IITOODA 22 - Bibliyeeda Ghaydit

Sugoocheanda Moabu gaguursa Balaamu

¹ Muchu gaweay fuga Israeli, ak gooduuw aba ng'eanyiida moohajeega Moabu giigheawda niirja bea eenda Yordani deaschi sea Yeriko.

² Ak ghwadaah Balaki was orjeeda Sipori ng'asheega sean sima fuga Israeli fuga Amori.

³ Hean ghoawal muuchi fuga Moabu fugiga, aba gideaba aasaang'a; ak ghabeal fuga Moabu aba badayda fuga Israeli.

⁴ Ak gwayeesha fuga Moabu gweargwa Midiyani, “Eemeeni deenuun gaygwaduulu haleanjeeda sean neaweeseasa, gaygawuurji gida akiida deeda nyeega madamnyeanda.” Nea Balaki orjeeda Sipori, ea sugoocheanda Moabu gil aba damandida.

⁵ Hean goojeakta buuneeda heeda Balaamu orjeeda Beori, mida Betori, mida ghuuta Eenda, aba ng'eanyiida Amawi ak gaguursa nea gwayeesha, “Ng'ula gwanda fuga leabu ng'eanyiida Misri; ak gwadukuta badayda ng'eanyiida, ak ea sukwa geefursiinyi.

⁶ Asi beeni ang'iing'i, mooshteaynean fiisu, aba gideaba gaburdeawean uurda muuchi; gwadeepa abeeda dajoar saawa ak ghaahoani jeeda ng'eanyiida; aba gideaba aniini ghaanali siida iidawi ghawooda, siitaw ghawooda, nea siida iimwaashti ea simwaashta.”

⁷ Gaweay gweargwa Moabu, ea gweargwa Midiyani, nea ghwaat gidageatinda nyaawa bea meang'nyeanduumeeda aba geatinga nyaawa; ak ghwahita heeda Balaamu, ak gwarukusa ng'asheega Balaki.

⁸ Ak gwayeesha, “Oopiidana hiji eaweani, ak gaydeaneegwa ng'asheanda, jea gwarukunean NG'UTAMIIDA;” ak goobiitpiit fuga hees bea Moabu sea Balaamu.

⁹ Muchu ghwahidu ASEETA heeda Balaamu ak gwayeesha, “Fiisu indeawiin akeega?”

¹⁰ Gwayeesha Balaamu ASEETA, “Aniini goojeaknean Balaki was orjeeda Sipori, was sugoocheanda Moabu, nea gwayeeshean,

¹¹ ‘Ng'ula, gwanda fuga leabu ng'eanyiida Misri, ak ea nidukuta ng'eanyiida; asi beeni mooshteaynean fiisu; gwadeepa daamu dang'uchi saawa, ak ghaahoanyi.’”

¹² Ghwalamda ASEETA ak gwayeesha Balaamu, “Adiideayeewi; ak ea adumwaashti fiisu, aba gideaba siitaw ghawooda.”

¹³ Hean ghang'eat Balaamu sakteayda ak gwayeesha fuga hees bea Balaki, “Aweayeena abiikta ng'eanyiideang'wa; aba gideaba ghaheawa NG'UTAMIIDA gideaba gajeeteayeena sea agooga.”

¹⁴ Ng'ata gaweay fuga hees heeda Balaki, ak gwayeesha, “Balaamu ghaheawa gideaba gajeeteanana.”

¹⁵ Gabiikta Balaki goojeakta buuneeda deaba iyeenya, burdeawa gea gwachi bea madeeda, biissa ea hees ea ghang'al gea gwachi bea madeeda.

¹⁶ Ghwahita heeda Balaamu, ak gwayeesha, “Gwayi Balaki was orjeeda Sipori, ‘Geamuscheey adaghoadealnyi ng'asheanda wassean ak ea mihini heedeanyu;

¹⁷ aba gideaba gaydasineey mureeda muuchi, nea ng'asheanda wassean iimuschean gaydasin; asi geamuscheey beeni, mooshteaynean fiisu’.”

¹⁸ Ng'ata ghwasha Balaamu ak gwayeesha fuga gadiyeeda Balaki, “Eara gwachi Balaki gagoonan gheanyi nyiit lapiya ea dahaabu, ea maydasuut moonghooda ng'asheanda NG'UTAMIIDA, was ASEETEANYU, ak ghaasuunyi ghana daahaat.

¹⁹ Asi ghamneawa geamuscheegwa, oopiidana hiji jeedeaba eaweani, ak abeeda ghaanali gichea gwarukunean NG'UTAMIIDA gicha.”

²⁰ Ng'ata ghwahidu ASEETA heeda Balaamu eawa, ak gwayeesha, “Asi iinukwa nupka fiisu gaguurneey, asi adeayeewana; nea ng'asheandida jea darukuneeyiin abeeda ea gichea sina.”

²¹ Muchu ghang'eat Balaamu sakteayda ak gwading'da digeadaanyi, ak goodeayi sea fuga hees bea Moabu.

Balaamu ea digeadaanyi

²² Ak ghwayeat nyarasta ASEETA aba gideaba gawa; ak ghamiinaada malaykajeanda NG'UTAMIIDA aba naweeda, nea gagasa ghwalas. Nea abeeda ea niding'da digeadaanyi, sea fih iyeenya ikaaschi bea gadiyeeda.

