Lukka 9 - Bibliyeeda Ghaydit

Yesu goojeakta giinealan damaniyeenya

¹ Hean gaguursa ginealangaaschi atamaniyeenya ak ghoadaw uurda ea gheambalmeeda jea goobala meangeenda sean ea giiheapta geeyoonung'weaka,

² Goojeakta gaweay gwarukwiida sugoocheanduumeeda ASEETA, nea ghoahaap fuga miyeani.

³ Gwayeesha saawa, “Adoayaadi geadi gil iyooweayi bareanyeeka, eara haleanjeeda, ghana shageeda, ghana mukaate, ghana lapiya ak ea adoalasi hang'weaka iyeenya.

⁴ Gheeda jea ahita wassean, oopiidana, ea eaghus ea noang'ami ng'eang'da nyaawa.

⁵ Nea iyoahiti heeda meegasseegwa, iyooriteawi mujiineedida ghoalalakti birjeanda mida geeshangeagwa ak gayghoah muuwuunooda aba badahuuka nyaawa.”

⁶ Hean ghang'eatng'eat gaweay gharang'weaka gwarukwiida Giijasta Miy nea ghoahaap fuga miyean aba hiji nyooh ghwahita.

Herode moapta ng'eanyi

⁷ Hean iiyiy sugoocheanda was Herode iita ng'asheega sean sisin, hean gwahirbaban, aba gideaba gwayi fuga mwaatkwa siituuna Yohana jeeda miyeeda,

⁸ nea mwaatkwa gwayeena niihiimu geaw Eliya, nea suuk gwayeena niduudu sibaneeda bea gea ghayi bea garayi.

⁹ Nea Herode niny gwayeena, “Yohana ghayi naalaji gheata; nih ghamneawa gajea ng'eaha eayiing'si badayda ng'asheesu seaniin?” Hean gagasa ghwadaa.

Yesu ghoang'aata fih sagalamnyooji muut

¹⁰ Muchu ea nibiigu Giijasoodigaaschi gwarukusa iita ginisin. Ghwaat saawa ea ghwahita mujiineeda siguura Betsayda.

¹¹ Iidu nea gwajeeng'u eemeetuw, geayaat geeshta; ama sihita ghwadeapta saawa ak goobaloola iita sugoocheanduumeeda ASEETA, ak ghoahaap fuga gasa giiheapta.

¹² Iidu nea niriikghta gamikta; ghapka giinealanga ak gwayeesha niny, “Siksiina buuneeda gaweay gharang'weaka ea jeeda ng'eanyiida gagasa gichea ghwaak; aba gideaba hiji geendi heeda manda sih.”

¹³ Gwayeesha saawa, “Oatawa agooga buuneeda gichea ghwaak.” Geeyeesha, “Meendeawani gil geaghus mukaataji muut ea ghweayi iyeenya. Geaghus eeweaya eashaaha hamiteaba fiisu seaniin.”

¹⁴ Abeeda fiisu headiga ak ghwahit ea sagalamnyooji muut. Hean gwayeesha ginealangaaschi, “Anung' goobiitpiit nea gwasina gharmucheeka eata fih haradam atamanamughuush.”

¹⁵ Ak gwasinda gidarukteayda, ghwanung' goobiitpiit sean.

¹⁶ Ng'ata gageanu mukaatajeegiga ghwanyawa amuudiin ea ghweayeegiga ghwanyawa asiyeenyean ak gagatkat gheanyangaaschi googeal humng'eeda, ak gabadiischeesa ak ghabanajaada, ak ghoadaw ginealangaaschi ghoang'aataawa eemeeda.

¹⁷ Gweagiischi sean ea gwalang'u. Geeweamu gheaptanga banajanga ak ghwanyiit sooscheew damaniyeenya.

Betaro goodeaga geaw Yesu

¹⁸ Eaweecha nea ghamwaash ASEETA nea gabwageaw, nea abeeda gwandeayi sea ginealangaaschi; hean ghoanyaash nea gwayeesha saawa, “Heapi buuneeda iibalool gwayeena geawooschi ng'eaha?”

¹⁹ Ghwasha Saawa nea gwayeesha, “Gwayeena guwoosi Yohaneeda Abaatiisachi; gwayeena suurja Eliya; nea suuk gwayeena guwoosi siyagi aba jeeda sibanga ghayi bea garayi niduudu.”

