Marko 9 - Bibliyeeda Ghaydit

¹ Gabiikta Yesu ak gwayeesha, “Aba huumwa gaydarukuneegwa gideaba aba jeeni hiji gwanda fuga maygameewa ea eaghus ea nidaah gheambalmeeda ASEETA gidahitaayda nea gweadu uurda.”

Yesu ghwayamwa deakta

² Iing'ata eawooji lah, ghwaat Yesu Betaro ea Yakobo ea Yohana uhuumba giijeeni geaw nea gaba geat. Iidu aba hoowa ghwayamwa deaktaanyi aba madeanyaawa,

³ ak eara hang'weakaaschi gaweeriidi muuchi. Eara aba jeeda ng'eanyiisean ghanyea manda siida ammu goohuun hang'weaka ea gaweeriitiidunu.

⁴ Deagheata geadaah Eliya ea Musa nea gabalool sea Yesu.

⁵ Gwayeesha Betaro Yesu, “Ea Giinealshoocheanda, aamiy muuchi gideaba geendi hiji. Anda meesini ghooraji samwagu aba hiji. Ghooriida mabeanyi ang'iing'i niirja gaba Musa, nea niirja gaba Eliya.”

⁶ Abeeda Betaro ea orjooga ghwanyawa ea ning'ut muuwda ea ghwaroat eara gichea gwarugu.

⁷ Miighoah gil ea nihoonu shamooghooda ak gwadukuta. Ghwanya ghuuta Siida nyaasha jeeda shamooghooda nea gwayi, “Nih Jeepteanyu aabwariinyi ooleeysiiniit.”

⁸ Miighoah gil ghoang'wearda giinealanga gicha, ak ea mwadaaha siinuut geaghus Yesu ak ghwahit ea saawa.

⁹ Iidu nea ghwararang'aadawa giijeeda gwayeesha Yesu, asi adiidu goorukusi sih ng'asheega ghwanyawa oadaayiin ea eaghus ea niduuna miyeeda Orjeeda Siida.

¹⁰ Ng'ata Ghoang'waay ng'asheanji, amadu gwasheang'nyi Saawa nea gwayi gwadeaschi naaha ng'asheanji bea duunooda miyeedean.

¹¹ Iidu Geanyaash Yesu nea geeyeesha, “Anda gwayeena giinealshoodiga Diini gayghanyi gooshoohu Eliya?”

¹² Gwayeesha, ada huumwa, “Eliya gayghanyi gooshoohu ghoan gwasisin haleanjeeda sean; eara gwasa, ghwasaan anda geang'waar aba jeeda Ng'ooruutka Ghaydit gideaba, Orjeeda Siida gayghwanyas hang'weanidooda muuchi nea geefool?

¹³ Geayeeshiineegwa, Eliya ada nihidu, ak gwasima buuneeda gidagasiida saawa, gawuurji gidaghayi sing'waarda aba badaydaanyi.”

Yesu ghoahaap orjeeni beardooschi meang'nyeandeenda

¹⁴ Gaweay ama hita heeda giinealanga suurja ghwadaah eemeetuw nibatiisa geat hoowa, nea gwasheang'dooschi sea giinealshoodiga mwaatkwa bea diineeda Yahudi.

¹⁵ Daah buuneeda Yesu ghahamng'eanyi muuchi. Gwasalda gaweay roonyeeda Yesu ak googeachi.

¹⁶ Gwayeesha Yesu ginealangaaschi, “Ghwanyawa goosheang'nyeesi naaha ooga fiisu?”

¹⁷ Deagheata gwarina Sih jeeda eemeeda ak gwayeesha, “Ea Giinealshoocheanda, heeta geeyeadu headaang'u orjeeni iteanyu beardooschi meang'nyeandeenda nea iissa ghwanung' ghwaroat eara ghuuta.

¹⁸ Inyeesa iibalaksa meang'nyeandeenda gwajaksa ng'eanyi nea gabaru ghuuta furghwajeega nea goowiiri geeshatka nea ghabwarghanda. Iyeayeeshi giinealangaagu ooruuta meang'nyeandeenda ghwaraay.”

¹⁹ Gwayeesha Yesu saawa, “Anda agooga goowooschi seaygeeda mandeawana masaweega! Asi agooga gaydeabiita heedeang'wa ea ghoah eeju? Gaydabatiiseegwa ea ghoah eeju? Heapi ayeani heedeanyu.”

²⁰ Geeyeadu orjeedida heeda Yesu. Daah meang'nyeandeenda Yesu ghwanung' ghoahiil orjeeda ak goobeedeaysa ng'eanyi ak goobeerbeershi nea gabaru ghuuta furghwajeega.

²¹ Gwayeesha Yesu ghweanda baleanda, “Miyeanji gaba eeju?” Gwayeesha Siidida, “Ghang'eada jeepcheanduumeadaanyi.

²² Nea iissa gwajaksa meang'nyeandeenda jeeda beasta ea jeeda beega, nea gagasa nuusta. Asi iimuusi, Gibwaydaneasa ak giweacheasa!”

²³ Gwayeesha Yesu, “Gwayi iimuusi gili! Aba siida mideawa masaweega manda gichea gwadilna.”

²⁴ Goojuur Siida nea gwayeesha, “Asi geandeawi masaweesu mii haw nea giiheanean.”

²⁵ Daah Yesu gidawamwaanda eemeetuw madeadaanyi gabiissa goojuursa meang'nyeandeenda nea gwayeesha, “Meang'nyeandeenda inung' ghwaroat ghuuteaba jeebi nea ghamiinyiit, geayi riteawana saseedeaba jeebi nea adiidu gudubiiksiina gicha!”

