Marko 15 - Bibliyeeda Ghaydit

Yesu gwanda madeeda Bilato

¹ Iimuchu nea gudughaghar gayeew gabalool Ashoohoodiga hees sea gweargwa, ea giinealshoodiga diineeda Yahudi ea girgweageeda sean, ak ghwarat Yesu aba biingu, ak ghwaat ea ghwayiin geatinga Bilato.

² Ghoanyaash Bilato Yesu nea gwayeesha, “Asi ang'iing'i guwoosi sugoocheanda Yahudi?” Ghwalamda Yesu ak gwayeesha Bilato, “Girgu ang'iing'i.”

³ Ghoahaaktaawa ashoohoodiga hees Yesu ng'asheega duguuga saang'a.

⁴ Gabiikta Bilato ghoanyaash Yesu nea gwayeesha, “Anda ang'iing'i mirukuni gil? Iinya ng'asheega sirukuna badaydaang'u giteena.”

⁵ Amwaasha Yesu ng'ashaan ea ghwanung' ghahamng'eanyi Bilato.

Yesu geergweaksiina miyeeda

⁶ Abeeda iissa iinyo ghwahita damanda ghweelmeeda Basaaka inyeesa Bilato gwasiksa siyagi aba fuga mida ghealooniga gasa buuneeda.

⁷ Abeeda damandida gwanda ghealooniga siisi siguura Baraba nea geeraduudayi fih suuk ghayi nuuseada buuneeda nea ghwanung' ghaghoakghoayda eemeeda.

⁸ Ghaghoayda eemeeda gaweay heeda Bilato ama sihita geeyeesha, Eaniyean sinneasa gidagweanyeeka sean.

⁹ Ghoanyaashta Bilato nea gwayeesha saawa, “Heapi googasayi deatineegwa sugoocheanda Yahudi?”

¹⁰ Abeeda niny ghwanyaashtunu aba gideaba ashoohoodiga hees ghoahaaktaawa Yesu sicheeda.

¹¹ Nea ashoohoodiga hees saawa ghoang'waalng'waal buuneeda nea gagasa gideaba gaygamus buuneeda gwasiksa Baraba.

¹² Hean ghoanyaash Bilato buuneeda gicha nea gwayeesha, “Googasayi dahindaan siisi ooguuri sugoocheanda Yahudi?”

¹³ Gabiikta buuneesean goojuur nea gwayeesha, “Angoorsiina uhuuda beehiida.”

¹⁴ Gwayeesha Bilato aba girukusa buuneeda, “Nea giidiinyeandeaba siisi ea naaha gil?” Gabiikta buuneeda goojuur muuchi nea gwayeesha, “Angoorsiina uhuuda beehiida!”

¹⁵ Hean Bilato aba gasooda gasa ghoamiidu gheanyanga eemeeda, gageanu ak gwasiksa Baraba. Hit ghwanung' eegeanu mughoowooda ak geabwar Yesu amahit geayaat eengoorsa uhuuda beehiida.

Shirikara gwajuuga Yesu

¹⁶ Ghwaat Shirikareedida Yesu ea eahiita heeda siguura Braitorio was seamooda gheeda sugoocheanda. Hean ghapka eara Shirikara suurja ak gabassa geat hoowa.

¹⁷ Geegeanu ak geekwealsa Yesu hang'da oomu. Geegeanu ng'ooroorga eanaaw ak geayiin uhuuda eanung' ghoah shiipka uhuudaanyi.

¹⁸ Hean Geeguursa nea geeyeesha, “Seayu sugoocheanda Yahudi!”

¹⁹ Gealas uhuuda Yesu aba diigheecheanda nea goong'uriisa ng'usheega. Geetkuy aba madeadaanyi eehinda gili siitaw mureeda.

²⁰ Ng'ata juukooda geegeanda hang'da ghwanyawa oomu siikwealsa ak geekuumsa hang'weakiga ikaaschiin. Ng'ata Geayaat eengoorsa uhuuda beehiida.

Yesu geengoorsa uhuuda beehiida

²¹ Geeweay aba naweeda ea eeroonyi siisi siguura Simoneeda ng'eanyiida Girene. Niny ghweanda geaba Aleksanda bea geaba Rufo gil, nea aba damani gwaleabu madamnyeanda. Geediing'sa aba uurda ghwasar beehiida Yesu.

²² Geayaat Yesu ea eahiita hiji siguura Golgota nea ghwanyawa iisiyam ghuut gajeeguura, Dea geapkeeda uhuuda.

²³ Geegeanu difaayi ak geeng'oolng'oolsiinyi sea manemane. Geataw nea geeyeesha leaha; ak ghaheawa ghwali.

²⁴ Ng'ata hean geengoorsa uhuuda beehiida, ama hit geegeanu hang'weakaaschi ak geelaja, nea geeng'alealeesa hang'daanyi eadaa siida jea gageanda.

²⁵ Geengoorsa uhuuda beehiida nea gaba aseeta samwagu.

