Lukka 3 - Bibliyeeda Ghaydit

Girukwiida Yohaneeda Abaatiisachi

¹ Aba gweaydeaba damanamuut bea Diberio Gaysari, nea abeeda Bontio Bilato ea sugoocheanda ng'eanyiida Yudeya gil, nea Herode abeeda ea sugoocheanda ng'eanyiida Galilaya, nea orjeeda ghaamwat siguura Filipo ea sugoocheanda Itureya ea Dirakoniti, nea Lisaniya, abeeda ea sugoocheanda Abilene,

² Nea abeeda aba damanda waseewa Anasi ea Gayafa ashoohoodiga heesi, ghwahidu ng'asheanda ASEETA heeda Yohana orjeeda Sakariya aba dareapcheeda;

³ Hean ghang'eat gawa ng'eanyiisean neaweesa Yordani, nea gwarukwiida giibaatiisanda samsiinda riing'eega.

⁴ Gawuurji gissing'oarda aba jeeda gitaabooda ng'asheega sibaneeda siguura Isaya gideaba, “Ghwanya ghuuta siida nyeara dareapcheeda; nea gwayeena asisina naweeda Ng'utamiida, ooleapa naweadingaaschi.

⁵ Nea geeng'alsa ghalalayeeka sean, ak geahiing'u giijeega ea heayeeniga, nea heeda ghwan gajeatoabiiw nea naweadinga gudung'unyoojiga gajeesin gamiyeasiidi;

⁶ Ak gilinyoo ea sih gayghwadaah lealnooda ASEETA.”

⁷ Gwarukusa fuga saang'a buwa headaanyi eebaatiisan, ak gwayeesha, “Ea dayeega udang'usheega! Gwareekuseegwa ng'eaha ea amng'awana nyarasta jea ghwahidu?

⁸ Asi ajiila haghweega miisa duukuunooda, nea adooyeeniisi geat, ‘Geendeawi ghweandeanya nea Abrahamu’, aba gideaba geayeeshiineegwa ASEETA ghoamu ghwayam lagheang'su ghoah diibiga Abrahamu.

⁹ Ak ghamneawa joomooda ea siyiin guumsheaka geediga, ak geeta maji haghweega miyaasiin gajealach ak geejaksa jeeda beasta.”

¹⁰ Ghoanyaash eemeeda nea gwayeesha, “Abeeda gajeesna naaha?”

¹¹ Ghwasha niny nea gwayeesha, “Siida mideawa hang'weak iyeenya, daadawa hang'agi siida mandeawana, nea siida mideawa hamita ea dasindunu.”

¹² Ghapka eara fuga ang'oonyi gwaadi eebaatiisan, ak eara saawa gwayeesha, “Gajeesna naaha aseasa giinealshoocheanda?”

¹³ Gwayeesha saawa, “Adoong'oonyayi gwaadeeda haweewa dea sirukuneegwa.”

¹⁴ Eara shirikara ghoanyaash nea gwayeesha, “Ama aseasa gajeesna naaha?” Gwayeesha, “Adoareachi siida gidaanyi aba uurda ghana oahaakta aba ng'uyeega, akghusa mushahareedeang'wa.”

¹⁵ Damanda duu gwandeewa buuneeda jeeda furdeaydean, goonyeari geat buuneassean aba jeesinga nyaawa aba iita Yohana, gideaba gwadeepa ea Gristohi,

¹⁶ ghwasha Yohana nea gwayeesha buuneesean “Aniini geabaatiisananeegwa beega; nea siida jea ghwahidu gaburdeawean uurda, ak aniini ea mamiisean deatineada deanga geakaaschi; nea niny gaygoobaatiisananeegwa Guroorooda Ghaydit ea beasta.

¹⁷ Gida aleela booga gwanda geatindaanyi, ak gaygoobuus heeda jea gooleelsa, ak gooweamsa ngaanoadaanyi jeeda gijigooda, nea looyda gayghaghwarda aba beasta maygamis.”