²⁰ Hean gwayeesha saawa, “Ama agooga gooyeenyi geawooschi ng'eaha?” Ghwasha Betaro nea gwayeesha, “Ang'iing'i guwoosi Gristoyda ASEETA.”

Yesu gabaloola iita sawanadeadaanyi ea miyeadaanyi

²¹ Gwareekusa nea gwayeesha, adiidu goorukusi sih ng'asheanji,

²² Gwayeesha, “Orjeeda Siida gayghwanyas sawanadeeda ng'waan muuchi, nea gayghaheawa gweargwa ea ashoohoodiga hees ea ng'oorshoodiga, ak gajeenuus, ak gaygwaduudu eaweeteaba samwagu.”

²³ Ak gwayeesha buuneesean, “Siida wassean iigasa gweadu geeshteanyu, ea ada gwasamsa geaw, ak gageanu beehiidaanyi ghwasar galeagasean ak gweadu geeshteanyu.

²⁴ Aba gideaba siida wassean iigasa gwalealu eaweagaaschi gaygabeagu, nea siida huteawi eaweagaaschi aba badaydeanyu gaygwalealu.

²⁵ Siida gaygwaloosa naaha iinyas haleanjeeda sean bea muunda ng'eanyiida ak gahuteawi eaweagaaschi?

²⁶ Siida isinnean gheanyanga ea ng'asheegeasu, eara niny gaygwasissa gheanyanga Orjeeda Siida, damanda jea ghwahina aba giighaambiitaanyi ea dea Bwaabwa ea dea malaykajeega ghaydidi.

²⁷ Aba huumwa gaydarukuneegwa gideaba aba jeeni iteang'wean gwanda fuga miinaada aba hiji maygwasamu miyeeda ea eaghus ea nidaah sugoocheanduumeeda ASEETA.”

Yesu ghwayamwa oormeeda

²⁸ Ng'ata eawooji sis nea ghoahiit baloolda gaguursa Betaro ea Yohana ea Yakobo, hean gaweay uhuumba giijeeda ghamwaash ASEETA.

²⁹ Damani Moasheewa ASEETEAN, ghwayamwa oormeeda nea eara hang'weakaaschi gaweeriidi muuchi ea gameeng'meeng'i.

³⁰ Hean gabalool sea fih iyeenya, Musa ea Eliya,

³¹ fiisu ghwahidu nea goodeana giigheambiita ak gabaloola badayda miyeadaanyi, jea gwasa aba Yerusalemu.

³² Aba damani Betaro ea orjooga suurja ea niing'waay ruweanga muuchi, ama ng'eatng'eat ghwadaah giigheambiitaanyi ea fuga asiyeenya miinaada sea niny.

³³ Iidu nea gwasimsa fiisu beata gwayeesha Betaro Yesu, “Siida haw ghwanyawa gahaguuw ea meang'amwani hiji; anda meesini udahabeascheew samwagu aba hiji, dea mabeanyi ang'iing'i niirja gaba Musa nea niirja gaba Eliya”; nea niny abeeda mwanala eara gidarukuta.

³⁴ Damani baloolean, ghwahidu shamooghooda ak gwadukuta; ghabeal iidaah nea gwadukuta shamooghooda.

³⁵ Ghwanya ghuuta nyaasha jeeda shamooghooda, nea gwayi, “Nih Orjeedeanyu aaloachi, ooleeysiiniit niny.”

³⁶ Ng'ata nyeashi, geadaah Yesu ak ghwahit. Hean ghwasiinda ak ea meerukusiina sih aba eawoojigiga ng'asheega dea.

Yesu ghoahaap orjeeda bearji meangeenda

³⁷ Muchu nea ghwararang'aana uhuuda giijeeda, gwaroonyi eemeeda saang'a.

³⁸ Ng'ula, gwarina Sih jeeda eemeeda ak goojuur nea gwayi, “Giinealshoocheanda, geamuscheey ang'weersiina orjeeni iteanyu was haghasheedean;

³⁹ ng'ula inyeesa iibalaksa meangeenda ghwanung' goojuur, ak ghoahiil nea gwarina ghuuta furghooda, ak gwasawan muuchi, nea magassa gwariteawa.

⁴⁰ Iyeayeeshi giinealangaagu ooruuta, ghwaraay.”

