IITOODA 3 - Bibliyeeda Ghaydit

Orjooga Haruni

¹ Suh jeacheenga Haruni ea Musa aba damanda abaloola NG'UTAMIIDA Musa aba uhuuda giijeeda Sinayi.

² Ak gheawunga orjooga Haruni ea suh; duweacheeda geeguura Nadabu, ea Abihu, ea Eleasari, ea Itamari.

³ Ak suh ea gheawunga orjooga Haruni, was ashoohoodiga ghayi simwaar ak ghoadaw hawunda gwasin gadiyeeda ashoohoocheanduumeeda.

⁴ Muchu ghami Nadabu sea Abihu aba madeeda NG'UTAMIIDA, damanda adaydaawa haleanjeeda ghadooweeda mii ghaydit aba madeeda NG'UTAMIIDA, aba dareapcheeda Sinayi, nea abeeda ea mii gwaji diibiga. Hean gwasin Eleasari ea Itamari gadiyeeda ashoohoocheanduumeeda aba madeeda Haruni was ghwaan.

Fuga Lawi gealoat gagadiiyeesa ashoohoodiga

⁵ Ng'ata goobalool NG'UTAMIIDA Musa, ak gwayeesha,

⁶ “Eani eemeeda Lawi gwaneekiit, ak giyiini madeeda Haruni was ashoohoocheanda, ak gagadiiyeesa.

⁷ Gaygagadiyeesa niny ea eemeeda bwat geat aba madeeda maheemajeanda siroondooscheesa ea dea eemeesean.

⁸ Ak gaygang'ula haleanjeeda sean bea maheemajeanda siroondooscheesa, nea ghoahaaghwa fuga Israeli.

⁹ Ak giidawi Haruni ea orjoagaaschi fuga Lawi; siitaw fiisu seaniin niny aba jeeda fuga Israeli.

¹⁰ Ng'ata gayloada Haruni ea orjoagaaschi, ak gaygwasin gadiyeeda nyaawa bea ashoohoocheanduumeeda; nea iineekiisa siida wassean, gajeabwar ghami.”

¹¹ Hean ghwalamda NG'UTAMIIDA ak gwayeesha Musa,

¹² “Ng'ula, aniini neageanu fuga Lawi aba jeeda fuga Israeli gaweay hoorgeeda giliwas duweacheeda atin jeeda ghaamwat aba jeeda fuga Israeli. Fuga Lawi gayghoah buuneedeanyu,

¹³ aba gideaba duweachajeega sean geasu; aba eaweeda aabwari duweachajeega sean aba ng'eanyiida Misri, ak geagaydiisi geaw duweachajeega sean bea Israeli, gea buuneeda ea gea diyeanga; gayghoah geasu; aniini geawooschi NG'UTAMIIDA.”

Iitooda fuga Lawi

¹⁴ Iimuchu goobalool NG'UTAMIIDA Musa aba dareapcheeda Sinayi, ak gwayeesha,

¹⁵ “Iita fuga Lawi aba gidabeada gealga ghweaniga nyaawa ea fuga gheanyaawa; giliwas ng'eedeeda bea sheanagi ea dea naawa gajiita.”

¹⁶ Ng'ata gwasinda Musa gidarukuteayda ng'asheanda NG'UTAMIIDA. Ak gwayiida.

¹⁷ Nea orjooga Lawi gheawunga nyaawa ea suh; Gershoni, ea Gohati, ea Merari.

¹⁸ Nea gheawunga orjooga Gershoni ea fuga gheanyaawa, ea Libni gil ea Shimeyi.

¹⁹ Ak orjooga Gohati ea fuga gheanyaawa, ea Amramu gil, ea Ishari, ea Hebroni, ea Usieli.

²⁰ Nea orjooga Merari ea fuga gheanyaawa ea Mahli gil, ea Mushi. Suh fuga gheeh Lawi aba gealga ghweaniga nyaawa.

²¹ Ak jeeda fuga Gershoni gwanda fuga Libni ea fuga Shimeyi; suh fuga gheeh Gershoni.

²² Mooneeda nyaawa aba giteena headiga sean ng'eada sheanagi ak ghwanaawa was fuga siyiida bea gheanyaawa ea sagalamnyooji laadam ea damanamughuush ea bughalaji muut.

²³ Fuga gheeh Gershoni gayghamway badayda maheemajeanda bea heeda biyeara,

²⁴ Ak siida haw bea gheeh Gershoni ea Eliyasafu orjeeda Laeli.

²⁵ Nea furiischoocheanda fuga Gershoni aba maheemajeanda siroondooscheesa gayghoah maheemajeanda ghaydit, maheemajeanda ea gidaghuutaanyi ea hang'da ghuuta maheemajeanda siroondooscheesa,

²⁶ ea hang'da beashooda mida bugusta maheemajeanda ghaydit ea heeda wagiida, ea hang'da gidaghuuta hilgweanda, ea ghealoonigaaschi. Gadiyoojiga sean gal haleanjeeni daanyaawa.

²⁷ Ak jeeda fuga Gohati gwanda fuga Amramu, sea fuga Ishari, sea fuga Hebroni, sea fuga Usieli; suh fuga jih Gohati.

²⁸ Nea mooneeda headiga sean ng'eada dea bea sheanagi ghana ghwanaawa, ea sagalamnyooji sis ea bughalaji lah was gea fuga gadiiyi aba heeda ghaydit.

