Marko 4 - Bibliyeeda Ghaydit

Gida sigala siida weah gwahista booga

¹ Gabiikta Yesu goonealshi gicha aba ghuuta basooda. Ghwasaabwan Eemeetuw ea eanung' gawa jeeda maleambooda ak goopteada. Abeeda buuneeda goobiitpiit aba ghuuta basooda ng'eanyiida ghajaam.

² Hean gooneali buuneeda ng'asheega saang'a nea gagala geat ng'asheega. Gwayeesha aba jeeda giinealshoadaanyi,

³ “Oaleaydiit! Ghayi ghang'eat sih gawa gwahista booga.

⁴ Hita nea gwahista boagaaschi gwanda booga abitpisa heeda was naweeda buuneeda, iidu ghwahidu dariidaka ak ghwaak.

⁵ Gwanda eara booga abitpisa heeda was badayda harearacheanda heeda manda sigeemba huumwa. Boosu gabay gwardu aba gideaba eara sigeedeaba hoowa eang'ay.

⁶ Boosu iidu ghwalas daknooda nea gudugwanda ghuusiga sigeeda, ak gabay ghaghajaamiit aba gideaba manda sigeemba huumwa ang'waay hawunga.

⁷ Gwanda eara booga abitpisa jeeda geediga halaghweenga, iidu nea gwardu boogiga ea maji gil aba gideaba ghwariis geediga halaghweenga.

⁸ Gwanda eara booga abitpisa jeeda sigeeda miyaas, iidu nea gwardu gwaji muuchi. Ghealooniga meateena booga diktam ea damanamughuush, suurja gweata laadam nea suurja gweata bughala.”

⁹ Iidu nea gayghoabuut Yesu ghuuta baloaldaanyi gwayeesha buuneeda, “Siida agar iita ea daayiinya ng'asheesu ikeasuun.”

Gida sigalla ng'asheega

¹⁰ Iidu nea gwandeawa Yesu geaw, gaweesa fuga gwachi aleeysiit sea ginealangaaschi atamaniyeenya ak geanyaash gidagwachi baysiina galoodeaba geat bea ng'asheega.

¹¹ Ghwalamda Yesu ak gwayeesha, “Agoogeeni ghamneawa simeayneegwa makcheameeda Gheambalmeeda ASEETA. Ama sinung' fugiga manda jeedeaba gheambalmeeniin, saawa ng'asheega iijea eerukwiisa geaghus eegala geat.

¹² Ghoaw ramoraneeda ghayi sirukuta bea gideaba, fiisu gayghoang'wearda muuchi, ak ea mayghwadaah gil. Iidiga nyaawa gaygwayiing'shi muuchi, ak ea manda gili jea gwajeeng'u. Ghang'wana gwachi gwayamsa geat ASEETA ak gwasamsa riing'eega nyaawa.”

Yesu gwarugu ganeega siida weah gwahista booga

¹³ Hean ghoanyaashta Yesu ak gwayeesha, “Asi agooga mii ajeeng'ni eara ng'asheesu eagali geadiini? Gajoamuustaan ajeeng'ni ng'asheesu jea dagala geadiin?

¹⁴ Siida weah gwahista booga gwahista ng'asheega ASEETA.

¹⁵ Boogiga abitpisa ghuuta naweedean fugiga iiy ng'asheanda deagheata ghwahidu Shataani ak gageandeawa jeesinga nyaawa.

¹⁶ Booga abitpisa badayda harearacheandean. Fugiga ama iiy ng'asheanda ghwadeapta nea gahoosan.

¹⁷ Ghanyea mandeawana hawunga iissa ghanyi gageanu gheadi nuwaas iihidu sawanaduutka ea munyinda gabay ghwalagaan.

¹⁸ Boogiga abitpisa jeeda halaghweengean, fugiga iiy ng'asheanda ASEETA,

¹⁹ iidu ghwahidu mitagheasta muunda ng'eanyiida bea geaba gasooda baruureega, ea seechmeeda seach saawa gilinyoo ghwariis ng'asheandida, ghwanung' ea mudu gwaji haghweega.

²⁰ Boogiga sihisa jeeda sigeeda miyaasiin, fugiga iiy ng'asheanda ak ghoang'waay ak gwaji haghweegean. Ghealooniga meateena booga diktam ea damanamughuush, suurja gweata laadam nea suurja gweata bughala.”