⁴¹ Ghwasha Yesu nea gwayeesha, “Ea fuga mandeawana masaweega was jeacheenga roodeadi, ak gaydeabiita heedeang'wa ea ghoah eeju? Eani orjeeni hiji.”

⁴² Damani wunaan, ghwanung' meang'nyeandeenda ghoabeada ak ghoahiil. Ak goojuursa Yesu meangeenda muy, ak ghahaap orjeedida ak ghoadaw ghwaan.

⁴³ Ghahamng'eanyi sean iisidaa uurda haw bea ASEETA. Damani duu ghahamng'eanyi aba haleanjeeni siniin, gwayeesha ginealangaaschi,

Yesu gabiikta gabaloola ng'asheega miyeadaanyi

⁴⁴ “Anung' gaweay ng'asheesu jeesinga iidigeagwa; aba gideaba Orjeeda Siida gajeayiin geatinga buuneeda.”

⁴⁵ Ea mwanala ng'asheanji sirukusean, aba gideaba sifunya saawa, ak abeeda ea majeeng'na; ak ghoawal ghoanyaash niny iiteaba ng'asheanji.

Siida haweewa sean ng'eaha?

⁴⁶ Iidu ghoaptu sheang'nyeeda eegasa eanal siida jea gwaheedu aba jeenyaawa.

⁴⁷ Hean gwajeeng'u Yesu gidabaloola gurooruunatka nyaawa, gaguursa jeebi mwanang' ak ghwayiin murdeadaanyi,

⁴⁸ ak gwayeesha saawa, “Siida deaptaawa gheawungeasu baleanda uurji nih ghwadeaptanaan aniini, nea siida deaptanaan aniini ghwadeapta siida ghayi ajeaknean; aba gideaba siida mwanang'eewaneegwa oogasean ea haweewaneegwa oogasean.”

Siida mwahasheasa gaba meatkweedeanya

⁴⁹ Ghwasha Yohana nea gwayeesha, “Siida haw, sidaayi siida aruuta meangeenda aba gheawungaagu, ak geeyeeshi nung'waada aba gideaba siidida mabwaaheasa.”

⁵⁰ Gwayeesha Yesu niny, “Adagudoaheawi; aba gideaba siida mwahasheasa siisi gaba meatkweedeanya.”

Fuga Samariya ghaheawa ghwadeapta Yesu

⁵¹ Iidu nea nineekiit eawoojiga jea ghabeawa humng'eeda hean gamanya beata Yerusalemu.

⁵² Goojeakta buuneeda goosheedeawa niny, ak gaweay gharang'da Samariya, gwasisin heechea goobiida;

⁵³ ak ghaheawa fugeaba hoowa ghwadeapta niny, aba gideaba ghoang'waay naweeda gawa Yerusalemu.

⁵⁴ Daah ginealangaaschi was geaba Yakobo ea Yohana gwayeesha, “Ng'utamiida, gigasayi eeguursiina beasta jea gwaleabu humng'eeda ak gwaduulu fiisu?”

⁵⁵ Gwayamsa geaw saawa ak gwareekusa.”

⁵⁶ Ghang'eatng'eat gaweay gharang'da nuut.

Fuga gasa ghwaat geeshta Yesu

⁵⁷ Iidu nea gudugwanda naweeda gwayeesha Sih niny, “Gaydeadu geeshtaang'u aba hiji uwi sean.”

⁵⁸ Gwayeesha Yesu niny, “Fureayoonga gwandeawa shoomeanga, nea dariidaka gwandeawa ghoorajeega nyaawa, nea Orjeeda Siida ea mandeawana eara heeda jea ghwayiin uhuudaanyi.”

⁵⁹ Gwayeesha siinuut, “Eani geeshteanyu.” Ak gwayeesha, “Ng'utamiida, nyooh sikseani ghanyi dawa dabuy ghweandeanyu.”

⁶⁰ Gwayeesha niny, “Nung'waada muscheeka gabuy muscheeka nyaawa; ak ang'iing'i, guwi rukwiida sugoocheanduumeeda ASEETA.”

⁶¹ Gwayeesha siinuut, “Aniini gaydeadu geeshtaang'u, Ng'utamiida; nea gidamadeeda ginyo goonean gheata dawa daheeli fugeaba gheenyu.”

⁶² Gwayeesha Yesu niny, “Manda siida jea ghoang'waay mageemng'eanda ak goong'weersa bwadaw jea ghwahit aba sugoocheanduumeeda ASEETA.”