IITOODA 27 - Bibliyeeda Ghaydit

Haweega Selofehadi

¹ Aba damandida ghwahidu eara haweega Selofehadi, madeeda Musa was orjeeda Heferi, orjeeda Gileyadi, orjeeda Makiri, orjeeda Manase bea dooshta Manase was orjeeda Yosefu; nea gheawungeaba haweesu bea Selofehadiin ea suh; Mala, ea Noa, ea Hogla, ea Milka, ea Dirsa.

² Hean ghamiinaada aba madeeda Musa, ea madeeda Eliyasari was ashoohoocheanda, ea madeeda fuga hees, ea girgweageeda sean, aba ghuuta maheemajeanda siroondooscheesa, ak gwayeesha,

³ “Bwaabwa gameewsa dareapcheeda nea maba jeeda girgweageedeaba fugiga bwatgeat nea ghaheawa NG'UTAMIIDA aba girgweageeda Gorahiin; ak gameewsa jeeda riing'eagaaschi niny; nea abeeda niny ea mandeawana diibiga was baloojiga.

⁴ Abeeda ghwasaan inyas geegeanda gheawunga bwaabwa aba jeeda fugeaba gheanyi aba gideaba mandeawana diibiga was baloojiga? Gooneasa aseasa hearaniischooda sea orjooga gheamba bwaabwa.”

⁵ Ng'ata gweadu Musa ng'asheanda nyaawa madeeda NG'UTAMIIDA.

⁶ Hean goobalool NG'UTAMIIDA Musa, ak gwayeesha,

⁷ “Haweega Selofehadi gwarugu ng'asheega doabiiw; gajadawa heechea gwahearan sea orjooga gheamba ghweaniga nyaawa; ak gajadawa saawa gichea gwahearan bea ghweanda nyaawa.

⁸ Ak gajabaloola fuga Israeli, ak giyeeshi, ‘Siida iimea, nea mandeawana baleanda, abeeda gajadawa hudaanyi gwahearan haleanjeadaanyi.

⁹ Ama deepa ea mandeawana huda, gayghoadaw orjooga gheanyaawa gwahearan haleanjeadaanyi.

¹⁰ Ama mandeawana orjooga gheanyaawa, gajoatawa orjooga gheamba ghwaan gwahearan haleanjeadaanyi.

¹¹ Nea ghwaan iideepa ea mandeawana orjooga ghwaan, gajadawa siida neeki aba jeeda fuga gheanyaawa gwahearan haleanjeadaanyi, ak gayghoah gaaschi; ak ng'asheanji gayghoah diigheanda ea girgweageeda aba heeda fuga Israeli, aba gidarukusiinda NG'UTAMIIDA Musa.’”

Yoshuwa gealoat gawa hoorgeeda Musa

¹² Ghwalamda NG'UTAMIIDA ak gwayeesha Musa, “Ding'da ang'iing'i uhuudeaba giijeeni bea Abarimuun, ak ging'ulayi ng'eanyiida aadawji fuga Israeli.

¹³ Amang'ata nea nidaahi, abeeda eara ang'iing'i gajeanung' meawa mideawana ghweanigaagu, uurjeewana orjeeda geamadu was Haruni meawa, gawuurji gidameawda Haruni,

¹⁴ aba gideaba ghoaheawi ng'asheandeanyu aba dareapcheeda Sini damanda aniiksiinanean eemeeda, nea moawali gheang'deanyu aba ghuuta beega aba madeeda gheanyanga nyaawa.” (Suh beega Meriba gil mida Gadeshi mida dareapcheeda Sini.)

¹⁵ Hean goobalool Musa NG'UTAMIIDA nea gwayeesha,

¹⁶ “Gidabal NG'UTAMIIDA, was ASEETA gurooruunatka haleanjeeda sean mideawa sasanuuka, ea dayiina siida jea ghoahaaghwa eemeeda,

¹⁷ was dea jea gwarita goosheedeawa saawa, nea ghoadoabiiw saawa; ak ghoadoabiiw damanda riteawa, nea ghoaghuumu ghoah; ak ea mawuurji fuga girgweageeda NG'UTAMIIDA gisilga nyeah jeagiischoochean.”

¹⁸ Gwayeesha NG'UTAMIIDA Musa, “Geani Yoshuwa orjeeda Nuni, was siida mideawa guroorooda, ak giyiini geatindaang'u uhuudaanyi;

¹⁹ ak giyaadi madeeda Eliyasari was ashoohoocheanda, ea madeeda girgweageeda sean; ak girukusi ng'asheega aba madeeda gheanyanga nyaawa.

²⁰ Ak giidawi gheambalmeadaang'u meatkweenagi ak abeeda gwasissa mureeda eemeeda sean bea Israeli.

²¹ Ak gayghamiinaada aba madeeda Eliyasari was ashoohoocheanda, ak gaygwarukusa niny gideagasayi nea gwarukusiina Urimu ea Dumimu aba madeeda NG'UTAMIIDA; ak aba ng'asheandaanyi gaygwarita, nea aba ng'asheandaanyi gayghapka ghoah; niny sea fuga sean bea Israeli, sea girgweageeda sean.”

²² Ng'ata gwasinda Musa gidarukusiinda NG'UTAMIIDA; ak gageanu Yoshuwa, ak ghwayiin madeeda Eleyasareeda was ashoohoocheanda, ea madeeda girgweageeda sean;

²³ ng'ata ghwayiin geatingaaschi uhuudaanyi, ak gwarukusa ng'asheega, gawuurji gidarukuteayda NG'UTAMIIDA aba ghuuta Musa.