IITOODA 6 - Bibliyeeda Ghaydit

Deaweedajeega fuga rada haleanjeeda

¹ Ng'ata ghwalamda NG'UTAMIIDA ak goobalool Musa nea gwayeesha,

² “Abaloola fuga Israeli, ak giyeeshi, iideepa ghwaak habeawooda haw siida was ng'eedeeda ghana ea gatmooda, was habeawooda radooda gida ak ghaghaydiit aba madeeda NG'UTAMIIDA;

³ gayghwasaja geaw difaayi ea difaayeeda ng'weani; mayghwali gidang'waan leabu difaayi, ghana gidang'waan was ghamunga, ak ea adaghwali beega wassean bea sabiibu, ak ea adaghwaak sabiibu, gea nyawiiri ghana gea gajeami.

⁴ Eawoojiga sean rada gidean adaghwaak gida wasean sisna sabiibu, ghang'eada ghajiileanda ea ghwahita badacheanda.

⁵ “Askwearjoojiga sean rada gida ak ghwasajaada, adaghwareakghu uhuudaanyi aba weembe; ea ghwahita eawoojigiga, jea ghoamiina geaw aba heeda NG'UTAMIIDEAN, ak gayghaghaydiit, ak gayghwanung'waada buudeega uhuudaanyi gwaheetu ea gageawiidi.

⁶ “Askwearjoojigiga sean adaw geaw NG'UTAMIIDEAN adagwaneekiisa musta.

⁷ Mayghang'uda geaw ririnnyeanda aba heeda ghwaan ghana heeda ghaamwat, ghana aba heeda huda ghaamwat, damanda meewa, abeeda gayghang'uda geaw ririnnyeanda; aba gideaba heeleeda ASEETA gwanda uhuudaanyi.

⁸ Askwearjoojiga sean sajaadawa, niny ea ghaydit aba heeda NG'UTAMIIDA.

⁹ “Nea siida wassean iisham miyeeda nea neekeewa niny, ak ghabwara ririnnyeanda uhuudaanyi ghaydit, abeeda gayghwareakghu uhuudaanyi eaweecheanji bea giimiinoadaanyiin; gaygwareekushi eaweeteaba ispwa.

¹⁰ Ak eaweeteaba sis gaygweadu ghariibaji iyeenya ghana dayi iyeenya bea ghariibajeanda ak gweasa ashoohoocheanda aba ghuuta maheemajeanda siroondooscheesa,

¹¹ ak gayghoadayda ashoohoocheanda agi eaghadoawanda aba badayda riing'eeda ak ghoadayda niirja aba badayda haleanjeeda ghadooweeda sighwarda, ak gaygwasin giiduupcheeda aba badaydaanyi, aba gideaba gwasin riing'eeda aba badayda siida meah, ak gayghoamiidu uhuudaanyi eaweedida,

¹² ng'ata gwasachsa geaw NG'UTAMIIDA aba badayda eawoojiga saja geaw, ak gweadu lagweenda bea gwanyagi ghoah haleanjeeda sighadoawanda aba badayda ramaseanda; ak eawoojiga madeeda ea majeeyiida, aba gideaba sajeadayda ghayi itaanyi sing'uda ririnnyeanda.

¹³ “Asi deaweedeeda siida rat gida ea nihi, iihit eawoojisu saja geaw ninyiin; gajeeyeadu ghuuta maheemajeanda siroondooscheesa;

¹⁴ ak gaygweadu haleanjeadaanyi bea ghadooweeda heeda NG'UTAMIIDA, dayeanaanjagi bea gisilleanda was lagweenda bea gwanyagi manda sirjeeda, ghoah haleanjeeda ghadooweeda sighwarda, ea dayeanaanjagi bea gisilleanda was ijooda bea gwanyagi manda sirjeeda, ghoah haleanjeeda ghadooweeda aba badayda riing'eeda, ea lagweenjeanjagi manda sirjeeda ghoah haleanjeeda ghadooweeda bea hoyyoo,

¹⁵ ea sooscheanda mida mukaatajeega meematawiita; ea mukaatajeega dearanga miyaasiin sisna nagheeda, ea mukaatajeega manang'i meematawiita, siyiin nagheeda, ea dearangaaschi bea ghadooweeda, ea haleanjeadaanyi bea ghadooweeda sileeha.

¹⁶ Ak gayghwaat ashoohoocheanda madeeda NG'UTAMIIDA, ak gaygweadu haleanjeadaanyi bea ghadooweeda aba badayda riing'eeda, ea haleanjeadaanyi bea ghadooweeda jea eaghwarda;

¹⁷ ak gaygweadu gisilleanji was lagweendean ghoah haleanjeeda ghaydit bea ghadooweeda bea hoyyoo bea NG'UTAMIIDA, ea sooscheanda mukaatajeega meematawiita; ak gaygweadu ashoohoocheanda eara haleanjeeda ghadooweeda was dearanga, ea haleanjeadaanyi bea ghadooweeda sileeha.

¹⁸ Nea siida rat gida gayghwareakghu uhuuda aba sajoadaanyi bea geaw, aba ghuuta maheemajeanda siroondooscheesa, ak ghwayiin jeeda beasta mida hing'eadayda haleanjeeda ghaydit bea ghadooweeda bea hoyyoo.

¹⁹ Hean gaygageanu ashoohoocheanda meang'eedeaba lagweenjeanji nea siiwu, sea mukaateanagi simwatawiit aba jeeda sooscheanda ea mukaatajeega manang'i meematawiita ak ghwayiin geatinda siida rat gida iing'ata reekghuta buudeega damanda giimiinoadaanyi;

²⁰ ak gaygageanu ashoohoocheanda ak gagatkat googeal humng'eeda ghoah haleanjeeda ghadooweeda siiyuuk aba madeeda NG'UTAMIIDA; gili ea ghaydit aba heeda ashoohoocheanda, ea giyooda sigatkat eekeal humng'eeda, ea jeata siitiing'da humng'eeda; ng'ata abeeda siida rat gida ghoamu ghwali difaayi.

²¹ “Deaweedeeda siida rat gida nea ghwaak habeawooda nihi, ak ea deaweedeeda haleanjeadaanyi bea ghadooweeda gil jea ghoadaw NG'UTAMIIDA aba giimiinoadaanyi bwaageaw, ea haleanjeeda suurja ammu ghoadaydaan; gawuurji gida rata gida aba gidabeada deaweedeeda giimiinoadaanyi.”

Ghawooda ashoohoodiga

²² Ng'ata ghwalamda NG'UTAMIIDA ak goobalool Musa ak gwayeesha,

²³ “Abaloola Haruni ea orjoagaaschi ak giyeeshi, Asi gajadawa ghawooda fuga Israeli ak giyeeshi,

²⁴ “Gagasa gagoonyi NG'UTAMIIDA ghawooda nea ghoahaaghwaneey;

²⁵ Gagasa ghoabwaanyi NG'UTAMIIDA aba weeshinda gheamamdaanyi ak ghabwaydaneey;

²⁶ gagasa ghoahiimneegwa NG'UTAMIIDA alooheadaanyi ak gagooneegwa hoyyoo.

²⁷ “Nih gichea ghwayiinda gheawungeasu badahuuka fuga Israeli gil ak gaydaadaw ghawooda.”