IITOODA 29 - Bibliyeeda Ghaydit

Haleanjeeda ghadooweeda bea ghweelmeeda gweaydeesh

¹ “Nea eaweeda madeeda bea sheedeaba ispwa gajea badoodeaba geat ghaydit jea eabwada ASEETA; majasna gadiyeeda wassean oosinayi. Nih eaweeda jea aghuudana durumbeati.

² Ak agooga gajoatayda haleanjeeda ghadooweeda jea eaghwarda ghoah shearooda ng'andit jea goohoosan NG'UTAMIIDA; heawagi mwanang', ea lagweenjeanjagi, ea dayi ispwa bea gisilga bea gwanyagi manda sirjeeda;

³ sea haleanjeadaanyi bea ghadooweeda was booga bea dearanga miyaasiin siikuuyi nagheeda, gideaba damanamughuush bea gilo damanamughuushcheew samwagu aba danyagi, ea gideaba damanamughuush bea damanamughuushcheew iyeenya aba lagweenda,

⁴ ea gideaba damanamughuushcheanjagi aba giliwas dayeenda gisilleanda aba jeedeaba dayeegiga bea gisilga asispwaan;

⁵ ea ghwaranyagi ghoah haleanjeeda ghadooweeda aba badayda riing'eeda, ak gwasin giirooroocheeda aba badahuukeagwa;

⁶ ak gayghabwada haleanjeeni bea ghadooweeda sighwarda aba ng'ushiinda sheedean, ea haleanjeadaanyi bea ghadooweeda was booga, sea haleanjeeni bea ghadooweeda sigwariida bea galeagaseaniin, ea haleanjeadaanyi bea ghadooweeda was booga, sea haleanjeadaanyi bea ghadooweeda sileeha, gawuurji gidanyaashta diigheandaanyi, ak ghoah shearooda ng'andit, suh haleanjeeda ghadooweeda siitaw NG'UTAMIIDA sighwarda.

Haleanjeeda ghadooweeda bea eaweeda giirooroocheeda

⁷ “Eaweeteaba damanamughuush bea sheeni bea ispwaan gajea badoodeaba geat ghaydit jea eabwada ASEETA; majayaaga gil, ak ea majasna gadiyeeda wassean oosinayi,

⁸ ak gajoatayda haleanjeeda ghadooweeda bea NG'UTAMIIDA sighwarda, ghoah shearooda ng'andit, gajea heeyda mwanang' gil, ea lagweenjeanjagi, ea dayi ispwa bea gisilga was lagweendiga bea gwanyagi; ak ea maygaba siirja;

⁹ sea haleanjeadaanyi bea ghadooweeda was dearanga, miyaasiin siikuuyi nagheeda, ghoah gideaba damanamughuush bea gilo aba giliwas damanamughuush bea damanamughuushcheew samwagu aba danyi, ea gideaba damanamughuush aba giliwas damanamughuush bea damanamughuushcheew iyeenya bea lagweenjeanji,

¹⁰ ea gideaba damanamughuush bea damanamughuushcheanjagi aba giliwas dayeenda gisilleanda aba dayeegiga bea gisilga asispwaan;

¹¹ ea ghwaranyagi ghoah haleanjeeda ghadooweeda aba badayda riing'eeda; mawoosa haleanjeeni bea ghadooweeda bea giirooroocheedean, ea haleanjeadaanyi bea ghadooweeda was dearanga, sea haleanjeadaanyi bea ghadooweeda sileeha.

Haleanjeeda ghadooweeda bea ghweelmeeda udahabeaschajeega

¹² “Ak eaweeteaba damanamuut bea sheedeaba ispwa gajea badoodeaba geat ghaydit jea eabwada ASEETA; majasna gadiyeeda wassean oosinayi, ak gajasisiina ghweelmeeda NG'UTAMIIDA eawooji ispwa;

¹³ ak gajoatayda haleanjeeda ghadooweeda sighwarda, was haleanjeeda ghadooweeda siitaydaawa beasta, ghoah shearooda ng'andit aba heeda NG'UTAMIIDA; was heewsu manang'i damasamwagu, ea lagweendi iyeenya, ea dayeega gisilga was lagweendiga damanang'wan bea gwanyagi; ak gajea manda sirjeeda sean;

