IITOODA 32 - Bibliyeeda Ghaydit

Eemoojiga mida gayeewda Yordani

¹ Abeeda orjooga Rubeni sea orjooga Gadi gwandeawa hawaniga saang'a bea dugwa; ak ghwadaah ng'eanyiida Yaseri ea ng'eanyiida Gileyadi, ak ging'ulayi, ng'eanyiini ng'eanyiida miy aba dugwa.

² Hean gaweay orjooga Gadi sea orjooga Rubeni ak gaweay heeda Musa ea Eliyasari was ashoohoocheanda, ea gweargwa girgweageeda, ak gabalool sea saawa, nea gwayeesha,

³ “Ataroti ea Diboni, ea Yaseri, ea Nimra, ea Heshboni, ea Eleale, ea Sebamu, ea Nebo, ea Beoni,

⁴ ng'eanyiini las NG'UTAMIIDA aba madeeda fuga girgweageeda fuga Israeliin, ng'eanyiida miy gil aba dugwa, ak aseasa fugaagu bea gadiyeeda geendeawi dugwa.”

⁵ Hean gwayeesha, “Iideakseasa alooheeda aba madeeda gheanyangaagu, aseaseeda was fugaagu bea gadiyeeda gigoonyeasa ng'eanyiini ghoah deanya; adinung' eakghaawana eenda Yordani.”

⁶ Ng'ata gwayeesha Musa orjooga Gadi ea Rubeni, “Gaygaweay fuga ghaheang'wa ng'ucheeda nea goopiitpiichi agooga aba hiji?

⁷ Ghwasaan inyas gajang'udana gurooruunatka fuga Israeli muuwda, ea moaghaawa gaweay ng'eanyiida adaw NG'UTAMIIDA?

⁸ Nih gidasin ghweanigeagwa, damanda anung' ghabeawa Gadesh-barneya gaweay gwasikteawa ng'eanyiida.

⁹ Aba gideaba damanda siyeang'daawa ak gaweay moangoachiyda Eshkoli, ak ghwadaah ng'eanyiida hean ghang'uda muuwda gurooruunatka fuga Israeli, ea mwascheang'da ak gaweay ng'eanyiida adaw NG'UTAMIIDA.

¹⁰ Ak ghwanyareas NG'UTAMIIDA eaweedida, ak ghwaak habeawooda nea gwayi,

¹¹ ‘Aba huumwa manda eara siyagi aba jeeda fuga leabu ng'eanyiida Misri, ghang'eada siidida bea gweanyeew diktamiin, ghana ghwanaawa, dea jea ghwadaah ng'eanyiida ghayi eayaksi habeawooda Abrahamu, ea Isaka, ea Yakobo; aba gideaba maana geeshteanyu aba jeesinga nyaawa sean;

¹² geaghus Galebu orjeeda Yefune, bea eemeeda Genisi, ea Yoshuwa orjeeda Nuni; aba gideaba saawa ghwaat geeshta NG'UTAMIIDA aba jeesinga nyaawa sean.’

¹³ Ak ghwayeat nyarasta NG'UTAMIIDA aba badayda Israeli, ak ghwanung' gwaneayi aba hiji ea hiji aba dareapcheeda gweanyeew haradam, bwak ea gwasin riing'eeda jeacheeng'su seaniin aba madeeda NG'UTAMIIDA ak gealas uhuuda.

¹⁴ Ak ging'ulayi, agooga nootiing'u geat ak gooweayi hoorgeeda ghweanigeagwa, seedooyda fuga riing'eega, ak ghoahaat gicha nyarasta NG'UTAMIIDA aba badayda Israeli!

¹⁵ Aba gideaba iyoayamnyi geat ak ea moayaadi geeshtaanyi, abeeda gaygabiikta gicha gwanung'usa dareapcheeda; ak gaylasa uhuudeaba fiisu seaniin.”

¹⁶ Hean gaweesa ea gwaneekiit, ak gwayi, “Gajeesna hilgweanda noagaasa aba hiji, nea geadeaschi mujiinajeega diibigaasa;

¹⁷ nea aseasa gajeewoosa hidaat ea dabiteanya ak geesheedeawi fuga Israeli, bwak ea eahita heeda jea goobiida; ak goobiida diibigaasa jeedeaba mujiinajeesu mideawa hiloogean, aba badahuuka fuga bea ng'eanyiida.

¹⁸ Aseasa majeebiiksiina gealgaasa, bwak ea ghwanyas giliwas sih hearaniischoadaanyi.

¹⁹ Aba gideaba aseasa majeehearaniischeena sea saawa aba giigheawda niirja bea Yordani, aba gideaba hearaniischoodeanya sinyaschi aba murdeeni bea Yordaniin duukusa heeda ghayeawa.”