²³ Ak ghwadaah digeedida malaykajeanda NG'UTAMIIDA nea ghamiinaada aba naweeda, nea gwanda geatindaanyi ng'utaanyi, nea nifagu; ak ghwasajaadawa digeeda gwanung'usa heeda naweeda, ak gawa gwasik jeesinga madameega. Hean ghwalas Balaamu digeeda nea gagasa goodeelsa naweeda.

²⁴ Ak ghamiinaada malaykajeanda NG'UTAMIIDA aba heeda naweeda mwanang', mida dageascheeda madameega sabiibu, nea meadajeega duwaawi gwanda ghamarda.

²⁵ Hean nea ghwadaah digeeda malaykajeanda NG'UTAMIIDA, goosiipsa ghamarda, ak gwadiing'sa geeshta Balaamu ghamarda; ak gabiikta ghwalas deaba iyeenya.

²⁶ Ng'ata goosiipta malaykajeanda NG'UTAMIIDA ak gawa mwadi, ak ghamiinaada aba heeda mwariis muuchi, manda gichea yamsiinda geaw geatinda dugwa ghana geatinda ghaadaam.

²⁷ Ak ghwadaah digeeda malaykajeanda NG'UTAMIIDA, ghabwada jih ng'eanyi aba hing'eadayda Balaamu; ak ghwanyareas Balaamu, ak ghwalas digeeda aba orjeadaanyi.

²⁸ Hean ghwajaat NG'UTAMIIDA ghuuteaba digeedida, ak gwayeesha Balaamu, “Neada ea neahindaneayiin, inyas gilaschaan niba samwaguun?”

²⁹ Gwayeesha Balaamu digeeda, “Aba gideaba gifoolean; ama inyeeda gwachi gwanda geatindeanyu ng'uta, gwachi gaydabwarnyi meawa.”

³⁰ Gwayeesha digeeda Balaamu, “Neada aniini ea meawoosi digeadaang'u, ak ea measareeneey aba eaweagaagu sean ea ghoah ghamneawa? Neada ghoang'wa dasimaneey ng'asheanda sunu?” Ak gwayeesha, “Manda.”

³¹ Hean ghwajaat NG'UTAMIIDA gheanyanga Balaamu, ak ghwadaah malaykajeanda NG'UTAMIIDA nea ghamiinaada aba naweeda, nea gwanda geatindaanyi ng'uta, nea nifagu; ak gabuy uhuuda, hean gwajaksa geaw ng'eanyi ak ghabwada jih ng'eanyi.

³² Ghwalamda malaykajeanda NG'UTAMIIDA ak gwayeesha, “Ghwasaan inyas gilas digeadaang'u ea ghwahita samwagu? Ng'ula, aniini ghaawunyi dalasnyi, aba gideaba naweadaang'u nimunyiit aba madeedeanyu;

³³ ak ghwadaahan digeeda, ak ghwasajaada aba madeedeanyu niba samwagu; gwachi inyeeda ea mwasajaadawanaan aniini, gwachi gaydabwarnyi ang'iing'i, ak ghaanung'waadi niny nea majeek.”

³⁴ Gwayeesha Balaamu malaykajeanda NG'UTAMIIDA, “Neasinyi riing'eeda; aba gideaba mwaanali gideaba ang'iing'i gimiinaadi aba naweeda nea gigasayi bwaraan; asi ghamneawa, iininyareasi, gaydabiikta gicha heeda ealeabu.”

³⁵ Ghwalamda malaykajeanda NG'UTAMIIDA ak gwayeesha Balaamu, “Adeayeewana fiisu, ak abeeda ng'asheanda jea darukuneey ea dea jea rukusiina.” Hean goodeayi Balaamu sea fuga hees bea Balaki.

Balaki ghwadeapta Balaamu

³⁶ Hean nea ghwayiiy Balaki gideaba nihidu Balaamu, gwarita ak gawa roonyeeda, ea ghwahita mujiineeda Amoni, mida moonghooda Arnoni, duukusiinyi sea muudeanooda moonghooda.

³⁷ Gwayeesha Balaki Balaamu, “Neada aniini ea miideajeagu buuneeda muuchi ghapka gaguurneey? Ghwasaan inyas muuwuuni heedeanyu? Neada aniini ea mwaamuusi dasineey mureeda hawi?”

³⁸ Gwayeesha Balaamu Balaki, “Ng'ula naawunyi dargu ng'asheanda wasean? Ng'asheanda jea ghwayiin ASEETA ghuuteanyu, dea jea dargu.”

³⁹ Goodeay Balaamu sea Balaki ea ghwahita Giriat-husoti.

⁴⁰ Ak gwanuus Balaki deeda, ea gisilleanda, ak gweasa Balaamu sea fugiga hees mideawean.

Balaamu ghwaramoar gidamadeeda

⁴¹ Iimuchu sakteayda ghwaat Balaki Balaamu, ak ghwascheang'da ea ghwahita uhuuda Bamot-baali, was heeda ammu Balaamu ghwadaah meatkweenagi bea fuga Israeli.