IITOODA 25 - Bibliyeeda Ghaydit

Fuga Israeli aba Beori

¹ Muchu goobiida Israeli ng'eanyiida Shitimu, ak ghoang'eat buuneeda hiseadayeanduumeeda sea gadeemga Moabu;

² aba gideaba gaguursa gadeemga buuneeda ghapka lukghumajeega aseecheeka nyaawa, ak ghwaak buuneeda hamita ak gwatkuy ghabwat aseecheeka nyaawa.

³ Hean ghoang'waay geat Israeli sea Baal-beori. Ak ghwayeat nyarasta NG'UTAMIIDA aba badayda Israeli;

⁴ ak ghwalamda NG'UTAMIIDA ak gwayeesha Musa, “Geanda fuga hees sean aba jeeda buuneeda, ak girati fiisu aba jeeda daknooda aba madeeda NG'UTAMIIDA, ak abeeda goosha nyarasta ng'waan bea NG'UTAMIIDA aba badayda Israeli.”

⁵ Gwayeesha Musa fuga laja girgweaguutka bea Israeli, “Daba siisi nuus fugaaschi ang'waay geat sea Baal-beori.”

⁶ Deagheata ging'ulayi, ghwahidu siyagi bea jeeda fuga Israeli nea gweasa orjooga ghaamwat, gatmooda eemeeda Midiyani aba madeeda gheanyanga Musa ea aba madeeda gheanyanga fuga bwatgeat sean bea Israeli, nea gooyeawda aba ghuuta maheemajeanda siroondooscheesa.

⁷ Hean nea ghwadaah ng'asheanji Finehasi was orjeeda Eliyasari, orjeeda Haruni was ashoohoocheanda, ghang'eat ak ghwanung'wa heeda fuga bwatgeat, ak ghoang'waay ng'uta aba geatindaanyi

⁸ ak gamaseaw siidida bea Israeliin ak gawa jeeda maheemajeanda nea ghwaat geeshta, ak ghang'ut jeesinga iyeenyeeda nyaawa aba ng'utaanyi, ng'eedeedida bea Israeliin ea gatmoodida. Ak ghwashiy bayiiga jea eabwar fuga Israeli.

⁹ Nea fugiga meewa aba dawniin buuneeda ea sagalamnyooji diktam ea ang'wan.

¹⁰ Ng'ata goobalool NG'UTAMIIDA Musa, ak gwayeesha,

¹¹ “Finehasi orjeeda Eliyasari, was orjeeda Haruni was ashoohoocheanda, niyam nyarasteanyu aba badayda fuga Israeli, aba gideaba gwanda lachng'eanyiida jeenyaawa was lachng'eanyiideanyu aniini, ak ea mutalas uhuuda fuga Israeli aba lachng'eanyiideanyu.

¹² Hean gwayi, ‘Ng'ula, aniini ghaadawji niny neajeedeanyu bea hoyyoo;

¹³ nea headaanyi niny, ea jeataanyi iing'ata niny, gayghoah neajeeda ashoohoocheanduumeeda damanda manda muudeanooda; aba gideaba gwandeawa lachng'eanyiida aba badayda ASEATAANYI, ak gwasin giirooroocheeda aba badahuuka fuga Israeli’.”

¹⁴ Nea gheawungeaba siidida bea Israeli sibaruuday sea gatmooda Midiyani, geeguura Simri, was orjeeda Salu, was siida haw aba gheanyaawa, bea eemeeda Simeoni.

¹⁵ Nea gheawungeaba gatmoodida sibwar bea eemeeda Midiyaniin geeguura Gosbi, hudeaba Suri; nea abeeda niny ea haweewa fuga gheanyaawa aba Midiyani.

¹⁶ Ng'ata goobalool NG'UTAMIIDA Musa ak gwayeesha,

¹⁷ “Adeawiida fuga Midiyani, ak gibwari;

¹⁸ aba gideaba niineayaneegwa agooga aba milmilanyeeka nyaawa, ak aba seareani gwareenganeegwa agooga aba badaydeaba ng'asheanda Beori, ea aba badaydeaba ng'asheanji bea Gosbiin, was huda siida haw bea Midiyani, was huda gheamateaba siidida sibwar eaweeda hina geeyooda muy aba badayda Beori.”