IITOODA 34 - Bibliyeeda Ghaydit

Moonghajeega ng'eanyiida

¹ Ng'ata gwayeesha NG'UTAMIIDA Musa,

² “Ajeaksiinda fuga Israeli ak giyeeshi, Iyoahiti jeeda ng'eanyiida Ganaani, (nih ng'eanyiida jea ghoabineegwa ak goohearanyi, aba gideaba ng'eanyiini giduurji moonghajeagaaschi),

³ nea meatkweedeang'wa duukusa wiilooda ng'eanyiida biyeara gayghang'eada dareapcheeda Sini ak gwasik murdeeda Edomu, nea moonghoodeang'wa aba wiilooda ng'eanyiida biyeara ghang'eada muudeanooda Basooda Balang'da ak ghoadoas;

⁴ ak gayghaghwan geaw moonghoodeang'wa gagal wiilooda ng'eanyiida biyeara gal naweeda Akrabimu ak gwasik Sini, ea ghwahita Gadesh-barneya, aba wiilooda ng'eanyiida biyeara; ng'ata gaygawa ea ghwahita Hasar-adari, ak gawa ea ghwahita Asmoni;

⁵ ng'ata ghaghwan geaw moonghooda aba Asmoni ea ghwahita ghealooda Misri, ak gabursa Basooda haw.

⁶ “Nea aba heeda biyeara moonghooda gajea Basooda hawi ea heeda neekeewa; nih gayghoah moonghoodeang'wa aba heeda biyeara.

⁷ “Ak moonghoodeang'wa bea wiilooda ng'eanyiida ghayeawa nih gil, ghang'eada Basooda haw gajang'waara moonghoodeang'wa ea ghwahita Giijeeda Hori;

⁸ ak ghang'eada giijeeda Hori gajang'waara moonghooda ea ghwahita seawadeeda Hamati, ak muudeanooda moonghooda gajea Sedada;

⁹ ak gayghang'ata moonghooda ea ghwahita Sifroni, ak muudeanoadaanyi gajea Hasarenani; nih gayghoah moonghoodeang'wa aba wiilooda ng'eanyiida ghayeawa.

¹⁰ “Gajang'waara moonghoodeang'wa bea heeda ghayeawa ghang'eada Hasarenani ea ghwahita Shefamu;

¹¹ ak gayghwararang'aada moonghooda ghang'eada Shefamu ea ghwahita Ribla mida gayeewda Ayini; ng'ata gayghwararang'aada moonghooda ea ghwahita murdeeda basooda Ginereti aba heeda ghayeawa;

¹² ak gayghwararang'aada moonghooda ea ghwahita Yordani, ak gamuudean aba Basooda Balang'da. Nih ng'eanyiideang'wa aba gidabeada moonghajeagaaschi iisineaweesa meadajeega sean.”

¹³ Ng'ata gwarukusa Musa fuga Israeli, nea gwayeesha, “Nih ng'eanyiida jea ahearanana ng'alealeeda, ghayi ayi NG'UTAMIIDA gajeataw fugeaba eemoojigiga ashageashiin, ea fuga mwaatkwa bea eamwa;

¹⁴ aba gideaba fuga eemeeda Rubeni ea gealga ghweaniga nyaawa, ea fuga eemeeda orjooga Gadi aba gealga gheanyaawa, ghayi saawa ninyas, sea fuga mwaatkwa bea eemeeda Manase ninyas haleanjeeda nyaawa hearan;

¹⁵ eemoojisu asiyeenyean ea fuga mwaatkwa bea eamwa ninyas haleanjeeda nyaawa hearan aba meatkweeda niirja bea Yordani, aba hoowa bea Yerikohiin, aba meatkweeda ghayeawa, arearuuna aseeta.”

Fuga hees bea lachooda ng'eanyiida

¹⁶ Ng'ata gabalool NG'UTAMIIDA sea Musa, ak gwayeesha,

¹⁷ “Suh gheawunga fuga jea alakiisiina ng'eanyiida jea gwahearani gil ghoah deang'wa, Eliyasari was ashoohoocheanda sea Yoshuwa orjeeda Nuni.

¹⁸ Ak gajageani siyagi haw aba giliwas eamwa, ak ghwalajaada ng'eanyiida ghoah heechea ahearana.

¹⁹ Ak gheawunga fiisu ea suh; aba eemeeda Yuda, gajea Galebu gil orjeeda Yefune.

²⁰ Ak aba eemeeda orjooga Simeoni, Shemueli orjeeda Amihudi.

²¹ Nea aba eemeeda Benjamini, ea Elidadi orjeeda Gisloni.

²² Ak aba eemeeda orjooga Dani, aahaw Buki was orjeeda Yogoli.

²³ Aba orjooga Yosefu; aba eemeeda orjooga Manase, aahaw Hanieli was orjeeda Efodi;

²⁴ ak aba eemeeda orjooga Efraimu, aahaw Gemueli was orjeeda Shiftani.

²⁵ Nea aba eemeeda orjooga Sabuloni, aahaw Elisafani was orjeeda Barnaki.

²⁶ Nea aba eemeeda orjooga Isakari, aahaw Baltieli was orjeeda Asani.

²⁷ Nea aba eemeeda orjooga Asheri, aahaw Abihudi was orjeeda Shelomi.

²⁸ Nea aba eemeeda orjooga Naftali, aahaw Bedaheli was orjeeda Amihudi.

²⁹ Suh fuga rukusa NG'UTAMIIDA gideaba alakiisiina hearaniischooda fuga Israeli aba ng'eanyiida Ganaani.”