IITOODA 4 - Bibliyeeda Ghaydit

Gadiyoojiga fuga dooshta Lawi bea Gohati

¹ Ng'ata goobalool NG'UTAMIIDA Musa ea Haruni ak gwayeesha,

² “Saja mooneeda orjooga Gohati aba jeeda orjooga Lawi, nea gaba siisi isachsiinayi sea fugeaba gheanyi ea gealga ghweaniga nyaawa,

³ ghang'eada fuga bea gweanyeew diktam ea damanamughuush ea ghwahita fuga bea gweanyeew haradam ea damanamughuush, was buuneesean ammu gaweay gwasin gadiyeeda, aba jeeda maheemajeanda siroondooscheesa.

⁴ Nih gadiyeeda orjooga Gohati aba jeeda maheemajeanda siroondooscheesa, aba dabitida ghaydidi muuchiin;

⁵ damanda jea ghoang'eada beata, gaygawa Haruni jeeda ghooriida, sea orjoagaaschi, ak gayghwahiing'u hang'da beashooda siiheeniida, ak gookwealsa sandakwajeanda muuwuunooda;

⁶ ak gaygookwealsa badaydaanyi eaghwada mbooyda ak gookwealsa badayda hang'da oomu, amang'ata gayghwayiin geedigaaschi.

⁷ Nea badayda measeeda mukaatajeega giihiimnooda gaygookwealsa hang'da oomu, ak ghwayiin badayda giihearmooda ea matiingwajeega, ea gweerajeega, ea gikoombajeega sileehiida; nea mukaateeydida bea gealaaniin gaygwanda badaydaanyi;

⁸ ak gaygookwealsa badayda hang'da areara, ak gookwealsa eagweega nooga siikweali, ak ghwayiin geedigaaschi.

⁹ Ng'ata gaygageanu hang'da oomu, ak gwadukuteawa hoorgeeda gheaboong'nyeanda yeat, ea gheaboonyangaaschi, ea makaasajeagaaschi, ea giihearmajeagaaschi ea haleanjeeda sean siyiina nagheeda gadiydooscheata.

¹⁰ Ak gaygoodiing'da sea dabita sean ak gookwealsa eaghwada mbooyda ak ghwayiin badayda geediga jea ghwasareana.

¹¹ Nea heeda wagiida sisna dahaabu siguura dahaabu gaygookwealsa hang'da oomu, ak gookwealsa eaghwada mbooyda, ak gayghwayiin badayda geedigaaschi jea easareana;

¹² ng'ata gaygageanu haleanjeedida sean bea gadiyeeda sigadiydooscheata aba heeda ghaydidiin, ak ghwayiin jeeda hang'da oomu, ak gookwealsa eaghwada mbooyda, ak ghwayiin badayda geedigaaschi jea easareana.

¹³ Ak gaygageanda deareeda aba heeda wagiida; ak gookwealsa badayda hang'da oomu;

¹⁴ ak gayghwayiin haleanjeadaanyi sean badayda, was gea jea gagadiyeata aba heeda wagiida haleanjeeda sigwariideawa hideeda, ea gharinga, ea matiingwajeega ea gweerajeega, was haleanjeeda sean bea heeda wagiida; ak gaygookwealsa badayda eaghwada mbooyda, ak ghwayiin geedigaaschi jea easareana.

¹⁵ Iidu nea nidukuta Haruni ea orjoagaaschi heeda ghaydit; ea haleanjeeda sean bea heeda ghaydit, damanda jea gwasimsiina beata; abeeda gayghapka orjooga Gohati gageanda; nea mwasada haleanjeeda ghaydidi, ak ea mameewa. Haleanjeedida gaba orjooga Gohati aba heeda maheemajeanda siroondooscheesa.

¹⁶ “Nea Eleasari orjeeda Haruni was ashoohoocheanda gadiyeadaanyi gajea furooda nagheeda gheaboonyaneeda, ea hideeda ghaydit, ea haleanjeeda ghadooweeda was dearanga galeagasean, ea nagheeda eeshteayda, ea gicha furooda museasooda sean, ea dea haleanjeeda sean mida jeeda, was heeda ghaydit ea haleanjeadaanyi sean.”