¹⁴ sea haleanjeadaanyi was dearanga, was dearanga miyaasiin siikuuyi sea nagheeda, ak gajea gideaba damanamughuush gil bea gilo aba giliwas damanamughuushcheanda aba damanamughuushcheew samwagu aba giliwas deeda aba jeedeaba heewgiga atamasamwaguun; ea gideaba damanamughuush aba giliwas damanamughuush bea damanamughuushcheew iyeenya aba giliwas lagweenda aba jeedeaba lagweendigiga asiyeenyean;

¹⁵ ea gideaba damanamughuush bea damanamughuushcheanjagi aba giliwas dayeenda gisilleanda aba jeedeaba dayeegiga bea gisilga atamanang'waniin;

¹⁶ ea ghwaranyagi ghoah haleanjeeda ghadooweeda aba badayda riing'eeda ak gabassiinyi sea haleanjeeni bea ghadooweeda sighwarda galeagaseaniin, ea haleanjeadaanyi bea ghadooweeda was dearanga, sea haleanjeadaanyi bea ghadooweeda sileeha.

¹⁷ “Ak eaweeteaba iyeenya gajoatayda heew damaniyeenya manang'i, ea lagweendi iyeenya, ea dayeega gisilga damanang'wan manang'i was lagweendiga bea gwanyagi manda sirjeeda;

¹⁸ sea haleanjeadaanyi bea ghadooweeda was booga ea haleanjeadaanyi bea ghadooweeda sileeha aba dusu, ea gisilsu, ea aba dayeegiga bea gisilgean, aba giteena mooneeda nyaawa, aba gidanyaashta diigheanji;

¹⁹ ea ghwaranyagi ghoah haleanjeeda ghadooweeda aba badayda riing'eeda; ak geabwada haleanjeeda ghadooweeda sighwarda bea galeagasean, sea haleanjeadaanyi bea ghadooweeda was booga, sea haleanjeadaanyi bea ghadooweeda sileeha.

²⁰ “Ak eaweeteaba samwagu heew damanagi, ea lagweendi iyeenya, ea dayi damanang'wan bea gisilga was lagweendiga bea gwanyagi mandeawana sirjeeda;

²¹ sea haleanjeadaanyi bea ghadooweeda was booga, sea haleanjeadaanyi bea ghadooweeda sileeha, aba dusu, ea aba gisilsu, ea aba dayeegiga bea gisilgean, aba giteena mooneeda nyaawa, aba gidanyaashta diigheanda;

²² ea ghwaranyagi ghoah haleanjeeda ghadooweeda aba badayda riing'eeda; ak geabwada haleanjeeda ghadooweeda sighwarda aba galeagasean, ea haleanjeadaanyi bea ghadooweeda was booga, ea haleanjeadaanyi bea ghadooweeda sileeha.

²³ “Ak eaweeteaba ang'wan gajoatayda heew damanamughuush, ea lagweendi iyeenya, ea dayi damanang'wan bea gisilga was lagweendiga bea gwanyagi manda sirjeeda;

²⁴ sea haleanjeadaanyi bea ghadooweeda was booga, ea haleanjeadaanyi bea ghadooweeda sileeha aba heewsu, ea aba gisilsu, ea aba dayeegiga bea gisilgean, aba giteena mooneeda nyaawa, aba gidanyaashta diigheanda;

²⁵ ea ghwaranyagi ghoah haleanjeeda ghadooweeda aba badayda riing'eeda; jea eabwada haleanjeeda ghadooweeda sighwarda bea galeagasean; ea haleanjeadaanyi bea ghadooweeda was booga, ea haleanjeadaanyi bea ghadooweeda sileeha.

