Marko 11 - Bibliyeeda Ghaydit

Yesu ghwahita Yerusalemu ak geadeaptaawa hooseaneega

¹ Iidu nea gwaneekiisa Yerusalemu, ghwahita mujiinajeega Betfage ea Betaniya neekeewa Giijeeda Saytuunajeega. Gageanu Yesu giinealan iyeenya aba jeeda ginealangaaschi ak goojeakta goosheeda.

² Nea gwayeesha, “Aweayeena ea ahita gharang'dida mida mwadiin. Iyoahiti gajanyasana hoowa digeeda miigwaheedu ghayi eara giinealda miyeanaal. Gajadaaha nea radaat ak gootinyi, ak goorjeanu.

³ Iideepa ghoanyaasheagwa buuneeda gideaba ‘ghwasaan anda gootinyi?’ gooyeeshi ‘gagasa, Ng'utamiida nea gaygabay goodeelu.’”

⁴ Gaweay fugiga ak ghwanyasa ghuuta naweeda digeeni sirassa geeta dooshta; hean gootin.

⁵ Ghwadaah fiisu ghwanyawa mida ghuuta naweeda ak ghoanyaash nea gwayeesha, “Digeeni gootissi naaha?”

⁶ Gwarukuta giinealanga ng'asheega sean ghwanyawa rukusa Yesu. Geesiksa ghoarjaanda.

⁷ Gearjaanda digeeda ea ghwahita heeda Yesu. Geegeanu hang'weaka ak geayiin badayda digeeda amahit gwading'da Yesu badayda ak goopteadawa.

⁸ Gageanu fugiga saang'aan ak ghoabwarghaan hang'weaka nyaawa aba naweeda, nea buuneeda suurja gaweay jeesinga madameega gwalagu seenga geediga ak ghoabwarghaan aba jeeda naweadaanyi.

⁹ Gwasim buuneeda gaweay nea heeda measheedeawana Yesu suurja gahuuydeana nea gwayi sean, “Oakghaambiida ASEETA! Sibadiischeesa siisi wuna gheawunga Ng'utamiidean!

¹⁰ Sibadiischooweey ea gheambalmeeda sugoocheanda ghayi was ghweandeanya siyi Dawdi. Oakghaambiida ASEETA mida humng'eeda.”

¹¹ Ghwahita Yesu mujiineeda Yerusalemu ak gawa jeeda gheeda sibata ASEETA. Hita ghoang'wearda gwasikteawa haleanjeeda sean. Iidu ghwadaah niiw shing'ada. Ghang'eat gawa ng'eanyiida Betaniya nea goodeayi ginealangaaschi atamaniyeenya.

Yesu ghamwaashta shaboogheecheanda

¹² Muchu nea gwanda naweeda gwaleabu ng'eanyiida Betaniya ghwayeat jih Yesu.

¹³ Ang'wearda ghwadaah shaboogheecheanda nea gudeasheagi nea gwandeawa seenga saang'a. Gaweesa ghwadaah ea jea ghwanyasa haghweega. Hita heeda nea gwasikteawa ghwadaah geaghus seenga nea gwasin gideaba miighwahita damanda jea gwalakna haghweega.

¹⁴ Gwayeesha Yesu shaboogheecheandida, “Maygudughwaaganeey sih haghweega ea ghoah gweanyeeka manda muudeanooda.” Gwarukuta ng'asheandida nea abeeda ghwayiiy giinealangaaschi.

Yesu gawa jeeda gheeda sibata ASEETA

¹⁵ Ghwahita Yesu Yerusalemu ak gawa jeeda gheeda Sibata ASEETA, ak gooruuta jarooda fuga gwachi shaayda ea gea shaah haleanjeeda. Ghoadandaarda haleanjeeda fuga ghwanyawa nyarja lapiya ea hoorgajeega fuga ghwanyawa shaayda ghariibajeega.

¹⁶ Ea mwanung' ghang'ata sih gwasik jeeda gheeda sibata ASEETA nea ghwaada geadi gil.

