Marko 14 - Bibliyeeda Ghaydit

Geamwaal gichea eenuusta Yesu

¹ Iimuchu nea ghwashoada eawooji iyeenya ak gayghwahidu ghweelmeeda Basaaka ea dea mukaatajeega meematawiita. Abeeda gagasa ashoohoodiga hees sea giinealshoodiga diineeda Yahudi gichea ghoahaaktaayda Yesu ak ghoang'waay ak gwanuus.

² Iidu gwayi, “Adiidu geang'waanyi eaweecheanji bea ghweelmeeda mideewa fuga saang'aan, gaygang'eessa fih buuneeda.”

Yesu geayeasha nagheeda aba Betaniya

³ Yesu abeeda gwanda ng'eanyiida Betaniya. Gwanda gheeh Simoneeda ghayi beardooschi udamusuura. Iidu nea goopteada gweagiischi ghwahidu headaanyi Gatmooni eatuuna geadi dabicheanda nyiit nagheeda haw sheayeat siguura nardo biissa ea ng'andit. Hidu goodalealsa uhuuda Yesu nagheedida ng'andidiin.

⁴ Gwanda fuga mwaatkwa nyareesi nea gwayi, “Nagheani geahaak ng'eanyiida ghwasaan?

⁵ Nagheani ghwanyawa iisishaayda ghoamu ghwanyas dinaaraji bughalaji samwagu. Nea lapiyeeni ghwanyawa iisinyas gajeatawaada fuga barbari.” Geewoowsa gatmoodida muuchi.

⁶ Nea Yesu niny gwayeesha, “Anung'waada gatmooni oogasean. Gooteawiisi naaha? Nih gwasinnean gitoabiiw.

⁷ Fuga barbari goondeaydooscheewi galeega sean. Abeeda iyoogasayi aweada gajaweada. Duuku Aniini ea maydeabiita heedeang'wa galeagasean.

⁸ Niny gwasin gidida amuun. Niny ghwayeashanaan nagheeda nea gwadawiisa saseedeanyu bunyita.

⁹ Ak ghamneawa aba huumwa ghoanung' darukuneegwa, heeda wassean aba muunda ng'eanyiida jea eeweay ak geerukwiida Giijasta Miy, ng'asheanji sin gatmooniin gajeeruku ghoah gichea eepkeata niny.”

Yuda ghamwas ghwala bwadaw Yesu

¹⁰ Hean gawa Yudayda Iskariyoti bea jeedeaba giinealangiga atamaniyeenyean, ea gawa heeda ashoohoodiga hees nea gagasa ghwala bwadaw Yesu.

¹¹ Nyas iidi ashoohoodiga gahoosan muuchi nea gwayeesha Yuda, Eara lapiya gajeegoona. Hean gabiissa ghamwaal Yuda gichea ghwalaapta bwadaw Yesu.

Yesu ghang'aap hamita Basaaka sea ginealangaaschi

¹² Eaweeda madeeda bea ghweelmeeda mukaatajeega meematawiita, nea eaweeda sinuusa dayeenda gisilleanda bea ghweelmeeda Basaaka gil, ghoanyaash giinealanga Yesu nea gwayeesha, “Gigasayi eesineey hamita ghweelmeeda Basaaka aba yeenu?”

¹³ Goojeakta Yesu ginealangaaschi asiyeenya nea gwayeesha, “Aweayeena ea ahita jeeda mujiini. Gajaroonyeewana siida sar sirbiida beega; ghoayaachi geeshta,

¹⁴ ea ghwahita gheeda jea gawa jeeda, iyoahiti gooyeeshi siida bea gheeda, ‘Gwayi Giinealshoocheanda abwaara aba jeedeaba gheang'u ghooriini siyeaksi hamita ghweelmeeda Basaaka aniini ea giinealangeasu?’

¹⁵ Ak gayghoahiimneegwa ghooriini haw ghayi sideeksa uhuumba nuut, nea sisin muuchi ak goosisi jeeni.”