¹⁷ Ng'ata ghwalamda NG'UTAMIIDA ak gwayeesha Musa ea Haruni,

¹⁸ “Adoanung'waadi fuga dooshta Gohati ea fuga gheanyaawa eabwar aba jeeda fuga Lawi;

¹⁹ asi asisiina ng'asheanji, ak abeeda ghwanyas eaweega ak ea mameewa, damanda jea gwaneekiisiina haleanjeedida ghaydidi muuchiin; gaygawa Haruni sea orjoagaaschi jeeda ghooriida, ak ghoadaw giliwas sih gadiyeadaanyi, ea giliwas sih sareandaanyi;

²⁰ ak saawa ea adagaweay jeeda ghooriida ak ghwadaah haleanjeedida ghaydidiin, eara gilimwanang', aba gideaba gajiidu gameewa.”

Gadiyoojiga fuga Lawi bea dooshta Gershoni

²¹ Ng'ata goobalool NG'UTAMIIDA Musa ak gwayeesha,

²² “Iita eara orjooga Gershoni, sea fuga gealga ghweaniga nyaawa, ea buweadeega nyaawa;

²³ ghang'eada fuga bea gweanyeew diktam ea damanamughuush ea gea naawa, ea ghwahita gea bea gweanyeew haradam ea damanamughuush iita; was fuga jea gwasin gadiyeeda, ak gwasin gadiyeeda maheemajeanda siroondooscheesa.

²⁴ Nih gadiyeeda fuga gheeh Gershoni, aba sinooda gadiyeeda ea sareenda haleanjeeda;

²⁵ saawa gaygageanu hang'weaka beashooda maheemajeanda ghaydit, ea gea maheemajeanda siroondooscheesa, ea hang'weakiga siikwealean, ea eagweegiga bea nooga siikwealiisa badaydean, ea hang'da siikweala ghuuta maheemajeanda siroondooscheesa,

²⁶ nea hang'weaka beashooda ea ghealooniga hilgweanda neaweesa maheemajeanda ea heeda wagiida, nea geeneaweesa meadajeega sean, ea ghealoonigaaschi, ea haleanjeeda sean bea gadiyeeda nyaawa, saawa gaygang'ula ng'asheega sean deaschi sea haleanjeeni.

²⁷ Nea gadiyoojiga sean bea orjooga Gershoni gaygwasin gidarukusa Haruni ea orjoagaaschi, aba haleanjeeda sean jea ghwasar, aba gadiyoojiga sean jea gwasin; ak gajanung' gafur haleanjeeda sean jea ghwasar.

²⁸ Nih gadiyeeda fuga dooshta orjooga Gershoni aba heeda maheemajeanda siroondooscheesa; ak furiischooda gaygwanda geatinda Itamari orjeeda Haruni was ashoohoocheanda.

Gadiyoojiga fuga dooshta Lawi bea Merari

²⁹ “Aba iita orjooga Merari, gajiita aba gidabeada fuga gheanyaawa, ea gealga ghweaniga nyaawa;

³⁰ ghang'eada siida bea gweanyeew diktam ea damanamughuush ak gwadiyeada, ea ghwahita gweanyeew haradam ea damanamughuush, gajiita, giliwas sih jea gawa jeedeaba gadiyeeni, ak gwasin gadiyeeda maheemajeanda siroondooscheesa.

³¹ Asi nih gadiyeeda jea gwasin jea ghoah gadiyeeda nyaawa aba jeeda maheemajeanda siroondooscheesa; daranajeega maheemajeanda, ea gharingaaschi, ea daranajeega, ea sindeetaanyi.

³² Ea daranajeega hilgweanda jea gwaneaweesa meadajeega sean, ea sindeetaanyi, ea guhuunatka, ea ghealooniga ea haleanjeadaanyi sean ea haleanjeadaanyi suurja sean, ea gadiyeadaanyi sean; ak gaylakiisiina aba gheawunga nyaawa haleanjeeda jea ghwasar.

