Marko 6 - Bibliyeeda Ghaydit

Yesu geaheawa aba Nasareti

¹ Ghabeawa Yesu hoowa ak gawa ng'eang'da nyaawa nea goodeayi ginealangaaschi.

² Muchu nea eaweeda mideewa sabaato gil, gawa jeeda ghooriida fuga Yahudi siinealshacheewa goonealshi. Ghahamng'eanyi fuga saang'a aleeysiit nea gwayeena, “Asiisi ghwanyasa yeenu ng'asheesu? Ea bareaynadi bea uhuudean. Ak gwasindaan deamdeamanga sina

³ Neada nih ea mii siidida sina beehajeega was orjeeda Mariya bea geenyea Yakobo bea geaba Yose bea Yuda ea Simon? Neada eara haweega ghaamwat ea manda ng'eang'i?” Geamwachmwach ng'asheagaaschi.

⁴ Ghwalamda Yesu ak gwayeesha saawa, “Eara sibaneeda geaghus ghoadaw mureeda fuga sheagi. Sighus fuga ng'eang'da nyaawa ea gea was geenoojigaaschi ea fugeaba gheanyi, aba saawa siisi mawuurji gil.”

⁵ Iidu Yesu ea mudu gwasin deamdeamanga aba hoowa. Ghoang'waay iheeng'spa fiisu ng'ay miyeani ak gaheaba.

⁶ Ghahamng'eanyi Yesu iidaah gidamwamwasta buuneeda ng'asheagaaschi. Iidu gwaskeada Yesu gealga aba hoowa nea goonealshi.

Yesu goojeakta ginealangaaschi atamaniyeenya

⁷ Gaguursa giinealanga atamaniyeenyean ak goojeakta nea ghwanung' gabadiina iyeenya iyeenya. Ghabiiw uurda jea ghwajoara meangeenda

⁸ Gwayeesha, Asi aweayeena nea adiidu ghoasapchi geadi. Daba siisi aada geadi bileangida ak ghwahit. Eara gicha ayaaga adoayaadi geadi, ghana shageeda, ghana lapiya.

⁹ Gwayeesha, oalaabwa geeka ak ea adoalasi hang'weaka iyeenya.

¹⁰ Gabiikta gwayeesha, “Gheeda wassean jea ahita ak ghwadeaptaneegwa oopiidana ea eaghus ea noang'ami hoowa.

¹¹ Nea iyoahiti ng'eanyiida deepa ea meadeaptaneegwa nea ghanyea mealeeyseegwa eara iit, iyoabeawi ng'eang'da nyaawa alalakta birjeanda geeshangeagwa. Abeeda gajea giibuhanda nyaawa gil.”

¹² Hean ghang'eatng'eat giijasoodiga gaweay. Gwarukwiisa buuneeda gideaba, Aduukuunana ng'asheega munyas bea riing'eeda.

¹³ Ng'ata gooruuta meangeenda saang'a, ak ghwayeasha fuga miyeani nagheeda ak gaheaba.

Miyeeda Yohaneeda abaatiisachi

¹⁴ Hean iimuchu eara sugoocheanda siyi Herode ea ninyas iita ng'asheega sina. Abeeda Yesu nigeawiit iita muuchi. Gwanda fugeena, “Nih gwaduudu Yohaneeda ghayi abaatiisachi, ak ghoah uuri ghamneawa sina ng'asheesuun.”

¹⁵ Buuneeda mwaatkwa gwayi, “Nih gwadeepa ea Eliya gil.” Nea mwaatkwa gwayi, “Nih gwadeepa ea sibaneeda. Anda gawuurji siyagi bea sibanga ghayi bea garayi.”

¹⁶ Nyas iita Herode gwayeena, “Nih ghamneawa niduudu Yohaneeda ghayi aalaji gheata.”

¹⁷ Ghayi abeeda eaweecha goojeakta Herode shirikareadaanyi ghoang'waay Yohana ak gwajaksa ghealooniga, aba ng'asheespa gatmooni siguura Herodiya ghayi geena orjeeda geenyea Herode siguura Filipo. Ghayi abeeda Herode ghaghi gatmooni bea orjeeda ghaamwadiin.

¹⁸ Nea ghayi abeeda ea niyeesha Yohana Herode, “Mamiiseey gheana gatmooda orjeeda geamadu.”

¹⁹ Hean ghwasit Herodiya muuchi Yohana ea gidabal gwanuus. Geaghus gideaba moamu.