¹⁶ Gaweay giinealanga ea gaweay jeeda mujiini. Hita ghwadaakta ng'asheega sean gidagwachi rukuteayda Yesu. Hean gwasin hamita ghweelmeeda Basaaka.

¹⁷ Shing'ada ghwahidu Yesu nea goodeana ginealangaaschi atamaniyeenya.

¹⁸ Iidu nea geeyeagiischi gwayeesha Yesu, “Aba huumwa ghamneawa geayeeshiineegwa jeedeang'wa gwanda siida eambuucheewi jea ghwalaabwan bwadaw.”

¹⁹ Ghang'ut giiseaneega giinealanga ak gaba nih anyaash Yesu nea gwayeesha, Siida aniini?”

²⁰ Gwayeesha Yesu saawa, “Siida gwanda jeedeang'wa agoogeeni atamaniyeenyean. Nukwa ghamneawa ghang'uta mukaate sea aniini aba jeeda buurda.

²¹ Asi Orjeeda siida gaygawa heechea gawa gawuurji ginyaashta Ng'ooruutka Ghaydit. Nea ea dashageada siidida jea ghwala bwadaw Orjeeda Siidean. Siisi ghayi ghang'wana ea meeji.”

Hamita Ng'utamiida

²² Iidu nea geeyeagiischi ghwasuung'u Yesu mukaate ak ghamwaash ghawooda. Hit gageanu gwalakiisa ginealangaaschi nea gwayeesha, “Oang'waanya ayaaga nih saseedeanyu gil.”

²³ Ng'ata Gageanu gikoombe ak gabadiischeesa ASEETA, ak gooheaksa saawa ak ghwaleayda sean.

²⁴ Gwayeesha Yesu, “Suh foojeandeanyu neajeeda ghayi siihiida aba badahuuka fuga saang'a gil.

²⁵ Aba huumwa, Maygutali difaayeeni was mideega haghweega sabiibuun, ea eaghus galanya dawa dali gea eashish aba jeeda Gheambalmeeda ASEETA.”

²⁶ Hean Gwasarman amahit gwarita, ak gwascheeng'sa Giijeeda Saytuunajeega.

Yesu gwarukusa Betaro gideaba gayheawanaan

²⁷ Gwayeesha Yesu ginealangaaschi, “Agooga gajamwachmwajaan ak ghoanung'wanaan heeda aba gideaba gwayi Ng'ooruutka Ghaydit, ‘Gaydabwar jeagiischoocheanda ak gayghwadarda gisilga.’

²⁸ Nea iidu iyeaduudu gaydeasheedeawaneegwa dawa Galilaya.”

²⁹ Ghwalamda Betaro ak gwayeesha, “Eara ghamwachmwachnyi fiisu seaniin, ak gwanung'useey heeda aniini mayghanyi danung'waneey heeda.”

³⁰ Ghwalamda Yesu ak gwayeesha, “Aba huumwa geayeeshiineey, eaweani bea ghamneawean heeda mii googuula nghaghooda niba iyeenya, gajea niheawanaan niba samwagu.”

³¹ Gabiikta Betaro gwayeesha nea goomajeek, “Adiidu aniini maydaheawaneey, goobal eemeewuudayeena, maydanung'useey heeda.” Ghwanyaashtunu eara giinealanga suurja.

Yesu ghamwaash ASEETA aba Getsemani

³² Geeweay ea eahita hiji siguura Getsemani. Gwayeesha Yesu aba girukusa ginealangaaschi, “Oopiitpiida aba hiji ghanyi damwaash ASEETA.”

³³ Gaguursa Betaro ea Yakobo ea Yohana ak goodeayi. Ghang'ut giiseaneega nea ghawiishaan uhuuda.

³⁴ Hean Gwayeesha niny saawa, “Ghwariikghta gwanuus guroroodeanyu giiseaneega. Oopiidana hiji nea adoolili, oang'wearni.”

³⁵ Ghwaloat geash gili miigeaw ak gwajaksa geaw ng'eanyi, ak ghamwaash gideaba, nung' danaawa gheadi bea sawanadeedean.

