Mattayo 13 - Bibliyeeda Ghaydit

Gida sigala siida weah histeayda

¹ Eaweedida gwariteawa Yesu ghoah ak gawa goobideada aba ghuuta basooda.

² Gabassa geat eemeetuw, ak geeyi bwak ea gwading'da maleambooda; ak goobideada nea ghamiinaada eemeeda aba ghuuta basooda.

³ Gwarukusa buuneeda ng'asheega saang'a nea gagala geat nea gwayeesha, “Ghayi gawa sih histeayda.

⁴ Damani histeawean gwanda gea abitpisa jeeda naweeda, ghwahidu dariidaka ak ghwaak.

⁵ Suurja goobitpisa badahuuka harearatka, heeda manda sigeeda saang'a, deagheata gwardu iidu ea manda sigeeda ang'waay hawunga,

⁶ iidu nea gwadagu daknooda ghoaseal beasta daknooda; ak ghwasis aba gideaba manda hawunga.

⁷ Suuk goobitpisa jeeda halaghweenga, ridu halaghweenga ghaminighis.

⁸ Suuk goobitpisa heeda mida sigeeda miyaas, gwardu ak gwaji akaleala bughala, gwaji niirja laadam, gwaji niirja diktam ea damanamughuush.

⁹ Siida mideawa iidiga, ea dayiing'shi.”

Gissibaysiina galoodeaba geat bea ng'asheega

¹⁰ Ghapka headaanyi giinealanga ak gwayeesha, “Ghwasaan anda gibalooli saawa nea gigali geat ng'asheega?”

¹¹ Ghwasha nea gwayeesha saawa, “Agooga sigooneegwa nalooda makcheameeda sugoocheanduumeeda humng'eeda, nea saawa ea miyeataw.

¹² Aba gideaba siida wassean mideawa gil gajeeheasa ea ghwanaawda, nea siidida mandeawana giliin, eara gidida mideawean gajeareat.

¹³ Nih gideabaysiini giibaloolda nyaawa nea geagali geat ng'asheegean, aba gideaba saawa iyang'wearda ea mwadaaha, ghoaleaydiit ak ea mwayiinya nea mwanala.

¹⁴ Aba heanyaawa gwasa ng'asheanda rugu sibaneeda siyi Isaya nea gwayi: ‘Iing'da gajayiinya, ak ea majanala, giing'weerdeayda gajoang'wearda, ak ea mwajadaaha.

¹⁵ Aba gideaba gurooruunatkeaba fiisu nidurmaniidi, nea iidiga nyaawa ea mayiing'shi muuchi, ak ea niiluulan gheanyanga nyaawa, adaghwadaah aba gheanyanga nyaawa, ak ghwayiiy aba iidiga nyaawa, ak gwajeeng'u aba gurooruunatka nyaawa, ak gwayamsean geat ak ghaahaapchi.’

¹⁶ Ghoang'wani agooga aba gideaba gheanyangeagwa ghoang'wearda nea iidigeagwa gwayiing'shi.

¹⁷ Aba huumwa geayeeshiineegwa sibanga saang'a ea fuga doobiiweadi ghayi gagaseadayi deakteaba ng'asheesu ghamneawa oadaayiin, ak ea mwadaaha, nea ghwayiiy ng'asheesu ghamneawa oayiinyiin ak ea mwayiinya.

Yesu gwarugu ganeega gala siida weah histeayda

¹⁸ “Asi agooga oaleaydiit gideagali siida weah histeayda.

¹⁹ Siida wassean iiy ng'asheanda sugoocheanduumeeda ak ea mwanala, ghwahidu gidida muyiin ak ghoasealda gidida sihisa guroroadaanyiin.

²⁰ Nea dea sihisa jeeda harearatkean ea siidida iiy ng'asheandideaniin gil ama deagheata ghoang'waay nea gang'weela.

²¹ Amadu ea mandeawana hawunga aba jeadaanyi iissa ghoang'waay ng'asheandida gilinuwaas, ama hidu sawanadeeda ghana gapnu ghabasta aba badaydeaba ng'asheanji gabay ghoabeada.

