Mattayo 10 - Bibliyeeda Ghaydit

Giijasoodi damaniyeenya

¹ Gaguursa giinealangaaschi atamaniyeenya, ak ghoadaw gheambalmeeda jea gooruuteawa meangeenda munyas nea ghoahaap geeyoonung'weaka ea sawanaduutka sean.

² Gheawungeaba giijasoodisu atamaniyeenyean ea suh, dea madeeda Simoneeda siguura Betarohi ea orjeeda ghaamwat siguura Andreya, ea Yakobo orjeeda Sebedayo ea Yohana orjeeda ghaamwat.

³ Filipo ea Bartolomayo, Domaso ea Matayooyda ghayi ang'oonyi gwaadi, ea Yakobo orjeeda Alfayo, ea Dadayo.

⁴ Simoneeda Ganaani ea Yudayda Iskariyote ghayi laabwadaw Yesu.

Giijeakteayda fuga atamaniyeenya

⁵ Goojeakta Yesu giijasoodigiga atamaniyeenyean ak ghoadaw giijasta nea gwayeesha, “Adooweayi jeeda darooraka Eemoojiga, ghana jeeda mujiineeda wassean bea Samariya.

⁶ Ghang'wana ghoang'waanyi naweeda aweayeena heeda gisilga roodeadi bea Israeli.

⁷ Aba jeeda neayeedeang'wa arukwiida gideaba, ‘Sugoocheanduumeeda humng'eeda nineekiit.’

⁸ Oahaabwa fuga miyeani, ak gootuudu fuga nimeewa, nea ghoamiidu fuga bearji udamusuura, nea gooruuti meangeenda. Geegooneegwa mwadaagha, oatayda mwadaagha.

⁹ Adoayaadi jeesinga shageenigeagwa lapiya ghana dahaabu sisina lapiya wassean, ghana heelajeega,

¹⁰ ghana shageeda naweeda, ghana hang'deaba iyeenya, ghana geeka ghana bileangida. Aba gideaba siida gadiyeeda gammiisa nyasita daghwardaanyi.

¹¹ Iyooweayi jeeda mujiineeda wassean ghana gharang'da, googasayi siida deaptaneegwa biissa ea doabiiwaat ak goopiidi gheanyi ea abeawana hoowa.

¹² Iyooweayi jeeda gheeda gookeacheewi fuga bea gheeda.

¹³ Nea gheedida iimiisa hoyyooydeang'wa, abeeda danyasa hoyyooydeang'wa. Ama deepa ea mamiisiina abeeda hoyyooydeang'wa gaygabiikseegwa agooga.

¹⁴ Nea siida iimwadeaptaneegwa ghana ghaheawa gooleeysiit ng'asheegeagwa, iyooriteawi gheedida ghana mujiineedida, ghoalalakti birjeanda mida geeshangeagwa.

¹⁵ Aba huumwa geayeesheegwa eaweeda girgweaksiinda gajeawusus ng'eanyiida Sodoma ea Gomora gamilikghteaysa ghoorjooda eaweeda girgweaksiinda ea ghang'al mujiineedida.

Ghabasta jea ghwahidu

¹⁶ “Asi Aniini geajeakteaydaneegwa gisilga jeeda suuyeeka; asi andeawana weaghuumeeda ea awuurjeewana ichibooda, nea goong'eeniiti ghariibajeanda.

¹⁷ Ashageada buuneeda aba gideaba gayghwaadeagwa gheeda siirgweacha nea ghabwareagwa aba jeesinga gealga nyaawa siinealshacheewa.

¹⁸ Gajeayadeagwa madeeda sugoodiga ea dea fuga ahaaghwa ng'eanyiida aba badaydeanyu, ak goomuuwiisi Giijasta miy saawa ea fuga Eemoojiga.

¹⁹ Asi iisiyaadeagwa adooteemsheesi gichea arukuta aba gideaba damandida gajeegooneegwa gichea arukuta.

²⁰ Aba gideaba mii agooga gil fuga jea gabalool, gaygabalool Guroorooda Ghweandeang'wa aba jeesingeagwa.

