IITOODA 28 - Bibliyeeda Ghaydit

Haleanjeeda ghadooweeda bea galeagasean

¹ Ghwalamda NG'UTAMIIDA ak gwayeesha Musa,

² “Rukusiina fuga Israeli, nea giyeeshi saawa, ‘Haleanjeedeanyu bea ghadooweeda, hamiteanyu sighadoawanda sighwarda, bea shearooda ng'andit, gajang'ula muuchi ak gajagoona aba damandaanyi hit.’

³ Ak gajeeshiina saawa, Nih haleanjeeda ghadooweeda jea eaghwarda jea oatawa NG'UTAMIIDA; dayi iyeenya bea gisilga was lagweendiga bea gwanyagi nea manda sirjeeda; giliwas eaweecha, ghoah haleanjeeda ghadooweeda sighwarda aba galeagasean.

⁴ Gajadayda dayeanaanjagi bea gisilleanda sakteayda, ak gajadayda dayeenda niirja bea gisilleanda shing'ada;

⁵ ak gajadayda gideaba damanamughuush bea gilo bea dearanga miyaasiin ghoah haleanjeeda ghadooweeda was booga siikuuyi sea gidameagweena iyeenya bea ghadeeda nagheedeesh.

⁶ Nih haleanjeeda ghadooweeda sighwarda galeagasean, ghayi sirugu aba giijeeda Sinayi ghoah shearooda ng'andit gil, was haleanjeeda ghadooweeda sighwarda bea NG'UTAMIIDA.

⁷ Nea haleanjeadaanyi bea ghadooweeda sileeha gajea gidameagweena iyeenya gil bea gikoombe aba dayeanaanjagi bea gisilleanda; nea heeda ghaydit gajahiisiina haleanjeeda ghadooweeda sileeha was difaayeeda ng'weani siitaw NG'UTAMIIDA.

⁸ Ak dayeendeaba iyeenya bea gisilleanda gajadayda damandeaba shing'ada; gawuurji boogiga bea ghadooweeda siitayda sakteaydean, ak gawuurji sea haleanjeedida ikaaschi bea ghadooweeda sileehean, gajadayda ghoah haleanjeeda ghadooweeda sighwarda, was shearooda ng'andit aba heeda NG'UTAMIIDA.

Haleanjeeda ghadooweeda bea sabaato

⁹ “Nea eaweeda sabaato gayghoadayda dayi iyeenya bea gisilga, bea gwanyagi, manda sirjeeda, sea gilagi bea jeeda gilatamanamughuushcheew iyeenya bea gilooyda booga miyaasiin ghoah haleanjeeda ghadooweeda was dearanga siikuuyi sea nagheeda, sea haleanjeadaanyi bea ghadooweeda sileeha;

¹⁰ suh haleanjeeda ghadooweeda sighwarda aba giliwas sabaatohi, nea ghabwada haleanjeeda ghadooweeda sighwarda galeagasean ea haleanjeadaanyi bea ghadooweeda sileeha.

Haleanjeeda ghadooweeda bea eaweeda madeeda bea sheeda

¹¹ “Nea aba giing'eeta sheegeagwa gajoatawa NG'UTAMIIDA haleanjeeda ghadooweeda sighwarda; nea heewsu manang'i iyeenya gil, ea lagweenjeanjagi, ea dayi ispwa bea gisilga was lagweendiga bea gwanyagi manda sirjeeda;

¹² sea gideaba damanamughuush bea damanamughuushcheew samwagu bea gilo was dearanga miyaasiin ghoah haleanjeeda ghadooweeda was dearanga siikuuyi sea nagheeda, aba giliwas heeyda, ea gideaba damanamughuushcheew iyeenya bea dearanga miyaasiin ghoah haleanjeeda ghadooweeda was dearanga siikuuyi sea nagheeda, aba lagweenjeanji asagiin;

¹³ ea gideaba damanamughuushcheanjagi bea dearanga miyaasiin siikuuyi sea nagheeda ghoah haleanjeeda ghadooweeda was dearanga aba giliwas dayeenda gisilleanda; ghoah haleanjeeda ghadooweeda sighwarda ghoah shearooda ng'andit, nih haleanjeeda ghadooweeda sighwarda siitaw NG'UTAMIIDA jea eaghwarda.