³⁶ Ghamwaash ASEETA nea gwayeesha, “Ea Bwaabwa, Bwaabwa, ang'iing'i manda gida miimuusi. Eaniyean giischoarjaan bayoogi bea sawanadeedean. Nea adaghoah huumeandeanyu, nung' ghoah daang'u.”

³⁷ Iidu nea Gabiikta hoowa ghwahita nea giinealangiga asamwaguun ea nilil. Ghoanyaash Betaro, “Ea Simon, Nilili? Miimuusi ang'wearni eara gheadi nuwaasi?

³⁸ Ng'ata gwayeesha ginealangaaschi, Oang'wearni nea ghoamwaashchi ASEETA ea meesimeegwa. Guroorooda gagasa amadu saseeda ea manda uurda.”

³⁹ Gabiikta gicha ak ghamwaash ASEETA nea gwarukuta ng'asheega ghwanyawa rukwiida.

⁴⁰ Iidu Gabiikta gicha hoowa bea giinealangaaschiin ak ghwahita nea nilil. Eara gheanyanga nyaawa mudughoamu ghwajaat aba ruweanga ak ea mwanala eara gichea gwarukuta.

⁴¹ Iidu Gabiigu heanyaawa deaba samwagu ak gwayeesha, “Gudu andana jeeda ruweanga nea goofuufchi? Anung'waada gwadeenu! Nigul damanda! Nukwa Orjeeda Siida gajeayiin geatinga fuga riing'eega.

⁴² Asi ang'eatng'eada eebu. Oang'wearda siidida jea ghwalaabwan bwadawiin nineekiit.”

Ging'ooyda Yesu

⁴³ Damanda duu gabaloola Yesu, ghwahidu Yuda nea gaba jeedeaba giinealangiga atamaniyeenyean, ghwahidu nea goodeana eemeetuw mideawa ng'utkeaka ea gulupkeaka. Fiisu abeeda goojeagu ashoohoodiga hees, ea giinealshoodiga diineeda Yahudi ea gweargwa.

⁴⁴ Abeeda Yudayda jea ghwala bwadaw Yesu nirukusa eemeeda gichea gooroorda. “Siida jea dasam gheata abeeda niny gil ak ghoang'waanyi nea goofurji.”

⁴⁵ Hidu Yuda ghang'ata ama hita heeda Yesu gwayeesha, “Ea Giinealshoocheanda!” Nea ghwasam gheata.

⁴⁶ Hean dea eemeeda ghang'eatng'eat ak ghoang'waay Yesu.

⁴⁷ Aba jeeda fuga ghwanyawa miinaada sea Yesu gafagu Sih ng'uta ak ghwalas soomjeanda ashoohoocheanda haw ak gwalaksa ng'eanyi iita.

⁴⁸ Hean gwayeesha Yesu fugiga, “Ghamneawa gooyeadu ng'utkeaka ea gulupkeaka aba giing'ooydeanyu neada ghoanung' dawuurji mareanghweanda?

⁴⁹ Eawoojisu nea geanealayi buuneeda aba jeeda gheeda sibata ASEETA, anda moong'oanyean. Ak gwasa ng'asheesu ghoah gidanyaashta Ng'ooruutka Ghaydit.”

⁵⁰ Gamng'aw Ginealangaaschi sean ak gwasalda gwanung'usa heeda.

⁵¹ Abeeda gweatu geeshta Yesu Orjeeni mwanang' nea gookwa hang'da. Hean geegasa eang'waay.

⁵² Iidu ghamwanmwanda Orjeeda ak gwanung'usa heeda hang'daanyi ak ghafwach nea dawiish.

Yesu aba madeeda girgweageeda

⁵³ Geayaat Yesu ea eayaat gheeda Ashoohoocheanda Haw. Ghwahita nea nibatiisa geat hoowa ashoohoodi suuk hees sea gweargwa sea giinealshoodiga Diineeda Yahudi.

⁵⁴ Abeeda Betaro gamaseaw Yesu nea sheagi, gawa jeedeaba gheedida bea ashoohoocheandida hawiin, goopteada ak ghoabwaal beasta sea furiischoodiga.

