IITOODA 7 - Bibliyeeda Ghaydit

Haleanjeeda ghadooweeda bea fuga hees

¹ Eaweecha nea niihiit Musa miindeayda maheemajeanda ghaydit, ak ghwayeasha nagheeda, ak ghoaghaydiit, ea dabitaanyi sean, ak ea niyeash heeda wagiida nea ghoaghaydiit ea dabitaanyi sean;

² Nea fuga hees bea Israeli, was fuga hees bea gealga ghweaniga nyaawa, ghoadayda haleanjeeda ghadooweeda; ak suh ea fuga hees bea dooshta ghayi miineadaysa fuga siyiida,

³ ak gweasa NG'UTAMIIDA haleanjeeda nyaawa bea ghadooweeda, was mutukwaji lah sidukuta iheenga, ea duuh damaniyeenya; nea mutukoanagi gaygweata fiisu hees iyeenya iyeenya, nea danyagi gaygaba siisi haw asagi; ak gaygweadu saawa madeeda maheemajeanda.

⁴ Ng'ata goobalool NG'UTAMIIDA, Musa ak gwayeesha,

⁵ “Ang'waanya aba geatinga nyaawa, ak abeeda gagadiyeata aba jeeda maheemajeanda siroondooscheesa; ak gajadawa fuga Lawi haleanjeeni, ak gaygaba siisi iidawi aba giteena gadiyeadaanyi.”

⁶ Hean gageanda Musa mutukwajeegiga, ea dugwa, ak ghoadaw fuga Lawi.

⁷ Orjooga Gershoni geataw mutukwaji iyeenya ea duuh ang'wan, aba giteena gadiyeeda nyaawa,

⁸ nea orjooga Merari ghoadaw mutukwaji ang'wan ea duuh sis, aba giteena gadiyeeda nyaawa, aba geatinda Itamari, orjeeda Haruneeda was ashoohoocheanda.

⁹ Nea mii adawa orjooga Gohati; aba gideaba, gadiyeedeaba haleanjeedida ghaydidiin daanyaawa. Hean gageanda ak ghwaada gheatkweaka nyaawa.

¹⁰ Ng'ata gayghoadayda fugiga heesiin haleanjeeda nyaawa bea ghadooweeda jea ghoaghaydiida heeda wagiida, aba eaweedida siyeasha nagheedean, ak ghoadayda fuga hees haleanjeeda nyaawa bea ghadooweeda aba madeeda heeda wagiida.

¹¹ Ng'ata ghwalamda NG'UTAMIIDA ak goobalool Musa nea gwayeesha, “Gaygweadu haleanjeeda nyaawa bea ghadooweeda ak gaygaba siisi haw eadu aba eaweadaanyi, ak geamiina heeda wagiida.”

¹² Siida asheeda gweadu haleanjeadaanyi bea ghadooweeda eaweeda madeeda Nashoni orjeeda Aminadaabu, bea eemeeda Yuda;

¹³ ak haleanjeadaanyi bea ghadooweeda ea giihearmoanagi gil bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya nea durumanataanyi ea shekeelaji laadam gil ea damanamughuush, aba shekeeleeda heeda ghaydit; dabidi sean asiyeenyean abeeda ghwanyiit dearanga miyaasiin siikuuyi sea nagheeda ghoah haleanjeeda ghadooweeda was dearanga;

¹⁴ ea ganakoanagi bea dahaabu, nea durumanataanyi ea shekeelaji damanamughuush, ak ea siinyiit hideeda;

¹⁵ ea eeshpajakcheanjagi, ea lagweenjeanjagi, ea lagweenjeanjagi mwanang' bea gwanyagi ghoah haleanjeeda ghadooweeda jea eaghwarda;

¹⁶ ea ghwaranyagi ghoah haleanjeeda ghadooweeda bea riing'eeda;

¹⁷ nea aba badayda lukghumeeda was haleanjeeda ghadooweeda bea hoyyoo, gajea heew iyeenya, ea lagweendi muut, ea ghwaray muut, ea lagweendisu manang'i muut bea gwanyagi; suh haleanjeeda ghadooweeda bea Nashoni orjeeda Aminadaabu.