³³ Nih gichea ghoah gadiyeeda orjooga dooshta Merari aba jeeda gadiyeeda nyaawa sean aba jeeda maheemajeanda siroondooscheesa, nea ghoahaaghwa saawa Itamari was orjeeda Haruni was ashoohoocheanda.”

Iitooda fuga Lawi

³⁴ Hean gageanu Musa ea Haruni sea fuga hees bea girgweageeda ak gwayiida orjooga Gohati aba gidabeada fuga gheanyaawa, ea gealga ghweaniga nyaawa,

³⁵ ghang'eada fuga bea gweanyeew diktam ea damanamughuush ak gwadiyeada, ea ghwahita gweanyeew haradam ea damanamughuush, giliwas sih sin gadiyeeda aba jeeda maheemajeanda siroondooscheesa;

³⁶ nea fuga siyiida aba gheanyaawa aba jeeda fuga dooshta nyaawa, ea sagalamnyooji iyeenya ea bughalaji ispwa ea haradam ea damanamughuush.

³⁷ Suh fuga siyiida aba jeeda fuga gheeh Gohati, was fuga sin gadiyeeda aba jeeda maheemajeanda siroondooscheesa, ghayi was fuga iida Musa ea Haruni aba diigheanda NG'UTAMIIDA aba geatinda Musa.

³⁸ Ak mooneeda fuga siyiida aba jeeda orjooga Gershoni, ea fuga gheanyaawa ea gealga ghweaniga nyaawa,

³⁹ ghang'eada fuga bea gweanyeew diktam ea damanamughuush ak ghwanaawa, ea ghwahita fuga bea gweanyeew haradam ea damanamughuush, giliwas sih nuwa jeeda gadiyeeda, aba jeeda maheemajeanda siroondooscheesa,

⁴⁰ eara giika ghayi siyiitiisa gheanyaawaan, aba gidabeada gealga nyaawa ea gealga ghweaniga nyaawa, ea sagalamnyooji iyeenya ea bughalaji lah ea diktam ea damanamughuush.

⁴¹ Suh fuga siyiida aba jeeda orjooga Gershoni, was fuga sean gadiiyi aba jeeda maheemajeanda siroondooscheesa, ghayi iida Musa ea Haruni aba diigheanda NG'UTAMIIDA.

⁴² Nea suh ea fuga siyiida aba jeeda fuga orjooga Merari aba gidabeada fuga gheanyaawa, ea gealga ghweaniga nyaawa,

⁴³ ghang'eada fuga bea gweanyeew diktam ea damanamughuush ak ghwanaawa, ea ghwahita fuga bea gweanyeew haradam ea damanamughuush, giliwas sih sin gadiyeeda, aba jeeda maheemajeanda siroondooscheesa

⁴⁴ fuga siyiitiisa gheanyaawa, heeda fuga gheanyaawa, ea sagalamnyooji samwagu ea bughalaji iyeenya.

⁴⁵ Suh fuga siyiida aba jeeda dooshta orjooga Merari, ghayi iida Musa ea Haruni aba diigheanda NG'UTAMIIDA, aba geatinda Musa.

⁴⁶ Fuga sean siyiida bea Lawi, was gea ghayi iida Musa ea Haruni ea fuga hees bea Israeli, aba gidabeada fuga gheanyaawa, ea gealga ghweaniga nyaawa,

⁴⁷ ghang'eada fuga bea gweanyeew diktam ea damanamughuush ea ghwanaawa, ea ghwahita fuga bea gweanyeew haradam ea damanamughuush, giliwas sih sin gadiyeeda, ea gadiyeeda sareenda haleanjeeda maheemajeanda siroondooscheesa,

⁴⁸ fuga siyiitiisa gheanyaawa, ea sagalamnyooji sis ea bughalaji muut ea seedam.

⁴⁹ Hean geeyiida giliwas sih aba diigheanda NG'UTAMIIDA ghayi rukusa Musa, giliwas sih aba gadiyeadaanyi, ghana aba giteena sareandaanyi; nih gidiitiida niny, gawuurji gidarukusiinda NG'UTAMIIDA Musa.