²⁰ Hean gwayeesha Musa saawa, “Iisini ng'asheesu, iyoogeanu dabita ak gooweayi madeeda NG'UTAMIIDA aba ng'ucheeda,

²¹ nea giliwas ng'eedeeda bea ghaheang'wa mideawa dabita ng'ucheeda gayghoaghaawa Yordani aba madeeda NG'UTAMIIDA, bwak ea gooruuta weajoodigaaschi aba madeadaanyi,

²² ak geajoar ng'eanyiini aba madeeda NG'UTAMIIDA; abeeda iimuchu gabiikta, ak abeeda ea majandeawana giidiinyeanda aba madeeda NG'UTAMIIDA, ghana aba heeda Israeli; ak gayghoah ng'eanyiini deang'wa aba madeeda NG'UTAMIIDA.

²³ Ama moogasi asina ng'asheanji, abeeda agooga ea noosinyi riing'eeda aba madeeda NG'UTAMIIDA, ak abeeda ghoanali agooga gideaba riing'eeni iteang'wean majaghanyi ea mwanyaseagwa.

²⁴ Asi adeasa mujiinajeega aba badahuuka diibigeagwa, ea hilooga jea gwalla noogeagwa; ak goosinyi ng'asheesu rinna ghuusigeagwean.”

²⁵ Ng'ata goobalool orjooga Gadi sea orjooga Rubeni Musa, nea gwayeesha, “Aseasa siwooschi fugaagu bea gadiyeeda gajeesna gidirgu ang'iing'eeda was ng'utamiideanyu.

²⁶ Diibigaasa, ea gadeemgaasa, ea gisilgaasa, ea dugwaasa sean, gaygoobiida hiji bea mujiinajeega Gileyadiin;

²⁷ nea aseasa fugaagu bea gadiyeeda gajeakghaawa, giliwas ng'eedeeda mideawa dabita ng'ucheeda, aba madeeda NG'UTAMIIDA eeweaya ng'ucheeda, gawuurji gidirukuteaydi ang'iing'eeda was siideanyu haw.”

²⁸ Ng'ata gwayeesha Musa Eliyasari was ashoohoocheanda sea Yoshuwa orjeeda Nuni, sea fuga hees aba gealga ghweaniga nyaawa bea eemoojiga fuga Israeli, aba iiteaba fiisu.

²⁹ Hean gwayeesha Musa saawa, “Iideepa orjooga Gadi ea orjooga Rubeni, giliwas ng'eedeeda mideawa dabita ng'ucheeda aba madeeda NG'UTAMIIDA gayghoaghaawa Yordani sea agooga abeeda gajeajoar ng'eanyiida aba madeedeang'wa, abeeda gajoatawa saawa ng'eanyiida Gileyadi ghoah daanyaawa;

³⁰ amadeepa ghaheawa ghoaghaaw sea agooga nea gwandeawa dabita ng'ucheeda, abeeda gayghwanyas ng'eanyiida jea goobiida aba jeedeang'wa aba ng'eanyiida Ganaani.”

³¹ Ng'ata ghwasha orjooga Gadi, sea orjooga Rubeni nea gwayeesha, “Gawuurji gidarukuneasa NG'UTAMIIDA aseasa siwooschi fugaagu bea gadiyeeda, nih ea gichea eesinda.

³² Gajeakghaawa, nea geendeawi dabiteanya bea ng'ucheeda, aba madeeda NG'UTAMIIDA, ak geeweayi jeeda ng'eanyiida Ganaani, ak heeda jea eehearana gayghoah giigheawda niirja bea Yordani.”

³³ Hean ghoadaw Musa saawa, aba gideaba, orjooga Gadi, ea orjooga Rubeni, ea fuga mwaatkwa bea eemeeda Manase, was orjeeda Yosefu, gheambalmeeda Sihoni sugoocheanda fuga Amori, sea gheambalmeeda Ogu sugoocheanda Bashani, ng'eanyiini, aba giduurji mujiinajeagaaschi, sea moonghajeagaaschi, aba gideaba mujiinajeegeaba ng'eanyiini gwaneaweesa meadajeega sean.

³⁴ Hean ghwadeas orjooga Gadi Diboni, ea Ataroti, ea Aroeri;

³⁵ ea Atroti-shofani, ea Yaseri, ea Yogobeha;

³⁶ ea Bet-nimra, ea Bet-harani; mujiinajeega siimajeek ea muhealuutka gisilga.

³⁷ Ak ghwadeas orjooga Rubeni Heshboni, ea Eleale, ea Giriataimu;

³⁸ ea Nebo, ea Baal-meoni, (abeeda gheawungaaschi ea siyam,) ea Sibma; ak gang'asa mujiinajeega deas gheawun suuk.

³⁹ Nea orjooga Makiri was orjeeda Manase gaweay Gileyadi, ak gageanda, ak ghoareat fuga Amori mida jeeda.

⁴⁰ Ak ghoadaw Musa Makiri was orjeeda Manase Gileyadi, ak goobiida ng'eanyiini.

⁴¹ Iimuchu gawa Yairi was orjeeda Manase ak gageanda gharang'weaka Gileyadi ak gaguura gheawungaaschi Hawot-yairi.

⁴² Ng'ata gawa Noba ak gageanda Genati sea gharang'weakaaschi, ak gaguura gheawungaaschi Noba, was gheawungaaschi niny.