¹⁸ Eaweeteaba iyeenya ghoadayda Netaneli, was siida haw bea eemeeda Isakari;

¹⁹ gweadu niny haleanjeadaanyi bea ghadooweeda, gweeriinagi bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya, nea durumanataanyi ea shekeelaji laadam gil ea damanamughuush, iisigala geat sea shekeeleeda heeda ghaydit, dabidi sean asiyeenyean ghwanyiit dearanga miyaasiin siikuuyi sea nagheeda, ghoah haleanjeeda ghadooweeda was dearanga,

²⁰ ea ganakoanagi bea dahaabu, nea durumanataanyi ea shekeelaji damanamughuush, nea ghwanyiit hideeda;

²¹ ea eeshpajakcheanjagi, ea lagweenjeanjagi, ea dayeeneanjagi bea gisilleanda mwanang' was lagweenda bea gwanyagi, ghoah haleanjeeda ghadooweeda jea eaghwarda;

²² ea ghwaranyagi ghoah haleanjeeda ghadooweeda aba badayda riing'eeda;

²³ nea aba badayda lukghumajeega ghadooweeda bea hoyyoo, ea heew iyeenya, ea lagweendi muut, ea ghwaray muut, ea dayi muut bea gisilga bea gwanyagi; suh haleanjeeda ghadooweeda bea Netaneli orjeeda Suari.

²⁴ Eaweeteaba samwagu ghoadayda Eliyabu orjeeda Heloni, was siida haw aba orjooga Sabuloni;

²⁵ haleanjeadaanyi bea ghadooweeda adayda gweeriinagi gil bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya, nea durumanataanyi ea shekeelaji laadam gil ea damanamughuush, nea geegala shekeeleeda heeda ghaydit; dabidi sean asiyeenyean ghwanyiit dearanga miyaasiin siikuuyi sea nagheeda, ghoah haleanjeeda ghadooweeda was dearanga;

²⁶ ea ganakoanagi bea dahaabu, nea durumanataanyi ea shekeelaji damanamughuush nea ghwanyiit hideeda;

²⁷ ea eeshpajakcheanjagi, ea lagweenjeanjagi, ea dayeenda gisilleanda mwanang' was lagweenda bea gwanyagi, ghoah lukghumajeega ghadooweeda jea eaghwarda;

²⁸ ea ghwaranyagi ghoah haleanjeeda ghadooweeda aba badayda riing'eeda;

²⁹ gicha aba badayda lukghumajeega ghadooweeda bea hoyyoo, gajea duu iyeenya was heewga, ea lagweendi muut, ea ghwaray muut, ea dayi muut bea gisilga was lagweendiga bea gwanyagi; suh haleanjeeda ghadooweeda bea Eliyabu orjeeda Heloni.

³⁰ Eaweeteaba ang'wan gayghoadayda Elisuri was orjeeda Shedeuri was siida haw aba orjooga Rubeni;

³¹ nea haleanjeadaanyi adayda bea ghadooweeda ea giihearmoanagi gil bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya, nea durumanataanyi ea shekeelaji laadam ea damanamughuush, iisigala shekeeleeda heeda ghaydit; dabidi sean asiyeenyean abeeda ghwanyiit dearanga miyaasiin siikuuyi sea nagheeda ghoah haleanjeeda ghadooweeda was dearanga;

³² ea ganakoanagi bea dahaabu, nea durumanataanyi ea shekeelaji damanamughuush, nea ghwanyiit hideeda;

³³ ea eeshpajakcheanjagi, ea lagweenjeanjagi, ea dayeenda gisilleanda was lagweenda bea gwanyagi, ghoah haleanjeeda ghadooweeda jea eaghwarda;

³⁴ ea ghwaranyagi ghoah haleanjeeda ghadooweeda aba badayda riing'eeda;

³⁵ nea aba badayda haleanjeeda ghadooweeda was lukghumeeda bea hoyyoo, ea duu iyeenya was heewga, ea lagweendi muut, ea ghwaray muut, ea dayi muut bea gisilga bea gwanyagi; suh haleanjeeda ghadooweeda jea ghoadayda Elisuri was orjeeda Shedeuri.