²⁰ Herode niny ghoawal gheang'da Yohana. Aba gideaba ghwanal beadi Yohana siida doabiwaat biissa ea ghaydit gil. Inyeesa Herode gafur Yohana nea ghabwariiy gooleeysiit girgweageadaanyi ak iissa ghwanung' gwasawana jeadaanyi.

²¹ Eaweecha ghwanyas gheata Herodiya, eaweeda sineewa Herode ghweelmeeda damanda ghayi sijiila. Gaguursa fuga hees ahaaghwa ng'eanyiida, ea fuga hees bea shirikara ea fuga hees mida mwadi bea ng'eanyiida Galilaya.

²² Iidu ghwahidu Hudeaba Herodiya ak ghang'ata gawa madeeda Herode ea rabastaanyi ak ghang'was muuchi ea gahoosan jeesinga buuneeda. Iidu gwayeesha Herode hudida bea Herodiyahiin, “Ng'alaan gidigasayi was sean gaydagoonyi.”

²³ Ghwaak Sugoocheanda habeawooda nea gwayeesha, “Ng'alaan gidigasayi wassean eara ng'eanyiini aahaaghwiin ghaamuuschi dalach bugusta deadeenyi ak geagoonyeey.”

²⁴ Iidu gwarita Hudida ak gaweesa ghaamwat ak ghoanyaash nea gwayeesha, “Iya gaydang'al naaha sugoocheanda?” Ghwalamda ghaamwat ak gwayeesha hudaanyi, “Eeshiina geagasayi uhuuda Yohaneeda abaatiisachi.”

²⁵ Ghafwach Hudida ea ghwahita heeda sugoocheanda ak gwayeesha, “Geagasayi goonean uhuuda Yohaneedida abaatiisachiin nea ginung' eayiin jeeda harakta.”

²⁶ Iiy Sugoocheanda ng'asheanji gagiisan muuchi. Apkaat habeawajeega ghwanyawa ak aba madeeda rabasta ghwaraay gichea ghaheawaata ng'asheanji.

²⁷ Goojeakta shirikarajeandaanyi furiisachi nea gwayeesha. Ng'eada lamwaja una eani uhuuda Yohaneeda abaatiisachi. Gawa shirikarajeanda ea ghwanyasa Yohana ghealooniga ama hita ghwalach gheata.

²⁸ Gweana shirikarajeanda uhuuda Yohana jeeda harakta ak ghoadaw hudeaba Herodiya ak ghoadaw ghaamwat.

²⁹ Nyas iiteaba ng'asheesu giinealanga Yohana ghapka ama hidu gageanda musta Yohana ak gaweay gabuy.

Yesu ghoang'aata fih sagalamnyooji muut

³⁰ Muchu ea nibiigu fuga ghayi ajeakta Yesu was Ginealangaaschi, hidu ghoadaw Yesu iita ginisin ea gida anaal buuneeda.

³¹ Ghwalamda Yesu ak gwayeesha saawa, “Aweayeena hichpa geat ak ghoonyo afuufa gili mwanang'.” Yesu gwarukuta ng'asheanji iidaah eemeeda heeda maweayi suurja ghapka ea ea mwanung' ghwanyasa saawa eara gheata agiischooda.

³² Iidu Gaweay saawa nea gaba geat jeeda maleambooda nyaawa ak goosiipta gaweay hichpa geat.

³³ Ghwadahaada fuga saang'a gidabeada ak geanal gideaba saawa gil. Gwasalda buuneeda goosheeda aba geeshanga ghwalach mujiinajeega sean ea ghwanyoaha ng'eanyi saawa.

³⁴ Duu ghwahita ghuuta basooda ghoang'wearda Yesu ak ghwadaah eemeetuw ak ghabwayda aba gideaba inyeessa buuneeda ea nuwuurji gisilga nyaah haghweadoochean. Hean gabiissa Yesu ghoanaal ng'asheega saang'a.

³⁵ Geeyi bwak ama niriikghta gamikta geeyeesha Yesu aba girukusa ginealangaaschi, “Nukwa ghamneawa nimikta nea geenda dareabeeta manda sih.

³⁶ Siksiina buuneeda gaweay madameega ea gharang'weaka gwasheaysa geat gichea ghwaak.”