²¹ Siida gayghwala bwadaw orjeeda ghaamwat eenuus, ak ghwalabadaw ghweanda jeaptaanyi, nea gwayamsa geat diibiga ghweaniga nyaawa ea gheamadiga nyaawa ak ghabwar gameewa.

²² Nea gayghwasteagwa buuneassean aba gheawungeasu. Nea siichea ghamilikghta ea gamuudean abeeda ea siichea eelealu.

²³ Iighabwaaseagwa buuneeda aba mujiineani, goomng'awsi mujiineanuut. Aba huumwa geayeeshiineegwa majaduulni mujiinajeega ng'eanyiida Israeli nea miighwahidu Orjeeda Siida.

²⁴ “Giinealaneeda moamu ghang'al giinealshoocheandaanyi; nea eara soomjeanda ea moamu ghang'al siida haw adaw gadiyeeda.

²⁵ Ghwahit iiwuurji giinealaneeda sea giinealshoocheandaanyi, ak gawuurji soomjeanda sea siidaanyi haw bea gadiyeeda. Abeeda iisiguura siida bea gheeda Beelsebuli, heapi abeeda ea maygwasissa ng'asheega munyas muuchi fuga mida jeedeaba gheanyi.

Siida miisa gheawalmeeda

²⁶ “Asi adoawali saawa aba gideaba ng'asheanda funyaat gajeajaat, nea gidida funyaadiin gajeatahaach.

²⁷ Ng'asheanda earukuneegwa aba jeeda misaneeda, oorukuta aba eeshpwara; nea ng'asheanda oayiinyi meang'shooda, arukwiida aba uhuuda gheeda.

²⁸ Adoawali fuga ammu gwanuus saseeda ak ea moamu gwanuus guroorooda; ghang'wana giiwali siidida ammu gwanuus saseeda ak gwajaksa guroorooda jeeda maloonghajeega.

²⁹ Heapi udabwaraadaji iyeenya meesheahideawana heelajeanjagi? Eara akaleala moamu goobissa ng'eanyi nea mamwasa Ghweandeang'wa.

³⁰ Nea agooga eara buudeega iheengeagwa ea siyiida sean.

³¹ Adoabeali, agooga; ghoang'ali udabwaraadajeega saang'a.

Masaweega ea gissiheawaata Gristo

³² Siida mwasan aba madeeda buuneeda, abeeda eara aniini gaydamwas niny aba madeeda Bwaabeeda mida humng'eeda;

³³ nea siida wassean jea ghaheawanaan aba madeeda buuneeda, eara aniini gaydaheawa niny aba madeeda Bwaabeeda mida humng'eeda.

Meayeani hoyyoo geayeadu ng'ucheeda

³⁴ “Adiidu ghoaghanyi gili eayeadu hoyyoo jeeda ng'eanyiida; meayeani hoyyoo geayeadu ng'ucheeda.

³⁵ Aba gideaba ghaawunyi deang'uuchi siida ea ghwaan, ea huda ea ghaamwat, ea gatmooda ea ghamasiyeeda;

³⁶ weajoodiga siida fuga gheanyaawa.

³⁷ Siida bwariiy ghwaan ea ghaamwat ea ghwalaabwanaan hoowa siisi mamiisean; siida bwariiy orjeeda ghana huda ea ghwalaabwanaan hoowa, siisi mamiisean;

³⁸ nea dea mwasara beehiidaanyi ak gweada geeshteanyu ea mamiisean.

³⁹ Siida agaba eaweagaaschi gaygahuteawi, nea siida huteawi eaweagaaschi aba badaydeanyu gaygwalealu.

Giimearda

⁴⁰ “Siida deaptaneegwa ghwadeaptanaan aniini, nea siida deaptanaan, ghwadeapta siida ghayi ajeaknean.

⁴¹ Siiteapta sibaneeda aba gideaba sibaneeda gil, gayghwanyas giimearda sibaneeda. Dea deapta siida doabiiwaat aba gideaba ea doabiiwaat eara niny gayghwanyas giimearda doobiiwnata.

⁴² Siida wassean jea ghoadaw siyagi aba jeedeaba fiisu manang'iin beega garbapi aba gideaba giinealaneeda, aba huumwa geayeeshiineegwa eara niny mayghwaroat giimeardaanyi.”