Marko 16 - Bibliyeeda Ghaydit

Duunooda Yesu

¹ Ng'ata ghweelmeeda Sabaato ghang'eat geaba Mariyayda siguura Magdalena ea Salome ea Mariyayda was gheamata Yakobo gaweay ghwasha nagheeda ng'andit jea ghwayeasha musta Yesu.

² Hean iimuchu nea gudugoorearu aseeta eaweeda madeeda bea wiikajeanda gaweay Gadeemsu ea ghwahita heeda bung'eeda.

³ Gaweay nea gabalooleada aba naweeda nea gwayeesha geat, “Ghamneawa gayghoarakghrakghta ng'eaha lagheaneedida haw bea ghuuta shoomanda bung'eedean?”

⁴ Ghoang'wearda ak ghwadaah lagheaneedida nea sigeanda, (Nea mii lagheana gil gidahaw muuchi.)

⁵ Duu gwasik ghuuta shoomanda bung'eeda ghwadaah Gheareemaneeni akwa hang'deesh nea goopteada aba meatkweeda geatinda dugwa, Ghahamng'eanyi muuchi.

⁶ Hean gwayeesha Gheareemaneeni gadeemgiga, “Ada ghahameegwa ng'eanyi. Ghaanali beadi oogaseadayi Yesuheeda Nasareti, singoorsa uhuuda beehiida. Siisi niduudu eara hiji mudugwanda. Ang'ula heeda siyiin.

⁷ Asi agooga aweayeena oatawa iidi giinealangiga ikaaschiin ea Betaro gideaba niisheedeawaneegwa gawa Galilaya. Iyoahiti hoowa gajadaakta gidaghayi rukuteayda.”

⁸ Ng'ata Ghabeawa hoowa bea bung'eedean nea gwasalda, aba gideaba niboadan ak ea ning'ut muuwda nea ghahamng'eanyi. Eamudu gwarukusa sih ng'ashaan aba gideaba nibeal muuchi.

Yesu gwaroonyi Mariyayda siguura Magdalena

⁹ Ng'ata duunooda Yesu nea beashata eaweeda madeeda bea wiikajeanda gil goohiimsa geaw Mariyayda siguura Magdalena, was gatmooda ghayi aruuteawa Yesu saseeda meangeeniga asispwa.

¹⁰ Gawa Mariyayda Magdalena, ak gawa gwarukusa fuga eawoojisu mideaydooschi Yesu, nea abeeda aba damandida fugiga gooyeawda nea gagutu heareega.

¹¹ Iidu nea Ghwayiiy gideaba Yesu ea majeek ea gideaba nidaah Mariyayda Magdalena ea meamwasa.

Yesu gwaroonyi giinealan iyeenya

¹² Hean iimuchu goohiimsa geaw Yesu giinealan iyeenya nea niyamwa deakta. Abeeda Giinealang'su gaweay madamnyeanda.

¹³ Eara Saawa gaweay ak gwarukusa suurja. Earapeadi sirukusean ghanyea mamwasa.

Yesu gwaroonyi giinealan damwanagi

¹⁴ Iidu aba huuydeanda goohiimsa geaw Yesu giinealan damwanagi hita Yesu nea gweagiischi. Goowoowsa Yesu saawa muuchi aba hang'ooynacheeka iheenga nyaawa, ea gideaba mamwasa ng'asheegiga bea fuga eadu iita duunoadaanyiin.

¹⁵ Hean gabiissa gwayeesha, “Aweayeena ng'eanyiisean ak goorukwiidi Giijasta Miy aba heeda buuneassean.

¹⁶ Nea siida mwas ak geepaatiisan gayghaghu, nea siida mamwasa gajeergweaksa.

¹⁷ Ak abeeda eara gwadeagooda gaygoodeaydooschi fugiga mideawa masaweegean, aba gheawungeasu gaygooruuta meangeeniga ak gaygabaloola iit nuut.

¹⁸ Nea eara ghoang'waay ichipkeega ghana eara eabiiw siida gichea ghabwar, ea manda gili jea gwahissa. Nea inyeessa Gayghoang'waay iheenga fuga miyeani ak gaheaba”.

Yesu gawa humng'eeda

¹⁹ Iidu Ng'utamiida was Yesu goobalool saawa amahit, geanung' gawa humng'eeda goobiida meatkweeda geatinda dugwa bea ASEETA.

²⁰ Hean gaweay giinealanga ng'eanyiisean nea gwarukwiida Giijasta Miy. Gwasin Ng'utamiida gadiyeeda sea saawa ak goomajeek Giijasi aba gwadeagooda adeaydooschi saawa.