IITOODA 24 - Bibliyeeda Ghaydit

¹ Iidu nea ghwadaah Balaamu gideaba ghabwariiy NG'UTAMIIDA ghoadaw Israeli ghawooda, ea mawa, gawuurji gideaba eawoojisu, ghabwar lagheanga, ghwayam geaw ak googeal gheanyangaaschi dareapcheeda.

² Ng'ata gagatkat Balaamu gheanyangaaschi ak ghwadaah fuga Israeli, nea gabeeliisiinyi dooshinga; ak ghwahidu guroorooda ASEETA headaanyi.

³ Ak ghang'at ghwasiildeangaaschi nea gwayi, “Gwayi Balaamu was orjeeda Beori, Ghuuteaba siidida sijaat gheanyangean;

⁴ Gwayi, siida iiy ng'asheega ASEETA, siida daah gidahiimsa ASEETA hoauur, siida duguy ak ea meedukuta gheanyanga;

⁵ maheemajeagaagu aamiyaastaan Ea Yakobo, heeda ootuwiisi, Ea Israeli!

⁶ Gawuurji moangoachihajeega siitoabiiw ea gwasheagiidi, gawuurji boostaanajeega mida ghuuta ghealooda, gawuurji gadaroonga ng'aapta NG'UTAMIIDA, gawuurji geediga gubooyeeka mida ghuuta beega.

⁷ Gayghwanyiit ghadeatkaaschi beega ea gagulda, nea histeangaaschi gaygwanda jeeda beega saang'a, ak sugoocheandaanyi gajeahaweewa Agagi, nea sugoocheanduumeadaanyi gajeakghaambiit.

⁸ ASEETA niyeadu aba ng'eanyiida Misri; ak gwandeawa uurda sigala uurda muweasta; gayghwanukghuta eemoojiga was weajoodigaaschi, gaygwahirjeaweada geaka nyaawa ea ghoah basanga, ak gaygang'uda aba geatkaaschi.

⁹ Ghwahiiy geaw, ak gwalil gawuurji ng'adiida, ak gawuurji soorearda; gayghwasat ng'eaha ak ghang'eat? Ak ea deatawa ghawooda dea wassean goonyi ghawooda, ak ea deamwaashta dea wassean mwaashtaneey.”

¹⁰ Hean ghwayeat nyarasta Balaki aba badayda Balaamu ak ghabwar geadi, ghwalamda Balaki ak gwayeesha Balaamu, “Geaguurneey mooshteaynean weajoodigeasu, ak ging'ulayi, ak ghamneawa ea niidawi ghawooda muuchi niba samwagu.

¹¹ Asi ghamneawa ng'eada mang'awa una ghoah; aba gideaba ‘geagasayi dagoonyi gida,’ ak ging'ulayi niheawa NG'UTAMIIDA goonda.”

¹² Gwayeesha Balaamu Balaki, “Neada ea miidarukusa fugaagu iijeagu gideaba,

¹³ ‘Eara gwachi gagoonan Balaki gheanyi nea ghwanyiit lapiya ea dahaabu, maydasuut moonghooda ng'asheanda NG'UTAMIIDA, ak geasinyi ng'asheanda miy, ghana ng'asheanda muy, aba gideagasiidi aniini; gichea gwarugu NG'UTAMIIDA gichea dargu aniini’.

Balaamu ghwaramoar dea huuydean

¹⁴ Asi ghamneawa, ng'ula, aniini geawi heeda buuneedeanyu; asaha, gaydagu iita ng'asheega jea gwasima fiisu fugaagu eaweeda huuydean.”

¹⁵ Ak ghang'at ghwasiildeangaaschi ak gwayi, “Balaamu orjeeda Beori gwayi, Gwayi siidida sijaat gheanyangean,

¹⁶ Gwayi, siida iiy ng'asheega ASEETA, ak ghwanal fughareeda leabu dea Haw mida Humng'eeda, was dea deaha gidahiimu ASEETA Hoauur, ak gwatkuy, nea gheanyangaaschi ghoang'wearu;

¹⁷ Geang'ulayi niny, ak ea mii ghamneawa; geang'ulayi niny, ak ea mii neeki, gaygwarina miing'weanda jeeda Yakobo, nea bileangida gheambalmeeda gaygwarina Israeli; ak gaygwahirjeaweada gujaka Moabu, ak gwahirjeaweada orjooga sean bea Seti.

¹⁸ Ak gaygoombal Edomu, ak eara Seyiri gaygoombal, was weajoodigaaschi, gajeareat ng'eanyiida nyaawa ghoah daanyi, nea gwasina Israeli ng'asheega aba meaynata.

¹⁹ Siida jea goombaliischi gaygwaleabu Yakobo, ak gayghwalas uhuuda boosteanga mujiinajeega!”

²⁰ Ng'ata gaygang'ula fuga Amaleki, ak gwarugu ghwasiildeang'su, nea gwayi, “Amaleki eemeeda mideawa uurda aba jeeda eemoojiga; nea aba huuydeanda gaygoosha.”

²¹ Ng'ata gang'ula siida Geni, ak ghoang'eat ghwasiildeangaaschi, nea gwayi, “Hoorgeeda giibindaang'u gwandeawa uurda, nea ghooriidaang'u ea siyiin jeeda lagheaneeda;

²² iidu Geni gajealas uhuuda. Gayghwaadeagwa fuga Ashuru ahuwa soomjooga ea ghoah eeju?”

²³ Ak ghang'at ghwasiildeangaaschi ak gwayi, “Ashageada, gayghaghu ng'eaha isin ASEETA ng'asheesu?

²⁴ Ak iidu gayghapka maleambajeega jea gwaleabu Gitimu ak gaygoodeawiit Ashuru sea Eberi; ak eara ada gayghwanyas sawanadeeda.”

²⁵ Hean ghang'eat Balaamu, ak gabiikta ghoah; ak eara Balaki gawa heechea gawa.