IITOODA 36 - Bibliyeeda Ghaydit

Hearaniischooda gadeemga sigeena

¹ Iimuchu gaweay fuga hees bea jeeda buweadeega dooshta Gileyadi, was orjeeda Makiri, orjeeda Manase, orjeeda Yosefu, ak gabalool sea Musa sea fuga hees suurja bea eemeeda Israeli;

² ak gwayeesha, “NG'UTAMIIDA gwayeesha ng'utamiideanyu adawa fuga Israeli ng'eanyiida aba ng'alealeeda ak gwahearan; ak ng'utamiideanyu gwayeesha NG'UTAMIIDA adawa haweega Selofehadi was orjeeda giyeanya hearaniischooda ghwaan.

³ Ak ghaghi fuga eemoojiga suuk bea fuga Israeli, ak abeeda hearaniischooda nyaawa gajeegeanda aba jeeda hearaniischooda ghweanigaasa, ak eemeeni jea eayiin jeeda nyaawaan gajeeheasa hearaniischooda nyaawa; nea hearaniischooni gajeegeanda aba ng'alealeeda aba jeeda hearaniischoodeanya.

⁴ Nea iihita gweaydeaba haradam ea damanamughuush was ghweelmeeda giipkeata bea giighuumdeayda madameega aba fuga Israeli, abeeda hearaniischoodeaba eemeeni mida jeedean gajeahaat hearaniischooda nyaawa; abeeda hearaniischooda nyaawa gajeegeandeawa jeeda hearaniischooda aba jeeda eemeeda ghweanigaasa.”

⁵ Hean gwarukusa Musa fuga Israeli ng'asheega gawuurji gidanyaashta ng'asheanda NG'UTAMIIDA, ak gwayeesha, “Eemeeda orjooga Yosefu ng'asheega rugu ghwahit.

⁶ Asi gwarugu NG'UTAMIIDA ng'asheanji aba iita haweega Selofehadi, nea gwayi, ‘Nung'waada ghaghi saawa fuga bwariiy; ak ea daghi fuga jeeda buweadeega eemeeda ghweaniga nyaawa.

⁷ Ak ea manda hearaniischooda wassean aba heeda orjooga Israeli jea ghabeawa eemeeni ak gaweesa eamwa suuk; aba gideaba orjooga Israeli gayghwanoas geat ak giliwas sih gaygwahearaniischi aba jeeda eemeeda ghweanigaaschi.

⁸ Nea giliwas huda jea ghwanyas haleanjeeda jea gwahearan aba jeeda eemeeda wassean aba orjooga Israeli, gajeaghi aba jeeda buweadeega aba eemeanagi bea ghwaan, ak abeeda orjooga Israeli gaba siisi nyas gichea gwahearan bea ghweanigaaschi.

⁹ Ak ea manda hearaniischooda wassean jea ghabeawa eemeeni ak gaweesa eamwa suuk; aba gideaba eemeeda orjooga Israeli gaygaba siisi noas hearaniischoadaanyi niny nea gaba geaw.’”

¹⁰ Hean gwasinda haweega Selofehadi gidarukusiinda NG'UTAMIIDA Musa;

¹¹ aba gideaba Mala, ea Dirsa, ea Hogla, ea Milka, ea Nuhu, was haweega Selofehadi gageena orjooga buweadeega ghwaan.

¹² Gageena buweadeega orjooga Manase, was orjeeda Yosefu, nea hearaniischooda nyaawa goobiida jeeda eemeeda buweadeega ghwaan.

¹³ Suh ng'asheega sirugu gil ea girgweageeda, adaw NG'UTAMIIDA fuga Israeli, aba geatinda Musa, aba jeeda mooheeda ng'eanyiida Moabu, neekeewa Yordani, mida ng'eanyiida eenda Yordani mida Yeriko.