Marko 3 - Bibliyeeda Ghaydit

Yesu ghoahaap siida aptu geatinda

¹ Iidu gabiikta Yesu hoowa bea jeeda ghooriida siinealshacheewa nea abeeda gwanda hoowa siida aptu geatinda.

² Abeeda gwanda Fiisu gasa ghoahaakta Yesu, hean ghoamuughu ghwadaah ea jea ghoahaap siidida eaweeda sabaato. Aba sareani geegasa gichea eanyasta ramaseanda jea eahaaktaawa

³ Iidu gwayeesha Yesu siidida aptu geatindean, “Beeni hiji bea mwadiin.”

⁴ Ng'ata ghoanyaash Yesu fugiga nea gwayeesha, “Ghwadoabiiwi gideaba geesin ng'asheanda miy eaweeda sabaato ghana gideaba geesin ng'asheanda muy; ghang'wana gideaba geakghu eaweega ghana gideaba geelaku?” Ea measha ghuutaanyi geasiinda.

⁵ Hean ghoaduup ghaang' Yesu buuneeda aba nyarasta ak ghang'ut giiseaneega iidaah hang'ooynacheeka gurooruunatkeaba fugiga. Gwayeesha siidida aptu geatindean, “Asi adoabiiwa geatindaang'u.” Ghoadoabiiw siidida geatindaanyi ak gabiikta geatinda gamajegiit.

⁶ Deagheata gwarita jarooda Farisaayajeega ak gaweay gang'weaschi sea fuga Herode, ghwadaawdaaw gichea ghwanyasta gheata nuusta Yesu.

Fuga saang'a mida ghuuta basooda

⁷ Gawa Yesu nea goodeayi ginealangaaschi ea gaweay hoowa bea ghuuta basoodean. Ghwaat geeshta Yesu eemeetuw, nea gwaleabu ng'eanyiida Galilaya ea ghoah ng'eanyiida Yudeya

⁸ ea gea Yerusalemu ea ghoah Idumeya, ea ghoah eenda Yordani, ea ghoah murdajeega mujiinajeega geaba Diro ea Sidoni. Iiy eemeeda ng'asheega sina Yesu gooreemu ghapka headaanyi.

⁹ Daah Yesu gida jea ghwariista buuneeda aba ghuuta basooda gwayeesha ginealangaaschi, Anung' goosiibu maleambooda ea mwariisan buuneeda.

¹⁰ Abeeda nihaap fuga saang'a, ghapka fuga geeyoonung'weaka nea gagasa ghanyi ghawaas Yesu.

¹¹ Nea fuga bearji meang'nyeandeenda iinyo gwaroonyi Yesu, goobeedeaysa madeadaanyi nea goojuur nea gwayeesha, “Ang'iing'i guwoosi Orjeeda ASEETA!”

¹² Iidu gwareekusa Yesu meangeenda nea ghoang'waaniit gideaba, adoorukusi buuneeda siida eawooschi!

Yesu gagwalu giijasoodi damaniyeenya

¹³ Iidu gawa Yesu ama weah uhuuda heayeeda gaguuriisa fuga gasa niny, Gaweay heeda fugiga.

¹⁴ Gagwalu fih damaniyeenya jea goodeaydooschi jea ghoah Giijasoodigaaschi jea gaweay gwarukwiida Giijasta

¹⁵ nea fiisu geataw gheambalmeeda jea gooruuteawa meangeenda.

¹⁶ Abeeda fiisu atamaniyeenya sigwaluun geaba Simoneeda (amadu gang'assa gheawunga siyi Betarohi,)

¹⁷ ea geaba Yakobo ea Yohana was orjooga Sebedayo (ghayi ng'assa Yesu gheawunga siyi Boanerge, ghwanyawa iisiyam ghuut gajeeyi Orjooga Mbagiida.)

¹⁸ Ea Andreya ea Filipo, ea Bartolomayo, Matayo ea Domaso, Yakoboyda Alfayo ea Dadeo, ea Simoneeda leabu Ganaani,

¹⁹ ea Yudayda Iskariyoti was siida amadu ghwala bwadaw.

Yesu ea Beelsebuli

²⁰ Iidu nea nuwa Yesu ghoah gagaweesa heeda eemeetuw ea eamudu ghwanyas niny gheata agiischooda.

²¹ Nyas iitaanyi fuga gheanyaawa gaweay ghoang'waay nea geaghay gili “ning'ul geeska.”

²² Nea Giinealshoodiga diineeda Yahudi leabu Yerusalemu, saawa gwayi Yesu, “Gwandeawa Beelsebuli! Ak ghahoan meangeenda aba uurda meang'nyeandeenda haw.”

²³ Iidu gaguursa saawa headaanyi, ak ghoanyaash nea gwasin ak gwayeesha, “Shataani ghoang'wa ghahoan Shataani?

²⁴ Sugoocheanduumeeda iimaweechi sugoocheanduumeeni ea maygahuweada.

²⁵ Nuut gicha eara fuga jeeda gheedassagi iidardaawaat gheawi ea maygahuweada.

²⁶ Eara shataani iing'uchi geaw, ea maygudu gageanu askwearjoojiga gaygabiisa gamuudean.

²⁷ Gheeda siida mwaay biissa ea haw uur manda siida jea gabadaksa gawa gah ghoareat haleanjeadaanyi. Geaghus abeeda ea sirada siisi bea gheedean abeeda gheawi ghoamu sih gawa jeeda gheeda ak ghwaat haleanjeeda.

²⁸ “Aba huumwa Gearukuneegwa, riing'eega sean sina buuneeda manda dea majeesamsa, eara ng'asheega munyas rituuna ghuusiga buuneeda gaygwasamsa ASEETA.

²⁹ Sinung' siida rukuuna ng'asheega munyas badayda Guroorooda Ghaydit, siisi majeesamsa, gwandeawa riing'eeda eaweega manda muudeanooda”–

³⁰ Yesu abeeda gwarukuna ng'asheesu fuga baloola gideaba, “Niny gwandeawa meang'nyeandeenda.”

Gheamata Yesu sea orjooga geenyea Yesu

³¹ Iidu ghwahidu Gheamata Yesu nea goodeana orjooga geenyea Yesu ak ghamiinaada aba jarooda ak goojeakta siida gawa gaguursa aba gah.

³² Abeeda goobiitpiit eemeetuw nea gwaneaweesa ak geeyeesha, “Gagaseey geamadu ea orjooga giyeang'wa aba jarooda.”

³³ Ghwalamda Yesu ak gwayeesha fugiga, “Iya ea orjooga giyeanya geabeang'a?”

³⁴ Gwasachsa ghaat fugiga ghwanyawa abiitpiidiin ak gwayi, “Ang'ula Iyya ea orjooga iyya fiisu gil!

³⁵ Siida nyooh gwasina haleanjeeda bwariiy ASEETA, siisi gayghoah orjeediyya, nea gayghoah eara hudiya, nea gayghoah iya.”