Marko 13 - Bibliyeeda Ghaydit

Yesu gabaloola nyarjeawda gheeda sibata ASEETA

¹ Damanda riteawa Yesu jeeda gheeda sibata ASEETA gwayeesha siyagi was Giinealaneadaanyi, “Ea Giinealshoocheanda, ang'wearda gealsu heesiin gisam, ea lagheanga ghayi sideasa!”

² Ghwalamda Yesu ak gwayeesha, “Ghamneawa gidaahi gealsu heesiin? Lagheang'su ghayi sideasaan manda dea jea eenung'usa heeda earagi. Gajeeng'adeadu sean.”

Sawanadeeda ea ghabasta

³ Eaweecha Yesu goopteada aba uhuuda Giijeeda Saytuunajeega deaschi gheeda sibata ASEETA gaweay geaba Betaro ea Yakobo ea Yohana sea Andreya ak ghoanyaash Yesu nea gaba geat gideaba,

⁴ “Eaniyean rukuneasa ng'asheesu gayghoah eeju? Ak gajeeroorda naaha aba hinnoodeaba ng'asheesu.”

⁵ Gwayeesha Yesu saawa, “Ashageada adagwareenganeegwa sih.

⁶ Aba gideaba gayghapka fuga saang'a jea ghapkaana gheawungeasu nea gwayi, ‘siida aniini gil!’ Ak aba sareani gaygwareengani fuga saang'a.

⁷ Iyoayiinyi ng'asheega ng'ucheadinga ea giijuureanda ng'ucheeda ea adoohirbabanyi. Ng'asheesu mayghwashiy hinnooda, duuku muudeanooda ea miighoaw.

⁸ Gaygaba ng'eanyiini ng'uchi nuut, gaygaba Sugoocheanji ng'uchi nuut, gaygwasaw ng'eanyiida gicha ak gaygang'eeda geejeadinga. Ng'asheesu seaniin gaygawuurji lajooda gatmooda jea gwaji.

⁹ “Asi agooga ashageada, aba gideaba gayghwaadeagwa buuneeda gheeda sirgweacha, nea geabwareagwa aba jeesinga ghoorajeega siinealshacheewa. Gajeayadeagwa madeeda fuga hees ea madeeda sugoodiga aba badaydeanyu, ak abeeda gajahuuwa mushoodigeasu aba madeanyaawa.

¹⁰ Nea hinnooda jea ghwahidu muudeanooda ng'eanyiida, abeeda gajea sirukusa buuneesean Giijasta miy.

¹¹ Nea eara iisiyaadeagwa gheeda sirgweacha, ea adoohirbabanyi, aba badayda ng'asheega jea arukuta, iihidu damandida, arukuta ng'asheanda wassean sinyuneegwa, aba gideaba mii agooga gil fuga jea gabalool, gaygabalool Guroorooda Ghaydit.

¹² Nea Siida gayghwala bwadaw orjeeda ghaamwat ak geenuus, nea Bwaabwa gayghwala bwadaw orjeedaanyi, eara Diibiga gayghabwar ghweaniga nyaawa ak gwanuuseada.

¹³ Ak agooga gayghwasteagwa buuneeda aba gheawungeasu. Nea siida jea ghamilikghta ea gagul damandida bea muudeanoodean, siisi gayghaghu.

Gidamuy jea gweadu nyariida

¹⁴ “Asi iyoadaayi gidamuy jea gweadu nyariida nea nimiinaada aba heeda mahaguuwsiina, (Siida asoamwa ea dajeeng'na gidawas) asi abeeda fuga mida ng'eanyiida Yudeya ea dasalsiina iheenga heayeeniga.

¹⁵ Abeeda siida deepa eanyasa uhuuda gheeda adaghwararang'aan, aduwi geani eara gidamida gah jea aadana geadi.

¹⁶ Siida deepa eanyasa jeeda madamnyeanda eara hang'da badayda ghwanyawa nung'wa ghoah adaghamwaghaada.

¹⁷ Eeshiina gadeemga was bungaroodiga ashageada, ea gadeemga reer diibiga aba damandida!