¹⁷ Hit gabiissa ghoanaal buuneeda nea gwayeesha, “Ghayi ASEETA gwayi aba jeeda ng'ooruutkaaschi, ‘Gheawi iteanyuun gayghoah heechea gabateewean eemoojiga sean’. Ak ghoanung' ghoah gwaleeda jea gafunya geat mareanghooga!”

¹⁸ Iiy ashoohoodiga hees ea giinealshoodiga diineeda Yahudi gabiissa ghamwaal gichea gwanuusta. Iidu geawal gheang'da iidaah gidaduupta eemeeda giinealshoadaanyi.

¹⁹ Iidu nea niiw shing'ada ghang'eat Yesu nea goodeayi giinealangaaschi ak gaweay ghang'amwa jeeda mujiini.

Gida anaal fih shaboogheecheanda ghajaamiit

²⁰ Iimuchu nea gaweeshiit damanda ng'ataawa ghwadaah shaboogheecheanda nea nighajaamiit sean ea gagul hawunga.

²¹ Apkaat Betaro gidaheeta sirukusa shaboogheecheanda gwayeesha Yesu, “Ea Giinealshoocheanda, ang'wearda! shaboogheecheanda heeta imwaashtiin nighajaamiit!”

²² Ghwalamda Yesu ak gwayeesha, “Agooga amwasa ASEETA.

²³ Aba huumwa Gaydarukuneegwa gideaba, Ghamneawa siida eesha, giijeeni ‘loadaadawana hiji ak guwi jaksiina geaw jeeda basooda,’ nea siisi gwarukuta ng'asheanji nea mwanyeaha jeadaanyi, ak ghamwas gideaba ng'asheega sean rugu gaygwasa, ng'asheanji gajeesissa.

²⁴ Asi Gaydayeeshiineegwa, iyoamwaashchi nea goomuschi gil, amwasa gideaba noanyaschi, ak gajeegooneegwa.

²⁵ Ghabwada iyoamiinaadi nea gajamwaasha gil, daba siisi samsa giidiinyeanda wassean deepa ea nisimaneey sih. Abeeda eara ghweandeang'wa mida humng'eeda gaygwasamsa giidiinyeanyeekeagwa.” [

²⁶ “Ama moosamiisiini giidiinyeanyeeka simeeweega buuneeda eara Ghweandeang'wa mida humng'eeda ea maygwasamsa giidiinyeanyeekeagwa.”]

Geanyaash Yesu heeda nyasa gheambalmeadaanyi.

²⁷ Gaweay ea ghwahita gicha Yerusalemu. Iidu nea gwaneayeewa Yesu jeedeaba Gheedida Sibata ASEETEAN, gaweay headaanyi ashoohoodiga hees ea giinealshoodiga diineeda Yahudi ea gweargwa.

²⁸ Geanyaash nea geeyeesha, “Ak gheambalmeani itaang'u isini ng'asheesuun aneeda? Gagoonyi ng'eaha gheambalmeani isini ng'asheesuun?”

²⁹ Ghwalamda Yesu ak gwayeesha, “Oomeasa eara agooga gaydaanyaasheagwa ng'asheanjagi, iyoashaayi ng'asheanji eara aniini gaydarukuneegwa heeda leabu gheambalmeani iteanyu easini ng'asheesuun.

³⁰ Heapi Arukunean giibaatiisanda ghayi eadu Yohana gwarina yeenu? Gwaleabu heeda ASEETA ghana leabu heeda siida?”

³¹ Hean Gabiissa gwasheang'nyi nea gwayi, “Ghamneawa iisiyeeshi, ‘Ghayi gwaleabu humng'eeda,’ gaygwayi, ‘Anda ak ea moamwasi ng'asheega Yohana?’

³² Ama siyeeshi, ‘Ghayi gwaleabu heeda buuneeda’.” (Ada geawali buuneeda aba gideaba ghamwas sean gideaba Yohana sibaneeda gil.)

³³ Hean iidu ghwalamda saawa ak gwayeesha Yesu, “Aseasa meanali.” Ghwalamda Yesu ak gwayeesha, “Eara aniini ea maydarukuneegwa heeda leabu gheambalmeani iteanyu easini ng'asheesuun.”