Marko 5 - Bibliyeeda Ghaydit

Yesu ghoahaap siida bearji meangeenda

¹ Muchu ghwahita giigheawda basooda ng'eanyiida Gerasi.

² Deagheata nea gwarina Yesu jeeda maleambooda geadaah siisi mideawa meangeenda nea gwaleabu heeda sibunyiisa buuneeda ak gwaroonyi.

³ Siisi eawoojisu goobiita hoowa sibunyiisa buuneedean nea ghanyea manda siisi ammu ghwarat aba munyaloalajeega.

⁴ Nea eara iisirata munyaloalajeega ghana biingu inyeesa gang'acheaweada sean nea ghanyea moamu sih ghwajoar.

⁵ Inyeesa Goojuureadayi eawa ea askweari nea gahoona geaw hoowa sibunyiisa buuneedean ea jeesinga beareega nea inyeesa ghabwaashaadawa geaw lagheanga.

⁶ Iidu nea ghwadaah Yesu nea gudeasheagi Ghafwach ama hita heeda ghwahiiy geaw aba mureeda aba madeeda Yesu

⁷ ak goojuur nea gwayeesha, “Geendeayeesi naaha Yesu sea ang'iing'i, Orjeeda ASEETA haw? Geamuscheey aba gheawunga ASEETA adisawanyean!”

⁸ Aba gideaba niyeesha niny, “Riteaysiina siisi!”

⁹ Ghoanyaash Yesu nea gwayeesha, “Gheawungaagu ng'eaha?” Gwayeesha siidida, “Gheawungeasu geeguura Lugooda, aba gideaba aseasa geewooschi saang'a.”

¹⁰ Gamearmearani Yesu nea gwayeesha, eaniyean adigutidaneasa aba ng'eang'i.

¹¹ Abeeda gwanda hoowa hawanda ukurmajeega siihaaghwa aba geeshta heayeeda.

¹² Gamearmearani, Meangeenda Yesu nea gwayeesha, “Nung' eeweaya jeedeaba ukurmajeegiga.”

¹³ Gwasiksa Yesu lugoodida bea meangeendean, ak gwariteaysa siidida ak ghoabita jeeda ukurmajeega. Abeeda ukurmajeega gwariiksa sagalamnyooji iyeenya. Gamng'aw ukurmajeega ak ghoabuutaawa geat mareecheanda ak ghwaak basooda sean.

¹⁴ Gwasalda fuga gwachi ahaaghwa ukurmajeega ak gaweay ea ghwahita mujiini ea heeda mawoosa mujiini. Ghapka buuneeda ghwadaah ng'asheega bunu.

¹⁵ Gaweay ama hita hoowa mida Yesuun ghwadaah siidida eawoojisu ng'utooschi lugooda meangeenigean nea goopteada nea gookwa hang'daanyi nea nibiiksa fughareadaanyi, ak geabeal.

¹⁶ Iidu gwarukusa fuga gwachi dea ng'asheesu buuneeda suurja iita gidabussa siidida bearji meangeendean ea iita ukurmajeega.

¹⁷ Hean geebiisa eemus Yesu gideaba ng'amwana ng'eang'deanya.

¹⁸ Daah Siidida nea gawa Yesu jeeda maleambooda gamus goodeayi.

¹⁹ Ghaheawa Yesu goodeayi siidida. Ghoadeal nea gwayeesha, “Una ghoah ak girukusi ng'asheega sean fuga ghaheang'wa ea gida niweataneey Ng'utamiida ea gida nibwaydaaydaneey.”

²⁰ Gawa Siidida ak gwarukwiida alooheeda ng'asheega miyaasiin sissa Yesu aba jeeda mujiinajeegiga atamanamughuushiin. Nyas buuneeda iidi bea ng'asheesuun ghahamng'eanyi sean.

Giiheapta hudeaba Yayro ea gatmooda waas weeleeda hang'da Yesu

²¹ Gwading'da Yesu maleambooda ghoaghaawa basooda ak gawa ama weah giigheawda gooreemsa Eemeetuw gaweay ghwanyasa hoowa.

