IITOODA 30 - Bibliyeeda Ghaydit

Deaweedajeega badayda habeawajeega

¹ Muchu goobalool Musa fuga hees bea eemoojiga fuga Israeli, ak gwayeesha, “Nih ng'asheanda rugu NG'UTAMIIDA.

² Siida iirasa gida NG'UTAMIIDA, ghana iiyaak habeawooda jea ghwanung'waadawa gida, ea adagwanuus gidida heeleesean, gagasa gwasinda ng'asheega sean gidarukuteayda aba ghuutaanyi.

³ Nea gatmooda iirasa gida NG'UTAMIIDA, ak gooluulda geaw, aba neajeeda, nea gudugwanda gheaghwaan aba huduumeadaanyi;

⁴ ak ghwayiiy ghwaan gideaba nirat gida, ea gidaluuldeayda geaw, ak ghwasiinda ghwaan; abeeda gaygamajeegiit haleanjeeda rat, abeeda gilinyoo ghwarat gaygamajeegiit.

⁵ Ama deepa ghaheawa ghwaan eaweedida iinyaan; was habeawajeagaaschi abeeda ea maygwanda habeawooda badaydaanyi, abeeda ea manda habeawooda jea ghwarat niny, ak gwasa; ak gaygwasamsa NG'UTAMIIDA niny, aba gideaba ghaheawa ghwaan.

⁶ Ama deepa ea sighi, aba damani aga habeawajeagaaschiin, ghana aba ng'asheanda rukuna ghuutaanyi nea meateemshi nea gwanda jeeda radoodean;

⁷ ak ghwayiiy siyeadaanyi, ak gwasiindeaysa eaweedida iinya ng'asheanjiin; abeeda gaygamajeegiit haleanjeeda rat gaygamajeegiit, ak haleanjeadaanyi rat gaygamajeekcheewiidi.

⁸ Ama deepa ghaheawa siyeadaanyi eaweedida iinyaan; abeeda gaygwanuus habeawooni itaanyi mida badaydaanyiin nea ng'asheanda rukuna ghuutaanyi nea meateemshi, was dea rada geawiin; abeeda gaygwasamsa NG'UTAMIIDA.

⁹ Nea habeawooda masiinung'weanda ghana dea gatmooda sinung', gida wassean deepa ghwarada geaw, gaygamajeegiit aba badaydaanyi.

¹⁰ Ama ak habeawooda nea gwanda gheesiyeadaanyi, ghana gwadeepa ghwarat geaw nea ghwaak habeawooda,

¹¹ ak ghwayiiy siyeadaanyi ak ea marukusiina gil, nea mwaheawana; abeeda habeawajeagaaschi sean gaygamajeegiit, nea eara radooda rat geaw gaygamajeegiit.

¹² Ama yam siyeadaanyi ak ghwanung' ghoah ng'asheega mwadaagha eaweeda iinya ng'asheesu, abeeda ng'asheega sean rinna ghuutaanyi aba habeawajeagaaschi, ghana gidida rada geawiin, abeeda ea maygamajeegiit; ak gaygwasamsa NG'UTAMIIDA.

¹³ Gili wassean sirat, ea giliwas habeawooda iradi jea gwasawanyi, gaygoomajeek siyeadaanyi, ghana ghwanung' gaba mwadaagha.

¹⁴ Ama siindeaysa siyeeda gatmoadaanyi muuchi aba giliwas eaweecha; abeeda goomajeek habeawajeagaaschi sean, ghana haleanjeadaanyi sean rat, mida badaydaanyi; aba gideaba niimajeek, aba gideaba marukusiina gil niny aba eaweeda iinya ng'asheesu ikaaschi radiin.

¹⁵ Ama nyarja nea gwanuus damanda iinya ng'asheesu; abeeda gayghwasar munyinda gatmoadaanyi.”

¹⁶ Suh deaweedajeega rukusa NG'UTAMIIDA Musa, aba dageascheeda ng'eedeeda ea gatmoadaanyi, ea dageascheeda ghweanda ea hudaanyi, aba damanda gheareemaneanduumeadaanyi, aba damanda mideewa gheanyaawa.