Mattayo 11 - Bibliyeeda Ghaydit

Fuga ajeagu Yohaneeda Abaatiisachi

¹ Iing'ata giidawda adaw Yesu giinealangaaschi atamaniyeenya iitaanyi, ghabeawa hoowa ak gawa goonealshi aba jeeda mujiinajeega nyaawa nea gwarukwiida Giijasta miy.

² Iidu nea ghwayiiy Yohaneeda Abaatiisachi iita gissina Yesu nea gwanda ghealooniga, hean goojeakta giinealangaaschi ghoanyaash

³ nea gwayeesha, “Asi ang'iing'i guwoosi siida ghayi jea ghwahidu ghana jea eefurda nuut?”

⁴ Ghwasha Yesu ak gwayeesha saawa, “Aweayeena ak goorukusi Yohana iita ng'asheega oayiinyi ea gea oadaayi:

⁵ fuga ng'oowi ghoang'wearda, fuga badeeda gaweelweel, gea bearji udamusuura geamiidu, gea miinyi gwayiing'shi, fuga meewa gwaduutu nea fuga barbari geerukusa Giijasta Miy.

⁶ Nea ghang'wana siida mwasida gil aba badaydeanyu.

⁷ Ng'eatng'eat gabiikta, gwarukusa Yesu eemeeda ghwanyawa badageat iita Yohana, “Gooweayi adaaha naaha aba dareapcheeda? Nyeeshtooda ayuuk jeameeda?

⁸ Abeeda gooweayi adaaha naaha? Siida akwa hang'weaka oormajeega? Ng'ula fuga akweali hang'weaka oormajeega goobiita gealga sugoodiga.

⁹ Abeeda ghwasaan anda gooriti? Gooweayi adaaha naaha? Sibaneeda? Ea, geayeeshiineegwa eara dea haweewa sibaneeda.

¹⁰ Nih siida sing'oorsa ng'asheesuun gil, ‘Ng'ula aniini geajeagu giijasoocheandeanyu madeeda gheanyangaagu, jea gwasineey naweadaang'u aba madeadaang'u.’

¹¹ Aba huumwa geayeeshiineegwa, manda siida wassean aba gea jih gadeemga dea haweewa Yohaneeda Abaatiisachi eara siidida siyi ea mwanang'eawa sean aba jeeda sugoocheanduumeeda humng'eedean eahaweewa niny.

¹² Ghang'eada askwearjoojiga Yohaneeda Abaatiisachi ea gagul ghamneawa sugoocheanduumeeda humng'eeda sibwasay, nea fuga bwasay gageanda aba uurda.

¹³ Aba gideaba ghang'eada sibanga ea deaweeda gwaramoorani ea ghwahita damanda Yohana;

¹⁴ nea iyoogasayi amwasa niny ea Eliyaheeda jea ghwaani.

¹⁵ Siida mideawa iidiga ea dayiing'shi!

¹⁶ “Asi gaydagala naaha seaygeani? Gawuurji diibiga mida naada, guuriisa suurja nea gwayeeniisa,

¹⁷ ‘Geang'waschi, ak ea moang'wasi; geeyeawdi, ak ea mooyeawdani.’

¹⁸ Aba gideaba ghwahidu Yohana ak ea meagiischi nea mwali gil, ak gwayi, ‘Gwandeawa meangeenda’;

¹⁹ ghwahidu Orjeeda Siida ak gweagiischi nea gwaleeshi, ak gwayi, ‘Ng'ula, nih aadeaw nea boogideat, nea gwaduupchi fuga ang'oonyi gwaadi ea fuga riing'eega!’ Amadu weaghuumeeda ea nidaajiit aba sinaweagaaschi.”

Mujiinajeega mandeawana masaweega

²⁰ Iimuchu goojuursa mujiinajeegiga ghayi sissa niny ng'asheega deamdeameadi ak ea maduukuunana riing'eega nyaawaan.

²¹ “Ashageada geat Gurasini! Ashageada geat Betsayda! Aba gideaba ng'asheegiga ghayi deamdeameadi sisissa jeedeang'wean, inyeeda ghayi geesissa mujiineeda Diro ea Sidoni, gajea nigeawiit gwaduukuuna ng'asheega munyas ak ghwayeashta deareeda nea gookwa guniyajeega.

²² Asi geayeeshiineegwa, gajeawusus gideaba gayghamilikghta ghoorjooda nyaawa Diro ea Sidoni ea ghwalaabwaneegwa hoowa.

²³ Eara ang'iing'i Gapernaumu, gajeetiing'neey ea gula humng'eeda? Gajeahiing'neeyi ea una jeeda maloonghajeega. Aba gideaba inyeeda ghayi ng'asheega deamdeameadi sisin aba ng'eang'deang'wa geesissa mujiineeda Sodoma, gwachi mujiineedida gajea gudugwanda ea gagul ghamneawa.

²⁴ Ak gaydayeeshiineegwa, eaweeda girgweaksinda gaynyasa ang'iing'i ghoorjooda haw adaraam dea Sodoma.”

Apkaani heedeanyu ak goofuufchi

²⁵ Aba damandida gwayi Yesu, “Geabadiischooweey ea Bwaabeeda was Ng'utamiida humng'eeda ea ng'eanyiida, aba gideaba gifunyi ng'asheesu fuga weaghoodi ea fuga mideawa fughareenga ak giihiimsi diibiga manang'i;

²⁶ ea Bwaabwa nih gweagu gideaba gidubwariiydi, ang'iing'i gil.

²⁷ Nigoonan Bwaabwa haleanjeeda sean. Manda siida nal Orjeeda geaghus Ghweanda, ghana siida nal Bwaabwa geaghus Orjeeda ghana siida wassean gasa Orjeeda goohiimsa.

²⁸ Apkaani heedeanyu oogasean agoogeeda deawiit nea ghabwaanyeegwa sareenda, ak gaydeafuufeegwa.

²⁹ Aghasana geat yookeedeanyu, ak ghoanaalanaan ng'asheega; aba gideaba aniini geewooschi ng'eeni nea geayeadayi geaw ng'eanyi aba guroroodeanyu, ak abeeda gajanyasa hooseaneega aba jeesingeagwa.

³⁰ Aba gideaba yookeedeanyu ea bumbun nea sareendeanyu ea asas!”