⁵⁵ Iidu gagasa ashoohoodiga hees sea gweargwa girgweageeda siida jea gamuuwu giidiinyeanda Yesu, ak abeeda gwanuus ak ea mwanyasa.

⁵⁶ Abeeda gwanda fuga saang'a muuwu ng'asheega ng'uyeega aba badayda Yesu. Amadu ng'asheega nyaawa ea mudu gaweechi.

⁵⁷ Gwanda fuga suuk miinaada ak gamuuwu ng'uyeega aba badayda Yesu nea gwayeesha,

⁵⁸ “Ghayi siyiinyi siisi nea gwayeena, ‘Gaydanyarja Gheawi Sibata ASEETA ghayi sideasa geatingean, ak aba jeemba eawooji samwagu gaydadeas nuut dea meesinana geatinga buuneeda’.”

⁵⁹ Iidu eara ng'asheega Nyaawa muuwu ea meateayi.

⁶⁰ Ghang'eat ashoohoocheanda haw aba madeeda buuneeda ak ghoanyaash Yesu, “Mwayshaaha ng'ashaan? Fiisu gwarukuna naaha badaydaang'u?”

⁶¹ Ghwasiinda Yesu marukuta eara ng'asheanjagi. Gabiikta ashoohoocheandida ghoanyaash Yesu nea gwayeesha, “Heapi ang'iing'i guwoosi Gristoyda was Orjeeda ASEETA Ghaambiidaadi?”

⁶² Gwayeesha Yesu, “Ea ada geawooschi. Ghabwada nih gajadaaha Orjeeni bea Siidean nea goobideada aba meatkweeda geatinda dugwa bea ASEETA hoauur, nea goodeana shamooghuutka humng'eeda.”

⁶³ Ng'ata ghabwaashaada ashoohoocheanda haw hang'weakaaschi ak gwayi, “Gudeegassa mushoodispa naaha?

⁶⁴ Noayiinyi gida ang'eawiida ASEETA! Gooyeenyiin agooga?” Gwayi sean siisi gagasa eenuus.

⁶⁵ Gwanda fuga mwaatkwa ang'uriisa ng'usheega, geedukuta gheanyanga ak geabwar madeang'aka nea geeyeesha, “Heapi rukuni siida lasnyi!” Eara fuga gadiyeeda ghabwar madeang'aka.

Betaro ghwashaang' Yesu

⁶⁶ Damani duu gwandeawa Betaro seamoodean, ghwahidu Hudi gadiydooschi aba gheeda ashoohoocheanda haw.

⁶⁷ Iidu nea ghwadaah Betaro nea gwaju beasta, goong'weersa ak gwayeesha, “Eara ang'iing'i gindeaydooscheewi Yesuheeda Nasareti.”

⁶⁸ Ghwashaang' Betaro nea gwayeesha, “Mwaanali, anda eara gidirgu mwaanali!” Ng'ata ghang'eat Betaro ak gawa hoowa bea dooshtean. Miighoah gil ea niiguul nghaghooda.

⁶⁹ Ghwadaa Hudideani Betaro gicha ak gwayeesha fiisu ghwanyawa miinaada, “Eara siisi gaba jeeda fuga eawoojisu adeaydooschi Yesu.”

⁷⁰ Iiy Betaro gabiikta ghwashaang' gicha. Miighoah gil geeyeesha Betaro aba girukusa Fiisu ghwanyawa miinaada, “Aba huumwa eara ang'iing'i gibeahi jeedeaba fugiga aba gideaba guwoosi siida Galilaya.”

⁷¹ Ghamwaashta geaw Betaro nea ghwaak habeawooda nea gwayeesha, “Aniini siisi ooruku iitaanyiin mwaanali.”

⁷² Miighoah gil gabiikta googuul nghaghooda deaba iyeenya. Hean gabiissa ghoapkaat Betaro gidaheeta rukusa Yesu bea gideaba, “Heeda miigabiikta nghaghooda giiguuleandeaba iyeenya gajea niheawanaan niba samwagu.” Hean gabiissa Betaro goorareang'u dabeaka gooyeawda.