²⁶ Goojuur meang'nyeandeenda nea gwajaksa orjeeda ng'eanyi ak gwariteaysa. Iising'ula orjeeda aba ng'eanyi ea nuwuurji musta ea gwayeena buuneesean, “Nimi!”

²⁷ Gageanu Yesu ak ghoang'waay geatinda orjeeda ak gagatkat. Hean ghang'eat ghamiinaada.

²⁸ Iidu nea nuwa Yesu gah, gaweay headaanyi giinealanga nea gaba geat ak ghoanyaash nea gwayeesha, “Ghwasaan anda ghwanyawa aseasa gearaanyi eeruuta?”

²⁹ Gwayeesha Yesu saawa, “Meang'nyeanji bea eendean gaba giika ama jea gwarita geaghus eamwaash ASEETEAN gil.”

Yesu gabiikta gabaloola ng'asheega miyeadaanyi

³⁰ Gawa Yesu nea goodeayi ginealangaaschi, Gaweay nea gwasik jeeda ng'eanyiida Galilaya. Abeeda Yesu niny magassa ghwanal buuneeda heeda mida.

³¹ Nea nih abeeda gwasin gideaba niny iyanaal ginealangaaschi gwayeeniisa, “Orjeeda Siida gajeenung' goobissa geatinga buuneeda jea ghabwar ghami. Nea iing'ata eawooji samwagu gaygwaduudu.”

³² Abeeda giinealanga mwanala ng'asheanji ak ghoawal ghoanyaash.

Siida haw ng'eaha?

³³ Ghwahita ng'eanyiida Gapernaumu. Iidu nea niweay jeeda gheeda ghoanyaash Yesu ginealangaaschi nea gwayeesha, “Ghwanyawa aba naweeda goosheang'nyeesi naaha?”

³⁴ Ghwasiinda Saawa, aba gideaba gwachi nea gwanda naweeda gwasheang'nyeesa gideaba aahaw ng'eaha aba jeenyaawa.

³⁵ Hean iidu gawa Yesu goopteada ak gaguursa ginealangaaschi atamaniyeenya. Gwayeesha, “Siida gasa ghang'ata madeedeaba suurja dayiina geaw ng'eanyi ea gahuuydeana buuneesean ea ghoah siida gadiyeesa buuneesean.”

³⁶ Gaguursa jeebi mwanang' ak ghwanung' ghamiinaada aba madeanyaawa. Gageanu ak gabeashsa geatingaaschi gheata baleanda ak gwayeesha,

³⁷ “Siida deapta baleanda uurji nih aba gheawungeasu, ghwadeaptanaan aniini. Nuut siida deaptanaan aniini mwadeaptanaan aniini ak ghwahit, ghwadeapta eara siida ajeaknean.”

Siida mwahasheasa gaba meatkweedeanya.

³⁸ Gwayeesha Yohana Yesu, “Ea Giinealshoocheanda, sidaayi siida aruutiida meangeeniga aba gheawungaagu. Geeyeeshi nung'waada aba gideaba siidida mabwaaheasa.”

³⁹ Gwayeesha Yesu, “Adagudoochuursi, manda siida jea gwasin deamdeamanga sunu nea gwasina gheawungeasu amadu gwasheamu gwarukuna badaydeanyu ng'asheega munyas.

⁴⁰ Aba gideaba siida mwahasheasa siisi gaba meatkweedeanya.

⁴¹ Ama siida wassean jea gagoonaneegwa beega jea aleaha gideaba goowooschi fuga Gristo siisi aba huumwa eara niny majaghanyi ea mwanyasa giimeardaanyi.

Haleanjeeda eatu ramaseanyeeka

⁴² “Siida wassean jea ghwanung' ghwaramwasta siyagi aba jeedeaba fiisu manang'i mwasaniin ak ghwanung' gwasin riing'eeda, siisi abeeda ghang'wana geegeanu lagheaneeda haw bea ng'ealdeayda ak geerasa gheataanyi ama hit geejaksa jeeda basooda.

⁴³ Iinung' geatindaang'u, adiinya gilaji! Ghang'wana ginyasi eaweega nea gibeahi geatinagi, mwasamwa gideaba gindeawi geatinga sean ak guwi jeeda beasta manda muudeanooda. [

⁴⁴ Aba hoowa gwanda ghuughuutka mameewa, ea beasta mamisa.]

⁴⁵ Eara geashtaang'u iyaschoardaneey ghang'wana gilaji. Ghang'wana ginyasi eaweega eara beaha geeshagi, mwasamwa gideaba gindeawi geeshangaagu duwaawi amadu geejakseey jeeda beasta manda muudeanooda.

⁴⁶ Aba hoowa gwanda ghuughuutka mameewa, ea beasta mamisa.

⁴⁷ Eara gheang'daang'u iyaschoardaneey, ghang'wana giloodu! Ghang'wana guwi jeeda gheambalmeeda ASEETA nea gibeahi ghaang'agi. Mwasamwa gideaba gindeawi gheanyangaagu duwaawi amadu geejakseey jeeda beasta manda muudeanooda.

⁴⁸ Aba hoowa gwanda ghuughuutka mameewa ea beasta mamisa.

⁴⁹ Gaygaba siisi simiina beasta.

⁵⁰ Balang'da gida miy gil. Amadu balang'da iinihuta samneadaanyi gaygudu eesima naaha? Gagasa ahuwa balang'da aba jeedeang'wa nea goobeayi hoyyoo nea goorooroochi.”