ISAYA 3 - Bibliyeeda Ghaydit

Muuwda aba Yerusalemu

¹ Aba gideaba, ng'ula, Ng'utamiida, NG'UTAMIIDA bea lugweega, gaygageandeawa Yerusalemu ea Yuda haleanjeeda sean ea gidaghus, gidaghus sean was hamita, ea gidaghus sean was beega.

² Siida mwaay ea siida ng'ucheeda, siida aheeldooschi buuneeda ea sibaneeda, siida bara lagheanga ea gweargweeda,

³ Shirikarajeanda haw ambal fih haradam ea damanamughuush, ea siida siitaw hawunda, nea weedaneeda ea gearnoocheanda geariir muuchi, ea meang'nyeanda nal meang'nyeanduumeeda muuchi.

⁴ Ak gaydanung' ghoah orjooga sugoodiga orjooga nyaawa, nea diibiga manang'i gaygoombal saawa.

⁵ Ak gajeeghabwas buuneeda, siida ea niirja siida ea giischeewoocheandaanyi; baleanda gayghaghwar geaw aba madeeda gweargweeda, siida ng'arng'ar aba madeeda siida siiwal gheang'da.

⁶ Siida inyas ghoang'waay orjeeda ghaamwat aba jeeda gheeda ghwaan, ak gwayeesha: “Ang'iing'i gindeawi eaghwada; asi ambaleasa aba damani bea sawanadeedean”;

⁷ Ak eaweedida gaygoojuur, nea gwayi: “Aniini maydaahaap buuneeda; aba gideaba jeedeaba gheanyu manda hamita ghana eaghwada; ak ea majanung' doaw siida jea goombal fiisu.”

⁸ Aba gideaba Yerusalemu sinyarja, ak Yuda ea niibeada; aba gideaba ng'ushapta nyaawa ea sinaweega nyaawa maweapchi sea NG'UTAMIIDA, nea manung' ghoah gil giigheambiitaanyi aba madeadaanyi.

⁹ Inyeessa gidaahi gheamamuunatka nyaawa, gamuuwu riing'eega nyaawa uurji gea Sodoma, ak ea meafunya. Ashageada! Aba gideaba nisar gea munyas aba badahuuka nyaawa.

¹⁰ Ayeeshiina fuga doobiiweadi gideaba saawa ghang'wana, aba gideaba gayghwaak haghweega gadiyoojiga nyaawa.

¹¹ Dashageada siida muy! Gaygwanda badaydaanyi gidamuy aba gideaba gajeataw gidageatindaanyi.

¹² Fugeasu ghaghabwas diibiga nyaawa, ak saawa goombal gadeemga. Ea fugeasu, gahuteaweegwa fugeagwa mida madeedeang'wa, ak ghwadatas naweadingaagu.

NG'UTAMIIDA goorgweaksa fugaaschi

¹³ NG'UTAMIIDA niidiing'diing'da gwasin girgweageadaanyi, ak ea niidiing'diing'da goorgweaksa fugaaschi.

¹⁴ NG'UTAMIIDA gaygawa jeeda girgweageeda sea gweargwa ea fuga hees mida madeeda fugaaschi: “Ak fuga ak madamnyeanda sabiibu ea agooga gil, fuga barbari gwanda jeeda gealgeagwa.

¹⁵ Ak gideabeadaanyi naaha gil, gideaba ghoaghabwaschi fugeasu, ak ghwasaan anda goosawanyi fuga barbari?” gwarugu NG'UTAMIIDA was ASEETA bea lugweega.

Miinda gheang'da gadeemga Yerusalemu

¹⁶ Gwayi NG'UTAMIIDA: Ng'ula ghwarjeeda gadeemga Yerusalemu inyeesa gaweay nea goodiing'da iheenga nyaawa, nea gheanyanga nyaawa ghabwariiy haleanjeeda, inyeesa gaweay nea gaba weashweash nea ghwanung' goojuur gureayeeka mida geeshanga nyaawa.

¹⁷ Ak gayghwalas Ng'utamiida iheenga gadeemga Yerusalemu aba nyawiishta, ak gayghwanung' NG'UTAMIIDA gaweay nea dawiiri.

¹⁸ Ak eaweedida NG'UTAMIIDA gaygageanda haleanjeeda gwara geat gadeemga Yerusalemu was gureayeeka ea ghwarajanga;

¹⁹ ea seangheayoojiga ea ghunoojiga, ea shiipka nyaawa;

²⁰ ea weageaka iheenga, ea mulmulanga, ea hang'da sirasa mananda, ea gideeshteayda mida nagheeda ng'andit ea meajooda;

²¹ ea ghunoojiga mida mooringa nyaawa, ea gea mida sareenuuka nyaawa;

²² ea hang'weaka ghweelmeeda, ea hang'weaka manang'i siyiina hamarjoojiga, ea hang'weaka gul ng'eanyi ea shageeniga;

²³ ea hang'weaka siing'weardaawa, ea hang'weaka bumbuni miyaas, ea weageaka siratiisa iheenga, ea eaghwada sibeeda.

²⁴ Ak nagheeda ng'andit gaygang'uh; nea ghealooda mananda gayghoah mareamarooda; ak buudeega siireat gayghoah mearuumeeda; ak hang'weaka miyaasiin gayghoah hang'weaka beareadi; ak leanga nyaawa sean gayghwayamwa ghoah baspaseega.

²⁵ Gajeabwar headigeagwa aba ng'uta, nea geabwar fugaagu meanyi aba ng'ucheeda.

²⁶ Ak gaygooyeawda fuga mida ghuuta mujiini nea gagutu heareega, nea ghang'ut salgheang'da, ak goopteada aba ng'eanyi.