Marko 8 - Bibliyeeda Ghaydit

Yesu ghoang'aata fih sagalamnyooji ang'wan

¹ Iidu ghabwat geat eemeetuw gicha, ea ghwasaang'ayiit. Abeeda fiisu mandeawana gichea ghwaak. Hean gaguursa Yesu ginealangaaschi ak gwayeesha,

² “Aniini ghaabwaydi fiisu aba gideaba neandeayeesi hiji nea ghamneawa ea eaweeteaba samwagu gil, nea miighwanyas gilak.

³ Iyeasiksi gaweay ghoah nea ghwaat jalooda gwanda gea jea goohiili aba naweeda, aba gideaba jeeni gwanda fuga leabu heesheagi.”

⁴ Geeyeesha Yesu aba girukusa Ginealangaaschi, “Ghamneawa mukaatajeega jea goolang'u fiisu deenuun gajeegeanana yeenu aba dareabeedi.”

⁵ Gwayeesha Yesu giinealangaaschi, “Goondeawi mukaataji hada aba hiji?” Gwayeesha giinealanga niny, “Aba hiji geandeawi mukaataji ispwa.”

⁶ Hean ghwalamda Yesu ak gwayeesha, anung' goobiitpiit buuneeda aba ng'eanyi. Hit gageanu Yesu mukaatajeegiga ghwanyawa asispwaan ak ghanyi ghamwaash ASEETA. Gageanu ak gwalakiisa ginealangaaschi nea gwayeesha, oatawaada buuneeda. Ghoadaw giinealanga buuneeda mukaatajeegiga.

⁷ Abeeda gwanda eara ghweayeesu ng'ay. Gageanu Yesu ak ghamwaash ASEETA eara aba ghweayeesu ama hit ghoadaw giinealanga nea gwayeesha, oatawa buuneeda.

⁸ Gweagiischi fugiga seaniin ea gwalang'u. Hit agiischooda buuneeda nea geeweamu lajanga abit ghwanyiit sooscheew ispwa.

⁹ Nea mooneeda fuga ghwanyawa siing'aata ea sagalamnyooji ang'wan. Hit agiischooda gwasiksa Yesu buuneeda gaweay.

¹⁰ Deagheata gawa Yesu jeeda maleambooda nea goodeayi ginealangaaschi ak gaweay ng'eanyiida Dalmanuta.

Fuga Farisaayo gagasa gwadeagooda

¹¹ Ghapka fuga was Farisaayajeega heeda Yesu ak gwasheang'nyi sea Yesu. Nea abeeda geegasa eaghas aba jeeda baloaldaanyi, geegasa gwasin gwadeagooda jea ghoahiimu gideaba niny huumwa gil goojeagu ASEETA.

¹² Gagiisan Yesu aba gurooroadaanyi aba ng'asheanji ak gwayi, “Anda fiisu bea seaygeaniin gagassiidunu gwadeagooda? Adiidu. Aba huumwa fiisu bea seaygeaniin mwajeataw gwadeagooda.”

¹³ Ghang'eat Yesu ghang'amwa ng'eang'da nyaawa. Gwading'da maleambooda ak gawa ea ghoaghaawa basooda.

Matawanda fuga Farisaayo ea dea Herode.

¹⁴ Abeeda giinealanga Yesu niroosa eadita mukaatajeega deayeat, abeeda aba jeeda maleambooda gwandeawa mukaatajeanjagi ak ghwahit.

¹⁵ Iidu gwareekusa Yesu ginealangaaschi nea gwayeesha, “Ashageada matawanda Farisaayajeega ea dea Herode.”

¹⁶ Iiy giinealanga ng'asheesu gabiissa gwasheang'nyi sean nea gwayi, “Nih ghamneawa ghwanyaashtunu aba gideaba meekari mukaate aba hiji.”

¹⁷ Gabay gwajeeng'u Yesu ak gwayeesha, “Anda agooga goosheang'nyeesi ng'asheega nyoota mukaate? Asi eara giloanali ghana gili oojeeng'u mandana? Eara iheengeagwa mwariishta?

¹⁸ Asi agooga goondeawi gheanyanga ak ea moang'weardani? Goondeawi iidiga ak ea moayiinyani gili? Ea moapkaadi eara gidaghayi

¹⁹ eaweeda ghayi ealakiisiini mukaataji muut fuga ghayi as sagalamnyooji muudi? Heapi iisiiweamu lajanga ghwanyiit sooscheew hada?” Geeyeesha, “Ghwanyiit sooscheew damaniyeenya.”