²⁶ Nea gisiihaaktaawa geang'waar gideaba, “Nih sugoocheanda Yahudi.”

²⁷ Geengoorsa iheenga beehajeega eara fih iyeenya abeeda was mareanghooga. Dea meanung' ghwalaabwa Yesu meatkweeda geatinda dugwa niirja ghwalaabwa meatkweeda geatinda ghaadaam. [

²⁸ Ak gwasa gidaghayi nyaah Ng'ooruutka Ghaydit nea gwayi, “Sinung' gwandeayi sea fuga munyas.”]

²⁹ Nea abeeda fuga ng'ata aba naweeda goong'eawi nea goodiindiil iheenga nea geeyeesha, “Asi! Siida jea gwanyarja gheeda Sibata ASEETA ak ghwadeas aba jeeda eawoojiga asamwagu!

³⁰ Asi ayaawa geaw! Hiing'aanana uhuuda beehiida.”

³¹ Eara ashoohoodiga hees sea giinealshoodiga diineeda Yahudi gwajuuga nea gwayi, “Ghoaghu buuneeda, ak ghwaraay ghoaghu geaw!

³² Asi geeyi nih Gristoyda was sugoocheanda Israeli! Asi dahing'aana aba uhuuda beehiida eadaaha ak geamwaschi.” Eara fuga gwachi siingooruudayi ninyiin earaga goong'eawi.

Miyeeda Yesu

³³ Hean iidu nea ghabwarbwara aseeta gwaduk ng'eanyiisean misaneeda ea gaba aseeta shageash.

³⁴ Gul aseeteaba shageash ghwanya ghuuta Yesu nea goojuur nea gwayi, “Eloi, Eloi, laama sabaktaani?” Nea gideaba, “Ea ASEETEANYU, Ea ASEETEANYU, anda ang'iing'i ninung'usean heeda?”

³⁵ Fiisu ghwanyawa neeki iiyiiy ghuuta Yesu gwayi, “Ayiinya! Gaguursa Eliya.”

³⁶ Ghafwach sih ak gageanu gili was gheabuuscheanda ak ghang'uda jeeda beega ng'weani bea haghweega geeta. Ghoahaaktaawa diigheecheanda ak ghoadaw Yesu ghamit nea gwayeesha buuneeda, “Oomeasa eadaaha Eliya ea jea ghwahidu ghoang'aamwa uhuuda beehiida.”

³⁷ Ghwanya ghuuta Yesu nea gagis daghata muuchi ak ghoabita.

³⁸ Hean ghabwaasha bugusta hang'dida sibwaasha jeeda gheeda sibata ASEETEAN, ak ghoah iyeenya ghang'eada uhuuda ea gagul ng'eanyi.

³⁹ Abeeda Shirikarajeanda haw ghwanyawa ghamiinaada aba hiji gang'uleadayi Yesu. Daah gidabitaayda siida gwayi, “Siisi aba huumwa ghayi Orjeeda ASEETA gil!”

⁴⁰ Gwanda eara Gadeemsu abeeda ang'weeru nea sheagi. Jeedeaba gadeemsu gaba geaba Mariyayda siguura Magdalena, ea Salome, ea Mariyayda was gheamata geaba Yakoboyda mwanang' ea Yose.

⁴¹ Gadeemsu ghayi gabay goodeaydooschi Yesu damanda mideewa Galilaya nea gagadiiyeesa. Abeeda gwanda eara gadeem suuk saang'a adeana Yesu Yerusalemu.

Bunyita Yesu

⁴² Damanda huweewa shing'ada bea eaweedida, nih abeeda eaweeda siitiing'diing'deawa gil nea iimuchu ea eaweeda Sabaatohi.

⁴³ Ghang'eat siisi siguura Yosefu was siida ng'eanyiida Arimataya. Niny abeeda gaba gweargwa girgweageeda nea geawal gheang'da muuchi. Eawoojisu eara niny goola gafuriida Gheambalmeeda ASEETA. Siisi ghang'eat ak ghabwadakta ak gawa heeda Bilato ghang'al musta Yesu.

⁴⁴ Ghahamng'eanyi Bilato iiyiiy gideaba Yesu nigeawiit ghami. Gaguursa shirikarajeanda haw ak ghoanyaash Yesu ea nigeawiit ghami.

⁴⁵ Iidu nea ghwanyas Bilato iita aba heeda shirikarajeanda gideaba Yesu nigeawiit ghami, gwayeesha Yosefu aada musta Yesu.

⁴⁶ Gawa Yosefu ak ghwasha hang'deesh, hit gawa ama hita goorareang'u musta. Gookwealsa hang'dida eeshiin ak ghwaat ea ghwayiin jeemba bung'eeni ghayi sighurghur nihit mida jeemba lagheana. Hean gooreakreaksa lagheaneeda haw ghuuta shoomanda.

⁴⁷ Abeeda Mariyaydida siguura Magdalena sea Mariyaydida was gheamata Yosehiin abeeda saawa ghwadahaada heeda siyiin musta Yesu.