²² Nea dea abissa jeeda geediga halaghweenga, ea siidida iiy ng'asheanda amadu aba geawunda gheang'da baruureega badayda ng'eanyiida, ghaminighis ak ea mudu gwaji haghweega.

²³ Nea dea sihisa heeda sigeeda miyaasiin ea siidida iiy ng'asheandideaniin ak gwajeeng'uuni; nih dea jih haghweega, gwaji akaleala bughala, ak gwaji nih laadam, ak gwaji nih diktam ea damanamughuush.”

Gida sigala morooka

²⁴ Gwarukuta gicha galeega nea gwayeesha, “Sugoocheanduumeeda humng'eeda gawuurji siida weah gwahista histeanga miyaasiin aba jeeda madamnyeandaanyi.

²⁵ Iidu nea nilil buuneeda, ghwahidu weajoocheanda ak gwahisa morooka dang'adiga ngaano ak ghang'eat gawa.

²⁶ Ridu ngaano nea ghamwanmwan nea gwaji geadaah gaguuyi sea moorooka.

²⁷ Gaweay soomjooga ak gwayeesha siidida bea madamnyeandean, ‘Ea Siida mureeda, mwaaghanyi ghayi gihisti mbeeyooda miyaasiin aba jeeda madamnyeandaang'u? Amadu gwarina yeenu moorooka?’

²⁸ Gwayeesha niny, ‘Nih gwasin weajoocheanda.’ Ghoanyaash soomjooga nea gwayeesha niny, ‘Gigasayi eeweaya eamughuusha?’

²⁹ Gwayeesha, ‘Manda; iyoamughuushchi morooka gajiidu ghoaloachi eara ngaano.

³⁰ Anung'waada gwaheetu sean ea ghwahita damanda lajita; damandida gaydayeesha fugiga jea ghwalajiin, oosheeda oamughuusha morooka ak ghoarachi gharmucheeka ak geaghwarda, nea ngaano gooweamsi gijigoodeanyu.’”

Gida sigala ghajiileanda haradaali

³¹ Gwarukuta gicha galeega nea gwayeesha, “Sugoocheanduumeeda humng'eeda gawuurji sea ghajiileanda geeta siguura haradaali ghayi geanu siida ak gwahisa jeeda madamnyeandaanyi;

³² gabiissa ea mwanang'eawa ghajilga sean amadu nea gwardu gwaheedu ak geadaah nea niiw geeta haw, ghwahidu dariidaka ak gwadeeksa ghoorajeega nyaawa damealgaaschi.”

Gida sigala gidamwataw

³³ Gwarukusa saawa gicha galeega, “Sugoocheanduumeeda humng'eeda geegala sea hamiirayda geanu gatmooda, ak googuuyi sea dearang'spa gweeraji samwagu ak geeyi bwak ea ghaghuut geaw sean.”

Yesu gagadiyeata galeega

³⁴ Suh seaniin goobaloola Yesu eemeetuw aba galeega nea moang'wa gwarukuta ng'ashaan nea manda gidagala.

³⁵ Abeeda ghoah huumwa ng'asheanda ghayi rugu sibaneeda nea gwayi: “Gaydajaat ghuuteanyu aba galeega, gaydargu gea funyaat ghang'eada dea sibwada sindeeta ng'eanyiida.”

Yesu gwarugu ganeega gala morooka

³⁶ Iidu gwaheeli eemeetuw ak gawa ghoah. Gamaseaw giinealangaaschi ak gwayeesha “Goona ganeega ng'asheanda gwachi iigali geat sea morooka madamnyeandean.”

³⁷ Gwayeesha, “Siida hista histeanga miyaasiin Orjeeda Siida;

³⁸ madamnyeandida ea ng'eanyiida gil, histeanga miyas orjooga sugoocheanduumeeda; nea moorookiga ea orjoogeaba diita muyiin.

³⁹ Nea weajoocheandida histean ea meang'nyeandeenda, nea lajita ea muudeanooda ng'eanyiida, nea fuga lach ea malaykajeega.

⁴⁰ Asi gidida siimuguuriida morooka ak geang'uda beastean, ea gichea gawuurji muudeanooda ng'eanyiida.

