IITOODA 9 - Bibliyeeda Ghaydit

Basaakeedeaba iyeenya

¹ Ng'ata goobalool NG'UTAMIIDA Musa aba dareapcheeda Sinayi, aba sheeda madeeda bea gweaydeaba iyeenya damanda leapna saawa ng'eanyiida Misri, ak gwayeesha,

² “Gagasa ghoang'waay fuga Israeli ghweelmeeda Basaaka aba damanda sirugu.

³ Eaweeteaba damanang'wan bea sheeni, damandeaba shing'ada, gajoang'waanya damanda sirugu; aba diigheanyeekaaschi sean, ea aba giduurji girgweaguutkaaschi sean, nih gichea oang'waayda.”

⁴ Ng'ata gwayeesha Musa fuga Israeli gideaba oang'waanya ghweelmeeda Basaaka.

⁵ Hean ghoang'waay Basaaka aba sheeda madeeda, eaweeteaba damanang'wan bea sheeda, damandeaba shing'ada, aba dareapcheeda Sinayi; gawuurji ng'asheega sean rukusa NG'UTAMIIDA Musa, nih gidasin fuga Israeli.

⁶ Abeeda gwanda headiga hita moana nea nibwara geat ririnnyeanda aba ging'ooyda musta siida, ea ghwaraay ging'ooyda Basaaka eaweecheanji; ak gaweay madeeda Musa ea Haruni eaweedida;

⁷ ghwalamda fugiga ak gwayeesha, “Aseasa geebeayi ririnnyaan aba ging'ooyda musta siida; ak ghwasaan inyas geakghumwaneasa eara gideaba gajeatawa NG'UTAMIIDA haleanjeeda ghadooweeda aba damanda ghayi sirugu, aba jeeda fuga Israeli?”

⁸ Ng'ata ghwalamda Musa ak gwayeesha saawa, “Oomeasa, ghanyi dayiiy gichea gwarugu NG'UTAMIIDA aba badahuukeagwa.”

⁹ Ghwalamda NG'UTAMIIDA ak gwayeesha Musa,

¹⁰ “Eeshiina fuga Israeli, iideepa gaba ririnnyaan siida wassean aba jeedeang'wa ghana aba jeacheengeagwa aba ging'ooyda musta, ghana easheagi gwanda bareanyeeka, gayghoang'waay Basaakeeda NG'UTAMIIDA.

¹¹ Nea aba sheedeaba iyeenya eaweeteaba damanang'wan shing'ada gayghoang'waay nea ghwaak mukaateeyda meamwatawiida ea nyeanyiida ng'weani.

¹² Ak ea mwalaja eara gil ea ghoah sakteayda, ak ea mahirja geapkeadaanyi; gawuurji gidabeada deaweedeeda Basaaka ak ea gichea gwasinda.

¹³ Nea siida maba ririnnyaan ak ea manda bareanyeeka, nea ninung'waada ging'ooyda Basaaka, siisi gajeasach sea fugaaschi; aba gideaba mii ghoadaw NG'UTAMIIDA haleanjeeda ghadooweeda aba damandaanyi ghayi sirugu, siisi gayghwaat riing'eadaanyi.

¹⁴ Nea iyapteada rabascheanda aba jeedeang'wa aba ng'eanyiida mii daanyi, ak gagasa ghoang'waay Basaakeeda NG'UTAMIIDA; gawuurji gidanyaashta deaweedeeda Basaaka, ea giduurji diigheandaanyi, abeeda gaygwasindunu; abeeda gajandeawana deaweedeanagi, aba heedeaba siisi was rabascheandean, ea heeda siida sijiilsa jeedeaba ng'eang'i.”

Shamooghooda beasta

¹⁵ Eaweedida nea simiinda maheemajeanda, hean ghwahiing'aan shamooghoodida ak gwadukuta maheemajeanda, nea maheemajeanda siroondooscheesa; aba damandeaba shing'ada ak ghwaan uhuuda maheemajeanda, nea gawuurji beasta ak goobiida ea gamuchu.

¹⁶ Ak gwasunu galeagasean; shamooghoodida iissa gwadukuta gawuurji beasta aba eawa.

¹⁷ Nea iissa iisiitiing'da humng'eeda shamooghoodida aba uhuudeaba maheemajeandida, iissa gabalak fuga Israeli; ak gooduuwsa heeda miinaadawa shamooghoodida.

¹⁸ Nea aba diigheanda NG'UTAMIIDA iissa gabalak fuga Israeli, ak iissa shamooghoodida aba uhuuda maheemajeanda, hean goobiida jeeda museasooda.

¹⁹ Hean nea goobiida shamooghooda uhuuda maheemajeanda ea ghwasaang'ayiit askwearjoojiga, gafur fuga Israeli heeda ghaydit bea NG'UTAMIIDA, ak ea mabalaga.

²⁰ Hich ghoang'wa goobiida shamooghoodida uhuuda maheemajeanda askwearjoojisu ng'ay; hean goobiida jeeda museasooda nyaawa aba diigheanda NG'UTAMIIDA, nea hich gabalak aba diigheanda NG'UTAMIIDA.

²¹ Nea iissa ghoang'wa ghwashng'u shamooghoodida ghang'eada shing'ada ea ghwahita sakteayda; nea iisiitiing'da shamooghoodida sakteayda gabalak, nea iyabiida uhuuda maheemajeanda askwearda sean ea eaweesean, saawa iissa geaghus gaweay iisiitiing'da shamooghooda.

²² Hean iishing'da shamooghoodida, ak goobiida uhuuda maheemajeanda eawooji iyeenya, ghana sheeda, ghana gweayda, goobiida fuga Israeli jeeda museasooda nyaawa, maygabalak;

²³ nea iisiitiing'da gaweay. Aba diigheanda NG'UTAMIIDA iissa gooduuw aba museasooda nyaawa, nea iissa gaweay aba diigheanda NG'UTAMIIDA; ak gafur heeda abiita NG'UTAMIIDA, aba geatinda Musa.