Mattayo 12 - Bibliyeeda Ghaydit

Iita Sabaato

¹ Damandida gwasik Yesu jeeda madameega eaweeda sabaato. Iidu ghwayeat jih giinealangaaschi, ak gwahirjeaweada muschoonga ak ghwaak.

² Daah Farisaayajeega gissin giinealanga gwarukusa Yesu gideaba, “Ang'wearda, giinealangaagu gwasin ng'asheanda mamiisiina sinooda eaweeda sabaato.”

³ Gwayeesha saawa, “Heapi miyoasoamwana gidaghayi sin Dawdi sea fuga mideawa damanda yeada jih:

⁴ gidabeada jeeda gheeda ASEETA ak ghwaak mukaateeyda giihiimnooda, nea mamiisiina gideaba gayghwaak niny ghana fuga mideawa geaghus ghwaak ashoohoodiga?

⁵ Ghana miyoasoamwana aba jeeda deaweeda gideaba gili was askwearjeanda sabaato iissa ghwadatas ashoohoodiga diineeda Yahudi deaweeda aba jeeda gheeda sibata ASEETA ak ea moawa giidiinyeanda?

⁶ Asi geayeeshiineegwa hiji gwanda siida haweewa eara gheeda sibata ASEETA.

⁷ Ama inyeeda gajanala iiteaba ng'asheesu, ‘Geagasayi baydeayda mii haleanjeeda sisapa geadi bea ghadooweeda,’ gwachi majooparana fuga manda gidamuy nisin.

⁸ Aba gideaba Orjeeda Siida niny Ng'utamiida sabaatohi.”

Siida aptu geatinda

⁹ Ghabeawa hoowa ak gawa jeeda ghooriida nyaawa siinealshacheewa.

¹⁰ Nea abeeda gwanda hoowa siida aptu geatinda. Geanyaash nea geeyeesha, “Ghwahidi gideaba gajeahaap siida eaweeda Sabaato?” Geanyaash ng'asheanji nea geegasa gichea eahaaktaayda.

¹¹ Gwayeesha saawa, “Aba jeedeang'wa gajea ng'eaha jea gang'adeesa gisilleandaanyi jeeda shoomanda eaweeda Sabaato jea ea maygwalealu?

¹² Siida ghang'al gisilleanda niba hada! Ada abeeda ghwahit siinooda ng'asheega miyaasiin eaweeda Sabaato.”

¹³ Ng'ata gwayeesha siidida, “Adoabiiwa geatindaang'u.” Ghoadoabiiw, ak ghahaap ea gawuurji geatinda niirja.

¹⁴ Iidu gwarita Farisaayajeega jarooda ak ghwadawdaaw gichea gwanuusta.

Soomjeanda loat ASEETA

¹⁵ Geeyi bwak ama jeeng'u Yesu ng'asheanji ghabeawa hoowa. Ghwaat geeshta fuga saang'a ak ghoahaap fuga miyeani sean,

¹⁶ ghaheawa nea gwayeesha adoorukusi sih iiteanyu.

¹⁷ Abeeda gwasa gida ghayi rugu sibaneeda siguura Isaya nea gwayi:

¹⁸ “Ng'ula siideanyu bea gadiyeeda aaloachi, aabwariinyi nea iissa ghwanung' gahoosan jeedeanyu. Gaydayiin guroroodeanyu badaydaanyi, nea gaygwarukwiida girgweageedeanyu aba jeeda Eemoojiga.

¹⁹ Maygwasheang'a ng'asheega ghana goojuuri, nea eara ghuutaanyi ghanyea majeeyiing'sa naweadinga;

²⁰ ghanyea maygwahirja muudayeanda ng'arng'ar, nea eara weasta aroasan ea maygwanuus, bwak ea eaghus eanisin girgweageeda jea goombaliischi.

²¹ Nea gheawungaaschi gayghwarar Eemoojiga.”

Yesu ea Beelsebuli

²² Hean Geeyeassa siisi ng'oaw biissa ea manda ghuuta bearji meangeenda; ghoahaap ak ghoang'wearda nea gabalool.

²³ Ghahamng'eanyi buuneesean nea gwayi, “Siisi mii orjeeda Dawdihi?”

²⁴ Iiy Farisaayajeega ng'asheesu gwayi, “Siisi ghahoan meangeenda aba gideaba gwandeawa uurda Beelsebuli, meang'nyeandida bea eenda hawiin.”

²⁵ Gwajeeng'u gidabaloola saawa aba jeesinga nyaawa ak gwayeesha, “Sugoocheanduumeeda wassean iibearshi ea maygamajeegiit, ghana eara mujiini ghana gheeda wassean iidardaawaat, gheawi ea mayghamiinaada.

²⁶ Shataani iihoan Shataani, abeeda gang'uchi geaw. Abeeda sugoocheanduumeadaanyi gayghamiinaadaydaan?

²⁷ Aniini iyearuuteawi meangeenda uurda Beelsebuli, heapi! Abeeda orjoogeagwa saawa gooruutiideawa naaha? Aba gideaba saawa fuga jea goorgweakseegwa agooga.

²⁸ Ama ghamneawa earuuteawi meangeenda uurda Guroorooda ASEETA, abeeda ghoanali gideaba nihidu heedeang'wa Sugoocheanduumeeda ASEETA.

