Marko 7 - Bibliyeeda Ghaydit

Ng'asheega siing'waanyaana fugeaba garayi

¹ Ghapka fuga mwaatkwa was Farisaayajeega nea goodeana giinealshoodiga diineeda Yahudi nea gwaleabu Yerusalemu ama hidu gooweameesa heeda mida Yesu.

² Hidu nea ghoang'wearda ghwadaah giinealanga mwaatkwa bea Yesu gweagiischi nea meahuuna geatinga.

³ Aba gideaba fuga was Farisaayajeega ea fuga sean was eemeeda Yahudi inyeesa gwasinda ng'asheega gidaghayi ang'waanyaanda fugeaba garayi; iissa ea mayghwaak gil nea meahuuna geatinga muuchi.

⁴ Saawa mayghwaak gida leabu jarooda nea meenyooghanyi eehuun. Gwanda seareeda ghayi siing'waanyaana inyeesa geehuun gweerajeega, ea dahuundiga, ea bakurajeega gharinga.

⁵ Ghoanyaash Yesu, fuga was Farisaayajeega sea giinealshoodiga diineeda Yahudi, “Ghwasaan anda giinealangaagu moang'waanya ng'asheega ghayi bea fugeaba garayi? Eara iyagiischi ghwaakta geatinga meehuuna?”

⁶ Ghwalamda Yesu ak gwayeesha, “Fuga amiitu geat! Niiw huumwa ramoraneeda ghayi rukuteawa. Isaya badahuukeagwa, ‘Ghayi gwayi ASEETA, Fiisu gwasinunean mureeda aba ghuusiga ak ghwahit, nea gurooruunatka nyaawa ea sheageeweani.

⁷ Eara gabatean ghanyea maygwaloosa gil. Aba gideaba gooneali buuneeda huumeanyeeka mawoosa geasu was gea buuneeda.’

⁸ Agooga ghoanung'waadi diigheanda ASEETA ak ghoang'waanyi fughareenga buuneeda.”

⁹ Gabiikta Yesu ak gwayeesha, “Agooga goowooschi milmili. Ghoanali amulsiina deaweedeeda ASEETA aba ng'asheegeagwa oang'waanyaanyi.

¹⁰ Ghayi gwayeesheegwa Musa, ‘Sissiina gweanu ea geamadu mureeda’; nea, ‘Siida iimwaashta ghwaan ghana ghaamwat gagasa ghami.’

¹¹ Ghoayamnyi agooga ak gooyeeshi, ‘Siida iimideawa gili ghwanyawa jea ghoadaw ghwaan ghana ghaamwat, amadu gwayi gili Gorbani’

¹² Abeeda siisi gajea ninyas gida jea gamulsiinda weeta ghwaan ghana weeta ghaamwat.

¹³ Nih ghamneawa Gidoofooldi ng'asheanda ASEETA gil, aba giinealshoodeang'wa oang'waanyaadi. Nea goosinayi eara ng'asheega saang'a uurji suh.”

Ng'asheega ng'uta buuneeda ririnnyeanda

¹⁴ Ghabwada geat Yesu eemeeda ama hit gwayeesha, “Oaleaydiit oogasean ak goojeeng'u.

¹⁵ Manda gichea gawa jeesiida leabu jarooda, jea ghang'uda siida ririnnyeanda. Amaduuku ng'asheanda leabu jeesiida ea gea ng'uta siida ririnnyeanda gil.” [

¹⁶ “Siida agar iita ea daayiinya ng'asheesu.”]

¹⁷ Iidu nea gwaheeli eemeeda nea gawa jeeda ghooriida ghoanyaash Ginealangaaschi ng'asheega gwachi gala geadiin.

¹⁸ Gwayeesha Yesu, “Asi eara agooga moanali? Moanali gideaba gidawea jeesiida leabu jarooda, moamu ghang'uda siida ririnnyeanda,

¹⁹ Aba gideaba mawa jeeda guroorooda, gawa jeeda siyeakiisa hamita. Amadu gwarita jarooda.” (Aba sareani Yesu goohiimsa buuneeda gideaba hamichoojiga sean ghwadoabiiw.)