²⁶ “Ak eaweeteaba muut gajoatayda heew shageash, ea lagweendi iyeenya, ea dayi damanang'wan bea gisilga was lagweendiga bea gwanyagi manda sirjeeda;

²⁷ sea haleanjeadaanyi bea ghadooweeda was booga, ea haleanjeadaanyi bea ghadooweeda sileeha, aba heewsu, ea aba lagweendisu, ea aba dayeegiga bea gisilgean, aba giteena mooneeda nyaawa, aba gidanyaashta diigheanda;

²⁸ ea ghwaranyagi ghoah haleanjeeda ghadooweeda aba badayda riing'eeda; sibwada haleanjeeda ghadooweeda sighwarda galeagasean, ea haleanjeeni ikaaschi bea ghadooweeda was boogean ea haleanjeadaanyi bea ghadooweeda sileeha.

²⁹ “Ak eaweeteaba lah gajoatayda heew sis, ea lagweendi iyeenya, ea dayi damanang'wan bea gisilga was lagweendiga bea gwanyagi manda sirjeeda;

³⁰ sea haleanjeadaanyi bea ghadooweeda was booga, ea haleanjeadaanyi bea ghadooweeda sileeha; aba heewsu, ea aba lagweendisu, ea aba dayeegiga bea gisilgean, aba giteena mooneeda nyaawa, aba ginyaashta diigheanda;

³¹ ea ghwaranyagi ghoah haleanjeeda ghadooweeda aba badayda riing'eeda; ak ghabwada haleanjeeda ghadooweeda sighwarda galeagasean, ea haleanjeadaanyi bea ghadooweeda was booga, sea haleanjeadaanyi bea ghadooweeda sileeha.

³² “Ak eaweeteaba ispwa gajoatayda heew ispwa, ea lagweendi iyeenya, ea dayi damanang'wan bea gisilga was lagweendiga bea gwanyagi manda sirjeeda;

³³ sea haleanjeadaanyi bea ghadooweeda was booga, ea haleanjeadaanyi bea ghadooweeda sileeha; aba heewsu, ea aba lagweendisu, ea aba dayeegiga bea gisilgean, aba giteena mooneeda nyaawa, aba gidanyaashta diigheanda;

³⁴ ea ghwaranyagi ghoah haleanjeeda ghadooweeda aba badayda riing'eeda; ghabwada haleanjeeda ghadooweeda sighwarda galeagasean, ea haleanjeadaanyi bea ghadooweeda was booga, ea haleanjeadaanyi bea ghadooweeda sileeha.

³⁵ “Ak eaweeteaba sis gajea badoodeaba geat ghaydit bea huumwa jea eabwada ASEETA; majasna gadiyeeda wassean oosinayi;

³⁶ Asi gajoatayda haleanjeeda ghadooweeda jea eaghwarda, was haleanjeeda ghadooweeda jea eataydaawa beasta, was shearooda ng'andit aba heeda NG'UTAMIIDA; gea heawagi gil, ea lagweenjeanjagi, ea dayi ispwa bea gisilga was lagweendiga bea gwanyagi manda sirjeeda,

³⁷ sea haleanjeadaanyi bea ghadooweeda was booga, ea haleanjeadaanyi bea ghadooweeda sileeha; aba heewi, ea aba lagweenjeanji, ea aba dayeegiga bea gisilgean, aba giteena mooneeda nyaawa, aba gidanyaashta diigheanda;

³⁸ ea ghwaranyagi ghoah haleanjeeda ghadooweeda aba badayda riing'eeda; ak ghabwada haleanjeeda ghadooweeda sighwarda galeagasean, ea haleanjeadaanyi bea ghadooweeda was booga, sea haleanjeadaanyi bea ghadooweeda sileeha.

³⁹ “Haleanjeeni gajoatawa NG'UTAMIIDA aba ghweelmoojigeagwa ghayi sirukuneegwa, jea abwadana haleanjeedeang'wa oarachi, sea haleanjeedeang'wa bea ghadooweeda mwas jeesingeagwa, ghoah haleanjeedeang'wa bea ghadooweeda jea eaghwarda, ea haleanjeedeang'wa bea ghadooweeda was booga, ea haleanjeedeang'wa bea ghadooweeda sileeha, sea haleanjeedeang'wa bea ghadooweeda bea hoyyoo.”

⁴⁰ Ng'ata gwayeesha Musa fuga Israeli ng'asheegiga gawuurji ng'asheega sean rukusa NG'UTAMIIDA Musa.