²⁹ Gayghoamuustaan siida gideaba gayghabwasay gheeda siida mideawa uurda ak ghoareat haleanjeadaanyi, nea miighanyi gwarada siidida mideawa uurdean? Ak abeeda gayghoamu ghoareat haleanjeadaanyi.

³⁰ Siida manda meatkweedeanyu niifuurnean muwuuta, nea siida wassean mabwadana geat sea aniini ghoadaarda.

³¹ Aba sareani geayeeshiineegwa, buuneeda gajeesamsa riing'eega nyaawa sean ea giing'weaka nyaawa sean, duuku fuga ang'eawi Guroorooda Ghaydit rukuna badayda ng'asheega munyas mayghwanyas samsiinda.

³² Amadu gicha siida jea gwarukuna ng'asheanda muy badayda Orjeeda Siida gajeesamsa, duuku siidida jea gwarugu ng'asheanda muy badayda Guroorooda Ghaydidiin, ea majeesamsa aba jeedeaba ng'eanyiini, ghana eara aba ng'eanyiita jea ghoahiiduunu.

Geeta ea haghweagaaschi

³³ “Asina geeta ghamiidu ak ghamiyaasiit eara haghweagaaschi, ghana anung' gamunyiit geeta ak gamunyasiidi eara haghweagaaschi aba gideaba geeta geenala haghweagaaschi.

³⁴ Ea dayeega udang'usheega! Gajoamuustaan rukunooda ng'asheega miyaasiin nea goowooschi munyas? Aba gideaba siida iissa gwarugu ng'asheega nyiit guroroadaanyiin.

³⁵ Siida miy aba jeeda gheaseadaanyi miy iissa gwarugu ng'asheega miyaas, nea siida muy aba jeeda gheaseadaanyi muy iissa gwarugu ng'asheega munyas.

³⁶ Asi geayeeshiineegwa, eaweeda girgweaksiinda gaygaba siisi rugu ng'asheanda marachi gil ghayi nyooh ea nirugu;

³⁷ aba gideaba aba ng'asheagaagu gajeegoonyi doobiiwnata, ak aba ng'asheagaagu gajeergweakseey.”

Gasooda ng'asheega deamdeameadi

³⁸ Ak gwayeesha Ng'oorshoodiga ea Farisaayajeega, “Giinealshoocheanda geegasayi eadaaha gwadeagooda aba headaang'u.”

³⁹ Ghwasha nea gwayeesha, “Seaygeeda munyas biissa gamealuuli ak ea mwajeataw gwadeagooda; geaghus gwadeagooda ghayi bea sibaneeda siguura Yona.

⁴⁰ Gawuurji gida abiideata Yona jeeda ghweayeanda haw eawooji samwagu eawa ea askweari nih gichea gawuurji Orjeeda Siida gaygoobiida jeesigeeda eawooji samwagu eawa ea askweari.

⁴¹ Gayghamiinaada fuga Ninawi eaweeda girgweaksiinda ak gaygoorgweaksa seaygeani aba gideaba gwandeawa giidiinyeanda. Aba gideaba fuga Ninawi ghayi saawa gwaduukuuna riing'eeda aba ng'asheega rukwiida Yona, nea aba hiji gwanda siida haweewa Yona.

⁴² Gayghwahidu gatmooda ahaaghwa Wiilooda Ng'eanyiida Biyeara eaweeda jea eergweaksiina seaygeani, ak gaygoorgweaksa aba gideaba gwandeawa fiisu giidiinyeanda. Aba gideaba niny gwasimna deasheagi ak ghwaan gooleeysiit weaghuumeeda Sulemani, nea ging'ulayi gwanda hiji siida haweewa Sulemani.

Biiknooda meang'nyeandeenda muy

⁴³ “Meang'nyeandeenda muy iiriteawa siida iissa gwaneayeewa ng'eanyiida manda beega, nea gagasa heechea gafuufa ak ea mwanyasa.

⁴⁴ Amadu gwayeesha geaw, ‘Gaydabiikta gheenyu heeta earini.’ Biigu ghwahita nea siipuus ak ea sisisin nea manda jeeda sih.

⁴⁵ Ghang'eat gawa ak gweadu meangeenda suuk ispwa, munyas ea ghwalaabwa hoowa niny, ak ghapka sean ghamway jeedeaba siisi; amadu gamunyiit seareedeaba siidida ea ghwalaabwa hoowa dea ghayi bea mwadi. Nih gichea gawuurji gil aba seaygeeni ghamneawa munyasiin.”

Gheamata Yesu ea orjooga geenyea Yesu

⁴⁶ Damanda duu gabaloola sea buuneeda, hean ghwahidu ghaamwat sea orjooga ghaamwat ak ghamiinaada aba gidaghuuta nea gagasa goobalool.

⁴⁷ Ghwalamda Siyagi ak gwayeesha, “Ng'ula gwanda geamadu ea orjooga geamadu jarooda ghamiinaada nea gagasa goobaloolnyi.”

⁴⁸ Ghwasha nea gwayeesha siidida adaw iitean, “Iya ng'eaha, ama orjooga giyeanya geabeang'a?”

⁴⁹ Ng'ata ghamiin giinealangaaschi nea gwayeesha, “Ng'ula iyya ea orjooga giyeanya!

⁵⁰ Aba gideaba siida wassean nyooh gwasin gidida bwariiy Bwaabeeda mida humng'eedean, siisi abeeda orjeeda giyeanya gil, ea huda giyeanya, ea iyya.”