¹⁸ Goomoorayi ea mwahina ng'asheesu munyasiin damandida bea gooroogeedean.

¹⁹ Aba gideaba damandida gaygwanda sawanadeeda manda dea jea eegala ghang'eada deaghayi nibwada ASEETA ng'eanyiida ea gagul ghamneawa. Ak ea maygudu gabiigu gicha dea jea gawuurji nih.

²⁰ Inyeeda gwachi ea moong'ayiida Ng'utamiida askwearjoojigiga ghanyea manda siisi jea ghwalaalaan. Amadu aba badahuuka fuga loossa geaw ea nisuuy Ng'utamiida askwearjoojigiga.

²¹ Asi iiyeeshineegwa Siida, ‘Ang'wearda Gristo gwanda hiji!’ ghana gwayi, ‘Gwanda hoowa!’ adoamwaschi.

²² Aba gideaba gayghwahidu fuga was Gristohajeega ng'uyyeega ea sibanga ng'uyeega, gayghoahiimu gwadeagooda ea ng'asheega deamdeameadi, aba huteawda fuga loat ASEETA.

²³ Asi agooga ashageada. Aniini nearukuneegwa ng'asheega sean heeda mii ghwahina.

Hinnooda Orjeeda Siida

²⁴ “Asi askwearjoojigiga nea ning'ata ng'asheandida ng'waaniin, gaygwatuudu gheang'da ASEETA nea eara sheeda ea maygudu gooboong'u.

²⁵ Nea miinga humng'eeda gaygoobitu nea gaygwaduumduum uurda humng'eeda.

²⁶ Ak gajeadaah Orjeeda Siida nea gwashuubeanda jeeda shamooghuutka nea gaygwandeawa uurda haw ea giigheambiita.

²⁷ Ak Gaygoojeakta giijasoodigaaschi bea humng'eeda goodearsa meadajeega asang'wan bea ng'eanyiida gaweay gooweamu fuga loossa geaw, ghang'eada muudeanooda ng'eanyiida ea ghoah muudeanooda humng'eeda.

Gida anaal fih shaboogheecheanda

²⁸ “Agooga ang'ula shaboogheecheanda. Gwanda gichea ghoanaaleagwa. Iyabit seenga nea ghafiirfiir gea nyawiiri gajanala gideaba doomeelda nineekiit.

²⁹ Gwasunu eara agooga iyoadaayi ng'asheesu nea ghwahidu, anala gideaba Orjeeda Siida nineekiit muuchi.

³⁰ Gearukuneegwa aba huumwa, Seaygeani bea ghamneawean mayghwanaawda nea mii adaaha ng'asheesu.

³¹ Humng'eeda ea ng'eanyiida gaygammuudean. Duuku ng'asheegeasu ea maygamudean.

Manda siinal askwearjeanda ghana damanda

³² “Duuku askwearjeandida, ghana damandida manda siida nal. Eara giijasoodiga humng'eeda, ghana Orjeeda ASEETA. Siinal geaghus Bwaabwa ak ghwahit.

³³ Ashageada nea ghoang'wearu, aba gideaba moanali damanda jea gawaseewa.

³⁴ Gawuurji Siisi ghayi weah bareanyeeka ak gwaruuda nea ghwanung'wa gheeda fuga gadiyeeda. Nea nigeanu ak gaba siisi adaw gichea gwasin ak gageanu ghwayiin furiischoocheanda jea gafur dooshta nea gwayeesha milmiliida.

³⁵ Asi oang'wearni adoolili aba gideaba moanali eaweeda jea ghwahina siida bea gheeda, gwadeepa ghwahidu shing'ada, ghana gwadeepa ghwahidu eaweeda agweena, ghana gwadeepa ghwahidu beashata, ghana gwadeepa ghwahidu nea goorearu aseeta–

³⁶ Asi oang'wearni gajiidu gwashameegwa ak ghabwardaneegwa ng'eanyi nea goondi jeeda ruweanga.

³⁷ Gichea darukuneegwa oogasean, gaydayi, Oang'wearni, adoolili!”