¹⁴ Nea haleanjeadaanyi bea ghadooweeda sileeha gajea gidagween iyeenya bea gikoombeeyda difaayi gil bea heeyda, ea gideaba samwagu bea gikoombe bea lagweenda, ea gidameagweena iyeenya bea gikoombe bea dayeenda gisilleanda; nih haleanjeeda ghadooweeda sigwariida gil aba giliwas sheeda aba sheega sean bea gweayda.

¹⁵ Ak ghwaranyagi gayghoah haleanjeeda ghadooweeda aba badayda riing'eeda bea NG'UTAMIIDA ak gajeatayda gea madeeneawana suh bea ghadooweeda sigwariida galeagaseaniin, sea haleanjeadaanyi bea ghadooweeda sileeha.

Haleanjeeda ghadooweeda bea ghweelmeeda mukaateeyda meamwatawiida

¹⁶ “Gicha aba sheeda madeeda, eaweeteaba damanang'wan bea sheeda, gajea basaakeeda NG'UTAMIIDA.

¹⁷ Eaweeteaba damanamuut bea sheeni gajea ghweelmeeda; gajeayaak mukaateeyda meamwatawiida eawooji ispwa.

¹⁸ Eaweeda madeeda gajea badoodeaba geat ghaydit jea eabwada ASEETA; majasna gadiyeeda wassean oosinayi;

¹⁹ ak gajoatayda haleanjeeda ghadooweeda sighwarda, was haleanjeeda ghadooweeda sighwarda bea NG'UTAMIIDA; heewsu manang'i iyeenya, ea lagweenjeanjagi, ea dayi ispwa bea gisilga was lagweendiga bea gwanyagi, ak ea maba siirja;

²⁰ sea haleanjeadaanyi bea ghadooweeda was dearanga miyaasiin siikuuyi sea nagheeda; gajoatayda gideaba damanamughuush bea gilo aba damanamughuushcheew samwagu aba heawagi, ea gideaba damanamughuush bea damanamughuushcheew iyeenya aba lagweenda;

²¹ ak gajadayda gideaba damanamughuush aba giliwas dayeenda gisilleanda, was dayeegiga bea gisilga asispwaan;

²² ak gajoatayda ghwaranyagi ghoah haleanjeeda ghadooweeda aba badayda riing'eeda, gwasin giiduupcheeda aba badahuukeagwa.

²³ Gajoatayda haleanjeeni sea haleanjeeda ghadooweeda sighwarda sakteayda, was haleanjeeda ghadooweeda bea galeagasean.

²⁴ Gajoatayda haleanjeeda ghadooweeda gwasunu galeagasean aba eawooji ispwa, was hamita sighadoawanda sighwarda, was shearooda ng'andit aba heeda NG'UTAMIIDA; gajoatayda sea haleanjeeda ghadooweeda sigwariida galeagasean sea haleanjeadaanyi bea ghadooweeda sileeha.

²⁵ Nea eaweeteaba ispwa gajea eaweeda ghaydit gil jea eabwada ASEETA; majasna gadiyeeda wassean oosinayi.

Haleanjeeda ghadooweeda bea ghweelmeeda lajita booga

²⁶ “Nea aba eaweeda heasa booga madeeda, damanda jea oatawana NG'UTAMIIDA haleanjeeda ghadooweeda was booga madeeda aba jeeda ghweelmajeegeagwa bea wiikajeega, gajea baditeaba geat ghaydidi; majasna gadiyeeda wassean oosinayi,

²⁷ asi oatayda haleanjeeda ghadooweeda sighwarda, ghoah shearooda ng'andit aba heeda NG'UTAMIIDA; heewsu manang'i iyeenya, ea lagweenjeanjagi, ea dayi ispwa bea gisilga was lagweendiga bea gwanyagi;

²⁸ ea haleanjeadaanyi bea ghadooweeda was booga was dearanga miyaasiin siikuuyi nagheeda, was gideaba damanamughuushcheew samwagu bea gilo aba giliwas heeyda gideaba damanamughuushcheew iyeenya aba lagweenjeanjagi,

²⁹ gideaba damanamughuush aba giliwas aba giliwas dayeenda gisilleanda, was dayeegiga asispwa bea gisilgean;

³⁰ ea ghwaranyagi, ak geesina giiduupcheeda aba badahuukeagwa.

³¹ Ak gajeatayda sea haleanjeeda ghadooweeda bea galeagasean, ea haleanjeadaanyi bea ghadooweeda was booga, gajoatayda haleanjeeni sea haleanjeeda nyaawa bea ghadooweeda sileeha. Asi sikteawana adagwandeawa sirjeeda.