⁴¹ Orjeeda Siida gaygoojeagu malaykajeagaaschi, ak ghoawaam aba jeeda sugoocheanduumeadaanyi haleanjeeda sean eadu riing'eeda ea fuga sean sina ng'asheega munyas.

⁴² Ak geehisa jeeda duwayda beasta; ak gooyeawda fuga nyaawa aba hoowa nea goowiiri geeshatka aba sawanadeeda.

⁴³ Abeeda gea doobiiweadi gayghoameang'daayda ASEETA aba jeeda sugoocheanduumeeda Bwaabeeda nyaawa. Siida mideawa iidiga ea dayiinya.

Gissigala lapiyeeda funyaat

⁴⁴ “Gicha sugoocheanduumeeda humng'eeda gawuurji gheaseeda funyaat aba jeeda madamnyeanda, ama dea siida ghafuy; aba ng'weeloadaanyi gawa ak ghwashaayda haleanjeadaanyi sean mideawa ak ghwasha madamnyeandida.

Gissigala booshcheanda haw sheayeat

⁴⁵ “Gicha sugoocheanduumeeda humng'eeda gawuurji sea siida sheahiida haleanjeeda gasa sageeka miyaas,

⁴⁶ geeyi bwak ama dea booshcheanjagi mideawa sheayeeda haw, gawa ak ghwashaayda haleanjeadaanyi sean ak ghwasha.

Gissigala gheareedanga

⁴⁷ “Gicha sugoocheanduumeeda humng'eeda gawuurji sea gheareedanga siipuuta jeeda basooda, ak ghoang'waay heeluutka sean bea ghweayeega;

⁴⁸ geeyi bwak ama nyiit, goongiiru buuneeda ea ghwahidu ghuuta basooda ak ghaghwal ghweayeega miyaasiin ak ghwayiin jeesinga dabita nyaawa nea gea munyas gwahista.

⁴⁹ Nih gichea gawuurji gil eaweeda muudeanooda ng'eanyiida aba gideaba eaweedida gayghwahidu malaykajeega ak gooheeli fuga munyas ea gea doobiiweadi,

⁵⁰ ak gwahisa fuga munyas jeeda duwayda beasta; abeeda gaygwanda buuneeda nea giiwiirda geeshatka.

Meanang'oocheanduumeeda eesh ea dea waas

⁵¹ “Heapi noojeeng'u ng'asheesu seaniin?” Ghwalamda Saawa ak gwayeesha, “Ea.”

⁵² Ng'ata gwayeesha saawa, “Asi gilinyoo ea ng'oorshoocheanda gil was giinealaneeda sugoocheanduumeeda humng'eeda, gawuurji sea siida mideawa gheeda geanu aba jeeda gheaseadaanyi haleanjeeda eashish ea gea woosi.”

Yesu geaheawa aba Nasareti

⁵³ Iidu nea ghoahiit Yesu galeegiga ghang'eat gawa,

⁵⁴ gawa ng'eang'da nyaawa hita hoowa goonealshi aba jeeda ghooriida nyaawa siinealshacheewa, ak goonealshi ea ghahamng'eanyi buuneeda nea gwayi, “Siisi ghwanyasa yeenu weaghuumeeni ea ng'asheesu deamdeameadiin?

⁵⁵ Neada siisi ea mii baleandeaba siidida sina beehajeegeani? Neada ghaamwat ea meeguureewana Mariya? Nea orjooga ghaamwat ea mii Yakobo gil ea Yosefu ea Simon ea Yudahi?

⁵⁶ Ama eara haweega ghaamwat sean ea meendeawani aba hiji? Abeeda ghwanyasa yeenu siisi ng'asheesu seaniin?”

⁵⁷ Deagheata geenyareesi aba ng'asheagaaschi. Hean gwayeesha Yesu saawa, “Sibaneeda majaghanyi ea meatawa mureeda, geaghus ea meatawa aba ng'eanyiidaanyi ea gheanyaawa.”

⁵⁸ Ea mudu gwasissa hoowa deamdeamang'su saang'a aba gideaba mandeawana masaweega.