ISAYA 2 - Bibliyeeda Ghaydit

Hoyyoooyda manda muudeanooda

¹ Nih ng'asheanda dea Isaya gil was orjeeda Amosi, aba badayda Yuda ea Yerusalemu

² Nea eaweeda huuydean, giijeeda gheeda NG'UTAMIIDA gajeemajeek aba uhuuda giijeega, ak gajeetiing'da uhuuda heayeeniga; ak gaygwasalsa eemoojiga sean,

³ Ak gaygaweay fuga saang'a ak gwayi: “Apkaani, eediyeada uhuuda giijeeda NG'UTAMIIDA heeda gheeda ASEETA Yakobo; ak gayghoanaaleasa naweadingaaschi ak gajeayaada naweadingaaschi.” Aba gideaba Sayuni gaygwarina deaweeda, ea ng'asheanda NG'UTAMIIDA leabu Yerusalemu.

⁴ Ak gaygwasin girgweageeda aba jeeda eemoojiga saang'a, nea gaygoowoowsa fuga saang'a; ak ghwayam ng'utkeaka nyaawa ghoah mageemboojiga, nea ng'utkeaka nyaawa geanung' ghoah bargweaka nyeega; nea maygut gang'uchi eemoojiga, ak ea maygut ghoanaal geat ng'ucheeda earahay.

⁵ Ea fuga gheeh Yakobo, apkaani, eeweaya jeeda weeshinda NG'UTAMIIDA.

Fuga ghwarjeega gajeanung' goosha

⁶ Aba gideaba ang'iing'i ninung'wi heeda fugaagu, was gheeh Yakobo, aba gideaba ng'eanyiida ghwanyiit fuga bara lagheanga leabu gayeew ea fuga ruku ramooranga uurji fuga Filisti, ak gabareanyi sea fuga was rabasta.

⁷ Ak ng'eanyiida nyaawa ghwanyiit lapiya ea dahaabu siguura dahaabu, nea manda muudeanooda haleanjeeda siitiiw; ak ng'eanyiida nyaawa ghwanyiit faraasajeega, nea manda muudeanooda mutukwajeega nyaawa.

⁸ Ak ng'eanyiida nyaawa ghwanyiit sanaamajeega; geebada haleanjeeda sin aba geatinga nyaawa, was haleanjeeda sin aba mooringa nyaawa.

⁹ Siida ng'arng'ar ghwahiiy geaw, nea siida haw ghwaat geaw ng'eanyi– asi adisamsi!

¹⁰ Una jeeda lagheaneeda, ak gifunyi geaw aba jeeda birjeanda aba gharbeeda madeeda NG'UTAMIIDA, ea madeeda alooheeda sugoocheanduumeadaanyi.

¹¹ Siida ng'uluuna ghwarjeeda gajeerareang'u, nea fuga ghwarjeeda gajeehiing'u; ak gajeakghaambiit NG'UTAMIIDA ak ghwahit eaweecheanji.

¹² Aba gideaba gayghwahidu eaweeda NG'UTAMIIDA bea lugweega aba badayda fuga sean mideawa weashweashta ea ghwarjeeda, ea gea adiing'u geat sean, ak gajeerareang'u.

¹³ Ea badayda gubooyeeka sean geawi bea Lebanoni ea badayda sawacheeka sean bea Bashani.

¹⁴ Ea iheenga giijeega sean geawi, ea iheenga heayeeniga sean geawi;

¹⁵ ea gilinyoo ea madalajeega gil geawi, ea gilinyoo ea ghamarda gil sineaweesa hilgweanda;

¹⁶ ea maleambajeega hees sean bea Darshishi, ea badayda maleambajeega sisin sean miyaas.

¹⁷ Ak weashweashta siida gajeahiing'u, nea ghwarjeeda buuneeda gajeerareang'u; ak gajeakghaambiit NG'UTAMIIDA ak ghwahit eaweecheanji.

¹⁸ Nea sanaamajeega gaygwarooda.

¹⁹ Ak buuneeda gaygaweay jeeda gwaleeda lagheanga ea jeeda shoomeanga ng'eanyiida, aba madeeda gharbeeda NG'UTAMIIDA, ea giigheambiita sugoocheanduumeadaanyi, damanda jea ghang'eada gayghwanung' gwaduumduum ng'eanyiida muuchi.

²⁰ Eaweedida abeeda buuneeda gaygaba nih jakta sanaamooda sisna lapiya ea gidaanyi bada bea dahaabu siguura dahaabu, ghayi sissa geat jea ghabwat was gutkunooneeda ea udaghasgho,

²¹ ak gawa jeeda gwaleeda lagheanga ea jeeda seawuutka lagheanga bearshachi, mida madeeda gharbeeda NG'UTAMIIDA, ea giigheambiita sugoocheanduumeadaanyi, damanda jea ghang'eat ak ghwanung' gwaduumduum ng'eanyiida muuchi.

²² Anung'waada siida was dea mida giisiimdaanyi ghuuta sareenuukaaschi, aba gideaba niny gwarachi gil?