¹⁸ Gwareekusa nea goobaloola buuneeda ng'asheega saang'a nea gwarukwiida Giijaasta Miy.

¹⁹ Iidu goowoowsa Herodeyda was sugoocheanda, nea goowoowsiina gheenda Herodiya, was gatmooda orjeeda ghaamwat, ea badayda ng'asheega munyas saang'a sina Herode,

²⁰ ea mwaara gil gwasin dea muy nuut gwajaksa Yohana ghealooniga.

Giibaatiisanda Yesu

²¹ Hit giibaatiisanda buuneeda sean, ea dea Yesu nea ghamwaash ASEETA ghwajaada bugusta humng'eeda,

²² ak gwashuubeesa uhuudaanyi Guroorooda Ghaydit nea gawuurji ghariibajeanda, ak ghwanya ghuuta nyaasha humng'eeda nea gwayi, “Ang'iing'i guwoosi Orjeedeanyu aabwariinyi; gwadan jeedeanyu.”

Rooproobanga jiilu Yesu

²³ Yesu ghoang'eat giinealshoadaanyi nea gaba gweanyeew diktam ea damanamughuush, nea abeeda (geaghay) gideaba niny orjeeda Yosefuheeda Eli,

²⁴ Eli gaba Matari, Matari gaba Lawi, Lawi gaba Melki, Melki gaba Yanai, Yanai gaba Yosefu,

²⁵ Yosefu gaba Matatiya, Matatiya gaba Amosi, Amosi gaba Nahumu, Nahumu gaba Esli, Esli gaba Nagai,

²⁶ Nagai gaba Mati, Mati gaba Matatia, Matatia gaba Shemei, Shemei gaba Yosefu, Yosefu gaba Yuda,

²⁷ Yuda gaba Yoana, Yoana gaba Resa, Resa gaba Serubabeli, Serubabeli gaba Shealtieli, Shealtieli gaba Neri,

²⁸ Neri gaba Melki, Melki gaba Adi, Adi gaba Gosamu, Gosamu gaba Elmadamu, Elmadamu gaba Eri,

²⁹ Eri gaba Yoshuwa, Yoshuwa gaba Elieseri, Elieseri gaba Yorimu, Yorimu gaba Matate, Matate gaba Lawi,

³⁰ Lawi gaba Simon, Simon gaba Yuda, Yuda gaba Yosefu, Yosefu gaba Yonamu, Yonamu gaba Eliyakimu,

³¹ Eliyakimu gaba Meleya, Meleya gaba Mena, Mena gaba Matata, Matata gaba Natani, Natani gaba Dawdi,

³² Dawdi gaba Yese, Yese gaba Obedi, Obedi gaba Boasi, Boasi gaba Sala, Sala gaba Nashoni,

³³ Nashoni gaba Aminadabu, Aminadabu gaba Adimini, Adimini gaba Aramu, Aramu gaba Hesroni, Hersoni gaba Beresi, Beresi gaba Yuda,

³⁴ Yuda gaba Yakobo, Yakobo gaba Isaka, Isaka gaba Abrahamu, Abrahamu gaba Dera, Dera gaba Nahori,

³⁵ Nahori gaba Serugi, Serugi gaba Reu, Rewu gaba Belegi, Belegi gaba Eberi, Eberi gaba Shela,

³⁶ Shela gaba Genani, Genani gaba Arfaksadi, Arfaksadi gaba Shemu, Shemu gaba Nuhu, Nuhu gaba Lameki,

³⁷ Lameki gaba Metusela, Metusela gaba Henoko, Henoko gaba Yaredi, Yaredi gaba Mahaleli, Mahaleli, gaba Genani.

³⁸ Genani gaba Enoshi, Enoshi gaba Seti, Seti gaba Adamu, Adamu gaba ASEETA.