IITOODA 31 - Bibliyeeda Ghaydit

Ng'ucheeda ghaydit aba badayda Midiyani

¹ Ng'ata goobalool NG'UTAMIIDA Musa ak gwayeesha,

² “Walda mureandooda aba badayda fuga Israeli aba heeda fuga Midiyani; ak abeeda gaymeawa.”

³ Hean goobalool Musa buuneeda nea gwayeesha, “Oatawa headiga mida jeedeang'wa dabita gaweay ng'ucheeda, ak gaweay gang'uchi fuga Midiyani, ak gawaldeaysa mureandooda NG'UTAMIIDA aba heeda fuga Midiyani.

⁴ Gajoatayda fih sagalama aba giliwas eamwa aba jeeda eemoojiga sean bea Israeli ak ghoanung' gaweay ng'ucheeda.”

⁵ Ak geegeana jeeda sagalamnyoojiga Israeli, sagalamnyeanjagi aba giliwas eamwa, fih sagalamnyooji damaniyeenya mideawa dabita aba beata ng'ucheeda.

⁶ Hean ghwaat Musa fih sagalama aba giliwas eamwa ak gaweay ng'ucheeda, nea goodeayi Finehasi orjeeda Eliyasari was ashoohoocheanda ak gaweay ng'ucheeda, nea ghwaat haleanjeedida bea heeda ghaydidiin, ea durumbeatajeega siguuda aba geatinga nyaawa bea nyeashta Abeli fih.

⁷ Ak gang'uchi saawa sea fuga Midiyani gawuurji gidarukusiinda NG'UTAMIIDA Musa; ak ghabwar giliwas ng'eedeeda.

⁸ Ak geabwar sugoodiga Midiyani sea fih suuk sibaruuday saawa; Efi, ea Rekemu, ea Suri, ea Huri, ea Reba, was sugoodi muut bea Midiyani; ak ghabwar eara Balaamu orjeeda Beori aba ng'uta.

⁹ Ak gageanda fuga Israeli gadeemga fuga Midiyani ea diibiga nyaawa; sea dugwa nyaawa sean, sea gisilga nyaawa sean, sea haleanjeeda nyaawa sean, ak ghoawaas.

¹⁰ Ea mujiinajeega nyaawa sean, ea hiji wassean nyooh goobiita, ak ghang'uda museasajeega nyaawa sean beasta.

¹¹ Hean gageanda easang'su seaniin, sea giing'oonyanga sean, was gea buuneeda ea gea dugwa.

¹² Ng'ata gweadu giing'oonyanga buuneeda, ea easanga dugwa sea haleanjeeda siyaat ea eahiita heeda Musa, ea heeda Eliyasari was ashoohoocheanda, ea heeda eemeeda bwatgeat bea Israeli, aba museasooda mida moohajeega Moabu neekeewa Yordani mida Yeriko.

Biiknooda lugooda

¹³ Muchu gwarita Musa sea Eliyasari was ashoohoocheanda, sea fuga hees sean bea eemeeda bwatgeat, gwarita jarooda ghwadeapta aba riteayda museasooda.

¹⁴ Hean gwanyareeksa Musa shirikareeda hees bea lugooda, ea fiisu hees ambala sagalamnyoojiga buuneedean, ea fuga hees ambala bughalajeega buuneeda, was fuga biikna ng'ucheeda.

¹⁵ Ghoanyaashta Musa ak gwayeesha saawa, “Agooga noakghuumnyi gadeemga seani?

¹⁶ Ng'ula, suh gea nung' goodiiy fuga Israeli, aba girgweageeda Balaamu, ak ghwanung' gwasissa riing'eeda NG'UTAMIIDA aba ng'asheanji bea Beoriin, bwak ea ghwanyas buuneeda geeyooda muy was fuga bwatgeat bea NG'UTAMIIDA.

¹⁷ Asi aba ng'asheanji abwara giliwas ng'eedeeda aba jeedeaba diibisu, ea giliwas gatmu ninal ng'eedeeda aba luudayeeda sea niny.