³⁶ Eaweeteaba muut gayghoadayda Shelumieli was orjeeda Suri-shadayi, was siida haw aba jeeda orjooga Simeoni;

³⁷ nea haleanjeeda adayda ea giihearmoanagi gil bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya nea durumanataanyi ea shekeelaji laadam ea damanamughuush, iisigala shekeeleeda heeda ghaydit; dabidi sean asiyeenyean abeeda ghwanyiit dearanga miyaasiin siikuuyi sea nagheeda ghoah haleanjeeda ghadooweeda was dearanga;

³⁸ ea ganakoanagi bea dahaabu nea durumanataanyi ea shekeelaji damanamughuush, nea ghwanyiit hideeda;

³⁹ ea eeshpajakcheanjagi, ea lagweenjeanjagi, ea dayeanaanjagi bea gisilleanda bea gwanyagi, ghoah haleanjeeda ghadooweeda jea eaghwarda;

⁴⁰ ea ghwaranyagi ghoah haleanjeeda ghadooweeda aba badayda riing'eeda;

⁴¹ nea aba haleanjeeda ghadooweeda was lukghumeeda bea hoyyoo, ea heew iyeenya gil, ea lagweendi muut, ea ghwaray muut, ea dayeega gisilga muut bea gwanyagi; suh haleanjeeda ghadooweeda jea ghoadayda Shelumieli was orjeeda Suri-shadayi.

⁴² Eaweeteaba lah gayghoadayda Eliyasafu was orjeeda Deueli, haw aba jeeda orjooga Gadi;

⁴³ haleanjeeda adayda ea giihearmoanagi gil bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya, nea durumanataanyi ea shekeelaji laadam ea damanamughuush, iisigala shekeeleeda heeda ghaydit; dabidi sean asiyeenyean abeeda ghwanyiit dearanga miyaasiin siikuuyi sea nagheeda ghoah haleanjeeda ghadooweeda was dearanga;

⁴⁴ ea ganakoanagi bea dahaabu, nea durumanataanyi ea shekeelaji damanamughuush, nea ghwanyiit hideeda;

⁴⁵ ea eeshpajakcheanjagi, ea lagweenjeanjagi, ea dayeeneanjagi bea gisilleanda was lagweenda bea gwanyagi, ghoah haleanjeeda ghadooweeda jea eaghwarda;

⁴⁶ ea ghwarayda asagi ghoah haleanjeeda sighadoawanda aba badayda riing'eeda;

⁴⁷ nea aba haleanjeeda ghadooweeda was lukghumeeda bea hoyyoo, ea heew iyeenya gil, ea lagweendi muut, ea ghwaray muut, ea dayi muut bea gisilga was lagweendiga bea gwanyagi; suh haleanjeeda jea ghoadayda Eliyasafu was orjeeda Deueli.

⁴⁸ Eaweeteaba ispwa gayghoadayda Elishama was orjeeda Amihudi, was siida haw aba jeeda orjooga Efraimu;

⁴⁹ haleanjeeda adayda giihearmoanagi gil bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya, nea durumanataanyi ea shekeelaji laadam gil ea damanamughuush, iisigala shekeeleeda heeda ghaydit; dabidi sean asiyeenyean ghwanyiit dearanga miyaasiin siikuuyi sea nagheeda ghoah haleanjeeda ghadooweeda was dearanga;

⁵⁰ ea ganakoanagi bea dahaabu, nea durumanataanyi ea shekeelaji damanamughuush, nea ghwanyiit hideeda;

⁵¹ ea eeshpajakcheanjagi, ea lagweenjeanjagi, ea dayeeneanjagi bea gisilleanda was lagweenda bea gwanyagi, ghoah haleanjeeda ghadooweeda jea eaghwarda;

⁵² ea ghwaranyagi ghoah haleanjeeda ghadooweeda aba badayda riing'eeda;

⁵³ nea aba haleanjeeda ghadooweeda was lukghumeeda bea hoyyoo, heew iyeenya gil, ea lagweendi muut, ea ghwaray muut, ea dayi muut bea gisilga was lagweendiga bea gwanyagi; suh haleanjeeda jea ghoadayda Elishama was orjeeda Amihudi.

⁵⁴ Eaweeteaba sis gayghoadayda Gamalieli was orjeeda Bedasuri, was siida haw aba jeeda orjooga Manase;

⁵⁵ haleanjeeda adayda gajea giihearmoanagi bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya, nea durumanataanyi ea shekeelaji laadam ea damanamughuush, iisigala shekeeleeda heeda ghaydit; dabidi sean asiyeenyean abeeda ghwanyiit dearanga miyaasiin siikuuyi sea nagheeda ghoah haleanjeeda ghadooweeda was dearanga;

⁵⁶ ea ganakoanagi bea dahaabu, nea durumanataanyi ea shekeelaji damanamughuush, nea ghwanyiit hideeda;