²⁹ Fuga orjooga Gohati gayghamway murdeeda maheemajeanda duukusa wiilooda ng'eanyiida biyeara.

³⁰ Nea siida haw bea jeeda gheeda ghweanda fuga Gohati ea Elisafani orjeeda Usieli.

³¹ Haleanjeeda jea gafur sandakwajeanda gil, ea measa, ea hoorgeeda gheaboong'nyeanda, ea heeda wagiida, sea haleanjeedida bea heeda ghaydit gadiydooscheata aba gadiyoojiga nyaawaan, ea hang'da beashooda, ea gadiyoojiga sean deaschi sea gadiyoojigaaschi sean.

³² Nea Eliyasari orjeeda Haruneeda was ashoohoocheanda gayghoah siida haweewa fuga hees bea Lawi, ak gayghoah siida jea gagadiiy aba heeda ghaydidiin.

³³ Nea aba jeeda fuga Merari gwanda fuga Mahli sea fuga Mushi; suh fuga jih Merari.

³⁴ Ak buuneeda siyiitiisa gheanyaawa, aba giteena mooneeda headiga sean, ghang'eada siida sheanagi ghana ghwanaawa, ea sagalamnyooji lah ea bughalaji iyeenya.

³⁵ Nea siida haw bea gheeda ghweanda fuga Merari ea Surieli orjeeda Abihaili; suh gayghamway murdeeda maheemajeanda duukusa wiilooda ng'eanyiida ghayeawa.

³⁶ Ak gadiyeeda furiischooda siitaw orjooga Merari ea furooda beehajeega maheemajeanda, ea gharingaaschi, ea daranajeagaaschi, ea sindeetaanyi, ea dabitaanyi sean, ea gadiyoojigaaschi sean;

³⁷ ea daranajeega gireayda neaweesa, ea sindeetaanyi, ea guhuunatkaaschi, ea ghealoonigaaschi.

³⁸ Ak fugiga jea gooduuwsa madeeda maheemajeanda duukusa heeda ghayeawa, was madeeda maheemajeanda siroondooscheesa duukusa heeda arearuuna aseetean, gajea suh; Musa gil ea Haruni sea orjoagaaschi, ak gaygafur heeda ghaydit, ea furooda orjooga Israeli; nea rabascheanda jea gwaneekiit gajeabwar ghami.

³⁹ Buuneesean siyiida bea Lawi, ghayi iida Musa ea Haruni aba diigheanda NG'UTAMIIDA, aba jeacheenga nyaawa, headiga sean ng'eada sheanagi ghana ghwanaawa, ea sagalamnyooji diktam ea iyeenya.

Fuga Lawi gaweay hoorgeeda orjooga was duweachajeega

⁴⁰ Ng'ata ghwalamda NG'UTAMIIDA ak gwayeesha Musa, “Iita duweachajeega sean was headiga aba jeeda fuga Israeli, ghang'eada dea bea sheanagi ea dea naawa, nyasa mooneeda ea gheawunga nyaawa.

⁴¹ Ak gaygwalni fuga Lawi aba badaydeanyu aniini Aniini geawooschi NG'UTAMIIDA gaweay hoorgeeda duweachajeega sean aba jeeda fuga Israeli, ea dea dugwa fuga Lawi ak gaweay hoorgeeda duweachajeega dugwa fuga Israeli.”

⁴² Ak gwayiida Musa gawuurji gidarukusiinda NG'UTAMIIDA, duweachajeega sean mida jeeda fuga Israeli.

⁴³ Duweachajeega sean was headiga aba mooneeda gheawunga nyaawa ghang'eada dea sheanagi ak ghwanaawa, aba jeedeaba fiisu siyiida aba gheanyaawaan, ea sagalamnyooji diktam ea iyeenya ea bughalaji iyeenya ea laadam ea damasamwagu.

⁴⁴ Ng'ata ghwalamda NG'UTAMIIDA ak gwayeesha Musa,

⁴⁵ “Geani buuneeda Lawi gaweay hoorgeeda duweachajeega sean bea fuga Israeli, ea dugwa Lawi gaweay hoorgeeda dugwa nyaawa; ak fiisu bea Lawiin gayghoah buuneedeanyu; aniini geawooschi NG'UTAMIIDA:

⁴⁶ Nea aba lealnoodeaba fiisu was bughalaji iyeenya ea laadam ea damasamwagu was duweachajeega Israeli, burdeawa mooneeda fuga Lawiin,

⁴⁷ gaygeani shekeelaji muut aba giliwas uhuumba sih; aba shekeeleeda heeda ghaydit deenyi sea geerahaji diktam,

⁴⁸ nea lapiyeeni abit bea fuga silealuun gajadawa Haruni ea orjoagaaschi.”

⁴⁹ Hean ghawal Musa lapiyeeda lealnooda, was fuga naawa mooneeda nyaawa dea fuga silealu ea fuga Lawi;

⁵⁰ ak gageanda lapiyeeni aba heeda duweachajeega orjooga Israeli; shekeelaji sagalama ea bughalaji samwagu ea laadam ea muut, aba shekeeleeda heeda ghaydit;

⁵¹ abeeda gaygageanu Musa lapiyeeni bea lealnoodean ak ghoadaw Haruni ea orjoagaaschi, gawuurji sea ng'asheanda NG'UTAMIIDA, gawuurji gidarukusiinda NG'UTAMIIDA Musa.