¹⁸ Nea diibiga sean was haweega mii ghwanal ng'eedeeda aba luudayeeda sea niny, oakghuuha ak gabeaheegwa agooga.

¹⁹ Ootuwsiina riteayda museasooda ak goopiidi eawooji ispwa; nea siida wassean nibwar siida, ea siida wassean jea ghawaas siida sibwar, oamiini geat sea giing'oonyangeagwa aba eaweeteaba samwagu ea eaweeteaba ispwa.

²⁰ Ak gajoohuuna hang'weakeagwa, ea giliwas gil sisna muunda, ea haleanjeeda sean sisna eagweega nooga, ea giliwas gil sisna geeta.”

²¹ Ng'ata gwayeesha Eliyasari was ashoohoocheanda headiga sean weay ng'ucheeda, “Nih huumeanda diigheanda rukusa NG'UTAMIIDA Musa;

²² nea dahaabu, ea lapiya, ea lagheanga oomng'i, ea gharinyeanda, ea mabwaati, ea ghoolghoolga,

²³ gida wassean ammu goobiida jeeda beasta, gajoosiiga jeeda beasta, gayghamiidu. Ak gajeamiina beega siimiituuna haleanjeeda; nea gida wassean moamu goobiida jeeda beasta gajoosiiga jeedeaba beesu.

²⁴ Asi gajoohuuna hang'weakeagwa aba eaweeteaba ispwa, ak gajamiyeasiita; ama ng'ata gajapkaani jeeda museasooda.”

Lachooda easanga

²⁵ Ng'ata goobalool NG'UTAMIIDA Musa ak gwayeesha,

²⁶ “Iita mooneeda easanga siyeadu, sean gea buuneeda ea gea dugwa, ang'iing'i sea Eliyasari was ashoohoocheanda sea fuga hees bea gealga nyaawa mida jeeda eemeeda;

²⁷ ak gibwaashi easanga ghoah ghuusi iyeenya, ak gilakiisi gheareemanga weay ng'ucheeda sea eemeesean.

²⁸ Ng'ata ginung' gagu fiisu rita gaweay ng'ucheedean haleanjeeda mwaatkwa aba badayda NG'UTAMIIDA; gilagi aba jeeda bughalaji muut, aba buuneeda, ea aba dugwa, ea aba digeeniga, ea aba nooga;

²⁹ geani ak gilaji bugusta, ak giidawi Eliyasari was ashoohoocheanda, ghoah haleanjeeda ghadooweeda bea NG'UTAMIIDA.

³⁰ Nea haleanjeeda mwaatkwa bea fuga Israeli gaygeani agi jea eatayda aba jeeda giliwas haradam ea damanamughuush, aba buuneeda, ea aba dugwa, ea aba digeeniga, ea aba nooga; aba gideaba dugwa sean, adawa fuga Lawi, was fuga fur heeda ghaydit bea NG'UTAMIIDA.”

³¹ Hean gwasinda Musa ea Eliyasari was ashoohoocheanda gwasinda ng'asheanda gidarukusiinda NG'UTAMIIDA Musa.

³² Nea gheaptanga easanga aas fuga leabu ng'ucheeda, gisilga ea sagalamnyooji bughalaji lah ea laadam ea damanamughuush,

³³ ea duu sagalamnyooji laadam ea damaniyeenya,

³⁴ ea digeeni sagalamnyooji laadam ea agi,

³⁵ nea mooneeda buuneeda ea sagalamnyooji diktam ea damaniyeenya aba gadeemga miigwaluudayi headiga aba luudayeeda sea niny.

³⁶ Ea buuneeda mwaatkwa was fuga mwaatkwa bea jeeda fuga weay ng'ucheeda, mooneadaanyi gisilga ea sagalamnyooji bughalaji samwagu ea diktam ea damanispwa ea bughalaji muut;

³⁷ nea haleanjeeda jea eataw NG'UTAMIIDA aba jeedeaba gisilsu gajea gisil bughalaji lahi ea laadam ea damanamuut.