²² Iidu ghwahidu heeda siisi siguura Yayro siisi abeeda gaba fuga hees ahaaghwa ghooriida fuga Yahudi siinealshacheewa. Hita Siisi goobeedeaysa madeeda Yesu nea gwayeesha,

²³ “Jeebi iteanyu mwanang' bea haweega ghabwar miyeeda. Eaniyean beeni waasana geatingaagu ak abeeda gayghahaap.”

²⁴ Ghang'eat Yesu goodeayi siidida. Ghabwaang'aada eemeetuw gamaseaw nea geasaabwan.

²⁵ Abeeda gwanda hoowa gatmooni aream foojeanda galeagasean gweanyeew damaniyeenya.

²⁶ Gatmooni abeeda niduulu haleanjeadaanyi aba beata gealga meanga nea ghanyea maloosiina eara gil gwareanyiisachi muuchi.

²⁷ Abeeda ninyas iita Yesu Ghwaat geeshta ak ghawaas weeleeda hang'da Yesu.

²⁸ Gwasin ng'asheanji nea gwayeesha geaw, “Iyaawaaschi weeleedeaba siisi ghaanali gaydaahaap.”

²⁹ Hita nea ghawaasa geaw weeleeda hang'da Yesu deagheata gageanda giireemdida bea foojeandean. Nea eara iisawsa saseadaanyi ghwadaah nimajeegiit.

³⁰ Jeeng'u Yesu gidabeada nisuunya uurdaanyi gwasachsa ghaat eemeeda ak gwayeesha, “Ghawaas ng'eaha weeleeda hang'deanyu?”

³¹ Gwayeesha ginealangaaschi, “Girukutaaydiin gideaba, ‘Ghawaas ng'eaha,’ nea gidaahi gidariistaneey buuneeda?”

³² Goong'weerng'weersa Yesu meadajeega sean ghwadaah ea jea ghwanyas siida ghwanyawa waas.

³³ Iidu nea ghwadaah gatmoodida gideaba nihaap gaweesa Yesu nea ghaboadanaada aba muuwda ama hita gwatkuy aba madeadaanyi ak ghoadayda iita sean.

³⁴ Gwayeesha, Yesu gatmooda, “Hudeanyu, gidahaapnyi masaweagaagu, una nea gibeahi seayu nea gagasa ea mabiikseey geeyooni.”

³⁵ Duu goobalool Yesu gatmoodida deagheata ea siicheagu fiisu leabu gheeh Yayro ak gwayeesha, “Jeeptaang'u nimi. Ghwasaan anda giideawiidi giinealshoocheanda?”

³⁶ Nyas Yesu iidi ghoanaawa geaw ak gwayeesha, “Adibeali. Heapi ang'iing'i mwasa.”

³⁷ Hean ea moodeayi fih suuk geaghus Betaro, Yakobo ea Yohaneeda geenyea Yakobo.

³⁸ Ghwahita gheeh Yayro ak ghwadaah Yesu eemeeda mwahawda heeda mwasakta dabeaka suurja gagutu heareega nea ghoahaawda.

³⁹ Hita Yesu gwayeesha, “Anda agooga gooyeawdi nea mandaneegwa eara hawdaaw? Jeapaang'u eara miyeeda miighami. Gabeachi ruweanga ak ghwahit.”

⁴⁰ Gabara reari buuneeda. Hean gooruuta buuneesean jarooda ama hit gaguursa ghweanda baleanda ea gheamata baleanda ea ginealangaaschi ghwanyawa adeana ak gaweay hoowa bea gah mida jeeptean.

⁴¹ Hita Yesu ghoang'waay geatinda baleanda nea gwayeesha, “Dalitakumi”; nea gideaba, “Huda mwanang' ng'eada!”

⁴² Deagheata gafakna geaw ng'eanyi hudida ak ghang'eat gawa. (Jeeptida abeeda gaba gweanyeew damaniyeenya.) Ghwanung' ng'asheanji ghahamng'eanyi buuneeda muuchi.

⁴³ Iidu gwayeesha Yesu buuneeda, Adiidu goorukusi gili gwachi easinyiin. Ng'ata gwayeesha oatawa huda gichea ghwaak.