Gheaboong'nyeanda sidukuta

²¹ Gabiikta Yesu ak gwayeesha, “Gheaboong'nyeanda iijea eapwaang'da gajeedukuteawa dahuuda ghana jea eayiin uuta bulaliida? Manda ea meakghusa ak geayiin uhuumba gili?

²² Asi gilinyoo ea funyaat gajeenung' ghwadaajiit. Nuut gicha gissidukuta gajeenung' ghabwar daknooda.

²³ Asi Ayiinya iyoondeawi iidiga!”

²⁴ Gwayeesha Yesu saawa, “Ooleeysiina iit muuchi ng'asheesu oayiinyiin! Gidooteeniidi agooga gajeeteeneegwa nea geanung' ghwanaawda.

²⁵ Aba gideaba siisi agar gil gajeeheasa nea siidida meagara giliin, eara gidida mwanang' mideawean gajeareat.”

Gida sigala bookcheanda ridu

²⁶ Hean gabalool Yesu nea gwayi, “Gheambalmeeda ASEETA gajeegala siisi ghayi weah gwahista booga.

²⁷ Niny iissa iihidu eaweeda gawa gwalil, nea askweari ghoang'wearu, nea mwanala eara bookcheandida gidariteayda.

²⁸ Funooda bookcheanda goobal Sigeeda ak ghwahit. Iissa ghwanung' ghanyi gwasin mbearga, hean gabiissa ghwasar muhooga, iidu muhoogiga ea nisin gheanyanga booga.

²⁹ Iidu nea booga ea niheas, gaygawa seabwa ghwalach aba gideaba ghwadaah nihita damanda lajita.”

Gida sigala ghajiileanda geeta siguura haradaali

³⁰ Iidu gwayeesha Yesu, “Gheambalmeeda ASEETA gajeegala naaha? Iijea eerukuna gajeegalana naaha?

³¹ Gaydagala ghajiileanda haradaali. Ghajiileandeaba geedi aamwanang' ea ghwalaabwa hoowa ghajiileamba geet nuut.

³² Amadu nea geayiin jeesigeeda gwardu ak gwaheedu ea ghoah geeta gidahaw naawa geediga sean bea madamnyeanda. Iissa gwasin damealga duguuga hees ea ghamway jirooneadaanyi dariidaka.”

³³ Abeeda Yesu iinyo gagasa gwarukuta giijastaanyi, inyeesa ng'asheega aasaang'a gea gala suurja.

³⁴ Miighanyi gwarukuta ng'asheanji magalana nuut. Iidu nea gwandeawa ginealangaaschi ak ghwahit, gwarukusa ganeega ng'asheega sean nea mwafunyana eara gil.

Yesu gwareekusa siilakghta basooda

³⁵ Shing'adeedeaba eaweedida gwayeesha Yesu ginealangaaschi, “Eaniyean eakghaawana basooda eebu meatkweedida.”

³⁶ Gooheeli geat eemeedida saang'aan. Gaweay giinealanga jeeda maleambooda ghwanyawa mida Yesu ak gaweay nea ghwaat Yesu. Abeeda gwanda hoowa maleambajeega suuk.

³⁷ Iidu ghang'eat siilakghta aba jeeda basooda. Ghwalas maleambooda laweajajeega ak ghwanung' gwaneawiida beega ea ghwanyiit jeeda maleambooda.

³⁸ Abeeda Yesu gwalil aba hoowa bea uuta maleamboodean nea gwadiiwa uhuudaanyi hang'da was gheabuuscheanda. Ghwaheat giinealanga nea gwayeesha, “Giinealshoocheanda, asi ang'iing'i eara nyariideanya miduupi?”

³⁹ Ghang'eat Yesu ak gwareekusa siilakghtida nea gwayeesha basooda, “Siinda! Eena saw!” Gwareegweesa jeameeda. Gwayi basooda sean saw!

⁴⁰ Hean gwayeesha Yesu ginealangaaschi, “Ghoabealeegwaani? Moondeawani masaweega?”

⁴¹ Ghabeal muuchi ak goonyeari geat, “Nih siisi uurjiini? Siida nukwa ghoawal gheang'da eara jeameeda ea basooda?”