³⁸ Ak dugwa ea sagalamnyooji diktam ea damwalah; ak aba jeedeaba suh haleanjeeda jea eataw NG'UTAMIIDA gajea duu laadam ea damaniyeenya.

³⁹ Ak digeeniga ea sagalamnyooji diktam ea damanamughuush ea bughalaji muut, ak haleanjeeda jea eataw NG'UTAMIIDA ea digeeni laadam ea agi.

⁴⁰ Nea buuneeda abeeda ea sagalamnyooji damwalahi; nea aba jeedeaba suh gea jea eataw NG'UTAMIIDA ea fih diktam gil ea damaniyeenya.

⁴¹ Hean gageanu Musa ak ghoadaw Eliyasari was ashoohoocheanda haleanjeeni, was haleanjeeda ghadooweeda jea eetiing'da humng'eeda bea NG'UTAMIIDA, gawuurji gidarukusiinda NG'UTAMIIDA Musa.

⁴² Nea aba jeeda fuga mwaatkwa bea Israeli, sach Musa aba jeeda fuga weay ng'ucheeda

⁴³ ak haleanjeeda mwaatkwa bea fuga silach bugusta ea gisil sagalamnyooji bughalaji samwagu ea diktam ea damanispwa ea bughalaji muut;

⁴⁴ ea duu sagalamnyooji diktam ea damwalah,

⁴⁵ ea digeeni sagalamnyooji diktam ea damanamughuush, ea bughalaji muut,

⁴⁶ ea fih sagalamnyooji damwalah

⁴⁷ nea aba jeeda fuga silach bugusta bea Israeli gageanda Musa agi aba jeemba giliwas haradam ea damanamughuush, sean aba buuneeda ea dea dugwa, ak ghoadaw fuga Lawi was gea ahaaghwa maheemajeanda ghaydit bea NG'UTAMIIDA; gawuurji gidarukusiinda NG'UTAMIIDA Musa.

⁴⁸ Nea shirikareeda hees ambal sagalamnyoojiga lugooda, sea shirikareeda hees bwar bugus ambal sagalamnyoojiga, sea shirikareeda hees bwar bugus ambal bughalajeega, gwaneekiisa Musa;

⁴⁹ gwarukusa Musa nea gwayeesha, “Fugaagu bea gadiyeeda niyiida fuga ng'ucheeda mida hiing'eadaydeanya, ak ea manda eara akaleala dea niishoadeawaneasa.

⁵⁰ Ak geeyeadu haleanjeeda ghadooweeda bea NG'UTAMIIDA, was gideaba giliwas sih, was dabita dahaabu, mulmulanga ea gulanyeanda, ea ghunoojiga sing'oora, ea seangheayoojiga, ea gileenga ak geesin giiduupcheeda aba madeeda NG'UTAMIIDA.”

⁵¹ Ak ghoang'waay Musa ea Eliyasari was ashoohoocheanda haleanjeeda aba heanyaawa dahaabu aba gideaba haleanjeedida haleanjeeda sisin.

⁵² Ea haleanjeeda sean was dahaaboosean was haleanjeeda ghadooweeda adaw NG'UTAMIIDA, leabu heeda shirikareeda hees ambal sagalamnyoojiga ea shirikareeda hees ambal bughalajeega, shekeelaji sagalamnyooji damwalah ea bughalaji ispwa ea haradam ea damanamughuush.

⁵³ (Aba gideaba fiisu bea ng'ucheedean niyaas haleanjeeda, ak gaba siisi nyaksa geaw gida.)

⁵⁴ Hean ghoang'waay Musa ea Eliyasari was ashoohoocheanda dahaabu aba geatinga shirikareeda hees ambal sagalamnyoojiga ea gea ambal bughalajeega, ak gweadu jeeda maheemajeanda siroondooscheesa, ghoah gichea eepkeadi aba badahuuka fuga Israeli aba madeeda NG'UTAMIIDA.