⁵⁷ ea eeshpajakcheanjagi, ea lagweenjeanjagi, ea dayeeneanjagi bea gisilleanda was lagweenda bea gwanyagi, ghoah haleanjeeda ghadooweeda jea eaghwarda;

⁵⁸ ea ghwaranyagi ghoah haleanjeeda ghadooweeda aba badayda riing'eeda;

⁵⁹ nea aba haleanjeeda ghadooweeda was lukghumeeda bea hoyyoo, ea heew iyeenya gil, ea lagweendi muut, ea ghwaray muut, ea dayi muut bea gisilga was lagweendiga bea gwanyagi; suh haleanjeeda ghadooweeda jea ghoadayda Gamalieli was orjeeda Bedasuri.

⁶⁰ Eaweeteaba shageash ea galanda Abidani was orjeeda Gideoni, was siida haw aba jeeda fuga Benjamini;

⁶¹ nea haleanjeadaanyi bea ghadooweeda jea ghoadayda ea giihearmoanagi gil bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya, nea durumanataanyi ea shekeelaji laadam ea damanamughuush, iisigala shekeeleeda heeda ghaydit; dabidi sean asiyeenyean abeeda ghwanyiit dearanga miyaasiin siikuuyi sea nagheeda ghoah haleanjeeda ghadooweeda was dearanga;

⁶² ea ganakoanagi bea dahaabu, nea durumanataanyi ea shekeelaji damanamughuush, nea ghwanyiit hideeda;

⁶³ ea eeshpajakcheanjagi, ea lagweenjeanjagi, ea dayeenda gisilleanda was lagweenda bea gwanyagi, ghoah haleanjeeda ghadooweeda jea eaghwarda:

⁶⁴ ea ghwaranyagi ghoah haleanjeeda ghadooweeda aba badayda riing'eeda;

⁶⁵ nea aba lukghumeeda was haleanjeeda ghadooweeda bea hoyyoo, heew iyeenya gil, ea lagweendi muut, ea ghwaray muut, ea dayi muut bea gisilga bea gwanyagi, suh haleanjeeda jea ghoadayda Abidani was orjeeda Gideoni.

⁶⁶ Eaweeteaba damanamughuush ea galanda Ahieseri orjeeda Amishadayi, was siida haw aba jeeda orjooga Dani,

⁶⁷ nea haleanjeadaanyi bea ghadooweeda jea ghoadayda ea giihearmoanagi gil bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya, nea durumanataanyi ea shekeelaji laadam ea damanamughuush, iisigala shekeeleeda heeda ghaydit; dabidi sean asiyeenyean abeeda ghwanyiit dearanga miyaasiin guuyi sea nagheeda ghoah haleanjeeda ghadooweeda was dearanga;

⁶⁸ ea ganakoanagi bea dahaabu, nea durumanataanyi ea shekeelaji damanamughuush, nea ghwanyiit hideeda;

⁶⁹ ea eeshpajakcheanjagi, ea lagweenjeanjagi ea dayeeneanjagi bea gisilleanda was lagweenda bea gwanyagi, ghoah haleanjeeda ghadooweeda jea eaghwarda;

⁷⁰ ea ghwaranyagi ghoah haleanjeeda ghadooweeda aba badayda riing'eeda;

⁷¹ nea aba lukghumajeega ghadooweeda bea hoyyoo, ea heew iyeenya gil ea lagweendi muut, ea ghwaray muut, ea dayi muut bea gisilga was lagweendiga bea gwanyagi; suh haleanjeeda ghadooweeda jea ghoadayda Ahieseri was orjeeda Amishadayi.

⁷² Eaweeteaba damwanagi ea galanda Bagieli orjeeda Okrani, was siida haw aba orjooga Asheri;

⁷³ haleanjeeda jea ghoadayda ea giihearmoanagi bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya, nea durumanataanyi ea shekeelaji laadam ea damanamughuush, iisigala shekeeleeda heeda ghaydit; dabidi sean asiyeenyean abeeda ghwanyiit dearanga miyaasiin siikuuyi sea nagheeda ghoah haleanjeeda ghadooweeda was dearanga;

⁷⁴ ea ganakoanagi bea dahaabu, nea durumanataanyi ea shekeelaji damanamughuush, nea ghwanyiit hideeda;

⁷⁵ ea eeshpajakcheanjagi, ea lagweenjeanjagi, ea dayeeneanjagi bea gisilleanda was lagweenda bea gwanyagi, ghoah haleanjeeda ghadooweeda jea eaghwarda;

⁷⁶ ea ghwaranyagi ghoah haleanjeeda ghadooweeda aba badayda riing'eeda;

⁷⁷ nea aba lukghumajeega ghadooweeda bea hoyyoo, ea heew iyeenya gil, ea laghweendi muut, ea ghwaray muut, ea dayi muut bea gisilga was lagweendiga bea gwanyagi; suh haleanjeeda ghadooweeda jea ghoadayda Bagieli, was orjeeda Okrani.