²⁰ Gabiikta Yesu gwayeesha, “Siida geaghus ghang'uda ririnnyeanda ng'asheega munyas leabu jeadaanyi.

²¹ Aba gideaba ng'asheega leapu jeesiida gwaleabu jeeda gurooroadaanyi nea giika munyasiini gil, nea hiseadayeanduumeeda,

²² Ea gwadishta, ea nuusta buuneeda, mealuuleega, shidoodeaba ghaang', munyinda, lachng'eanyiida, ririnnyeanda, geawunda gheang'da, giing'weaka, ghwarjeeda ea leendeeda.

²³ Ng'asheesu munyas seaniin gwaleapu jih ak gang'uta fih ririnnyeanda.”

Masaweespa gatmu

²⁴ Ghabeawa Yesu hoowa, ak gawa ng'eanyiida Diro. Aba hoowa iidu gawa jeemba ghoah nea magassa ghwanal sih amadu ghwaraay ghafuy geaw.

²⁵ Abeeda gwanda Gatmooni mida jeebi itaanyi bea haweega beardooschi meang'nyeandeenda, nea ea ninyas iita Yesu, Ghwaan ama hidu goobeedeaysa madeadaanyi.

²⁶ Gatmooni abeeda gaba eemoojiga. Gaba ng'eanyiida Foinikeeda mida jeeda Shaamu. Hidu Gatmooni gwayeesha Yesu, Eaniyean nung' gwariteaysa hudeanyu meang'nyeandeenda.

²⁷ Ghwalamda Yesu ak gwayeesha, “Ameasa ghanyi gwalang'u diibiga, mwadoabiiwa gideaba geegeanu hamita diibiga ak geejaksa gudajeega.”

²⁸ Gwayeesha Gatmoodida, “Ea Siida mureeda, eara gudajeega inyeesa gooliim murmurga abuutpuut diibiga iyagiischi.”

²⁹ Gwayeesha Yesu, “Aba ng'asheanji ghamneawa iriguun, una ghoah hudaang'u niriteaysa meang'nyeandeenda!”

³⁰ Gawa Gatmoodida ghoah ama hita ghwadaah hudaanyi gawiil geaw aba bulaliida nea niriteaysa meang'nyeandeenda.

Yesu ghoahaap siisi miy manda ghuuta

³¹ Ghang'eat Yesu gawa ghang'amwa ng'eanyiida Diro. Gawa ak gwasik ng'eanyiida Sidoni, ak ghwahita Basooda Galilaya, nea gwasik mujiinajeega atamanamughuush siguura Dekapoli.

³² Ghwahidu heeda Yesu fiisu eatu siisi miy biissa ea manda ghuuta. Siihiidu geeyeesha Yesu, eaniyean mwasa ang'waanya uhuudeaba siisi.

³³ Gageanu Yesu siidida ak gooruuteawa jeeda eemeeda. Hit gageanu ak ghoabuuta mooringaaschi jeesinga iidiga, gang'usha nea gageanu ak ghwasat ng'ushapta.

³⁴ Hean goong'weersa Yesu humng'eeda, amahit goosiima, ak gwayeesha siida ghwanyawa miyaan, “Efata!” nea gideaba, “Jaadana.”

³⁵ Hean gabiissa ghwajaada iidigeaba siidida ak gootina ng'ushapta, ak eara ghuutaanyi gabiissa ghoamu gabalool.

³⁶ Ng'ata gwayeesha Yesu buuneeda, ng'asheesu easinyiin adiidu ghoanung' ghwayiiy eara siida. Nea iissa gidaheawaata gideaba adoorukuti ada ghoaraanya buuneeda rukuteayda.

³⁷ Ghahamng'eanyi buuneeda muuchi nea gwayi, “Gwasin ng'asheega sean nea ghoadoabiiw, ghwanung' gwayiing'shi fuga miinyi nea eara gea manda ghuusiga gabalool!”