²⁰ “Ama mukaatajeega ghayi aabwanajaadi asispwa ak ghwaak fih sagalamnyooji ang'wan, iidu nea gooweamu lajanga abit ghwanyiit sooscheew hada?” Geeyeesha, “Ispwa.”

²¹ Hean gwayeesha, “Ak ea mii ajeeng'ni?”

Yesu ghoahaap siida ng'oaw bea ng'eanyiida Betsayda

²² Ghwahita Yesu ng'eanyiida Betsayda nea goodeayi ginealangaaschi. Hean gweadu buuneeda siisi ng'oaw ak geemus Yesu gideaba waasana geatingaagu.

²³ Ghoang'waay Yesu geatingeaba siidida ng'oawiin, gooruuteawa jeeda ghooriida, ak gang'usha gheanyanga aba ng'usheega, ak ghwayiin geatingaaschi uhuuda ak gwayeesha, “Heapi giimuusi daaha gili?”

²⁴ Ng'ata ghoang'wearda Siidida ng'oawiin ak gwayeesha, “Ghaadaayi buuneeda ak gawuurji geediga nea gaweelweel.”

²⁵ Gabiikta Yesu ghoang'waay gheanyangeaba siidida. Hean ghoang'wearda siidida muuchi. Gabiikta gheanyangaaschi ghoang'wearda. Ghwadaa haleanjeeda sean mahoophoopsiina eara gil.

²⁶ Ng'ata gwayeesha Yesu siidida, “Asi una ghoah nea adiski hoowa bea gharang'dean.”

Betaro goodeaga geaw Yesu

²⁷ Gawa Yesu nea goodeayi ginealangaaschi nea gaweay hoowa bea gharang'weaka Gaysariyayda Filipiin. Duu gwanda naweeda, ghoanyaash Yesu ginealangaaschi nea gwayeesha, “Heapi buuneeda iibalool gwayeena geawooschi ng'eaha?”

²⁸ Ghwalamda Saawa ak gwayeesha, “Buuneeda mwaatkwa gwayeena guwoosi Yohaneedida abaatiisachiin, nea mwaatkwa gwayeena guwoosi Eliya nea mwaatkwa gwayi gwadeepa woosa siyagi aba jeeda sibanga ghayi bea garayi.”

²⁹ Hean ghwalamda Yesu ak ghoanyaash saawa nea gwayeesha, “Ama agooga gooyeenyi geawooschi ng'eaha?” Ghwalamda Betaro ak gwayeesha, “Ang'iing'i guwoosi Gristo.”

³⁰ Gwareekusa Yesu saawa nea gwayeesha, Adiidu goorukusi sih iiteanyu.

Yesu gabaloola sawanadeeda ea nuusta ea duunoadaanyi

³¹ Gabiissa hean gooneali Yesu ginealangaaschi nea gwayeesha, Asi anala gideaba Orjeeda Siida gayghwanyas sawanadeeda haw muuchi nea gayghaheawa gweargwa, ea ashoohoodiga hees ea giinealshoodiga diini. Gaygwanuus ama ng'ata eawooji samwagu gaygwaduudu.

³² Ng'asheesu gwarukuta Yesu muuchi nea mwafunya eara gil. Hean ghwaat Betaro Yesu hichpa geaw ak goowoowsa.

³³ Ghwasach ghaat Yesu goong'weersa ginealangaaschi ama hit goowoowsa Betaro nea gwayeesha, “Ng'amwana madeedeanyu ang'iing'i guwoosi Shataani! Ng'asheesu bea jeeda uhuudaang'uuni ghanyea maleapna heeda ASEETA. Suh ng'asheega uhuuda siida gil.”

³⁴ Gaguursa Yesu eemeetuw saang'aan ea ginealangaaschi ak gwayeesha, “Siida wassean iigasa gweadu geeshteanyu, ea adaghwarar geaw, geaghus gageanu beehiidaanyi ak gweadu geeshteanyu.

³⁵ Aba gideaba siida gasa ghoaghu eaweagaaschi gaygabeagu, amadu siida beagu eaweagaaschi aba badaydeanyu ea badayda Giijasta miy gayghoaghu.

³⁶ Heapi ghamneawa siida eara ghwanyas haleanjeeda sean bea muunda ng'eanyiida gaygwaloosa naaha, iihuteawi eaweagaaschi?

³⁷ Ama siida gayghoadayda naaha jea ghoalaaja eaweagaaschi?

³⁸ Siida wassean aba seaygeani bea riing'eeda biissa ea meawala ASEETEAN, siida isinnean gheanyanga ea ng'asheegeasu, abeeda Orjeeda Siida gaygwasissa gheanyanga siidida, damanda jea ghoana nea nighaambiit ghwaan sea giijasoodiga ghaydidi bea humng'eeda.”