aba Genesareti

³⁴ Ghoaghaawa basooda ak ghwahita ng'eanyiida Genesareti.

³⁵ Jeeng'u fugeaba hoowa, ghoadayda iita aba daroorakiga neekeewean. Geeyeassa fuga sean miyeani,

³⁶ geemearmearani niny eawaas eara ea weeleeda hang'daanyi gil ak ghwahit; nea fugiga sean waas weeleadaanyiin geahaap.