Marko 2 - Bibliyeeda Ghaydit

Yesu ghoahaap siida abitu damealga

¹ Iing'ata eawoojisu ng'ay gabiikta Yesu ng'eanyiida Gapernaumu ak gabay ghwanyas buuneeda iita gideaba gwanda ghoah.

² Gooweameesa fuga saang'a ghoah ea gwadukuta eara seawadeeda gidaghuuta. Gwarukwiida Yesu Giijastaanyi.

³ Iidu ghwahidu Fih ang'wan nea gwasareenu siisi miyaan bearji giibituunooda damealga

⁴ Siihiidu siida miyaan nea geegasa eayaat gah heeda mida Yesu ghwaroat naweeda aba seang'ayda buuneeda. Gaweay ak ghwasaaw uhuuda gheeda deascheeda mida Yesu, ak geesiik siidida miyaaniin nea gwanda badayda muundaanyi, ea eaghatghat aba madeeda Yesu.

⁵ Daah Yesu masaweega nyaawa gwayeesha siida miyaan, “Jeepteanyu, riing'eagaagu sisamsa.”

⁶ Abeeda gwanda hoowa Giinealshoodiga mwaatkwa bea diineeda Yahudi gwachi abiitpiit nea gwayeena aba jeesinga nyaawa

⁷ “Siisi gwarukuteaydaan ng'asheesu? Nih goong'eawi ASEETA! Ghanyea manda siisi ammu gwasamsa riing'eemba nuut, geaghus ASEETA ak ghwahit.”

⁸ Gwajeeng'u Yesu ng'asheega baloola jeesinga nyaawa ak gwayeesha, “Ghamwachmwach naaha jeesingeagwa?

⁹ Ea wusis aneeda aba heedeang'wa gideaba gearukusi siisi abitu damealgean gideaba, ‘Sisamsa riing'eadaang'u’ ghana gideaba geeyeesha ‘Ng'eada, geanda muundaang'u ak guwi?’

¹⁰ Asi geagasayi anala gideaba Orjeeda Siida gwandeawa Gheambalmeeda jea gwasamsiina buuneeda riing'eega aba ng'eanyiida”–ng'ata gwayeesha Yesu siidida bearji giibituunooda damealgean–

¹¹ “Geayi ng'eada, geanda muundaang'u ak guwi ghoah.”

¹² Ghang'eat ak ghamughut muunda ak gawa nea geadaahaada sean. Ghwanung' ghahamng'eanyi buuneesean ak ghoaghaambiit ASEETA nea gwayi, “Ng'asheanji miyeadaaha eara heeda ghayi.”

Yesu gaguursa Lawi

¹³ Iidu gabiikta Yesu hoowa bea ghuuta basoodean. Gaweay eemeetuw hoowa mida ninyiin, ak ghoang'eat giinealshooda.

¹⁴ Gawa Yesu ghwaat naweeda ea ghwadaah siisi siguura Lawiyda Alfayo nea goopteada aba hoowa siing'oonya gwaadiin. Gaguursa ak gwayeesha, “Beeni eani geeshteanyu.” Ghang'eat Lawi ghwaat geeshta Yesu.

¹⁵ Iidu nea gweagiischi Yesu aba gheeh Lawi, gooreemsa fuga saang'a ang'oonyi gwaadi ea fuga riing'eega, nea abeeda niny gweagiischi sea ginealangaaschi ea fuga mwaatkwa ghwanyawa eatu geeshtaanyi.

¹⁶ Daah fuga mwaatkwa was Giinealshoodiga diineeda Yahudi was Farisaayajeega gideaba Yesu goombuuchi fuga riing'eega geanyaash giinealanga gideaba, “Anda Yesu ghwasaan inyas goombuuchi sea fuga riing'eega ea gea ang'oonyi gwaadi?”

¹⁷ Iiy Yesu ng'asheesu gwayeesha saawa, “Fuga majeekcheewi magaseadayi meang'nyeanda. Meang'nyeanda geaghus gagasa fuga miyeani. Asi eara Aniini mwawuni dagasa fuga doobiiweadi. Ghaawunyi dagasa fuga riing'eega.”

Giiluuldeaydeaba geaw

¹⁸ Eaweecha gooluulda geat giinealanga Yohana ea gea Farisaayajeega. Ghapka buuneeda ak ghoanyaash Yesu nea gwayeesha, “Anda giinealanga Yohana ea gea Farisaayajeega gooluulda geat nea gaagu ea mooluulda geat?”

¹⁹ Ghwalamda Yesu ak gwayeesha, “Fuga siguursa nyeangiida iimida hiji siida geeshi ghoang'wa gooluulda geati? Iinyo gwanda hiji siida geeshi fuga siguursa maygooluulda geat.

²⁰ Amadu gwanda eaweeda jea eegeandeawa siida geeshi eaweecheanji fuga siguursa gaygooluulda geat.

²¹ Manda siida ammu gwalagu weasta hang'deesh ak ghawaasa hang'da waas. Iisisin ng'asheanji abeeda gayghwaloadaadawa weastida eeshiin hang'da waas ak abeeda ghami hang'da muuchi.

²² Ghanyea manda siida jea ghwayiin difaayeeda eashish jeesinga sheargweega woosi. Iisisin ng'asheanji gayghabwaashaada difaayi sheargweega, ak abeeda gaygwanyara sheargweega ak gaweay difaayi. Difaayeeda eashish geeyiina jeeda sheargweega eashish!”

Ng'asheega sabaato

²³ Eaweecheanjagi mideewa ng'eanyiida sabaato, gawa Yesu nea gwasik jeesinga madameega ngaano damani beawaan gwahirjeaweada Ginealangaaschi muschoonga ngaano.

²⁴ Gwayeesha Farisaayajeega Yesu, “Ng'ula ghwasaan anda giinealangaagu gwasin ng'asheanda meeseama eaweeda sabaato?”

²⁵ Ghwalamda Yesu ak gwayeesha, “Heapi miyoassoamwana gidaghayi sin Dawdi ea fugaaschi iiyeachih.

²⁶ Gawa jeeda gheeda ASEETA ak ghwaak mukaatajeega siyiin madeeda ASEETA. Ng'asheanji geesin damanda waseewa Abiyatari ashoohoocheanda haw. Mukaateani geaghus ghwaak ashoohoodiga nea gaba geat. Amadu ghwaak Dawdi ak ghoadaw eara fuga mideawa.

²⁷ Ng'ata gwayeesha Yesu, “Sabaato geesissa buuneeda miigideaba buuneeda geesissa sabaato gil!

²⁸ Asi Orjeeda Siida Ng'utamiida gil eara aba sabaato.”