³⁷ Ghwalamda Yesu ak gwayeesha, “Oatawa agooga buuneeda gichea ghwaak.” Ghwalamda Saawa ak gwayeesha Yesu, “Gajeeweaya eashaaha mukaatajeega aba dinaaraji bughalaji iyeenya ak geatawji ghwaagi?”

³⁸ Gabiikta Yesu ghoanyaashta nea gwayeesha, “Heapi goondeawi mukaataji hada? Aweayeena oong'weersiina.” Weay goong'weersa gabiigu ak gwayeesha, “Aba hiji geendeawi mukaataji muut ea ghweayi iyeenya.”

³⁹ Hean gwayeesha Yesu giinealanga anung' goobiitpiit buuneeda aba heeda mida nyeega nyawiiri nea ghoanung' gwasina gharmucheeka eata fih bughala ea gea eata fih haradam ea damanamughuush.

⁴⁰ Hean Geanung' goobiitpiit buuneeda nea geanung' gwasina gharmucheeka eata fih bughala ea gea eata fih haradam ea damanamughuush.

⁴¹ Ng'ata gageanu Yesu mukaatajeegiga ghwanyawa amuudiin ea ghweayeegiga ghwanyawa asiyeenyean ak goong'weersa humng'eeda ak gabadiischeesa ASEETA. Gageanu mukaatajeega ghwanyawa ak ghabwanajaada aba geatingaaschi ak ghoadaw ginealangaaschi gwalakiisa buuneeda. Eara ghweayeega ghwanyawa asiyeenya ghwanung' googuuli buuneesean.

⁴² Gweagiischi fugiga seaniin ea gwalang'u.

⁴³ Hit agiischooda buuneeda geeweamu mukaatajeega abit ea ghweayeega abit ak ghwanyiit sooscheew damaniyeenya.

⁴⁴ Nea fuga siing'aataawa mukaatajeega ghwanyawa ea sagalamnyooji muut, headiga ak ghwahit.

Yesu ghabeawa badayda beega

⁴⁵ Deagheata ghwanung' Yesu gaweay ginealangaaschi jeeda maleambooda nea gwayeesha, oosheeda ookghaawana basooda aweayeena hoowa bea ng'eanyiida Betsaydaan. Aniini ghaaghanyi dahuuydean daheeli eemeeda.

⁴⁶ Iidu nea niheeli buuneeda gawa uhuumba heaya ghamwaash ASEETA.

⁴⁷ Ghoaw shing'ada nea maleambooda gwanda bugusta basooda nea Yesu gaba geaw aba ng'eanyiida ghajaam.

⁴⁸ Ang'wearda ghwadaah nea gwadeawiit ginealangaaschi aba manmanda maleambooda nea ghwaak milaada aba gideaba gooyuuk maleambooda jeameeda. Ghargayeew ghabeawa Yesu badayda beega nea gaweesa ginealangaaschi mida jeeda maleambooda. Gawa nea gwahinda gili jea ghwasuut.

⁴⁹ Hean sidaah nea ghabeawa badayda beega Googuul nea ghaghay gili dea maloonghajeanda.

⁵⁰ Sidaah ghang'ut sean muuwda. Iidu ghwanya ghuuta Yesu nea gwayeesha, “Asi abisiina ahawda! Siida aniini gil adoabeali!”

⁵¹ Gwading'da niny maleambooda ak ghahawuda jeameeda. Ghwanung' ghahamng'eanyi saawa muuchi.

⁵² Ghabeal muuchi aba gideaba mwanala ng'asheega ghayi bea mukaate. Nea gwasin hang'ooynacheeka gurooruunatka nyaawa.

Yesu ghoahaap fuga Genesareti

⁵³ Ng'ata nea gooyeawusa ng'eanyiida Genesareti, ghwanung' gooduuw maleambooda nyaawa aba ghuuta basooda.

⁵⁴ Hita nea ghwararang'aana jeeda maleambooda gabay ghwadaah buuneeda ak geanal.

⁵⁵ Gwasalda buuneeda gaweay gealga ak gwasareenu fuga miyeani siyeatuuna muuchka nyaawa eayaat heeda wassean siyiing'sa Yesu.

⁵⁶ Heeda lah Yesu sean mida gharang'weaka ghanea mujiinajeega gil, ghanea madameega, inyeesa Geayiin fuga miyeani gheata naweeda gawa ghwanyasa nea geeyeesha geat eara ghanyi ghawaap weeleeda hang'daanyi gaygaheaba buuneeda. Ak ghoah huumwa fuga waasa geat weeleeda Yesu gaheaba.