⁷⁸ Eaweeteaba damaniyeenya ea galanda Ahira orjeeda Enani, was siida haw aba jeeda orjooga Naftali;

⁷⁹ haleanjeeda jea ghoadayda ea giihearmoanagi bea lapiya, nea durumanataanyi ea shekeelaji bughala ea diktam ea damanamughuush, ea gweeriinagi bea lapiya, nea durumanataanyi ea shekeelaji laadam ea damanamughuush, iisigala shekeeleeda heeda ghaydit; dabidi sean asiyeenyean abeeda ghwanyiit dearanga miyaasiin siikuuyi nagheeda ghoah haleanjeeda ghadooweeda was dearanga;

⁸⁰ ea ganakoanagi bea dahaabu, nea durumanataanyi ea shekeelaji damanamughuush, nea ghwanyiit hideeda;

⁸¹ ea eeshpajakcheanda, ea lagweenjeanjagi, ea dayeeneanjagi mwanang' bea gisilleanda was lagweenda bea gwanyagi, ghoah haleanjeeda ghadooweeda jea eaghwarda;

⁸² ea ghwaranyagi ghoah haleanjeeda ghadooweeda aba badayda riing'eeda;

⁸³ nea aba lukghumajeega ghadooweeda bea hoyyoo, ea heew iyeenya gil, ea lagweendi muut, ea ghwaray muut, ea dayi muut manang'i bea gisilga was lagweendiga bea gwanyagi; suh haleanjeeda ghadooweeda jea ghoadayda Ahira was orjeeda Enani.

⁸⁴ Suh haleanjeeda ghadooweeda adayda fuga hees bea Israeli aba giighaydiita heeda wagiida, aba eaweecheanji siyeashaan; giihearmajeega lapiya damaniyeenya, ea gweerajeega lapiya damaniyeenya, ea ganakwajeega dahaabu damaniyeenya;

⁸⁵ giliwas giihearmooda lapiya durumanataanyi ea shekeelaji bughala ea diktam ea damanamughuush, ak giliwas gweeriida durumanataanyi shekeelaji laadam ea damanamughuush; lapiyeesean bea dabitida ea shekeelaji sagalamnyooji iyeenya ea bughalaji ang'wan, iisigala geat sea shekeeleeda heeda ghaydit;

⁸⁶ ea ganakwajeega dahaabu damaniyeenya nyiit hideeda, nea durumanata giliwas ganakooda ea shekeelaji damanamughuush, iisigala shekeeleeda heeda ghaydit; dahaabooda sean bea ganakwajeegiga ea shekeelaji bughala ea diktam;

⁸⁷ dugwa sean bea ghadooweeda jea eaghwarda heewga ea damaniyeenya lagweendiga bea gwanyagi ea damaniyeenya, sea booga nyaawa bea ghadooweeda; ea ghwarayga sighadoawanda aba badayda riing'eeda ea damaniyeenya;

⁸⁸ nea dugwa sean bea lukghumajeega ghadooweeda bea hoyyoo heewga ea diktam ea ang'wan, nea lagweendiga ea laadam nea ghwarayga ea laadam, nea dayeega manang'i bea gisilga bea gwanyagi ea laadam. Suh haleanjeeda ghadooweeda siitayda aba giighaydiita heeda wagiida, iing'ata nea siyeasha nagheeda heeda wagiida.

⁸⁹ Iidu nea gawa Musa jeeda maheemajeanda siroondooscheesa gabalool sea ASEETA hean ghwayiiy Ghuuta abalool niny nea ghwanyaasha uhuuda hoorgeeda baydeayda, mida uhuuda sandakwajeanda muuwuunooda, nea gwaleabu dageascheeda geeruubajeegiga asiyeenyean; ak gabalool sea niny.