IITOODA 23 - Bibliyeeda Ghaydit

¹ Gwayeesha Balaamu Balaki, “Sinnean aba hiji heeda wagiida ea ghwahita ispwa, ak giyeanean heew ispwa ea lagweendi ispwa.”

² Hean gwasinda Balaki gidarukusiinda Balaamu. Ak ghoadayda Balaki ea Balaamu haleanjeeda ghadooweeda, danyagi was heeyda ea lagweenjeanjagi aba uhuumba hiji was heeda wagiida.

³ Ak gwayeesha Balaamu Balaki, “Miinaada aba murdeeda haleanjeadaang'u bea ghadooweeda, ak gaydawa, gwadeepa ghwaan NG'UTAMIIDA daroonyi; ak abeeda gidahiimnaan gaydarukuneey.” Ak gawa ea ghwahita heeda miy ghaang' aba uhuuda heayeeda.

⁴ Ak gwaroonyi ASEETA sea Balaamu; ak ghwalamda Balaamu ak gwayeesha, “Neasinyi heeda wagiida ispwa ak ea naadaydi haleanjeeda ghadooweeda danyagi was heeyda ea lagweenjeanjagi aba uhuumba hijiwas heeda wagiida.”

⁵ Hean ghwayiin NG'UTAMIIDA ng'asheanda ghuuta Balaamu, ak gwayeesha, “Biiksiina Balaki; ak girukusi ng'asheesu.”

⁶ Ng'ata gabiikta gheanyi, ak ging'ulayi, ghamiinaada aba murdeeda haleanjeadaanyi bea ghadooweeda sighwarda, niny sea fuga hees sean bea Moabu.

⁷ Ak ghang'eat ghwasiildeangaaschi, nea gwayi, “Balaki gweananean Aramu, sugoocheanda Moabu aba giijeega ghayeawa, ‘Beeni, mooshteaynean Yakobo, ak gibeenu, nyareeksiina Israeli!’

⁸ Gaydamwaashtaaydaan siida mii ghamwaashta ASEETA? Gaydanyareeksiindaan siida mii gwanyareeksa NG'UTAMIIDA?

⁹ Damanda eandeewi iheenga giijeega ghaadaayi niny, ak aba iheenga heayeeniga geang'ulayi niny; ng'ula, suh fuga mideaydooschi geadi, ak ea majeeyiiduudayi sea fuga eemoojiga!

¹⁰ Gayghoamu ng'eaha ghwanal mooneeda birjeanda Yakobo, ghana gwayiida guroorooda Israeli? Gagasa dami miyeeda siida doabiiwaat, ak gawuurji muudeanoodeanyu eegala sea muudeanoadaanyi.”

¹¹ Gwayeesha Balaki Balaamu, “Ang'iing'i nisinnean naaha? Geayeaneey mwaashta weajoodigeasu, ak ging'ulayi, niidawi ghawooda huumwa.”

¹² Ghwasha niny ak gwayeesha, “Heapi mamiisean dang'ula, ak gearukuti ng'asheandida iin NG'UTAMIIDA ghuuteanyuuni?”

Balaamu ghwaramoar deabiyeenya

¹³ Ghwalamda Balaki ak gwayeesha, “Asaha, geamuscheey beeni, ea eahita hich nuut, ak aba hoowa gajamuusa daaha; gaydaaha meatkweeda nyaawa washiini itaanyaawa ak ghwahit, ak ea mwaydaaha sean, ak gimooshteaynean suh aba hoowa.”

¹⁴ Ak ghwaat ea ghwahita madamnyeanda Sofimu, ea ghwahita gilingiljeanda Bisga, ak gwasin heeda wagiida ea ghwahita ispwa, ak ghoadayda haleanjeeda ghadooweeda danyagi was heeyda ea lagweenjeanjagi aba hiji was heeda wagiida.

¹⁵ Ghwalamda ak gwayeesha Balaki, “Miinaada aba hiji neekeewa haleanjeadaang'u bea ghadooweeda jea eaghwardaan, ak gaydaroonyi aniini NG'UTAMIIDA aba hoowa.”

¹⁶ Hean gwaroonyi NG'UTAMIIDA sea Balaamu ak ghwayiin ng'asheanda ghuutaanyi, ak gwayeesha, “Biiksiina Balaki ak giyeeshi.”

¹⁷ Ng'ata ghwahita headaanyi, ak ging'ulayi, ghamiinaada aba murdeeda haleanjeadaanyi bea ghadooweeda jea eaghwarda, nea gwandeawa fuga hees bea Moabu. Gwayeesha Balaki, “Gwayiin NG'UTAMIIDA?”

¹⁸ Hean ghang'at ghwasiildeangaaschi nea gwayi, “Ng'eada Balaki, ak giileaydiit; aleeysean iit, Ea orjeeda Sipori;

¹⁹ ASEETA mii siida gil, ea gwarugu ng'uyeega; ak ea mii siida gil, ea gagiisan; Neada iinirgu ng'asheanda, ea maygwasin? Ama nirugu, ea mayghoahiidi?

²⁰ Ng'ula, sigoonan diigheanda jea daadaydaawa ghawooda, niny niidayda ghawooda, ak ea mwaamuusi deadeelu.

²¹ Niny mang'ula ng'asheega munyas bea Yakobo, ghana ghwadaah daghoosta aba Israeli. NG'UTAMIIDA was ASEATAANYI, gwandeayi sea niny, nea nyeashta haw bea sugoocheanda gwanda bugusta nyaawa.

²² Ak ea niyeana ASEETA saawa ng'eanyiida Misri, ak gwandeawa uurda uurji dea muweasta.

²³ Aba huumwa manda geedi ghana beeneediga, ghana ng'uta aba badayda fuga Israeli. Asi ghamneawa iita Yakobo ea Israeli gajeergu, ‘Ng'ula, gidanisin ASEETA!’

²⁴ Ang'ula, fiisu ghabeada ng'adiida was soorearda, ak gawuurji ng'adiida ng'eat, maygwalil ea eaghus ghwaak diyeayda, nea ghwali foojeanda diyeanga ang'waay.”

²⁵ Gwayeesha Balaki Balaamu, “Asi adumwaashti muuchi, ak ea adiidawi ghawooda muuchi.”

²⁶ Hean ghwalamda Balaamu ak ghwasha ak gwayeesha Balaki, “Neada ea mii dayeeshiineey gideaba ‘Gilinyoo ea ng'asheanda jea gwarugu NG'UTAMIIDA gaydasin’?”

Balaamu ghwaramoar deaba samwagu

²⁷ Ng'ata gwayeesha Balaki Balaamu, “Asi, beeni ghamneawa daanyi hich nuut; gwadeepa ghamwas ASEETA gideaba gaymooshteaynean fiisu aba hoowa.”

²⁸ Hean ghwaat Balaki Balaamu ea ghwahita uhuuda giijeeda Beori, was heeteaschi dareapcheeda.

²⁹ Gwayeesha Balaamu Balaki, “Asi, sinnean heeda wagiida ea ghwahita ispwa, amang'ata gooyeanean duuh ispwa was heewga, ea lagweendi ispwa.”

³⁰ Hean gwasinda Balaki gidarukusiinda Balaamu, ak gweadu haleanjeeda ghadooweeda ak gaba heewi iin hiji was heeda wagiida ea lagweenjeanjagi iin hiji was heeda wagiida.